Diospa cosechanpi astawan llamkʼana

“Wiñaspapuni Señorpa ruwaynimpi” (1 COR. 15:58).

 1. ¿Imata ruwanankupaqtaq Jesús discipulosninta waqyarirqa?

JESUSQA, 30 watap tukukuyninpi Samarianta richkaspa, Sicar llaqtapi, phukyup qayllanpi samarikuchkaspa discipulosninman nirqa: “Qhawariychej chajrasta; cosechanapaj poqosqaña kashanku” (Juan 4:35). Mana granota cosechanamantachu parlachkarqa, manaqa llampʼu sunquyuq runasta tantanamanta, pikunachus discipulosninman tukunanku karqa. Kaytaqa, usqhayllata ruwananku karqa, imaptinchus pisi tiempollapi, ¡may chhikata ruwananku karqa!

2, 3. a) ¿Imaraykutaq cosecha tiempopi kawsachkasqanchikta nisunman? b) ¿Imatá kay yachaqanapi yachakusun?

² Jesuspa nisqantaqa, kunan tiempopi astawan kasukuna kachkan, imaptinchus runasqa, “chajras[jina]; cosechanapaj poqosqaña kashanku”. Sapa wata may chhika runasta, Bibliamanta chiqa yachachiykunata yachakunankupaq waqyarikun, chaykunamantataq waranqas kasukuspa, Jesuspa discipulosninman tukunku, bautizakunkutaq. Kay cosechataqa, Jehová Dueñojina ruwachichkan, chaypi llamkʼasqanchiktaq, ¡may sumaq! Chayrayku tapurikuna: “¿‘Wiñaspapunichu Señorpa ruwaynimpi’ kachkani?”, nispa (1 Cor. 15:58).

³ Jesusqa, kimsa wata khuskanniyuqta Diosmanta willachkaspa, discipulosninta imaynatachus Diospa cosechanpi llamkʼanankuta yachachirqa. Kay yachaqanapiqa, kimsallamanta yachakusun. Sapa juktaq juk sumaq kʼacha kaymanta parlarichkan, chaykunataq discipulosta ruwanapaq yanapawasun. Kaykunata, jukmanta juk qhawarina.

Llampʼu sunquyuqpuni kana

 4. ¿Imaynatá Jesús, llampʼu sunquyuq kanamanta yachachirqa?

⁴ Kaypi tʼukurina: Jesuspa discipulosninqa, pichus aswan kuraqpaq qhawasqa kasqanmanta siminakuchkarqanku. Ichapis phiñanasqas kachkarqanku. Jinallapi Jesusqa, juk wawata chawpinkuman waqyarin, payta rikuchispataq, nin: “Sichus pipis kay wawa jina llampʼu sonqoyoj kanman [chayri kay wawamanjina tukunman] chayqa, janaj pacha reinopeqa tukuymanta nisqaqa aswan kurajpaj qhawasqa kanqa”, nispa (Mateo 18:1-4, ñawiriy). Runasqa kamachiqkunata, qhapaqkunata, sumaq llamkʼayniyuqkunata ima, jatunpaq qhawanku. Jesuspa discipulosnintaq, mana jinatachu yuyananku karqa, manaqa ‘wawamanjina tukunanku’ karqa. Arí, Jehovapaq llamkʼanankupaq, tʼinkasninta japʼinankupaq ima, chiqamanta llampʼu sunqus kananku karqa.

5, 6. Cosechapi astawan llamkʼanapaq, ¿imaynatá llampʼu sunqu kay yanapawanchik? Juk hermanop ruwasqanmanta parlariy.

⁵ Ñawpa tiempopijina, runasqa atiyta, qhapaqyayta, sumaq llamkʼayta ima, maskʼanku. Chayraykutaq, Diosmanta yachakunankupaq mana tiempo kanchu (Mat. 13:22). Jehovap kamachisnintaq, cosechap Dueñonwan allinpi qhawachikunankupaq, tʼinkasninta japʼinankupaq ima, runaspa ñawpaqinpi ‘wawasmanjina tukunku’. Chaytataq, tukuy sunqu ruwanku (Mat. 6:24; 2 Cor. 11:7; Fili. 3:8).

⁶ Franciscop kawsayninmanta parlarina, payqa ancianojina llamkʼan. Waynallaraq kachkaspa precursorjina llamkʼananrayku, jatun yachaywasipi yachakuchkasqanta saqirqa. Pay nin: “Aswan qhipamanqa casarakurqani. Ichapis tukuy imayuq kanaykupaq, sumaq llamkʼayta tariyman karqa. Chaywanpis, Diosmanta astawan willanaykurayku, kapuwasqallaykuwan kawsakuyta akllarqayku. Wawasniyuq kaptiykutaq, manaña atinaykupaqjina karqa, jinapis Jehová, ñawpaqman rinallaykupaqpuni yanapawarqayku. Kimsa chunka kuraq watataña ancianojina llamkʼani, wak ruwaykunapipis yanapallanitaq. Kapuwasqallaykuwan kawsakusqaykumantaqa, ni jaykʼaq pesachikuykuchu”.

