¿Imaynatá ‘sapa ujman kutichisunman’?

1, 2. 1) ¿Imataj sumaj tapuykunata ruwana kasqanta yachachiwanchej? (Patapi kaj dibujota qhawariy.) 2) ¿Imaraykutaj mana manchachikunachu tiyan wakin imasmanta parlariyta?

UJ HERMANA Bibliamanta qosanwan parlarisharqa, pichus mana Jehovaj testigonchu karqa. Qosanqa Trinidadpi creesqanta nerqa. Hermanaqa, qosan imachus Trinidad kasqanta mana yachasqanta reparaspa, allin yuyaywan tapurerqa: “¿Nishankichu Tata, Churi, espíritu santo ima uj Dioslla kasqankupi creesqaykita?”, nispa. Qosantaj kutichisqa: “Mana chaypichu creeni”, nispa. Chaytaj pichus cheqa Dios kasqanmanta parlarinankupaj yanaparqa.

² Kay rikuchiwanchej allin yuyaywan tapuykunata ruwana kasqanta. Chantapis yachakullanchejtaj mana manchachikuspa Trinidadmanta, infiernomanta, Diosninchej kasqanmantapuni sutʼinchana kasqanta. Jehovapi, pay wakichiwasqanchejpi ima atienekusunchej chayqa, runaj sonqonman chayanapaj jina kutichiyta atisunchej (Col. 4:6). Kunantaj hermanosninchej chay yachachiykunamanta, imaynatachus sutʼinchasqankuta ukhuncharisunchej. Qhawarisuntaj paykuna, 1) runasta tʼukurichinankupaj jina tapurisqankuta, 2) Bibliaj nisqanpi tʼukurichisqankuta, 3) rijchʼanachinaswan sutʼinchasqankuta ima.

3, 4. ¿Imaraykutaj runa imapichus creesqanta yachanapaj tapuriy may allin? Sutʼinchay.

³ Tapuykunata ruwayqa yanapawasunman imapichus runas creesqankuta yachanapaj. ¿Imaraykutaj chayta ruwana tiyan? Proverbios 18:13 nin: “Manaraj allinta uyarishaspa imatapis kuticheyqa wampu kaymin, pʼenqaytaj”, nispa. Chayrayku ñaupajtaqa runa imatachus yuyasqantaraj yachana. Chayta mana ruwajtinchejqa, ichapis unayta parlarispa tiemponchejta usuchisunman, imapichus mana creesqanmanta parlaspa (1 Cor. 9:26).

⁴ Pillawanpis infiernomanta parlarishasqanchejpi tʼukurina. Mana tukuy runaschu yuyanku infiernopi runas wiñaypaj ñakʼarishasqankuta. Astawanpis yuyanku Diosmanta karunchasqaslla kashasqankuta. Chayrayku ichá nisunman: “Runasqa mana kikintachu yuyanchej, yuyasqaykiman jina, ¿imataj infierno?”, nispa. Kutichisqanta uyariytawantaj, imatachus Biblia nisqanta sutʼinchayta atisunchej.

 5. ¿Imaynatá allin tapuykunata ruway, imapichus runa creesqanta yachanapaj yanapawasunman?

⁵ Allin yuyaywan tapoyqa, runa imaraykuchus imapipis creesqanta yachanapaj yanapawasun. Sutʼincharinapaj, willaypi pillapis Diospi mana creesqanta niwajtinchej, ¿imapi yuyasunman? Ichapis runa jinallamanta rikhurisqanpi creesqanrayku jinata nisqanta yuyasunman (Sal. 10:4). Wakinkunataj Diospi manaña creenkuchu, ñakʼarisqankurayku chayri wajkunata ñakʼarejta rikusqankurayku. Manataj creeyta atinkuchu munakuyniyoj Dios runata ñakʼarinanta saqesqanta. Chayrayku pillapis Diospi mana creesqanta niwajtinchej, nisunman: “¿Ajinatapunichu yuyaj kanki?”, nispa. “Mana” niwajtinchejtaj, imaraykuchus manaña Diospi creesqanta tapurisunman. Kutichiwasqanchejtaj imaynatachus yanapanapi tʼukurinapaj yanapawasun (Proverbios 20:5 leey).

