Jehová kallpachawasun

1, 2. 1) ¿Imatataj Jehová ñaupa tiempopi ruwarqa? 2) ¿Imatataj kay tiempopi wakin onqosqas tapukunku?

NI PIPIS onqoyta munanchejchu. Maykʼajllapis sinchʼita onqoykuspa sanoyanaykitachus manachus ichá tapurikorqanki. Chayri amigoyki manachayri familiaykimanta pillapis sinchʼita onqoykojtin ajinallatatajchá tapurikorqanki. Bibliaqa ashkha runasmanta parlan, chay runasqa onqosqa kaspa onqoyninkumanta sanoyanankutachus manachus tapurikullarqankutaj. Chay runasmanta ujnenqa rey Ocozías karqa, payqa altospata ventanamanta urmaykamorqa. Tapurikorqataj sanoyanantachus manachus. Paypa tatanqa Achab karqa, mamantaj Jezabel. Siriamanta rey Ben-adadpis onqoyninmanta sanoyanantachus manachus tapurikullarqataj (2 Rey. 1:2; 8:7, 8).

² Bibliaqa nin ñaupa tiempopi Jehová uj milagronejta onqosqasta sanoyachisqanta, profetasnejtataj wakin wañusqasta kausarichisqanta (1 Rey. 17:17-24; 2 Rey. 4:17-20, 32-35). Kay tiempopipis wakin onqosqasqa, Diosninchej onqoyninkumanta sanoyachinantachus manachus tapurikunku.

3-5. 1) ¿Imatataj Jehovawan Jesuswan ruwayta atinku? 2) ¿Ima tapuykunamantaj kay yachaqanapi kutichisunchej?

³ Jehovaqa atiyninwan wakin runasta onqoykuchiyta atin. Sutʼincharinapaj, Egiptoj ujnin reyninta, Moisespa hermananta ima uj onqoywan castigarqa (Gén. 12:17; Núm. 12:9, 10; 2 Sam. 24:15). Israelitastataj mana kasukusqankurayku ‘unaypaj manchay nanaykunawan, millay onqoykunawan’ ima castigarqa (Deu. 28:58-61). Chaywanpis Jehovaqa kamachisninta sanoyachiyta aterqa, manataj onqonankutapis saqerqachu (Éxo. 23:25; Deu. 7:15). Sutʼincharinapaj, Jobta onqoyninmanta sanoyacherqa, Jobqa sinchʼi onqosqa kasqanrayku wañupuyta munarqa (Job 2:7; 3:11-13; 42:10, 16).

⁴ Jesuspis Jehová jinallataj runasta onqoyninkumanta sanoyachiyta atin. Kay Jallpʼapi kashaspa lepra onqoyniyojkunata, suchusta, ciegosta, tʼuku onqoyniyojkunata ima sanoyacherqa (Mateo 4:23, 24 leey; Juan 9:1-7). Chay milagrosta ruwasqanqa, paraisopi imatachus ruwananta rikuchiwanchej. Paraisopeqa manaña pipis nenqachu: “Onqosqa ka[sha]ni”, nispa (Isa. 33:24).

⁵ Sinchʼi onqosqa kashanchej chay, ¿suyasunchu Jesuswan Jehovawan sanoyachinawanchejta? ¿Imaspitaj tʼukurinanchej tiyan imaynatachus jampichikunata ajllananchej kajtin?

 6. ¿Imatataj Biblia nin ñaupa tiempomanta cristianos milagrosta ruwasqankumanta?

⁶ Jehovaqa apostolespa tiemponkupi wakin ajllasqa cristianosman atiyta qorqa milagrosta ruwanankupaj (Hech. 3:2-7; 9:36-42). Sutʼincharinapaj, chay cristianosmanta wakenqa onqosqasta sanoyacherqanku, wakintaj waj parlaykunata parlarqanku (1 Cor. 12:4-11). Chaywanpis Bibliaqa milagrosta ruway ‘tukukapunanta’ nerqa, chaytaj jinapuni karqa (1 Cor. 13:8). Chayrayku mana suyanchejchu Jehová uj milagronejta onqoyninchejmanta sanoyachinawanchejta chayri mayqen familiarninchejtapis sanoyachinanta.

 7. ¿Imaynatá Salmo 41:3 versículo kallpachawanchej?