 7. Romanos 12:16 nisqanta, ¿imaynasmantá kawsayniykipi kasukuchkanki?

⁷ Kay pachap ‘jatunchakuynintaʼ qhisachasun chayqa, ‘pisipaq qhawasqa kaqkunawantaqʼ, nisunman kapuwasqallanchikwan kawsakuspaqa, kay cosechapi tʼinkasta, may sumaq ruwaykunata ima, japʼisun (Rom. 12:16; Mat. 4:19, 20; Luc. 18:28-30).

Kʼuchi runas kaspaqa, tʼinkasta japʼisun

8, 9. a) Talentosmanta rikchʼanachinamanta pisillapi parlariy. b) ¿Pikunatá kay rikchʼanachina sunquchan?

⁸ Cosechapi astawan llamkʼanapaqqa, kʼuchis kananchik tiyan. Jesusqa, chayta talentosmanta rikchʼanachinanpi rikuchirqa.a Chaypiqa, juk patronmanta parlan, pichus niraq karu llaqtaman ripuchkaspa kamachisninman kapuyninta saqirqa. Jukmanqa, phichqa talento qullqita jaywarqa, jukmantaq iskay talentota, jukninmantaq juk talentollata. Patronninku ripuptintaq iskay kamachisqa, chay qullqita juk jinatawan ‘mirachispa’ kʼuchis kasqankuta rikuchirqanku. Juk talentollata japʼiqtaq, “qhella kamachi” kasqanrayku, talentonta pʼampaykurqa. Patronninkutaq, kutimuytawan iskaynin kamachisninta “aswan ashkhata qos[pa]” tʼinkarqa. Qhilla kamachitataq, talentonta qhichukapuspa, wasinmanta wikchʼurqa (Mat. 25:14-30).

⁹ Tukuypis, Diosmanta runasman astawan yachachispa, chay iskay kʼuchi kamachisjina kayta munanchik. Chaywanpis, ichá familianchikta uywananchikpaq, astawan llamkʼananchik tiyan. Chayri manaña waynasjinachu kallpayuq kanchik, ichá unqunchik ima. Jina kaptinqa, kay rikchʼanachina mayta sunquchawasun.

10. Rikchʼanachinamanta patrón, ¿imatataq yacharqa, imaraykutaq chay sunquchawanchik?

¹⁰ Kay rikchʼanachinapi patronqa, kimsantin kamachisnin maykamachus atisqankuta sumaqta yacharqa, chayrayku “sapa ujman qo[r]qa atisqankuman jina” (Mat. 25:15). Phichqa talentosta japʼiqqa, iskay talentosta japʼiqmanta, astawan qullqita mirachirqa. Jina kaptinpis patronqa, iskayninkuman “walejpacha, allinta ruwaj kamachi” nispa nirqa, kikinkamatataq tʼinkarqa (Mat. 25:21, 23). Jehovapis, cosechap Dueñon kasqanrayku, maykamachus sapa jukninchik ruwayta atisqanchikta, allinta yachan. Payta tukuy sunquwan yupaychanapaq kallpachakusqanchiktapis, yachallantaq, chayraykutaq tʼinkawasunpuni (Mar. 14:3-9; Lucas 21:1-4, ñawiriy).

11. Imaynatachus juk hermana mayta kallpachakuspa Diospaq llamkʼasqanrayku, tʼinkasta japʼisqanmanta parlariy.

¹¹ Selmirap kawsayninmanta parlarina, payqa Brasilpi tiyakun. Ruwasqanqa, Jehovata kʼuchi runasjina yupaychanapaq, mana tukuy ima allillan kanantaraqchu suyanata yachachiwanchik. Qusanta, suwa wañuchisqanmantaqa, iskay chunka watasña, chayrayku sapallan kimsa imillitasninta uywarqa. Payqa, achkha horasta empleadajina llamkʼaq, chantapis juntʼa autospi karuta rinan karqa. Jinapipis, precursora regular kananpaq tiempota urqhukurqa, qhipamantaq iskay wawasnin kikillantataq ruwarqanku. Pay nin: “Kunankamaqa, iskay chunka kuraq runasmanña Bibliamanta yachachini, paykunataq familiayjina kanku. Munakuyninkuta, paykunawan khuskachakuytapis, jatunpaq qhawani. Chaytaqa, ni wañunaykama llamkʼaspapis rantiymanchu.” Chiqamanta cosechap Dueñon, Selmirap llamkʼayninta sumaqta tʼinkasqanta nisunman.

