“Hermanos ukhupi munanakullaychejpuni”

1, 2. ¿Imaraykutaj Pablo Hebreosman cartata qhelqarqa?

KAY 61 watapi Judeapi kaj qotuchakuykunamanta hermanos uj tiempota allinta kausakushasqankupi tʼukurina. Apóstol Pablo Romapi presochasqa kashaspa, tumpamantawan kacharichisqa kayta suyasharqa. Paywan khuska viajaj Timoteotaj carcelmanta chaypachallaraj llojsimorqa, iskayninkutaj Judeamanta hermanosta waturej riyta munarqanku (Heb. 13:23). Chaywanpis phishqa watanman jina Jerusalén llajta romano soldadoswan muyurisqa kanan karqa. Jesustaj ashkha watas ñaupajta “Jerusalén llajtata soldadoswan muyurisqata rikuspa” Judeapi kaj, Jerusalenpi kaj cristianos ayqenankuta nerqa (Luc. 21:20-24).

² Chayta Jesús nisqanmanta 28 watasña pasarqa. Chay tiempopi Judeamanta cristianosqa qhatiykachasqas, ñakʼarichisqas karqanku, jinapis creeyninkupi sinchʼita sayallarqankupuni (Heb. 10:32-34). Chaywanpis chay hermanospa creeyninku mana jaykʼaj jina pruebaman churasqa kanan karqa (Mat. 24:20, 21; Heb. 12:4). Jesuspa nisqanta kasukunankupaj, mana wañunankupaj ima, creeyniyoj kananku karqa, sinchʼitataj sayananku karqa (Hebreos 10:36-39 leey). Chayrayku Jehovaqa munarqa chay hermanosman Pablo cartata qhelqananta. Chay cartatataj Hebreos sutiwan rejsinchej. Chay cartaqa hermanosta aswan qhepapaj wakicherqa, kallpacharqa ima.

 3. ¿Imaraykutaj Pabloj cartanmanta yachakunanchej tiyan?

³ Noqanchejpis Pabloj cartanmanta yachakunanchej tiyan. Imaraykuchus Judeamanta cristianos jina, kikin chʼampaykunallapitaj rikukunchej. Kay qhepa sajra pʼunchaykunapitaj ashkha hermanosninchej qhatiykachasqas, ñakʼarichisqas kaspapis creeyninkupi sinchʼita sayallankupuni (2 Tim. 3:1, 12). Noqanchejmanta ashkhastaj allillanta kausakunchej, nitaj qhatiykachasqaschu kanchej. Chaywanpis Pabloj tiemponmanta cristianos jina, wakichisqas kananchej tiyan. Imaraykuchus tumpamantawan ni jaykʼaj jina creeyninchej pruebaman churasqa kanqa (Lucas 21:34-36 leey).

 4. ¿Imataj 2016 watapaj texto, chantá imaraykutaj may sumaj?

⁴ ¿Imataj yanapawasun qhepaman imapichus rikukunanchejpaj wakichisqa kanapaj? Hebreosman cartapi Pabloqa ashkha yuyaychaykunamanta parlarqa, chaykunataj creeyninchej sinchʼi kananpaj yanapawasun. Chay yuyaychaykunamanta ujnintaj Hebreos 13:1 versiculopi kashan. Chaypi nin: “Hermanos ukhupi munanakullaychejpuni”, nispa. Kay versiculomanta 2016 watapaj texto ajllakun.

 5. ¿Imaynatá “hermanos jina tukuy sonqo” munanakunchej?

⁵ ¿Imaynatá “hermanos jina tukuy sonqo” munanakunchej? Imaynatachus familiawan, sumaj amigosninchejwan munanakunchej ajinata (Juan 11:36). Noqanchejqa mana hermanos kayku nillanchejchu, manaqa cheqamantapuni hermanos kanchej (Mat. 23:8). Pablo nerqa: “Hermanos jina tukuy sonqo munanakuychej, ujkuna ujkunata aswan allimpaj qhawaspa [chayri jatunpaj qhawaspa ñaupajpi kaychej]”, nispa (Rom. 12:10). Kaytaj rikuchiwanchej hermanospura mayta munanakunanchej kasqanta. Kay jina munakoyqa Diospa yuyaychaykunasninman jina kashan, chaytaj Diospa llajtanta yanapan uj familia jina kanankupaj, ujchasqa kanankupaj ima.

 6. ¿Pikunatataj tukuy sonqo munakunchej?

