Armagedonqa qayllitapiña ¿imaraykú chayta ninchej?

JEHOVAQA runasta manaña jaykʼajpis jatun parawan chinkachinanta rikuchinanpaj, uj señalta churarqa. Chayta kay libroj 46 yachaqananpi yachakorqanchej, ¿yuyarikunkichu?... Uj kuti, apostolespis Jesusta taporqanku: ‘¿Ima señaltataj rikuchiwasqayku kutimunaykimanta, kay pachaj tukukuyninmantawan?’, nispa (Mateo 24:3).

Jesús cieloman ripojtin, runasqa niña rikunkumanchu karqa. Kamachiyta qallarisqantaña yachanapajtaj, uj señal necesitakorqa. Chayrayku Jesusqa, yachachisqasninman imaschus Jallpʼapi kananta nerqa. Chay señalta rikuspataj, Jesús kutimusqanta, cielopitaj kamachiyta qallarisqanta yachankuman karqa.

Jesuspa yachachisqasnenqa wakichisqa kananku karqa. Chayrayku Jesús paykunaman nerqa: “Qhawariychej higo sachʼata, chayri mayqen sachʼallatapis. Qʼomeryajta rikuspa, yachankichejña qʼoñi tiempo qayllapiña kasqanta”, nispa. Qʼoñi tiempo chayamunantaqa sutʼita reparayta atinchej. Ajinallatataj Jesuspa nisqanta juntʼakojta rikuspaqa, Armagedón qayllapiña kasqanta yachasunman (Lucas 21:29, 30).

Jesusqa Diospa Gobiernon qayllitapiña kasqanta reparanapaj, uj señalta qorqa. Kay 245, 246 paginaspitaj chay señalmanta dibujos rikhurin. Tukuy chay imas juntʼakojtenqa, 46 yachaqanapi yachakorqanchej jina, Diospa Gobiernonqa Jesucristonejta tukuy gobiernosta chinkachenqa.

Chay iskay paginaspi dibujosta sumajta qhawariy. Chaykunamanta qhepan parrafospi parlarisun. Imachus chay dibujospi rikukusqantaqa, Mateo 24:6-14 chantá Lucas 21:9-11 versiculospi leeriwaj. Sapa dibujopi uj número rikhurin. Chay numerosllataj dibujosta sutʼinchaj parrafospi rikhurin. ¿Jesús chay señalmanta parlasqan juntʼakushanchu? Chayta qhawarina.

1) Jesús nerqa: “Uyarinkichejtaj wañuchinaku maqanakus kasqanmanta, chʼajwasmanta parlaykunatawan. [...] Uj nación waj naciompa contranta oqharikonqa, uj reinopis waj reinoj contranta”, nispa. Noticiaspi guerrasmanta parlajta, ¿uyarerqankichu?... Ñaupaj kaj guerra mundialqa 1914 watamanta, 1918 watakama karqa. Iskay kaj guerra mundialtaj 1939 watamanta, 1945 watakama karqa. Ni jaykʼaj Jallpʼantinpi chay jina guerras aswan ñaupajta karqachu. Kay tiempopitaj tukuynejpi guerras tiyan. Guerrasmantaqa sapa pʼunchay telepi, radiopi chayri periodicospi parlakun.

2) Jesús nillarqataj: “Kanqa yarqhaykuna, [...] kaynejpi, jaqaynejpi”, nispa. Ichapis yachanki mana tukuy runaschu mikhunayoj kasqankuta. Sapa pʼunchay, may chhika runas yarqhaymanta wañunku.

3) Chantá Jesús nerqa: “Kanqa [...] wañuchej onqoykuna”, nispa. ¿Chay onqoykunamanta parlajta uyarerqankichu?... Chay wañuchej onqoykunamanta ujqa gripe española karqa. Chay onqoywantaj, uj watallapi 20 millones wañorqanku. Kay tiempopeqa ichá aswan ashkha runasraj, sida onqoywan wañonqanku. Chantapis waj onqoykuna kallantaj: cáncer, sonqomanta onqoykuna, waj laya onqoykuna ima. Sapa watataj may chhika runas, chay onqoykunawan wañunku.

4) Jesús nillarqataj: ‘Kanqa terremotos kaynejpi, jaqaynejpi’, nispa. ¿Imataj uj terremoto?... Terremoto kajtenqa, jallpʼa kharkatiyta qallarin, wasista urmachin, chay wasispi kaj runastataj wañuchin. Kay 1914 watamantapacha, sapa wata ashkha terremotos karqa. ¿Chaykunamanta parlajta uyarinkichu?...

5) Chantá Jesús nerqa: ‘Anchapuni jucha kanqa’, nispa. Chayrayku may chhika suwas tiyan, sajra ruwaykunapis. Tukuy suyuspi runasqa wasinkuman suwa yaykunanmanta manchasqalla kausakunku. Ni jaykʼaj, chay chhika sajra ruwaykuna Jallpʼantinpi rikukojchu.

6) Jesús nillarqataj: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa (Mateo 24:14). ‘Reinomanta evangelio’ qanpaj valorniyoj chayqa, waj runasman chaymanta willanayki tiyan. Ajinamanta qanpis, Jesuspa nisqan juntʼakushasqanpi yanapakunki.

Wakin runasqa imasmantachus Jesús parlasqan, unaymantapachaña rikukusqanta ninku. Chaywanpis tukuy chaykunaqa ni jaykʼaj tukuynejpi, ujllapitaj rikukojchu. ¿Imatá chay rikuchiwanchej?... Tumpamantawan kay sajra pacha chinkachisqa kananta, Diospa mosoj pachantaj qallarinanta.

Jesusqa señalmanta parlashaspa, kayta nillarqataj: “Diosmanta mañakuychej ari, ama chiri tiempopi ayqenaykichej kanampaj”, nispa (Mateo 24:20). ¿Imatá chaywan niyta munasharqa?...

Chiri tiempopi viajayqa trabajo, ima llakiypipis rikukusunman. Chayrayku chiri tiempopi uj jatun ñakʼariymanta ayqejtinchej, ¿imaspí rikukusunman?... Mana ayqeyta atillasunmanchu, ichá wañusunman. Allin tiempopi mana usqhayta ayqesqanchejrayku, ritʼiwan pʼampasqa wañunanchej, ¿llakiycharí kanman?...

¿Imaraykú Jesús niraj chiri tiempo kashajtin ayqenanchejta nerqa?... Payqa nisharqa, Armagedón qayllapiña kasqanrayku, tiempota mana usuchinachu kasqanta. Astawanpis Diosta sirvispa, munakusqanchejta rikuchina tiyan. Chayrayku tiempo kashajtin, Jehovata sirvina. Mana chayta ruwaspaqa, Noej tiemponmanta runasman rijchʼakusunman. Paykunaqa Noej willasqanta uyarispapis, mana arcaman yaykorqankuchu.

Qhepan yachaqanapeqa, Armagedón maqanakuy pasayta imaynachus kausay kananmanta parlarisun. Chantapis yachakusun, imastachus Dios payta munakojkunapaj ruwananta.