 6. Tapuriytawan, ¿imatá ruwasunman?

⁶ Tapuriytawantaj, kutichisqanta sumajta uyarina, imaynachus kashasqantapis reparana. Ichá willariwasunman uj llakiypi rikukusqanrayku manaña Diospi creesqanta, jina kajtin, ¿ima nisunmantaj? Manaraj Bibliapi Dios kasqantapuni rikuchishaspaqa, allin kanman ninanchej llakiypi rikukusqanmanta llakikusqanchejta, imaraykuchus ñakʼarishasqanchejta tapukuytaj mana juchachu kasqanta (Hab. 1:2, 3). Chantapis kʼachamanta, paykunata entiendenapaj jina parlarejtinchejqa, ichapis yachakuyta munanqanku.a

 7. ¿Imatataj ruwana tiyan sumajta yachachinapaj?

⁷ Bibliaj nisqanpi, imaynatachus runasta tʼukurichinata qhawarina. Imaraykuchus Bibliaqa, willaypi runasman yachachinapaj may sumaj yanapa. Nisqantaj ‘sumaj wakichisqa kanapaj tukuy ima allin kajta ruwanapaj ima’ yanapawanchej (2 Tim. 3:16, 17). Willaypi sumajta yachachinapajqa, Bibliamanta mana ashkha versiculostapunichu leena tiyan. Manaqa, ima versiculotachus leeripusqanchejta tʼukurinanpaj jina sumajta sutʼinchana tiyan (Hechos 17:2, 3 leey). Imaynatachus chayta ruwanatataj, kinsanejmanta qhawarina.

8, 9. 1) ¿Imaynatá Jesuswan, Dioswan ujlla kasqanpi creej runata tʼukurichisunman? 2) ¿Imaynatataj Trinidadpi creejkunata tʼukuricherqanki?

⁸ Uj kaj. Willaypi Jesuswan, Dioswan ujlla kasqankupi creej runawan tinkojtinchej. ¿Ima versiculota rikuchispataj chay runata tʼukurichisunman? Imatachus Jesús, Juan 6:38 versiculopi nisqanta leerichisunman. Chaypi nin: “Mana munayniyta ruwanaypajchu janaj pachamanta uraykʼamorqani, astawanqa Kachamuwajniypa munayninta ruwanaypaj jamuni”, nispa. Chay versiculota leerisqantawantaj tapurisunman: “Jesús Dios kanman chayqa, ¿pitaj Jesusta janaj pachamanta kachamorqarí? Pichus payta kachamoj, ¿nichu paymanta aswan kuraj kanman? Kachamojqa, ¿kachasqa kajmanta kurajcharí?”, nispa.

⁹ Chantá Filipenses 2:9 leeripusunman, maypichus apóstol Pablo Jesús kausarimusqanmanta qhepaman, Dios imatachus ruwasqanmanta sutʼinchashan. Chaypi nin: “Diosqa payta maytapuni jatuncharqa tukuy kaj chhika patapi kanampaj, uj sutitataj qorqa, tukuy sutismanta aswan sumaj sutita”, nispa. Chay runata tʼukurichinapajtaj, nisunman: “Jesús manaraj wañushaspa Diosllataj kanman karqa chay, qhepamantaj Dios payta jatuncharqa chay. ¿Nichu chay ninayanman Jesús Diosmanta aswan patapi kashasqanta? ¿Pipis Diosmanta aswan patapi kanmanchu?”, nispa. Chay runa Diospa Palabranta jatunpaj qhawajtin, llampʼu sonqo kajtin imaqa, ajinata tʼukurichisqanchej yachakuyta munananpaj yanapanqa (Hech. 17:11).