⁶ Uj yachayniyoj runa nisqanman jina cristianoslla librosninkupi “hermanos jina tukuy sonqo munanakuychej” nisqata oqharinku. Ñaupa tiempomanta judiosqa “hermano” nej kanku familiaresnillankuta chayri sumaj amigosnillankuta. Chaywanpis mana judío kaj runataqa ni jaykʼaj hermano nejchu kanku. Chaywanpis cheqa cristianospajqa, Jehovata tukuy yupaychajkuna hermanosninku kanku, ima suyumanta kajtinkupis (Rom. 10:12). Imaraykuchus Jehová Diosninchej purajmanta munanakunanchejta yachachiwanchej (1 Tes. 4:9). Chaywanpis, ¿imaraykú purajmanta munanakunanchej may allin?

 7. ¿Imasraykutaj hermanosninchejwan purajmanta munanakunanchej tiyan?

⁷ Hermanosninchejwan purajmanta munanakunanchej tiyan, Jehová kamachiwasqanchejrayku. Jehovata mana munakuyta atisunmanchu, hermanosninchejta mana munakuspaqa (1 Juan 4:7, 20, 21). Chantapis hermanosninchejwan purajmanta munanakunallanchejtaj tiyan, llakiykunapi rikukuspa yanapanakuyta necesitasqanchejrayku. Pablo hebreo cristianosman cartanta qhelqashaspa, yacharqa wakin cristianos wasisninkuta, tukuy imasninkuta saqespa ayqenanku kasqanta. Jesusqa imaynachus chay ñakʼariy pʼunchaykuna kananta nerqaña (Mar. 13:14-18; Luc. 21:21-23). Niraj chay tiempo chayamushajtintaj, cristianosqa astawanraj tukuy sonqo purajmanta munanakunanku karqa (Rom. 12:9).

 8. Niraj manchay ñakʼariy tiempo qallarishajtin, ¿imatataj ruwananchej tiyan?

⁸ Tumpamantawan manchay ñakʼariy tiempo qallarenqa (Mar. 13:19; Apo. 7:1-3). Chay tiempopitaj kay yuyaychayta kasukunanchej kanqa: “Kunanqa, aylluymanta kajkuna, rispa, wasiykichejman yaykuychej, punkuykichejtataj wisqʼakamuychej. Chaypi uj pisita pakakuychej Tata Diospa kʼajaj phiñakuynin tukukunankama” (Isa. 26:20). “Wasiykichejman yaykuychej” nispaqa ichapis qotuchakuykunamanta parlashan. Chaykunapitaj Jehovata hermanosninchejwan khuska yupaychanchej. Chantapis mana tantakuykunaman riyllachu. Pabloqa hebreo cristianosta yuyaricherqa ‘purajmanta kallpachanakuspa yanapanakunankuta, munanakuypi kausakunankuta, allin ruwaykunata ruwanankuta ima’ (Heb. 10:24, 25). Noqanchejpis kay tiempopi hermanosninchejwan purajmanta munanakusqanchejta kallpachananchej tiyan, imaraykuchus chayqa qhepaman mana allin imasta aguantanapaj yanapawasun.

 9. 1) ¿Maykʼajtaj hermanosninchejta munakusqanchejta rikuchiyta atisunman? 2) Imaynasmantachus Diospa llajtan munakuyta rikuchisqanmanta sutʼinchariy.

⁹ Niraj manchay ñakʼariy tiempo qallarishajtin hermanosninchejman munakuyninchejta imaymanamanta rikuchiyta atisunman. Ashkha hermanosninchej jallpʼa ikhakuykuna, pʼampaj yakus (tsunamis), sinchʼi wayras, loco paras, waj imas kasqanrayku ima mayta ñakʼarinku. Wakin hermanosninchejtaj sinchʼi qhatiykachasqas kanku (Mat. 24:6-9). Wakinkunataj kay sajra pachapi kausakusqanchejrayku sapa pʼunchay qolqemanta ñakʼarinku (Apo. 6:5, 6). Hermanosninchej chʼampaykunapi astawan rikukojtinku, munakuyninchejta astawan rikuchiyta atinchej. Kay pachamanta runas munakuyta mana rikuchejtinkupis, noqanchejqa hermanos jina tukuy sonqo munanakunallanchejpuni tiyan (Mat. 24:12).^[1]

10. ¿Imastataj ukhuncharisun?

¹⁰ Chʼampaykunasniyoj kaspapis, ¿imaynatataj munakuyta rikuchillasunmanpuni? ¿Imaynatataj hermanosninchejman munakuyninchejta rikuchisunman? Apóstol Pabloqa “hermanos ukhupi munanakullaychejpuni” niytawan, imaynasmantachus chay munakuyta rikuchiyta atisqanchejta nerqa. Kunantaj chaykunamanta sojta imasta ukhuncharina.