⁷ Sinchʼi onqosqa kashanchej chayqa, Jehová sonqochanawanchejpi, yanapanawanchejpi ima atienekuna. Payqa ñaupa tiempomanta kamachisninta jina yanapallawasuntaj. Rey David qhelqarqa: “Kusikuyniyojmin mana kallpayoj wajchapi yuyajqa. Tata Diosqa payta libranqa, llakiy pʼunchay chayamojtin. Tata Diosmin paytaqa waqaychanqa; kay pachapi kusiyta, kawsaytataj qospa”, nispa (Sal. 41:1, 2). Kaywanqa David mana nisharqachu wajkunata yanapaj runa mana wañunanta. Chantá, ¿imaynatá Jehová chay kʼacha runata yanapanman karqa? David nin: “Tata Diosqa payta onqoynimpi kallpachanqa. Onqoyninmanta sanoyachiponqa”, nispa (Sal. 41:3). Jehovaqa ñakʼarishasqanchejta yachan, nitaj noqanchejmanta qonqakapunchu, chaytaj mayta kallpachawanchej. Payqa ima onqoyta atipanapajpis kallpata, yachayta ima qowanchej. Chantapis sapallanmanta sanoyananpaj jina cuerpoyojta ruwawarqanchej.

 8. Salmo 41:4 versículo nisqanman jina, ¿imatataj David onqosqa kashaspa Jehovaman nerqa?

⁸ Kay 41 Salmo, rey David sinchʼita onqoykusqanmanta parlashan. Paypa cuentanmanta wawan Absalón kamachiyta munashasqanraykusina may llakisqa kasharqa. Jinapis sinchʼi onqosqa kashasqanrayku mana ni imata ruwayta aterqachu. Yacharqataj Betsabewan khuchichakusqanrayku familian ajina llakiypi kashasqanta (2 Sam. 12:7-14). ¿Imatataj David ruwarqa? Jehovaman nerqa: “Noqa nerqani: Tata Dios, khuyakuway, sanoyachiway, imaraykuchus contraykipi juchallikorqani”, nispa (Sal. 41:4). Davidqa Jehová juchanta perdonasqanta yacharqa, onqosqa kashaspataj Jehovaj yanapayninta maskʼarqa. Chaywanpis, ¿suyarqachu uj milagronejta onqoyninmanta Jehová sanoyachinanta?

 9. 1) ¿Imaynatataj Jehová rey Ezequiasta yanaparqa? 2) ¿Imatataj David suyarqa Jehová payrayku ruwananta?

⁹ Ñaupa tiempopeqa Jehová wakin runasta sanoyacherqa. Sutʼincharinapaj, rey Ezequiastaqa sinchʼita onqoykusqanrayku wañuy patapi kashajtin Jehová sanoyacherqa, chunka phishqayoj watastawantaj kausayninman yapaykorqa (2 Rey. 20:1-6). ¿David suyarqachu Jehová Ezequiasta jina uj milagronejta sanoyachinanta? Mana. Astawanpis imaynatachus Jehová ‘mana kallpayoj wajchapi yuyaj runata’ yanapan, ajinata yanapananta suyarqa. Jehovaj sumaj amigon kasqanraykutaj onqosqa kashajtin sonqochananta, qhawananta ima mañakuyta aterqa. Chantapis onqoyninmanta allinyarikunanpaj yanapayninta mañakorqa. Noqanchejpis pay jinallataj ruwayta atisunman (Sal. 103:3).

10. ¿Imatataj yachakunchej Trófimo, Epafrodito ima onqoykusqankumanta?

¹⁰ Ñaupa tiempopi apóstol Pablo, waj cristianos ima, onqosqasta uj milagronejta sanoyachej kanku. Chaywanpis mana tukuy cristianoschu sanoyachisqas karqanku (Hechos 14:8-10 leey). Sutʼincharinapaj, uj kuti Pabloqa Publioj tatanta kʼaja onqoymanta, wijsa qʼewiymantawan sanoyacherqa. Payqa “Diosmanta mañakuytawan, onqosqata makisninwan llankhaykuspa, payta, sanoyacherqa” (Hech. 28:8). Chaywanpis Pabloqa paywan khuska viajaj Trófimo sutiyoj amigonta mana sanoyacherqachu (Hech. 20:3-5, 22; 21:29). Viajashajtinku Trofimoqa onqoykuspa manaña paywan viajarqachu, manaqa Miletopi allinyarinankama qhepakorqa (2 Tim. 4:20). Chantapis Pabloj waj amigon Epafrodito sutiyoj, sinchʼita onqoykusqanrayku casi wañorqa, Bibliataj mana ninchu Pablo sanoyachisqanta (Fili. 2:25-27, 30).

