“Tukuy llakisqasta” sunquchana

“Tata Diospuni noqataqa ajllakuwarqa. [...] Tukuy llakisqasta sonqochanaypaj[...].” (ISA. 61:1, 2.)

 1. ¿Imaynatá Jesús llakisqasta yanaparqa, chantá imaraykutaq?

JESÚS nirqa: “Mikhuyneyqa Kachamuwajniypa munayninta juntʼanay, ruwanantataj tukuychanay”, nispa (Juan 4:34). Diospa kamachisqanta ruwaspataq Tatanpa kʼacha kaykunasninta rikuchirqa, astawanqa runasta mayta munakusqanta (1 Juan 4:7-10). Arí, Jehovaqa runasta sunquchaspa munakuyninta rikuchin. Chayraykuchá apóstol Pabloqa, “tukuy imapi sonqochaj Dios[...]” kasqanta nirqa (2 Cor. 1:3). Cristopis Isaías nisqanmanjina chayjina munakuyllatataq rikuchirqa (Isaías 61:1, 2 ñawiriy). Chayrayku Nazaretpa sinagoganman rispaqa, chay profeciata ñawirirqa paypi juntʼakuchkasqantataq nirqa (Luc. 4:16-21). Jesusqa, Jallpʼapi kachkaspa llakisqa runasta khuyakuspa kallpacharqa, sunqucharqa ima.

2, 3. ¿Imaraykutaq Jesusjina runasta sunquchananchik tiyan?

² Jesuspa discipulosninqa, ñakʼariqkunata sunquchananchik tiyan (1 Cor. 11:1). Pablo nirqa: “Qankunapura sonqochanakuychej, jinallataj kallpachanakuychej”, nispa (1 Tes. 5:11). “Manchay sajra pʼunchaykuna[pi]” kawsachkasqanchikrayku llampʼu sunqu runasqa, sunquchasqa kayta necesitanku (2 Tim. 3:1). Chantapis tukuyniqpi astawan millay parlaykunata uyarinku, millay ruwaykunatataq rikunku.

³ Kay qhipa pʼunchaykunapiqa, profecías nisqanmanjina, runasqa ajina kanku: “Imallatapis paykunallapaj munajkuna, qolqeta munakojkuna, runaykachajkuna, tukuypa contranta millayta rimajkuna, jatunchakojkuna, tatasninkuta mana kasojkuna, mana graciasta qoyta yachajkuna, Diosta mana manchachikojkuna, mana sonqoyojkuna, rumi sonqos, qhasimanta tumpajkuna, aychaj sajra munayninta mana atipayta atejkuna, mana khuyarispa sajrata ruwajkuna, allin kajta chejnejkuna, wasanchajkuna, mana qhawarikuspa imallatapis ruwarparejkuna, may kasqankuta yuyakojkuna, kay pachaj kusikuyninta astawan munakojkuna Diosta munakunankumanta nisqaqa”. Biblia nisqanmanjinataq “sajra runas, chʼawkiyajkunataj, sajra kasqankumanta aswan sajraman tukonqanku” (2 Tim. 3:2-4, 13).

 4. ¿Imaynamantaq kay pacha tukuchkan?

⁴ Chaytaqa yachanchikña, imaraykuchus Bibliaqa “kay pachapi kaj chhika runas[qa] Kuraj Supaypa atiynimpi kasqankuta” nin (1 Juan 5:19). “Kay pachapi kaj chhika” nispaqa, politicamanta, religionmanta, ranqhaqkunamanta, wak imasmantawan parlachkan. Chaykunawantaq Satanasqa chʼawkiyan. Chayraykuchá “kay pachata kamachej[...]”, “kay pachaj dios[nin]” ima, nispa sutichakun (Juan 14:30; 2 Cor. 4:3, 4). Chantapis Kuraq Supayqa, pisi tiempollaña kapusqanta yachaspa may phiñasqa kachkan, chayrayku kay pachaqa, mana allinman tukuchkan (Apo. 12:12). Tumpamantawan Jehovaqa, Satanasta, saqra pachanta ima tukuchinqa, mana iskaychakuspataq kamachiyninman churanakusqanta sutʼinchanqa. Chayqa mayta sunquchawanchik (Gén. 3 tʼaqa; Job 2 tʼaqa).

Jallpʼantinpi allin willaykunata willanchik

 5. ¿Imaynatá kay qhipa pʼunchaykunapi Diospa Reinonmanta willakunan kasqanmanta profecía juntʼakuchkan?

