Ajllayta atisqanchejta jatunpaj qhawana

1, 2. 1) ¿Imatá runas ninku imatapis ajllayta atisqanchejmanta? 2) ¿Imatataj Biblia yachachin ajllayta atisqanchejmanta? 3) ¿Ima tapuykunamantaj kutichisunchej?

UJ WARMI kausayninpi uj imata ajllananpaj kashajtin, amigonta nerqa: “Ama tʼukuriy niwaychu, imatachus ruwanallayta niway. Chaytaqa ruwayta atillasaj”, nispa. Chay warmeqa imatachus ruwananta ninankuta munarqa, sapallanmanta imatachus ruwananta ajllananmantaqa. Payqa Diospa regalonta pisipaj qhawasharqa. ¿Imataj chay regalo? Kausayninchejpi imatapis ajllayta atisqanchej. Qanrí, ¿qanpunichu kausayniykipi imatapis ajllanki? Chayrí, ¿wajkuna qanrayku ajllanankutachu munanki? Imatapis ajllayta atisqaykita, ¿jatunpajchu qhawanki?

² Runasqa imatapis ajllayta atisqanchejmanta, tukuy imata ninku. Wakenqa ninku: “Diosqa imatachus ruwananchejta ajllanña, niña imatapis ajllayta atisunmanchu”, nispa. Wakintaj ninku: “Imatapis munayninchejman jina ajllayta atispalla, ajllayta atisqanchejta nisunman”, nispa. Jinapis Bibliaqa yachachin, imatapis sumajta ajllanapaj ruwasqa kasqanchejta (Josué 24:15 leey). Bibliapeqa kay tapuykunaj kutichiyninta tarillanchejtaj: ¿Tukuy imatachu munayninchejman jina ajllasunman? ¿Imaynatá kausayninchejpi imatapis ajllasunman? ¿Imaynatá ajllasqanchejwan Jehovata munakusqanchejta rikuchisunman? ¿Imaynatá wajkunaj ajllasqankuta jatunpaj qhawasunman? Kay yachaqanapeqa chay tapuykunaman kutichisun.

 3. ¿Imatataj Jehová ruwarqa ajllayta atisqanwan?

³ Jehovataqa ni pipis kamachiyta atinmanchu imatachus ruwananta. Pay imaynatachus imatapis ruwayta ajllasqanmantaqa, mayta yachakusunman. Payqa israelitasta ajllarqa “may sumaj ajllasqa ayllun” kananpaj (Deu. 7:6-8). Jehovaqa israelitasta ajllarqa, imatachus Abrahamman nisqanta juntʼayta munasqanrayku (Gén. 22:15-18). Chantapis Jehovaqa imatapis munakuywan ajllan, cheqan kajman jinataj. Chaytataj sutʼita reparasunman, israelitas mana kasukojtinku imaynatachus paykunata cheqanchasqanpi. Israelitas tukuy sonqo pesachikojtinku, Jehovaqa paykunata khuyakoj, munakojtaj. Jehová nerqa: “Noqa paykunata jampisaj juchachakusqankumanta. Noqa paykunata tukuy sonqo munakusaj mana munakunapaj jina kashajtinkupis”, nispa (Ose. 14:4). Arí, Jehovaqa imatachus ajllasqanwan wajkunata yanapaj. Paymantataj mayta yachakusunman.

4, 5. 1) ¿Pitaj ñaupajta ruwasqa karqa ajllayta atinanpaj jina, chantá imaynatá imatapis ajllarqa? 2) ¿Imatá tapurikunanchej tiyan?