11, 12. Pablo nisqanman jina, ¿imatataj ruwananchej tiyan? (7 paginapi dibujota qhawariy.)

¹¹ “Ama qonqaychejchu forasterosta wasiykichejman wajyarikuyta” (Hebreos 13:2 leey). ¿Ima ninayantaj chay? Pabloqa mana rejsisqa runaswan kʼachas kananchejta nisharqa. Ichapis kayqa imatachus Abraham, Lot ima ruwasqankuta yuyarichiwanchej. Paykunaqa forasterosta nisunman mana rejsisqa runasta wasinkuman wajyarikorqanku, chaymantaraj yacharqanku chay mana rejsisqa runas ángeles kasqankuta (Gén. 18:2-5; 19:1-3). Kaytataj Pabloqa hebreo cristianosman willarerqa, forasterosta wasinkuman wajyarikuspa munakuyninkuta rikuchinankupaj.

¹² ¿Imaynatataj wajyarikoj kasqanchejta rikuchisunman? Hermanosninchejta wasinchejman wajyarisunman mikhurinapaj, purajmanta kallpachanakunapaj ima. Chantapis qotuchakuyninchejta waturej hermanota, warminta ima mana allinta rejsispapis, qotuchakuyninchejta waturishajtinku wasinchejman wajyarisunman (3 Juan 5-8). Chaypajtaj mana ashkha mikhunatapunichu waykʼunanchej kanqa, nitaj ashkha qolqetapunichu gastananchej kanqa. Astawanpis purajmanta kallpachanakuyta munanchej, nitaj jatunpaj qhawachikuytachu maskʼanchej. Chantapis hermanostaqa wasinchejman wajyarinchej mana wasinkuman wajyarinawanchejta suyaspachu (Luc. 10:42; 14:12-14). Ashkha ruwanasniyoj kaspapis, ni jaykʼaj wajyarikuyta qonqanachu.

13, 14. ¿Imaynatá “presosmanta yuyariku[sunman]”?

¹³ “Presosmanta yuyarikuychej” (Hebreos 13:3 leey). Pablo kayta nispaqa, creeyninkurayku hermanos presochasqa kashasqankumanta parlasharqa. Pabloqa hebreo cristianosta “presosta khuya[sqankurayku]” sumajta ruwankichej nerqa (Heb. 10:34). Chantapis Pablota, Romapi tawa watata preso kashajtin chay qayllapi tiyakoj hermanos yanaparqanku. Romamanta karupi tiyakoj hermanostaj Diosmanta paypaj mayta mañapuspa yanapayta aterqanku (Fili. 1:12-14; Heb. 13:18, 19).

¹⁴ Kay tiempopipis ashkha hermanosninchej creeyninkurayku carcelpi kashanku. Chay qayllapi tiyakoj hermanostaj paykunata imaymanamanta yanapayta atinku. Chaywanpis noqanchejmanta ashkhas chay carcelpi kajkunamanta karupi tiyakunchej. Chay hermanosmanta mana qonqakapusqanchejta, yanapayta ima munasqanchejta rikuchisunman, paykunapaj Diosmanta mayta mañapuspa. Sutʼincharinapaj, Eritreapi ashkha hermanos, hermanas, wawas ima creeyninkurayku carcelpi kashanku, paykunapajtaj Diosmanta mayta mañapuyta atisunman. Chay carcelpi kajkunamantataj Paulos Eyassu, Isaac Mogos, Negede Teklemariam ima kanku, paykunaqa 20 watasmanta astawanña carcelpi kashanku.

15. ¿Imaynatataj qhariwarmi kausayta jatunpaj qhawasqanchejta rikuchisunman?

¹⁵ “Casarasqa qhariwarmi kawsayta jatumpaj qhawaychej” (Hebreos 13:4 leey). Hermanosninchejta munakusqanchejta rikuchillanchejtaj qhariwarmi kausayta jatunpaj qhawaspa, llimphu kausayniyoj kaspa ima (1 Tim. 5:1, 2). Sutʼincharinapaj, uj hermanowan chayri uj hermanawan khuchichakusunman chayqa, payta, familianta ima mayta llakichisunman. Chantapis hermanos ukhupi manaña atienekuy kanmanchu, nitaj munakuypis (1 Tes. 4:3-8). Chantapis uj hermana, qosan khuchichakuymanta millay imasta qhawasqanta yachaspa imaynachus sientekunanpi tʼukurina. ¿Yuyanmanchu qosan munakusqanta, qhariwarmi kausayninkutapis jatunpaj qhawasqanta? Mana, ¿icharí? (Mat. 5:28.)