10. 1) ¿Imaynatá parlarisunman infiernopi creej runawan? 2) ¿Imaynatataj tʼukuricherqanki infiernopi creejkunata?

¹⁰ Iskay kaj. Uj runa sajra runas infiernopi ñakʼarinankupuni kasqanta creejtin. Ichapis jinata creen sajra runas juchankumanta ñakʼarinankupuni kasqanta yuyasqanrayku. ¿Imaynatá yanapasunman? Ñaupajtaqa, sajra runas castigasqaspuni kanankuta nisunman (2 Tes. 1:9, NM). Chantá Génesis 2:16, 17 versiculosta leeripusunman. Chaypeqa Adán juchallikojtin, wañuywan castigasqa kananta nishan. Chantá Adanpa juchanrayku tukuy miraynin juchasapas kasqanchejta sutʼinchasunman (Rom. 5:12). Chantapis Diosqa mana infiernopi wiñaypaj castigasqa kanantachu nisqanta nisunman. Chantá Génesis 3:19 versiculota leeripusunman. Chay versiculopi Diosqa, Adanman juchanrayku jallpʼaman kutinanta nerqa. Tapurisunmantaj: “¿Allinchu kanman karqa ninan jallpʼaman tukunanta infiernopi wiñaypaj ñakʼarinan kashajtin?”, nispa. Ajinata tapoyqa runa yachakuyta munananpaj tʼukurichenqa.

11. 1) Kʼacha runas janaj pachaman ripusqankupi creejkunata, ¿imaynatá yanapasunman? 2) ¿Imaynatataj tʼukuricherqanki kʼacha runas janaj pachaman ripusqankupi creejkunata?

¹¹ Kinsa kaj. Tukuy kʼacha runas janaj pachaman rinankuta creej runawan tinkojtinchej. Chay yachacheyqa, runata mana yanapanchu Bibliaj nisqanta entiendenanpaj. Apocalipsis 21:4 (leey) leerisqanchejpi tʼukurina. Ichapis chay runaqa chaypi imaynachus kausay kananta nisqan cielopi kananta yuyanqa. ¿Imaynatá payta yanapasunman? Bibliamanta waj versiculota leenamantaqa, chay versículo “manañataj wañuy kanqachu” nisqanpi tʼukurichisunman. Chantá tapurisunman: “Imallapis manaña kananpaj, ¿manachu ñaupajta kananraj tiyan?”, nispa. Ichapis “arí” nispa kutichenqa. Janaj pachapi ni jaykʼaj wañuy kasqanta, manaqa kay pachallapi wañuy kasqanta sutʼinchasunman. Chayrayku imatachus Apocalipsis 21:4 nisqanqa kay Jallpʼapi juntʼakonqa (Sal. 37:29).

12. ¿Imaraykutaj Jesús rijchʼanachinaswan yachachej?

¹² Jesusqa, mana tapuykunallawanchu yachachej, manaqa rijchʼanachinaswanpis (Mateo 13:34, 35 leey). Rijchʼanachinaswanqa, Jesús yacharqa runaj sonqonpi imachus kasqanta (Mat. 13:10-15). Yachachiynenqa yuyarinapaj jina, entiendenapaj jinalla karqa. ¿Imaynatá Jesús jina yachachisunman?

13. ¿Ima rijchʼanachinawantaj yachachisunman Dios, Jesusmanta kuraj kasqanta?

¹³ Japʼeqanapaj jina rijchʼanachinasqa, may sumaj yachachinapaj. Pillamanpis Dios, Jesusmanta kuraj kasqanta yachachishajtinchej, ichapis nisunman Jesusqa, Diosmanta parlaspa Tatan kasqanta nerqa. Diostaj, Jesusmanta parlaspa Churin kasqanta nerqa (Luc. 3:21, 22; Juan 14:28). Chantá tapurisunman: “Iskay runas kikinkamalla kasqankuta sutʼinchanaykipaj, ¿ima rijchʼanachinawantaj sutʼinchawaj? ¿Uj tatamanta, wawanmantawanchu? Chayri, ¿gemelosmantachu?”, nispa. Ichapis gemelosmanta nispa kutichenqa. Jinata kutichejtintaj nisunman: “Noqanchej chay rijchʼanachinawan nejtinchej, ¿manachu Jesús, pichus aswan Sumaj Yachachej, gemelosmanta chay rijchʼanachinawan sutʼinchanman karqa? Jesús nerqa Dios Tatan kasqanta, nisunman paymanta aswan kuraj, aswan atiyniyojtaj”, nispa.

