Jesucristo, jatun misionero

“Noqari [...] paymanta kani, paytaj kachamuwarqa”. (JUAN 7:29.)

1, 2. ¿Imataq juk misionerori, pitaq aswan sumaq misionero kasqanta nisunman?

MISIONERO rimayta uyarispa, ¿pimantataq yuyarikunki? Wakinkunaqa, ichapis cristianos nichikuqkunapta misionerosmanta yuyarikunku, chaykunataq, yaqha tukuy politicapi, wak imaspi ima, chhapukunku. Chaywanpis, Jehovamanta sutʼinchaqjina, ichapis rikunki imaynatachus Jallpʼapi Diospa llaqtanta kamachiqkuna, tukuy Jallpʼaman misionerosta kachanku, runaman Diospa Reinonmanta yachachinankupaq (Mat. 24:14). Kay hermanosqa, mana imata mañaspalla, tiemponkuta, kallpankuta ima churanku, runas Jehovata riqsinankupaq, paywantaq masichakunankupaq (Sant. 4:8).

² Diosmanta Qhelqasqa Bibliapi, Efesios 4:11 pʼitipiqa, “evangeliota willarajkuna[manta]” parlan, kay rimayqa wakin kuti “misioneros”, nispa tikrakullantaq. Jehovaqa, tukuymanta astawan jatun evangelizador. Chaywanpis, mana nisunmanchu misionero kasqanta. Imaraykuchus juk misioneroqa, wak llaqtaman rin, chaypitaq imatachus kamachisqankuta juntʼan. Jehovataqa mana pipis kamachinmanchu, nitaq kachanmanchu. Jesucristotaqri pay kikinmanta parlaspa nirqa: “Noqari [...] paymanta kani, paytaj kachamuwarqa”, nispa. (Juan 7:29). Arí, Jehovaqa chayjinatapuni runata munakusqanrayku, kʼata churinta Jallpʼaman kachamurqa (Juan 3:16). Chantapis, Diosqa ‘chiqa kaqmanta willananpaq’ churinta kachamullarqataq (Juan 18:37). Chayrayku nisunman Jesusqa, jatun may sumaq misionerotaq kasqanta. Diospa Reinonmanta chayjina sumaqtapuni willasqanrayku, kunankama tukuy ruwasqanmanta yachakuyta atinchik. ¿Imyanatá yanapawanchik? Ñuqanchikpis mana misionero kaspapis, tukuyninchik imaynatachus Jesús yachachirqa, kikinta yachachiyta atisunman.

 3. ¿Ima tapuykunamantaq kunan kutichisunchik?

³ Evangeliomanta Jesús yachachisqanta qhawarispa, kay tapuykuna rikhurin: ¿Imayna runaswantaq Jesús Jallpʼapi tinkurqa? ¿Imaraykutaq sumaqta yachachirqa? ¿Imaynamanta chay chhika runasta yanapayta atirqa?

Tukuy imata saqispa Jallpʼaman jamurqa

4-6. ¿Imasmantaq Jesús Jallpʼapi yachakapurqarí?

⁴ Kunan tiempopipis, wakin hermanos wak suyusman Diospa Reinonmanta willaysiq rinku. Kay hermanos, misioneros ima, allin kawsayman yachasqa kaspapis, wakcha llaqtaspi kawsayta yachakunku. Jesusqa astawanraq ruwarqa, payqa cielopi Tatanwan, chiqa sunqu angeleswan ima, khuska kachkaspa, tukuy imata saqiytawan Jallpʼaman jamurqa (Job 1:6; 2:1). Payqa, mana jaykʼaqpis jucha sapa runap chawpinpi, nitaq millay ruwaykuna chawpipi, kawsarqachu (Mar. 7:20-23). Chantapis, munasqa discipulosnin phiñanakusqankuta rikuspa llakikurqa (Luc. 20:46; 22:24). Chaywanpis, Jesusqa tukuy tiempo chay tukuy chʼampaykunata sumaqta allincharqa.

⁵ ¡Janaqpachapi payqa angelesta imatachus ruwanankuta kamachiq! Chaywanpis, Jesús Jallpʼapi nacekuspa, mana chay pacha parlayta qallarirqachu; manachayqa juk wawitajina, pisimanta pisi parlayta yachakurqa. Jallpʼapiqa Jesús, ‘runaspa parlayninkupi’ parlayta yacharqa, runa parlasqanqa mana ‘angelespa parlayninjinachu’ karqa (1 Cor. 13:1). Chaywanpis, Jesusjinaqa mana pipis sumaqta parlaspa yachachinchu (Luc. 4:22).

