Uj sumaj regalo

JORDANQA lápiz tajanata barquitoman rijchʼasqata japʼisharqa. Chaytaj paypajqa may valorniyoj karqa. Pay nin: “Chaytaqa Russell regalawarqa wawa kashajtiy, paytaqa familiay unayña rejserqa, amigoykutaj karqa”, nispa. Jordanqa, Russell wañupojtinraj yacharqa, abuelonpa, tatasninpa ima sumaj amigonku kasqanta, llakiypi kashajtinkutaj mayta yanapasqanta. Jordan nin: “Kunanqa Russellmanta astawan yachani, chayrayku regalitontaqa aswan valorniyojpaj qhawani”, nispa.

Jordanpa kausaynenqa rikuchin, uj regalota mana tukuychu kikinta qhawasqankuta. Wakenqa uj regalota pisipaj qhawankuman, jinapis agradecekuyta yachaj runaqa may valorniyojpaj qhawanman. Bibliapeqa aswan sumaj regalomanta parlan, nintaj: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:16).

¡Chay regalota japʼejqa wiñay kausayta japʼin! ¿Kanmanchu waj regalo aswan valorniyoj? Wakin runas mana ajinatachu qhawajtinkupis, cheqa cristianospajqa may valorniyoj (Salmo 49:8, 9; 1 Pedro 1:18, 19). ¿Imaraykutaj Dios, Wawanpa kausayninta runasman regalota jina qorqa?

Apóstol Pablo jinata sutʼincharqa: “Uj runanejta jucha kay mundoman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku” (Romanos 5:12). Adanqa yachashaspa Diosta mana kasukusqanrayku juchallikorqa, chayrayku wañorqa. Adanpa juchanraykutaj, tukuy runas wañunchej.

“Juchaj pagonqa wañuymin. Diospa regalonrí wiñay kausay, Señorninchej Cristo Jesusnejta” (Romanos 6:23). Diosqa wañuymanta runasta kacharichinanpaj Wawan Jesucristota Jallpʼaman kachamorqa, mana juchayoj kausayninta tukuy runasrayku qonanpaj. Juchamanta kacharichisqa kasqankurayku Jesuspi creejkunaqa wiñay kausayta japʼenqanku (Romanos 3:24).

Dios, payta yupaychajkunaman ima bendicionestachus qonanmanta parlaspa, apóstol Pablo nerqa: “Diosman agradecekuna, may sumaj regalota qowasqanchejmanta”, nispa (2 Corintios 9:15). Dios juchamanta kacharichiwasqanchejqa uj sumaj regalo, ni imawan kikinchakunchu. Dios waj imasta qowasqanchejmanta, ¿imaraykutaj juchamanta kacharichiwasqanchej aswan sumaj regalo? ¿Imaraykutaj waj imaswan mana kikinchakunchu?a ¿Imatá ruwasunman agradecekusqanchejta rikuchinapaj? Qhepan yachaqanaspi chay tapuykunaman kutichishan.