14. ¿Imataj rikuchin Dios mana Kuraj Supayta kamachisqanta runasta infiernopi ñakʼarichinanpaj?

¹⁴ Wajtañataj qhawarina. Wakin runasqa, Kuraj Supayta infiernopi runasta ñakʼarichinanpaj Dios churasqanta yuyanku. ¿Imaynatataj uj tatata yanapasunman chay mana cheqachu kasqanta entiendenanpaj? Kayta tapurisunman: “Wawayki kʼullu wawaman tukojtin, sajra imastataj ruwajtin, ¿imatá ruwawaj?”, nispa. Ichapis tataqa niwasun: “Sajra imasta manaña ruwananpaj, kutin kutita yanapariyman”, nispa (Pro. 22:15). Chantá tapurisunman: “Manapuni kasukojtinrí, ¿imatataj ruwawaj?”, nispa. Ichapis seqʼonanta nenqa. Chantá tapurillasunmantaj: “Wawaykita mana kasukunanpaj uj sajra runa tanqasqanta yachaspa, ¿imatataj ruwawaj?”, nispa. Ichapis tataqa chay runawan mayta phiñakunman. Kay rijchʼanachinata sumajta entiendenanpaj ichá nillasunmantaj: “Wawaykita chay sajra runa mana kasukunanpaj tanqasqanta yachaspa, ¿payllawantajchu seqʼochiwaj?”, nispa. Ichapis chay tataqa “mana” nenqa. Chaytaj sutʼita rikuchin Dios mana Kuraj Supayta runasta castigananpaj kamachisqanta, imaraykuchus Kuraj Supayllataj runasta tanqashan sajra imasta ruwanankupaj.

15, 16. 1) ¿Imaraykutaj mana suyananchejchu tiyan tukuy runas Reinomanta willayninchejta uyarinankuta? 2) ¿Runaj sonqonman chayanapaj sumaj yachachejpunichu kananchej tiyan? Sutʼinchay. (“Tapuykunaman kutichinapaj uj sumaj yanapa” nisqa recuadrota leey.)

¹⁵ Sumaj tapuykunata ruwajtinchejpis, sumaj rijchʼanachinaswan yachachejtinchejpis, mana tukuychu Diospa Reinonmanta willaykunata uyariwasun (Mat. 10:11-14). Jesustapis Sumaj Yachachej kajtinpis mana tukuychu uyarerqanku, manaqa pisi runaslla (Juan 6:66; 7:45-48).

¹⁶ Mana sumaj yachachej kajtinchejpis, willayninchejwan runaj sonqonman chayayta atisunman (Hechos 4:13 leey). Imaraykuchus Diospa Palabran nisqanman jina “wiñay kausaypaj kajkunaqa” sumaj willaykunata uyarenqanku (Hech. 13:48 Qheshwa Biblia). Chayrayku pikunamanchus willashanchej chaykunamanta, noqanchejmanta ima, maychus kajllata yuyana. Jehová yachachiwasqanchejwantaj yanapachikuna. Ajinamanta sumaj yachachejkuna kasunchej, chaytaj noqanchejta, jinallataj willayninchejta uyarejkunatapis yanapanqa (1 Tim. 4:16). Jehová yachachiwanchej “imaynatachus sapa ujman kutichina[nchej] kasqanta”. Qhepan yachaqanapi willayninchejpi allin rinawanchejpaj imatachus ruwananchejta ukhunchasunchej.