Paykunajina ruwanaykipaq: Lidia

Lidia, manaraq unaychu bautizasqa kaspapis, pay kikinmanta apóstol Pablota, compañerosnintawan wasinman waqyarirqa (Hechos 16:14, 15). Chayta ruwasqanrayku Lidiaqa, paykunawan khuskachakuspa kusiyta tarirqa. Chayrayku, apóstol Pablowan, Silaswan carcelmanta lluqsispa, ¿maymantaq kutisqankuta yuyanki? Arí, Lidiap wasinman kutirqanku (Hechos 16:40).

¿Qamri? ¿Lidiajina qutuchakuymanta wakkunata riqsiyta maskʼawaqchu? ¿Imaynatá chayta ruwawaq? Qallarinapaq jukmanta jukta riqsiyta maskʼay. Ama yuyaychu tantakuypi kachkaspa tukuywanpuni parlarinayki kasqanta. Astawanpis sapa tantakuypi juk hermanowan chayri juk hermanawan parlariyta maskʼay. Asirispa parlayta yachay. Imatachus niyta mana yachankichu chayqa, tapuykunata ruway chayri kawsayniykipi imallatapis rikusqaykimanta parlariy. Chantapis allinta uyariyta yachay. Tiempo pasasqanmanjina, mana manchachikuspa pillawanpis parlayta yachanki. Yachanchikjina tukuypis munanchik pillapis tukuy sunquwan mana ni imata pakaspa, allinllamanta parlapayanawanchikta (Proverbios 16:24). Lidiaqa, kʼacha warmi kasqanrayku, wasinman waqyarikuyta yachasqanrayku ima, sumaq amigosniyuq karqa. ¡Qampis payjina ruwayta atinki!