⁵ Kay qhipa pʼunchaykunapiqa, Jesuspa nisqan juntʼakuchkasqanta rikunchik, pay nirqa: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa (Mat. 24:14). Diospa llaqtanmanta kaqkunaqa, Diospa Reinonmanta Jallpʼantinpi willachkanchik. Kay tiempopiqa 7.500.000 willaqkunamanta kuraqña kanchik, 107.000 kuraq qutuchakuykunapitaq kachkanchik. Jesusjinataq Diospa Reinonmanta willachkanchik, yachachichkanchik ima (Mat. 4:17). Chaywantaq llakisqasta sunquchanchik. Chaytataq iskay pasaq wataspi 570.601 Jehovamanta sutʼinchaqkunajina bautizakusqanku rikuchin.

 6. ¿Imatá Diospa llaqtan ñawparichkasqanmanta niwaq?

⁶ Chantapis Bibliamanta publicacionesta 500 qallus kuraqpi urqhukuchkasqan, chaykunatataq tikrachikuchkasqan imaqa, Diospa llaqtan willaspa ñawparichkasqanta rikuchillantaq. Ni jaykʼaq chayjinataqa ruwakusqachu. Kay saqra pacha Satanaspa atiyninpi kaptinpis, Diospa llaqtanqa kachkallanpuni, llamkʼachkallanpuni, yapakuchkallanpunitaq. Chaytataq Diospa yanapaynillanwan ruwakuchkan. Pachantinpi willakuchkasqanrayku may chhika runas Diospa Reinonmanta yachakuspa ñuqanchikjina sunquchasqas kanku.

Hermanosninchikta sunquchana

 7. a) ¿Imaraykutaq cristianos tukuy llakichiwasqanchik imasta Jehová mana kay tiempopi chinkachinanta suyasunmanchu? b) ¿Imaynatá qhatiykachaykunapi, ñakʼariykunapi ima sinchita sayayta atisqanchikta yachanchik?

⁷ Kay saqra pachapiqa, saqra ruwaykuna, ñakʼariy ima kasqanrayku llakikunchikpuni. Dios tukuchinankamaqa, ajinallapipuni kawsakusun. Chaykamaqa, Biblia nisqanmanjina qhatiykachasqas kayta muchuspa, Jehovaman chiqa sunqu kasqanchikta, kamachiynintataq jatunchasqanchikta rikuchisun (2 Tim. 3:12). Chantapis Tesalónica llaqtamanta akllasqas cristianostajina, Janaqpachapi kachkaq Tatanchikqa yanapawasun, sunquchawasun ima. Paykunaqa, qhatiykachasqas, ñakʼarichisqas ima kaspapis sinchita sayarqanku (2 Tesalonicenses 1:3-5 ñawiriy).

 8. ¿Imaynatá yachanchik Jehová kamachisninta sunquchasqantapuni?

⁸ Jehovaqa, kamachisninta sunquchanpuni. Eliasmanta parlarina. Payqa, saqra reina Jezabel wañuchiyta munaptin mayta mancharikuspa, ayqikurqa, wañuyta munasqantataq nirqa. Chaywanpis Diosqa mana kʼamirqachu, manaqa kʼachamanta sunquchaykurqa, profetan kanallanpaqpunitaq kallpacharqa (1 Rey. 19:1-21). Arí, Jehovaqa llaqtanta sunquchanpuni, chaytataq apostolespa tiemponkumanta cristianospa kawsayninkupi rikunchik. Paykunamanta Biblia nin: “[Qutuchakuyqa, NM] allillan kasharqa tukuy Judeapi, Galileapi, Samariapi ima. Creejkunaqa Señorpi wiñasharqanku, ashkhayasharqankutaj Espíritu Santoj yanapayninwan. Chantá Señorta manchachikuspa kawsakusharqanku” (Hech. 9:31). Ñuqanchiktapis paykunatajina Diospa espíritu santon sunquchawasqanchikta yachayqa, mayta kusichiwanchik.

 9. ¿Imaraykutaq Jesuspa kawsayninmanta ukhunchariy kallpachawanchik?

⁹ Chantapis cristianostaqa, Jesuspa kawsayninmanta ukhunchariy, payjina ruway ima kallpachallawanchiktaq. Pay nirqa: “Noqaman jamuychej, tukuy saykʼusqa kajkuna, llasa qʼepiyojkuna ima, noqataj samarichisqaykichej. Yugoyman churakuychej, yachaqakuychejtaj noqamanta. Noqaqa kʼacha, llampʼu sonqotaj kani, almasniykichejpajtaj samakuyta tarinkichej, imaraykuchus yugoyqa llampʼulla, qʼepiypis chhallalla”, nispa (Mat. 11:28-30). Yachanchikjina Cristoqa, runasta yanaparirqa, munakurqa ima. Chayrayku Jesuspa kawsayninmanta ukhunchariy, chantá payjina ruwanapaq kallpachakuyqa, llakiykunamanta samarichiwanchik.