11, 12. 1) ¿Imaynatataj Lucas yanaparqa Pablota? 2) ¿Imaraykutaj Lucas doctor kananpaj estudiasqanta ninchej?

¹¹ Lucasqa doctor karqa, Pablowan khuskataj viajaj (Hech. 16:10-12; 20:5, 6; Col. 4:14). Ichapis chay viajespi Pablota, waj cristianosta ima onqoykojtinku yanaparqa (Gál. 4:13). Jesús nerqa jina “onqosqaslla” uj doctorpa yanapayninta necesitanku (Luc. 5:31).

¹² Lucasqa cheqamantapuni uj doctor karqa. Biblia doctor kananpaj maypichus estudiasqanta mana nejtinpis, Laodiceapi kaj escuelapisina yachakorqa. ¿Imaraykú chayta ninchej? Imaraykuchus Pabloqa Laodiceaj qayllanpi kaj Colosasmanta cristianosman Lucas napaykamusunkichej nispa nerqa. Lucas Laodiceapi estudiarqa chayqa, Colosasmanta hermanosta rejserqachá. Chantapis Lucasqa evangelionpi Jesús onqosqasta sanoyachisqanmanta parlaspa, Hechos libropi wakin imasmanta parlaspa doctorespa parlayninkuman jina qhelqarqa. Chaytaj rikuchiwanchej payqa doctorpuni kasqanta.

13. ¿Imatataj yuyarikunanchej tiyan pillapis allinyarinapaj imaynatachus jampikunata yuyaychawajtinchej?

¹³ Kay tiempopeqa ni mayqen hermanopis onqoyninchejmanta sanoyachinawanchejpaj uj milagrota ruwayta atinchu. Chaywanpis ichá wakenqa allinyarinanchejrayku yanapayta munawasunman, mana mañakojtinchejpis yuyaychawasunman. Arí, wakin yuyaychaykunaqa ichá allin kanman. Sutʼincharinapaj, Pabloqa Timoteoman uj chhika vinota ujyananta yuyaycharqa. Imaraykuchus Timoteoqa wijsa nanaywan kasharqa, ichapis chʼichi yakuta ujyasqanrayku (1 Timoteo 5:23 leey).a Chaywanpis sumajta qhawarikunanchej tiyan imatachus wajkuna yuyaychawasqanchejta. Uj hermano ichá ima jampitapis chayri ima hierbatapis ujyanata niwasunman. Chayri ichapis nillawasunmantaj imatachus mikhunanchejta, imatatajchus mana. Ichapis niwasunman ujnin familiarninta chayta ruwasqan onqosqa kashajtin yanapasqanta. Chaywanpis chayqa mana ninayanchu noqanchejtapis sanoyachinawanchejta. Uj jampi chayri uj tratamiento ashkha runasta yanapanman, wakintataj astawan onqochinman (Proverbios 27:12 leey).

14, 15. 1) ¿Imaraykutaj allin yuyayniyoj kananchej tiyan? 2) ¿Imatataj Proverbios 14:15 versículo yachachiwanchej?

¹⁴ Kusisqa kausakunapaj, Jehovata sirvinapaj ima mana onqoyta munanchejchu. Jinapis juchasapa runas kasqanchejrayku onqonchej. Kay tiempopi ashkha tratamientos tiyan, chaywanpis sapa ujninchej ima tratamientotachus ruwachikuyta ajllananchej tiyan. Llakikunapaj jinataj kay pachapi ashkha runas qolqeta japʼinankurayku, onqosqasta chʼaukiyanku. Onqosqasmantaj ninku onqoyninkumanta sanoyanankupaj uj tratamientota tarisqankuta. Ichapis nillankutaj chay tratamientota ruwaspa ashkha runas sanoyasqankuta. Onqoykuspa ichá noqanchejpis allinyarinanchejraykulla astawan kausananchejraykulla, ima tratamientotapis ruwayta munasunman. Chaywanpis Bibliaj nisqanta ama qonqanachu, Biblia nin: “Uj wampu runaqa pejpa nisqantapis japʼikullan; yuyayniyoj runarí allintaraj qhawakun maynintachus rinanta”, nispa (Pro. 14:15).