⁴ Jehovaqa angelesta, runasta ima ajllayta atinankupaj jina ruwarqa. Ñaupajtaqa Jesusta ruwarqa. Payqa Diospa rijchʼayninman jina ruwasqa karqa, kausayninpi imatapis ajllayta atinanpaj jinataj (Col. 1:15). ¿Imaynatá Jesús imatapis ajllarqa? Niraj kay Jallpʼaman jamushaspa, Tatanmanta ni jaykʼaj karunchakuyta ajllarqa. Chayrayku Diospa contranta Satanás oqharikojtin, mana payman ujchakorqachu. Jallpʼaman jamuspataj, Satanás juchaman urmachiyta munajtin, Jesusqa mana urmarqachu (Mat. 4:10). Chantá wañunanpaj uj chʼisi faltashajtin, Jesusqa Tatanman nerqa paypa munayninta ruwayta munasqanta. Jesús nerqa: “Tatáy, munankichus chayqa, noqamanta karunchay, ñakʼarinay kashan, chayta; chaywampis ama munaynillayqa kachunchu, manachayqa qampa munayniyki ruwasqa kachun”, nispa (Luc. 22:41, 42). ¿Jesús jina ruwayta atisunmanchu? ¿Imatapis ajllayta atisunmanchu Jehovata jatunchanapaj jina, munaynintataj ruwanapaj?

⁵ Arí, Jesús jina ruwayta atisunman. Noqanchejpis Diospa rijchʼayninman jina ruwasqa kanchej (Gén. 1:26). Chaywanpis mana Jehová jinachu tukuy imata munasqanchejman jina ajllayta atinchej. Bibliaqa niwanchej, Jehová kamachiykunata qowasqanchejta. Diostaj chay kamachiykunata kasukunanchejta munan. Sutʼincharinapaj, familiapi warmisqa qosankuman kʼumuykukoj sonqo kananku tiyan. Wawastaj tatasninkuta kasukunanku tiyan (Efe. 5:22, 23; 6:1). Chayrayku tapurikunachej: “¿Diospa qosqan kamachiykunata kasukunichu?”, nispa. Wiñay kausayta japʼinanchejqa, imaynatachus chay tapuyman kutichinanchejmanta kashan.

 6. ¿Imaraykutaj imatapis ajllanapaj kamachiykunata necesitanchej? Sutʼinchay.

⁶ Kamachiykunata kasukuna kajtin, ¿imaraykutaj ninchej kausayninchejpi imatapis ajllayta atisqanchejta? Imaraykuchus kamachiykunaqa allinninchejpaj. Sutʼincharinapaj, autota waj llajtaman apananchejpi tʼukurina. Leyes mana kajtenqa, autosqa munasqankuman jina correnkuman, chayri may ladontapis rillankuman. Ajinapi autota apaytaqa manchachikusunman, ¿icharí? Chayrayku kamachiykuna kasqanqa allinninchejpajpuni, sumajta ajllanapajtaj yanapawanchej. Kunantaj Bibliamanta wakin runaspa kausayninkumanta yachakuna. Paykunaj kausayninkoqa, Jehovaj kamachiykunasnin allinninchejpajpuni kasqanta rikuchiwasun.

 7. 1) ¿Imapitaj Adanwan animaleswan mana kikinchu karqanku? 2) ¿Imastataj Adán sumajta ajllarqa?

⁷ Jehovaqa ñaupaj runata, angelesta jinallataj ruwarqa imatapis ajllayta atinanpaj. Animalestarí mana ajinatachu ruwarqa. ¿Imastataj Adán sumajta ajllarqa? Adanqa animalesman sutista churarqa. Biblia nisqanman jina, Diosqa animalesta “runaman qhaterqa, sapa ujta sutichanampaj”. Chantá Adanqa animalesta qhawariytawan, imaynachus kasqankuman jina suticharqa. Jehovataj Adanpa ajllasqan sutista, allinpaj qhawarqa. “Chay runaj sutichasqasninwantaj sapa uj kashanku” (Gén. 2:19).

 8. 1) ¿Imata ruwaytataj Adán ajllarqa? 2) Adanpa ajllasqanrayku, ¿imapitaj rikukunchej?