⁶ ¿Imasmantaq astawan Diospa Churin yachakapunan karqari? Adanpa juchanqa mana payman chayarqachu. Chaywanpis payqa, runallataq karqa, akllasqasninjina, “hermanosnin jina” (Hebreos 2:17, 18, ñawiriy). Payqa ñawpaqta Arcángel Miguel sutiyuq janaqpachapi angelesta kamachirqa. Niraq wañuchichkaptinku chay chʼisiqa, “chunka iskayniyoj tropa angelesninmanta astawan” mañakuyta atispapis, mana mañakurqachu. (Mat. 26:53; Jud. 9). Arí, Jesusqa jallpʼapi milagrosta ruwarqa, chaywanpis janaqpachamanta astawan ruwanman karqa.

 7. ¿Imaynatataq judíos Diospa Leyninta qhawarqanku?

⁷ Manaraq runaman tukuchkaspa, ichapis Jesusqa, “Palabra” sutiyuq, Diospa voceron kaspa, israelitasta chʼin jallpʼapi imatachus ruwanankuta ninman karqa (Juan 1:1; Éxo. 23:20-23). Israelitasqa “angelesnejta leyta japʼishaspapis, manapuni kasorqan[kuchu]” (Hech. 7:53; Heb. 2:2, 3). Discipulospa tiemponpiqa, religionta apaykachaqkuna imapaqchus Ley kasqanta qʼiwiq kanku. Kamachikusqanmanta juknin qʼiwisqankuqa, sábado pʼunchay karqa (Marcos 3:4-6, ñawiriy). Escribas, fariseos ima, Leypi aswan allin kaqta mana kasurqankuchu; paykunaqa “cheqan kajta, khuyakuyta, Diosta mana wasanchayta ima”, pisipaq qhawaq kanku (Mat. 23:23). Chawanpis, Jesusqa mana chaywan atipachikurqachu, chiqa kaqta willallarqapuni.

 8. ¿Imaraykutaq Jesús salvayta atiwanchik?

⁸ Jesusqa yanapariq runa karqa. Munakuyninrayku runasta yanaparqa, nitaq jaykʼaqpis yachachiyta munasqan chinkarqachu. Jallpʼapi kachkaspa Jehovaman chiqa sunqu kasqanrayku, “churasqa karqa payta tukuy kasojkunaman wiñay kawsay salvacionta qonampaj”. Astawanpis, “payqa kay pachapi ñakʼariypi probasqa karqa; chayraykumin yanapayta atin pruebapi kajkunata” (Heb. 2:18; 5:8, 9).

Sumaq wakichisqa yachachiq

9, 10. ¿Imaynatá Diosninchik Jesusta yachachirqa manaraq Jallpʼaman kachamuchkaptin?

⁹ Kunanqa, Jallpʼapi Diospa llaqtanta kamachiqkuna, misionerosta tukuyniqman kachanankupaq, wakichinku, yachachinku ima. ¿Pillapis Jesusta yachachirqachu niraq Mesiasjina akllasqa kaptin? Arí, chaywanpis payqa mana, chay tiempomanta sumaq yachay wasispi, nitaq religionmanta yachayniyuq runasmantachu yachakurqa (Juan 7:15; kikinchay Hechos 22:3). Jina kaptinqa, ¿imaraykutaq sumaq yachachiq karqa?

¹⁰ Jesustaqa, maman María, José ima, yachachirqanku, chaywanpis Jesustaqa, tukuymanta astawan yachayniyuq Diospuni yachachirqa. Chaymanta parlaspa Jesús jinata nirqa: “Mana imatapis noqallamantachu parlarqani; kachamuwajniy Dios Tataj kamachiwasqanta parlani, yachachinitaj”, nispa (Juan 12:49). Qhawanchikjina, Diosninchikqa Churinman imatachus ruwananta sutʼita willarqa. Diosninchikqa may unaytachá churinta yachachirqa. ¿Pillapis astawan sumaqta Jesusta yachachinmanchu karqa?

11. ¿Imaynatataq Jesús Tatanjina runata munakusqanta rikuchirqa?

¹¹ Jesusqa Diosninchik ruwasqanmantapacha, may allinta Tatanwan apanakurqa. Janaqpachapi kachkaspaqa, rikurqa imaynatachus Tatan runasta qhawasqansta, jinamanta yacharqa imaynatachus runata munakusqanta. Chayrayku paypis Tatanjina runata munakurqa. Astawanpis Jesús jinata nirqa: “Kay pachata ruwasqampi sinkʼurispa kusikorqani, runasraykutaj sonqoy tʼikarerqa”, nispa (Pro. 8:22, 31).

12, 13. a) ¿Imatataq Jesús yachakurqa imaynatachus Tatan israelitasta khuyakusqanmanta? b) ¿Imaynatá Jesús Tatanmanta yachakusqanmanjina ruwarqa?