10, 11. ¿Pikunataq qutuchakuypi wakkunata sunquchayta atinkuman?

¹⁰ Hermanosninchikpis sunquchayta atillawanchiktaq. Sutʼincharinapaq ancianosqa, chʼampaypi kaqkunata sumaqta yanapanku. Discípulo Santiago nirqa: “Qankuna ukhupi mayqellampis onqosqa chayrí sonqompi saykʼusqa kashanman chayqa, [qutuchakuymanta, NM] anciano nisqa kurajkunata wajyachun, Diosmanta paypaj mañapunankupaj”, nispa. Ajinamanta “creespa mañapojtinkutaj, chay runaqa sanoyachisqa kanqa, Señortaj payta sayarichenqa. Sitajchus juchallikorqa chayqa, chay juchampis pampachasqallataj kanqa” (Sant. 5:14, 15). Chaywanpis qutuchakuy ukhupiqa, tukuy puraqmanta sunquchanakusunman.

¹¹ Warmisqa, warmi masisnillankuwan wakin chʼampaykunasninkumanta parlayta munanku. Paya hermanasqa, sipas hermanasta sumaqta yuyaychariyta atinku, imaraykuchus paykunaqa ichá chayjina chʼampaykunapi rikukurqankuña. Khuyakuyniyuq kasqanku, kʼacha kaykunasninkuta rikuchisqanku imaqa, mayta yanapanman (Tito 2:3-5 ñawiriy). Arí, qutuchakuymanta ancianos, wak hermanos imaqa, “pisi kallpasta[...]” kallpachanankupuni tiyan (1 Tes. 5:14, 15). Diosqa, “sonqochawanchej tukuy llakiyninchejpi noqanchejpis sonqochananchejpaj llakiypi, ñakʼariypi kajkunata” (2 Cor. 1:4).

12. ¿Imaraykutaq tantakuykunaman rinanchikpuni tiyan?

¹² Tantakuykunapiqa Bibliamanta sutʼinchakun, chaytaq sunquchawanchikpuni. Silaswan Judaswanpis allin yachachiykunawan “hermanosta sonqocharqanku aswan sinchʼita sayanankupaj” (Hech. 15:32). Chantá niraq tantakuy qallarichkaptin, tukukusqantawantaq sumaqta parlarispa kallpachanakullanchiktaq. Chayrayku chʼampaykunapi kachkaspaqa mana hermanosninchikmanta karunchakunachu, chayqa mana yanapawasunmanchu (Pro. 18:1). Astawanpis apóstol Pablo nisqanmanjina ruwasun, pay nirqa: “Purajmanta kallpachanakuspa yanaparinakunachej, munanakuypi kawsananchejpaj, allin ruwaykunata ruwananchejpajtaj. Chaypajqa Diosta yupaychana tantakuytaqa ama saqeychejchu, imaynatachus wakin saqenku, ajinata. Astawanqa kallpachanakuspa ujkuna ujkunata sonqosninchejta oqharinakuna, astawampis Señorpa jamunan pʼunchay qayllapiña kasqanta reparaspa”, nispa (Heb. 10:24, 25).

Diospa Palabranqa sunquchawanchik

13, 14. ¿Imaynatá Diospa Palabran sunquchawanchik?

¹³ Bautizasqasña kanchik chay chayri Diosmanta yachakuyta qallarichkanchik chaypis, Diospa Palabranqa mayta sunquchawasunman. Pablo jinata nirqa: “Ñaupajta qhelqasqa kajqa yachachinawanchejpaj qhelqasqa karqa, Diosmanta Qhelqasqapi pacienciakuspa, sonqochakuspataj suyakuyniyoj kananchejpaj”, nispa (Rom. 15:4). Diospa Palabranqa, “tukuy ima allin kajta ruwana[paq]” wakichiwanchik, kallpachawanchik ima (2 Tim. 3:16, 17). Arí, Diospa munayninta yachay, suyakuyniyuq kasqanchikta yachay imaqa, mayta sunquchawanchik. Chayrayku Bibliata, publicacionesta ima allinta ukhuncharina. Chaykunaqa sunquchawasun, maytataq yanapawasun.