¹⁵ Sumaj yuyayniyoj kanchej chayqa, imatachus wajkuna yuyaychashawasqanchejta sumajta qhawarikusunchej. Astawanraj pichus yuyaychashawanchej chay runa mana doctorchu kajtin. Tapurikunataj: “¿Cheqamantachu kay vitaminas, jampikunapaj hierbas, imastachus mana mikhunanchej ashkha runasta yanapan? Wajkunata yanapajtinpis, ¿imaynatataj yachani noqatapis yanapanawanta? ¿Chay jampismanta astawanchu yachanay tiyan, doctortapis tapurinaychu tiyan? (Deu. 17:6.)

16. Pillapis allinyanapaj ima tratamientotapis ruwanata chayri jampikunapaj hierbasta ujyanata niwajtinchej, ¿imapitaj tʼukurinanchej tiyan?

¹⁶ Imaynatachus jampichikunanchejta, ima analisistachus ruwachikunanchejta ajllashaspaqa, allin yuyayniyoj kananchej tiyan (Tito 2:12, Dios Parlapawanchej). Pillapis chaykunamanta mana allintachu sutʼinchawajtinchej sumajta qhawarikunanchej tiyan. ¿Imaynachus chay tratamiento ruwakusqanta sutʼinchayta atiwasunmanchu? ¿Sutʼinchawasqanchej sutʼichu? ¿Tukuy doctoreschu chay tratamientomanta yachanku? (Pro. 22:29.) Ichá pillapis niwasunman uj karu llajtapi uj jampita ruwasqankuta, chay jampimantataj mana tukuy doctoreschu yachasqankuta. Chaywanpis, ¿chay jampi kanmanpunichu? Ichapis waj imaswan chhapusqa jampista, layqeriyoswan chhapusqa jampista qoyta munawasunman. Chaytaj mana allinchu kanman, imaraykuchus Jehová Diosqa mana munanchu ‘layqa ruwaykunawan’ chhapusqa imaswan jampikunata (Isa. 1:13, NM; Deu. 18:10-12).

17. ¿Imatataj tukuypis munanchej?

¹⁷ Apostolespa tiemponkupi Diospa llajtanta kamachejkunaqa qotuchakuykunaman cartasta apacherqanku wakin imasta mana ruwanankuta ninankupaj. Chay cartaj tukukuyninpitaj “chaykunamanta karunchakuspaqa, allinta ruwankichej. Walejllata kakushaychej” nispa qhelqarqanku (Hech. 15:28, 29). Walejllata kakushaychej nispaqa, waj parlaypi waj kutikama nisharqanku. Chaytaj yuyarichiwanchej Diosta sirvinapaj tukuypis mana onqoyta munasqanchejta.

18, 19. ¿Imatataj Jehová paraisopi qowasunchej?

¹⁸ Kay sajra pachapi kausasqanchejrayku, juchasapas kasqanchejrayku ima, onqollasunpuni. Rikunchej jina mana suyasunmanchu kay tiempopi Jehová uj milagronejta sanoyachinawanchejta. Chaywanpis mosoj pachapi Jehovaqa manaña onqonanchejta saqenqachu. Apóstol Juanqa ‘kausay yakumanta’, ‘kausay sachʼamantawan’ parlarqa, mayqenkunachus tukuy “nacionesta” sanoyachenqa (Apo. 22:1, 2). Chaywanqa mana nisharqachu kay tiempopi, paraisopi ima jampikunapaj hierbasta ujyanata. Astawanqa Jehovawan, Jesuswan ima, wiñaypaj kausakunapaj imastachus ruwanankumanta parlasharqa (Isa. 35:5, 6).

¹⁹ Paraisopi kausakuyta mayta suyakushanchej. Chay tiempo chayamunankamataj onqosqa kajtinchejpis chayri manapis Jehová munakuwasqanchejmanta mana iskayrayanchejchu. David jinataj Jehová mana saqerparinawanchejpi atienekunchej. Payman cheqa sonqos kasunchej chayqa, wiñaypaj yanapawasunchej (Sal. 41:12).