64 yachachiy

Salomón Diospa wasinta ruwan

DAVID manaraq wañuchkaspa, Salomonman Diospa wasinta ruwananpaq tukuy imata qurqa. Salomón tawa watataña kamachichkaspa, Diospa wasinta ruwayta qallarirqa. Qanchis wata khuskanniyuqpi ruwayta tukucharqa. Chay wasi ruwaypi may chhika runa llamkʼarqa, kay wasiqa may valesqa, achkha quriwan, phatawan ima ruwakurqa.

Chay wasiqa iskay cuartosniyuq, tantakunapaq toldopijina, chay cuartosqa aswan jatuchaq cuartos kanku. Salomonqa, ukhu cuartoman Diospa trato ruwasqan arcata churachin, tantakunapaq toldomanta wak imasnintataq juknin cuartoman churachin.

Diospa wasinta tukuytawan, juk jatun raymita ruwanku. Rikunkijina, Salomón Diospa wasin ñawpaqinpi qunqurikuspa, mañakuchkan: ‘Mana janaqpachapis wakisqachu qampaqqa. ¿imaynatá wakisunqa kay ruwasqa wasiri? Chaywanpis, Jehová Diosniy, kay llaqtaykita wasiykiman mañakuq jamuptinku uyarillay ari’, nispa.

Salomón mañakuyta tukuchkaptin, janaqpachamanta nina lawray uraykamun, jaywasqa uywakunatataq qʼulachin. Jehová kʼanchayninwantaq wasinman juntʼaykun. Dios kay imasta ruwaspaqa, kay wasimanta kusikusqanta, Salomonta uyarisqanta ima rikuchirqa. Kunanqa tukuypis, kay wasiman Diosta yupaychaq jamunanku tiyan, manaña tantakuna toldomanchu.

Salomonqa yachaywan may unayta runata kamachirqa, runataq kusikurqa. Chaywanpis Salomonqa, wak llaqtasmanta warmiswan, mana Jehovata yupaychaqkunawan casarakurqa. ¿Juk warminta lantita yupaychaqta rikunkichu? Chay warmikunaqa Salomontapis lantikunata yupaychachinku. ¿Imayna runamantaq Salomón tukurqa? Salomón saqraman tukurqa, llaqtataq manaña kusikurqachu.

Chayrayku, Jehová Salomonwan phiñakuspa nirqa: ‘Manaña aylluyki kamachinqachu, wak reyta churasaq. Wañupuptiyki churiyki kamachichkaptin chayta ruwasaq. Chaywanpis, churiykimanta, mana tukuy llaqtatachu qhichusaq’, nispa. Imachus kasqanta qhawarina.

1 Crónicas 28:9-21; 29:1-9; 1 Reyes 5:1-18; 2 Crónicas 6:12-42; 7:1-5; 1 Reyes 11:9-13.