¹⁴ Jesusmantaqa, mayta yachakusunman. Payqa, runa masinman Diospa Palabranwan yachachiq, sunquchaq ima. Chantapis wañuymanta kawsarimuspa iskay discipulosninman rikhurirqa, Diospa Palabranmanta sutʼinchaspataq sunqusninkuman chayarqa (Luc. 24:32). Apóstol Pablopis Jesusjinallataq ruwarqa. Achkha kutispiqa, runasman “Diospa Palabranmanta sutʼita parlaykorqa”. Bereamanta kaqkunataq “Diospa Palabranta tukuy sonqo japʼikorqanku. Sapa pʼunchay Diosmanta Qhelqasqata allinta qhawaspa” (Hech. 17:2, 10, 11). Chayrayku Bibliataqa, sapa pʼunchay ñawirinanchikpuni tiyan. Chayniqta, publicacionesniqta ima, kay saqra pʼunchaykunapi sunquchasqas kasunchik, sumaq suyakuyniyuqtaq.

Wakkunatapis sunquchasunman

15, 16. ¿Imaynasmantá hermanosninchikta yanapasunman, sunquchasunman ima?

¹⁵ Hermanosninchiktaqa, tukuy imaymanamanta sunquchayta atinchik. Sutʼincharinapaq unqusqaspaq, machuyasqaspaq ima, necesitasqankuta rantipuq risunman. Chantapis wasinkupi imallatapis mana ruwayta atisqankuta ruwaspa yanaparisunman (Fili. 2:4). Chantá, hermanostaqa munakuyninkuta, wak kʼacha kaykunasninkuta rikuchinankupaq mayta kallpachakuchkasqankuta allinpaq qhawasqanchikta nillasunmantaq.

¹⁶ Machuyasqa hermanosninchiktaqa, wasinkupi waturispa sunquchallasunmantaq. Chantapis Jehovata yupaychaspa ima bendicionestachus rikusqankumanta willariwasqanchikta allinta uyarisunman. Chaytaq ichá ñuqanchiktaraq kallpachawasun, sunquchawasun ima. Waturiq rispaqa, Bibliata chayri publicacionesninchikta ñawiripusunman. Ichá chay semanapaq Torremanta Qhawaq yachaqanapaq tantakuypi chayri Bibliamanta Yachaqanapaq tantakuypi, ima yachaqanachus ukhunchakunanta ukhuncharisunman. Chantapis Bibliamanta urqhukusqan videota qhawarisunman chayri publicacionesninchikpi wak hermanospa kawsayninkumanta rikhuriq yachaqanasta willarisunman chayri ñawiripusunman.

17, 18. ¿Imaraykutaq Jehová, chiqa sunqu kamachisninta pay yanapanawanchikpi, sunquchanawanchikpi ima atienekusunman?

¹⁷ Juk cristiano llakisqa kachkasqanta reparaspaqa, sapallanchikpi sutinta uqharispa Diosmanta mañapusunman (Rom. 15:30, 31; Col. 4:12). Chʼampaykunapi rikukuspa chayri wakkunata yanapayta munaspaqa, salmistajina mana iskaychakuspa Jehovapi atienekusqanchikta rikuchisunman, pay nirqa: “Llakiyniykita Tata Diosman saqey. Payqa sinchʼita sayachisonqa. Payqa cheqan runata ni jaykʼaj urmajta saqenqachu”, nispa (Sal. 55:22). Diosman chiqa sunqullapuni kasun chayqa, pay yanapallawasunpuni, sunquchallawasunpunitaq.

¹⁸ Jehovaqa, ñawpa tiempopi kaq kamachisninman jinata nirqa: “Noqamin kani sonqochajniykeqa”, nispa (Isa. 51:12). Kunanpis Jehovaqa, llakisqasta parlayninchikwan ruwasqanchikwan ima, sunquchanapaq kallpachakuptinchikqa, bendeciwanchik, sunquchawanchiktaq. Chayrayku janaqpachapi chayri Jallpʼapi kawsakuyta suyakuspapis, Pablo akllasqa cristianosman nisqanta ñawiriyqa, tukuyta sunquchawanchik, pay nirqa: “Señorninchej Jesucristo, Dios Tatanchej ima munakuwarqanchej, qhasilla kʼacha yanapayninraykutaj wiñay sonqochayninwan kallpachawarqanchej, allin kaj suyakuytapis qollawarqanchejtaj. Payqa sonqosniykichejta oqharichun, kallpachachuntaj allin kajllatapuni ruwanaykichejpaj, parlanaykichejpajtaj”, nispa (2 Tes. 2:16, 17).

¿Yuyarikunkichu?

• Llakisqasta sunquchanapaq ruwachkasqanchik, ¿imaynatá ñawparichkan?

• ¿Imaynasmantá wakkunata sunquchasunman?

• ¿Bibliamanta ima pʼitistaq, Jehová kamachisninta sunquchasqanta rikuchin?

[28 paginapi dibujo/foto]

Llakisqasta sunquchanapaq ¿kallpachakunchikchu?

[30 paginapi dibujo/foto]

Waynuchus chayri machuyasqas kaspapis wakkunata kallpachasunman