16. ¿Imaynatataj kapuwasqanchejwan kusisqas kay, hermanosninchejman munakuyninchejta rikuchinapaj yanapawanchej?

¹⁶ “Imachus kunan kapususqaykichejllawan sonqo juntʼasqa kaychej” (Hebreos 13:5 leey). Jehová Diosninchejpi atienekusunchej chayqa kapuwasqallanchejwan kusisqas, sonqo juntʼasqas ima kausakusunchej. ¿Imaynatataj hermanosninchejta munakusqanchejta rikuchinapaj kay yanapawasunchej? Kapuwasqanchejwan sonqo juntʼasqa kaspaqa, qolqemanta chayri waj imasmanta nisqa hermanosninchej aswan sumaj noqanchejpaj kasqankuta reparasunchej (1 Tim. 6:6-8). Chantapis hermanosninchejta mana qhawarasunchu, nitaj imaynatachus kausakushasqanchejmanta quejakusunchu. Manataj hermanosninchejmanta envidiakusunchu, nitaj astawan kapuyniyoj kayta maskʼasunchu. Astawanpis kapuwasqanchejmanta wajkunaman qoriyta atisunchej (1 Tim. 6:17-19).

17. ¿Imaynatá Jehovapi atienekusqanchej hermanosninchejta munakusqanchejta rikuchinapaj yanapawasunchej?

¹⁷ “Tukuy sonqo niyta atinchej: Señorqa yanapawajniy, manataj manchachikusajchu” (Hebreos 13:6 leey). Jehovapi atienekusunchej chayqa jatuchaj chʼampaykunapi rikukuspapis mana manchachikusunchu, kusisqallapunitaj kasunchej. Chaytaj hermanosninchejta kallpachanapaj, sonqochanapaj ima yanapawasunchej (1 Tes. 5:14, 15). Jehovapi atienekullasunpuni chayqa, manchay ñakʼariy tiempopi mana manchachikusunchu, kacharichisqa kayninchej qayllapiña kasqanrayku (Luc. 21:25-28).

18. ¿Imataj yanapawasunchej ancianosta munakunapaj?

¹⁸ “Yuyarikuychej [...] ñawpajman pusa[sunki]chej, chaykunamanta” (Hebreos 13:7, 17 leey). Ancianosqa qotuchakuyrayku mayta llankʼanankupaj tiempochakunku. Noqanchejrayku tukuy imata ruwasqankupi tʼukurejtinchejqa paykunata astawan munakusunchej, astawan jatunpaj qhawasunchej. Ni jaykʼaj munasunmanchu sajra ruwayninchejrayku llakiywan ruwayninkuta juntʼanankuta. Astawanqa tukuy sonqo paykunata kasukuyta munanchej. Ajinamantataj “trabajasqankurayku may munakuywan paykunata allinpaj qhawa[sun]chej” (1 Tes. 5:13).

19, 20. ¿Imataj yanapawasunchej hermanosninchejta astawan munakunapaj?

¹⁹ Noqanchejqa purajmanta munanakusqanchejrayku may rejsisqas kanchej. Pabloj tiemponpipis cristianosqa purajmanta munanakusqankurayku rejsisqas karqanku. Jinapis Pabloqa chay cristianosta “mañakuyku astawan astawan munakuypi wiñanaykichejta”, nispa nerqa (1 Tes. 4:9, 10). Chaytaj yachachiwanchej, hermanosninchejta astawan munakunapaj kallpachakuna kasqanta.

²⁰ Qotuchakuyninchejpi kay watapaj ajllasqa versiculota letreropi rikuspa, tapurikunachej: “¿Astawanchu wajyarikuyta yachanay tiyan? ¿Imaynatá carcelpi kaj hermanosta yanapayman? ¿Qhariwarmi kausayta jatunpajchu qhawani? ¿Imataj yanapawanman kapusqallaywan kusisqa kausakunaypaj? ¿Imataj Jehovapi astawan atienekunaypaj yanapawanman? ¿Imaynatá ancianosta astawan kasukuyman?”, nispa. Kay sojta imasta ukhuncharisqanchejman jina ruwanapaj kallpachakusunchej chayqa, kay watapaj ajllasqa textoqa Pabloj nisqanta kasukunapaj yanapawasunchej, pay nerqa: “Hermanos ukhupi munanakullaychejpuni”, nispa (Heb. 13:1).