12. ¿Imaynamantá willaypi kʼuchis kasqanchikta rikuchisunman?

¹² Mana tukuychu, cosechapi kikinta llamkʼayta atisun. Chaywanpis, sumaqta llamkʼanapaq kallpachakunapuni. Sapa semana Willayta Yachanapaq Tantakuypi yachachikusqanmanjina ruwaptinchikqa, sumaqmanta runasman yachachisunchik, tukuyniqpitaq willayta atisun (2 Tim. 2:15). Qutuchakuyninchikwan runasman willamunapaqqa, ichá wakin ruwanasninchikta saqisunman, chayri wak kutipi ruwasunman (Col. 4:5).

13. ¿Imataq kʼuchi runas kanapaq yanapawasun?

¹³ Kʼuchi runas kananchikqa, ñuqanchikllamanta (Sal. 40:8). Jesuspa rikchʼanachinanmanta kimsa kaq kamachiqa, patronninta manchachikurqa, saqra kasqantataq yuyarqa. Chayrayku, qullqita mirachinanmantaqa, pʼampaykurqa. Mana payjina qhilla kanapaqqa, Jehovaman, cosechap Dueñonman, sapa pʼunchay astawan qayllana. Chantapis, Bibliata ukhunchanapaq, Diospa munakuyninpi, paciencianpi, khuyakuyninpi, wak kʼacha kaykunasninpi ima, tʼukurinapaq tiempochakusun chayqa, astawan paypaq llamkʼayta munasun (Luc. 6:45; Fili. 1:9-11).

“Juchamanta tʼaqasqa santos kaychej”

14. Diospa cosechanpi llamkʼayta munaqkuna, ¿imatá ruwananku tiyan?

¹⁴ Apóstol Pedroqa, Hebreopi Qillqasqas nisqanmanjina, imaynachus Diospa kamachisnin kanankumanta ajinata nirqa: “Qankunata wajyaj Diosqa may santomin; ajinallatataj qankunapis juchamanta tʼaqasqa santos kaychej tukuy kawsakuyniykichejpi. Diosmanta Qhelqasqapi Diosqa nin: Juchamanta tʼaqasqa santos kaychej, imaraykuchus noqa may santomin kani”, nispa (1 Ped. 1:15, 16; Lev. 19:2; Deut. 18:13). Pedrop nisqanqa, cosechapi llamkʼaqkuna, kawsayninkupi, Diosta yupaychayninkupi ima, llimphus kananku kasqanta rikuchin. Chayta juntʼanapaqqa, llimphuchakunanchik tiyan. ¿Imataq chaypaq yanapawasun? Diospa chiqa yachachiykunasnin.

15. Diospa chiqa yachachiykunasnin, ¿imatá ruwayta atin?

¹⁵ Diospa chiqa yachachiykunasninqa, yakujina llimphuchayta atin. Sutʼincharinapaq, Apóstol Pabloqa, akllasqa cristianos, Diospa ñawpaqinpi llimphuchasqa kasqankuta nirqa. Mayqintachus Cristo, novian kananpaq ‘palabranwan yakuwanjina mayllaspa llimphucharqa, juchamanta tʼaqasqa, mana kʼamina kananpaq’ (Efe. 5:25-27). Jesusqa, Diospa chiqa yachachiykunasnin llimphuchanapaq atiyniyuq kasqanmanta, parlarqaña, chaytataq runasman yachachirqa. Chayrayku discipulosninman nirqa: “Qankunaqa llimphuchasqaña kankichej, noqaj parlasqayrayku”, nispa (Juan 15:3). Arí, Diospa chiqa yachachiykunasninqa, kawsayninchikta, Diosta yupaychayninchikta ima, llimphuchayta atin. Diosninchik yupaychayninchikta allinpaq qhawananpaqtaq, chiqa yachachiynin llimphuchakunanchik tiyan.

16. Kawsayninchik, Diosta yupaychayninchik ima, llimphullapuni kananpaq, ¿imatá ruwananchik tiyan?

¹⁶ Cosechapi llamkʼayta munaqqa, ñawpaqta kawsayninta, imaynatachus Diosta yupaychachkasqanta ima, llimphuchanan tiyan. Cosechallapipuni llamkʼananpaqtaq, kawsayninpi, Diosta yupaychayninpi ima, Jehovap kamachisqasninta kasukunan tiyan (1 Pedro 1:14-16, ñawiriy). Imaynatachus cuerponchikta sapa kuti llimphuchanchik, kikillantaq kawsayninchikta Jehovap chiqa yachachiykunasninwan llimphuchananchik tiyan. Chaypaqtaq Bibliata ñawirina, tantakuykunaman rina, Diospa kamachiykunasninmanjina kawsanapaqtaq kallpachakuna. Jinamantaqa, juchaman mana urmasunchu, nitaq kay saqra pachap yuyayninmanjina kawsasunchu (Sal. 119:9; Sant. 1:21-25). Diospa chiqa yachachiykunasninwan, jatun juchasmantapis ‘llimphuchasqa’ kayta atisqanchikta yachayqa, mayta sunquchawanchik (1 Cor. 6:9-11).