¹² Jesusqa rikullarqataq imaynatachus Tatan Jehovaqa, mana allin kaqta allinchaq. Mana kasukuq israelitaspi tʼukurina. Nehemías 9:28 paykunamanta nin: “Jinapis manaña ima llakiyninkupis kajtin, watejmanta ñawpaqeykipi juchallillajñataj kanku. Chayrayku enemigosninkoj makisninkuman urmajta saqerqanki, chay runastaj chakisninku uraman israelitasta churarqanku. Chaymantataj yanapayniykita qhaparikamullasojñataj kanku. Qantaj khuyakuyniykipi uyarimullajtaj kanki janaj pachamantapacha, ashkha kutista paykunata kacharichispa”. Jesusqa, Tatanta yanapaspa imatachus ruwananta yachakurqa. Chayrayku, payqa runaman willachkaptin khuyakullarqataq (Juan 5:19).

¹³ Jesús janaqpachapi yachakusqanta discipulosninmanpis riqsichirqa, paykunamantataq khuyakurqa. Chay chʼisi wañunan kachkaptin munasqa “yachachisqasnin payta saqerpayaspa, ayqerikaporqanku” (Mat. 26:56; Juan 13:1). Astawanpis, ¡apóstol Pedroqa kimsa kutita mana Jesusta riqsisqanta nirqa! Chaywanpis, Jesusqa mana Pedrota qharqurqachu, chayrayku Jesús Pedrota nirqa: “Qampajri noqa mañapuyki, creesqayki ama pisiyanampaj. Qantaj kutirikuspa, kallpachay hermanosniykita”, nispa (Luc. 22:32). Arí, kay ‘apostolesqa’, Israel espiritual nisqapta wasip cimientonjina kanku. Astawanpis, Musuq Jerusalenpa cimientomanta rumisninpi kay Jesucristop chunka iskayniyuq apostolesninpa sutisnin rikhurin. Kunanqa akllasqa cristianosqa, “waj ovejas” kaqkuna ima, Diospa llaqtan kanku, paykunataq Diospa Reinonmanta willanapaq wakichisqa kanku, Diostaq Jesusniqta paykunata imatachus ruwanankuta nichkan (Efe. 2:20; Juan 10:16; Apo. 21:14).

¿Imaynatá Jesús yachachiq?

14, 15. ¿Imaspitaq Jesuspa yachachisqan mana fariseospa, escribaspa yachachisqankujinachu karqa?

¹⁴ Jesusqa Tatanmanta yachakusqanmanjina runata yachachirqa. Yachachisqanqa, chay tiempomanta religionta yachachiqkunap yachachisqankuwan kikinchaptinchik, Jesuspa yachachisqan, may sumaq kasqanta rikunchik. Ecrisbas, fariseos ima, ‘Diospa kamachisqanta pʼakirqanku chay ñawpa ususninkurayku’. Jesustaq ni jaykʼaq paypa yuyasqallanta yachachirqachu, manaqa Tatan yachachisqanta yachachirqa (Mat. 15:6; Juan 7:16). Ñuqanchikpis kikillantataq ruwananchik tiyan.

¹⁵ Qhawarina imapichus astawan, Jesusqa mana chaypacha religionta apaykachaq runajinachu kasqanta. Jesús nirqa: Escribas, fariseos ima, imatachá “nisunkichej, chayta kasuspa, ruwaychej; chaywampis sajra ruwasqankutaqa ama ruwaychejchu. Paykunaqa parlallanku, manataj ruwankuchu”, nispa (Mat. 23:3). Jesustaq yachachisqanmanjina tukuy imata ruwarqa. Qhawarina imaynachus chay karqa.

16. ¿Imaynatataq yachanchik Jesús Mateo 6:19-21 nisqanmanjina kawsasqanta?

¹⁶ Jesús discipulosninman nirqa: “tukuy kapuyniykichejta janaj pachapi tantaychej”, nispa (Mateo 6:19-21, ñawiriy). ¿Jesús yachachisqanmanjinachu kawsarqa? Arí, jinata kawsarqa. Chayrayku pay kikinmanta nirqa: “Atojkunajtaqa qaqapi juskʼusninku tiyan, pʼisqospis thapasniyojllataj kanku; Runaj Churimpatari, mana maypi samarikunallampajpis kanchu”, nispa (Luc. 9:58). Jesusqa kapusqallanwan kawsakurqa; paypaqqa Diospa Reinomanta willay, imamantapis astawan sumaq karqa. Jesusqa kawsayninwan, mana qhapaqyaymanta llakikuspa, kusisqa kawsayta atisqanchikta rikuchirqa. Astawanpis rikuchirqa janaqpachapi qhapaqyay aswan sumaq kasqanta, “chaypeqa mana thutapis ni ismuypis tukuchinchu, nitaj suwas kanchu juskʼuspa suwanankupaj”. Ñuqanchikri, ¿Jesuspa nisqanta kasukuchkanchikchu, janaqpachapi qhapaqyayninchikta tantaspa?

