82 yachachiy

Mardoqueowan Esterwan

MANARAQ Esdras Jerusalenman richkaptin, Mardoqueo Esterwan Persia llaqtapi jatun runaman tukurqanku. Esterqa reina karqa, primuntaq reymanta qhipanpi kamachiq karqa. Qhawarina imaynatachus chayman chayarqanku.

Ester wawallaraq kachkaptin tatasnin wañupurqanku, Mardoqueotaq payta uywarqa. Persiamanta rey Asueroqa, Susapi jatun wasiyuq karqa, Mardoqueotaq paypa kamachin karqa. Juk pʼunchay reypa warmin, Vasti, mana qusanta kasukurqachu, chayrayku reyqa wak warmita reina kananpaq akllarqa. ¿Yachankichu pitachus akllarqa? Payqa, kʼachita warmi Esterta akllakurqa.

¿Dibujopi pimanchus runa kʼumuykukuchkasqanta rikunkichu? Payqa Aman sutikun, Persiapi may atiyniyuq runa karqa. Payqa Mardoqueopis kʼumuykukunanta munarqa. Mardoqueotaq mana kʼumuykukuqchu, paypaqqa mana allinchu chay saqra runaman kʼumuykukuy. Chayrayku Aman phiñakurqa. Qhawarina imatachus ruwasqanta.

Amanqa llullakuspa jinata reyman nirqa: ‘Israelitasqa mana allin runaschu kanku, nitaq kamachisqaykitapis kasukunkuchu. Paykunaqa wañunanku tiyan’, nispa. Asueroqa mana yacharqachu warmin israelita kasqanta. Chayrayku Amanta kasuspa tukuy israelitasta wanuchinapaq kamachirqa.

Mardoqueo chayta uyariytawan mayta llakikurqa. Esterman jinata willachirqa: ‘Reywan parlariy, salvanawanchikta mañarikuy’, nispa. Chaywanpis, Persiapi juk ley karqa, reywan mana waqyachikuspalla reypa ñawpaqinman yaykuqqa wañunan karqa. Jinapis, Esterqa mana waqyachikuspalla reypaman yaykurqa. Reyqa qurimanta tuqnunta uqharirqa, mana Esterta wañuchinankupaq. Esterqa, reyta Amantawan mikhunankupaq waqyarirqa. Mikhunapiqa rey Esterta tapurqa, ¿imatataq qampaq ruwapusqayki?, nispa. Estertaq kutichirqa, ‘qʼaya Amanwan watiqmanta mikhuq jamuptiyki, nisqayki’, nispa.

Qʼayantintaq Ester reyman nirqa: ‘Llaqtayta wañuchinqanku, ñuqatapis’, nispa. Reytaq phiñakuspa: ‘¿Pitaq chayta ruwanqari?’, nispa tapurqa.

‘¡Chay saqra sunqu runaqa kay Amán!’, nispa Ester kutichirqa.

Reyqa mayta phiñakuspa, Amanta wañuchinankuta kamachirqa. Mardoqueotataq Amanjina kamachinanpaq churarqa. Chaymanta Mardoqueoqa juk musuq leyta ruwarqa, israelitas mana wañunankupaq maqanakunankuta nirqa. Mardoqueo sumaq kamachiq kasqanrayku achkha runa israelitasta yanaparqanku, jinamanta saqra runakunamanta salvakurqanku.

Bibliamanta Ester libro.