17. Llimphu kawsayniyuq kanapaq, ¿Bibliamanta mayqin yuyaychaykunatá kasukunanchik tiyan?

¹⁷ Diospa chiqa yachachiykunasnin, ¿kawsayninchikta llimphuchananta saqinchikchu? Kaykunapi tʼukurina. Sunquta kusichinapaq wakin ruwaykuna mana allinchu kasqanta niwaptinchik, ¿kasukunchikchu? (Sal. 101:3.) Llamkʼaymanta, yachay wasimanta compañerosninchikwan ima, ¿anchatachu masichakuchkanchik? (1 Cor. 15:33.) Ima saqra ruwayllapipis urmanapaqjina kaptinchik, ¿kallpachakuchkanchikchu mana chaypi urmanapaq? (Col. 3:5.) Politicamanta, atipanaku pukllaykunawan suyusta jatunchaymanta ima, ¿karunchakuchkanchikchu? (Sant. 4:4.)

18. Kawsayninchik, Diosta yupaychayninchik llimphullapuni kasqan, ¿imaynatá cosechapi astawan uqharinapaq yanapawasun?

¹⁸ Kaykunata kasukusqanchikqa, allinninchikpaq kanqa. Jesusqa, akllasqa discipulosninta uva ramaswan kikinchachkaspa nirqa: “Noqapi kaj rama, sichus mana poqon chayqa, Dios Tata kʼutonqa. Poqoj ramatataj podaspa llimphuchanqa, astawan poqonampaj” (Juan 15:2). Jehovap chiqa yachachiykunasnin kawsayninchikta llimphuchananta saqisun chayqa, astawan puqusun.

Kunan, qhipamanpis tʼinkasta japʼisun

19. Jesuspa discipulosnin cosechapi mayta llamkʼasqankurayku, ¿ima tʼinkastataq japʼirqanku?

¹⁹ Jesuspa discipulosninqa, paywan yachachichikusqankurayku Pentecostés 33 watapi, espíritu santota japʼirqanku, chaytaq “testigos [...] tukuy kay pachaj kʼuchusninkama” kanankupaq kallpacharqa (Hech. 1:8). Paykunaqa, runasman allin willaykunata willaspa, sumaqmanta “tukuy kay pachapi kajkunaman willa[rqanku]”. Wakinkunataq Diospa Llaqtanta Kamachiqkuna, misioneros, qutuchakuykunata waturiqkuna ima, karqanku (Col. 1:23). Paykunapaqqa, ¡may sumaq tʼinkas karqa, achkha runastataq kusisqas kawsakunankupaq yanaparqanku!

20. a) Diospa cosechanpi astawan llamkʼasqaykirayku, ¿ima tʼinkastá japʼinki? b) ¿Imatá ruwayta munananchikpuni tiyan?

²⁰ Llampʼu sunqus, kʼuchis, Jehovap kamachiykunasnintapis kasukusun chayqa, Diospa cosechanpi may sumaqmanta llamkʼallasunpuni. Kay pachamanta runasqa, sunqunkuta kusichiyllapi, qullqi maskʼayllapi kachkanku. Ñuqanchiktaq ñakʼarinamanta, phutikunamanta nisqaqa, chiqamanta kusikunchik, sunqu juntʼasqataq kanchik (Sal. 126:6). Astawanpis, ‘Señorpa sutinpi ruwasqanchik, mana qhasipaqchu kasqanta’ yachanchik (1 Cor. 15:58). Jehovaqa cosechamanta Dueñojina, ‘ruwasqasninchikmanta, jinallataq sutinta munakusqanchikmantapis’ wiñaypaq tʼinkawasun (Heb. 6:10-12).

[Sutʼinchaynin]

¿Kaykunata japʼiqankichu?

• Cosechapi tukuy sunqu llamkʼanapaq, ¿imaraykutaq llampʼu sunqupuni kana tiyan?

• ¿Imataq cosechapi kʼuchi runasjina llamkʼanallapaqpuni yanapawasun?

• ¿Imaraykú kawsayninchik, Diosta yupaychayninchik ima, llimphullapuni kanan tiyan?

[17 paginapi dibujo/foto]

Llampʼu sunqu kayqa, kapuwasqallanchikwan kawsakunapaq yanapawanchik