Kʼacha runa kasqanrayku payta munakurqanku

17. ¿Imayna kʼacha kaynintaq Jesusta yanaparqa sumaq evangelizador kananpaq?

¹⁷ ¿Imaraykutaq Jesús may sumaq evangelizador karqa? Payqa runata allinpaq qhawaq. Jesusqa Tatanjina kʼacha runa karqa; payqa kʼumuykukuq runa karqa, munakuyniyuq, khuyakuyniyuq ima. Kunanqa Jesuspa kʼacha kayninmanta parlarina, chayrayku runaqa payman qayllaykuq.

18. ¿Imaraykutaq Jesús kʼumuykukuq runa kasqanta nisunman?

¹⁸ Jesús Jallpʼaman jamunanpaqqa, “janaj pachapi jatun kaynimpa kʼanchayninta saqespa, payqa kamachi runaj kayninta japʼerqa, runa jinataj nacekorqa” (Fili. 2:7). Kay ruwasqantaq kʼumuykukuq runa kasqanta rikuchirqa. Astawanpis, mana jaykʼaq runasta pisipaq qhawarqachu, nitaq janaqpachamanta jamusqanrayku, paytapuni uyarinankuta suyarqachu. Jesusqa, mana tukuyman paypuni Mesías kasqanta nispachu purirqa, chay llulla mesiaskunajinaqa. Wakin kutiqa runasman kamachirqa, pichus pay kasqanta, imatachus ruwasqanta ima, mana parlanankuta (Mat. 12:15-21). Sapa jukpis rikusqanmanjina paypa qhipanta puriyta akllanankuta munarqa. Chantapis, Jesusqa mana jaykʼaq discipulosninmanta mañarqachu, mana pantaq angelesjina kanankuta.

19, 20. ¿Imaynatá munakuynin, khuyakuynin ima, Jesusta tanqarqa runasta yanapanapaq?

¹⁹ Jesusqa Tatanpa may jatun munakuyninta rikuchirqa (1 Juan 4:8). Chay munakuyqa, runasman yachachimunanpaq tanqarqa. Juk wayna kamachiq Jesusman qayllaykusqanpi tʼukurina (Marcos 10:17-22, ñawiriy). Jesustaq “payta munakuspa”, yanapayta munarqa, waynataq qhapaq kapuyninta mana saqiyta munarqachu.

²⁰ Runaqa Jesusta munakurqanku, pay runamanta khuyakusqanrayku. Jesusqa payta uyariqkuna achkha chʼampaykunayuq kanankuta yacharqa, paykuna juchasapa runas karqanku. Chayta yachaspa, Jesusqa paykunamanta khuyakuspa, yachachiq. Juk kutiqa, Jesús apostolesninwan mayta llamkʼasqankurayku, mana mikhunallankupaqpis tiemponku karqachu. Chaywanpis, paykunaman may chhika runa jamurqanku, ¿imata paykunawan ruwanman karqarí?. Biblia jinata kutichiwanchik: “Paykunatataj khuyakuywan qhawarqa, mana michejniyoj ovejas jina kasqankurayku. Chantá paykunata tukuy imata yachachiyta qhallarerqa” (Mar. 6:34.) Jesusqa, imayna llakiypichus chay runas kasqankuta rikuspa, tukuy imata ruwarqa paykunata yachachinanpaq, jampinanpaq ima. Chayta ruwasqanrayku, wakin runasqa qhipanta puriyta qallarirqanku, parlasqanta uyarispataq discipulosninman tukurqanku.

21. ¿Imatataq qhipan yachaqanapi yachasunchik?

²¹ Jesús runata yanapasqanmanta maytaraq yachakunanchik tiyan, chaytataq qhipan yachaqanapi yachasunchik. ¿Imaynatataq ñuqanchikpis jatun misionerojina ruwasunman?

¿Imatataq kutichiwaq?

• Jesús manaraq Jallpʼaman jamuchkaptin, ¿imaynatataq Tatan yachachirqa?

• ¿Imaraykutaq Jesuspa yachachisqan, astawan sumaq karqa, fariseospa escribaspa ima yachachisqankumanta?

• ¿Ima kʼacha kaykunatataq Jesús rikuchirqa runas payta munakunankupaq?

[21 paginapi dibujo/foto]

¿Imaynatá Jesús runasta yachachiq?