¿Yuyarikunkichu?

¿Kay killasmanta Torremanta Qhawaj revistasta leerqankichu? ¿Kay tapuykunaman kutichiyta atiwajchu?

¿Imaraykú Jehová Israel llajtapi guerras kananta saqerqa?

Jehovaqa munakuyniyoj. Chaywanpis wakin kutisqa llajtan ñakʼarichisqa kajtin maqanakunankuta kamacherqa. Dioslla niyta atej maykʼajchus guerraman rinankuta, pitajchus rinanta (w15 1/11, páginas 4, 5).

¿Imatá tatas ruwananku tiyan wawasninkuman jovenyashajtinku Jehovata sirviyta yachachinankupaj?

Tatasqa wawasninkuta munakunanku tiyan. Llampʼu sonqos kananku tiyan, chaytataj ruwayninkuwan rikuchinanku tiyan. Chantapis wawasninkuta entiendenankupaj kallpachakunanku tiyan (w15 15/11, páginas 9-11).

¿Imaraykú mana yuyananchejchu tiyan Pedroj cuentanmanta papa kasqanta?

Mateo 16:17, 18 versiculospi Jesusqa mana nisharqachu apóstol Pedro iglesiaj chayri congregacionpa uman kananta. Nitaj Pedroman aswan sumaj cargotachu qosharqa, imaraykuchus Bibliaqa Jesuslla congregacionmanta esquina rumi kananta nin (1 Ped. 2:4-8) (w15 1/12, páginas 12-14).

¿Imatataj yachananchej tiyan niraj parlashaspa?

Sumajta parlayta munanchej chayqa, sumajta tʼukurinanchej tiyan: maykʼajchus parlanata (Ecl. 3:7), imatachus ninanchejta (Pro. 12:18), imaynatachus ninanchejta ima (Pro. 25:15) (w15 15/12, páginas 19-22).

¿Imastataj cheqa cristianos mana ruwankuchu?

Cheqa cristianosqa mana llullakunkuchu, nitaj pitapis qhasimanta tumpankuchu. Paykunaqa cheqa kajta parlanku, nitaj mana allin kajta, wajkunata pʼenqaypi rikhurichinankupaj jina parlankuchu. Mana chʼaukiyankuchu, nillataj suwakunkuchu (wp16.1, página 5).

Biblia nisqanman jina, ¿pikunataj karqanku “kuraj sacerdotes”?

‘Kuraj sacerdotes’ nispaqa aswan rejsisqa sacerdotesmanta parlashan. Paykunamanta wakintaj aswan ñaupajta kuraj sacerdotes jina llankʼarqanku (wp16.1, página 10).

¿Imaynatá qhawananchej tiyan Señorpa Cenanpi tʼantata mikhojkunata, vinotapis ujyajkunata?

Ajllasqa cristianosta mana jatunchanchejchu. Paykunaqa mana suyankuchu wajkuna jatunchanankuta. Nitaj pillamanpis ajllasqa kasqankuta ninkuchu (Mat. 23:8-12) (w16.01, páginas 23, 24).

¿Imatá yachakunchej Abraham Jehovaj amigon kasqanmanta?

Abrahamqa Jehovata sumajta rejserqa, ichapis Sem sutiyoj runa yachachisqanrayku. Tiempo pasasqanman jinataj, Jehovamanta astawan yachakorqa imaynatachus payta, familianta ima qhawasqanrayku. Noqanchejpis kikinta ruwasunman (w16.02, páginas 9, 10).

¿Pitaj Bibliata tʼaqarqa capitulospi, versiculospi ima?

Stephen Langton, 1.201 wata chaynejpi, Bibliata capitulospi tʼaqarqa. Chay tiempopajqa judío qhelqeris Ñaupa Testamento nisqata versiculospi tʼaqasqankuña. Kay 1550 wata chaynejpitaj, Robert Estienne sutiyoj runaqa Mosoj Testamentota versiculospi tʼaqarqa (wp16.2, páginas 14, 15).

Satanás, Jesusta juchaman urmachiyta munashaspa, ¿templomanchu pusarqa chayri mosqoypi jinallachu templota rikucherqa?

Mana yachanchejchu. Mateo 4:5; Lucas 4:9 versiculosqa rikuchinku Satanás, Jesusta temploman pusasqanta chayri mosqoypi jinalla templota rikuchisqanta (w16.03, páginas 31, 32).

¿Imapí willayninchej chhulla jina?

Chhullaqa pisimanta pisi rikhurin. Chhullaqa uj qhasa yakitu jina, kausananchejpajtaj yanapawanchej, Jehovamantataj uj bendición (Deu. 33:13). Chantapis chhullaqa tukuyninchej Jehovamanta willamunapaj kallpachakusqanchejwan kikinchakun (w16.04, página 4).