Jefté nisqanta juntʼan

Israelitasqa Jehová Diosmanta karunchakuspa watejmanta llulla diosesta yupaycharqanku. Jinapis chaykunaqa mana paykunata yanaparqachu amonitas paykunawan maqanakoj rejtinku. Chayrayku israelitasqa ashkha watasta sufrerqanku. Chay qhepatataj, Jehová Diosman nerqanku: “Juchallikorqayku. Enemigosniykumanta kacharichiwayku ari”, nispa. Chantá israelitasqa santosninkuta phiriytawan watejmanta Jehová Diosta yupaycharqanku. Diostaj paykunamanta khuyakorqa.

Israelitasqa niraj amonitaswan maqanakushaspa, Jefteta ajllarqanku paykunata maqanakupi ñaupajman pusananpaj. Jefteqa Jehová Diosman nerqa: “Sichus atipanaykupaj yanapawasqayku chayqa, pichari ñaupajta wasiymanta taripawaj llojsimonqa, chayta qosqayki”, nispa. Jehová Diostaj chay mañakusqanta uyarerqa, maqanakupi atipananpajtaj yanaparqa.

Jefté wasinman kutejtintaj, warmi wawan tususpa, panderetata tocarispa ima, payta taripaj llojsimorqa. Payllataj wawan karqa. Jeftetaj Jehová Diosman nisqanta mana qonqarqachu. Chayrayku wawanman nerqa: “Ay wawáy, qannejta jatun llakiypi rikhurini. Juraspa Jehová Diosman nerqani pichari ñaupajta taripawaj llojsimonqa, chayta qonayta. Chayta juntʼanaypajtaj, Diosta yupaychana toldoman kachasunay tiyan, mayqenchus Silopi kashan chayman”, nispa. Wawantaj nerqa: “Jehová Diosman imatachus nisqaykitaqa juntʼallay. Chaywanpis mañarikuyki kachanawaykita iskay killapaj orqosnejta amigasniywan puriykacharimunaypaj. Chanta risaj”, nispa. Jeftej wawanqa nisqanta juntʼarqa, wañupunankamataj Diosta yupaychana toldopi sirverqa. Amigasnintaj sapa wata Siloman rej kanku watukoj.