⁸ Jehovaqa Adanman kamacherqa, Jallpʼata uj kʼacha huertaman tukuchinanta. Jehová nerqa: “Miraychej, kay pachaman juntʼaychej; atiyniyojtaj kaychej, kamachispa [...] challwasta, tukuy pʼisqosta, jallpʼa patapi tukuy qhatatakojkunatawan”, nispa (Gén. 1:28). Jinapis Adanqa mana mikhunanchu karqa, chay sachʼaj poqoyninta mikhuykorqa. Chayta ruwaspataj Jehovaj kamachiykunasninta mana kasukorqachu. Adán mana allintachu ajllasqanrayku, may unaytaña ñakʼarinchej (Rom. 5:12). Adán juchallikusqanrayku imaschus kasqanta yuyareyqa, yanapawasun imatapis allinta ajllanapaj, Jehovata kasukunapaj ima.

 9. ¿Imata ajllajtataj Jehová israelitasta saqerqa, chantá imatá israelitas nerqanku?

⁹ Adanwan Evawan juchallikusqankurayku, tukuy runas juchata, wañuyta ima herenciata jina japʼinchej. Jinapis imatachus ruwananchejta ajllayta atisunmanraj. Chaytataj yachanchej, imatachus Jehová Israel llajtawan ruwasqanpi. Jehovaqa israelitasta ajllajta saqerqa, sumaj ayllun kayta munasqankutachus manachus (Éxo. 19:3-6). Israelitasqa Jehovaj ayllun kayta ajllarqanku, kamachiykunasninta kasukuytapis. Israelitas nerqanku: “Tata Diospa nisqasnintaqa kasusqayku”, nispa (Éxo. 19:8). Jinapis israelitasqa, imatachus Jehovaman nisqankuta juntʼayta qonqaporqanku. Ama paykuna jina ruwanachu. Ajllayta atisqanchejtaqa, may sumajpaj qhawana. Chantapis Jehovaj qayllallanpipuni kana, kamachiykunasnintataj kasukuna (1 Cor. 10:11).

10. ¿Pikunaj kausayninkutaj rikuchiwanchej Diosta jatunchanapaj jina imatapis ajllayta atisqanchejta? (12 paginapi dibujota qhawariy).

¹⁰ Hebreos 11 capituloqa, 16 runaspa sutisninkuta oqharin. Paykunaqa Diosman cheqa sonqos karqanku, paypa churasqan kamachiykunatataj kasukuyta ajllarqanku. Kasukusqankurayku ashkha bendicionesta japʼerqanku, uj sumaj suyakuyniyojtaj karqanku. Sutʼincharinapaj, Noeqa sinchʼi creeyniyoj karqa. Payqa Diospa nisqanta kasukuspa arcata ruwarqa. Ajinamanta familianta salvarqa, qhepaman jamoj miraynintapis (Heb. 11:7). Abrahamwan Sarawanqa, Diospa kamachisqanta tukuy sonqo kasukorqanku, ima jallpʼatachus qonanta nisqanmantaj rerqanku. Aswan qhepaman, Ur llajtaman “kutiripuyta atinkuman karqa”. Jinapis paykunaqa imastachus Dios qonanta nisqanpi astawan yuyarqanku. Biblia nin: “Paykunaqa aswan sumaj llajtata munasharqanku”, nispa (Heb. 11:8, 13, 15, 16). Moisesqa Egipto llajtaj qhapaj kayninta qhesacharqa, “Diospa ayllunwan khuska ñakʼarichisqa kayta ajllakorqa, manataj munarqachu pisi pʼunchaykunapaj kusikuspa jucha kawsaypi puriyta” (Heb. 11:24-26). Paykuna jina creeyniyoj kanachej. Ajllayta atisqanchejta sumajpaj qhawana, Diospa munayninman jina imatapis ajllaspa.

11. 1) ¿Imatataj ajllakuyta atinchej? 2) ¿Imaraykutaj sumajta ajllayta munanchej?

¹¹ Ichapis wajkuna noqanchejrayku imatapis ajllanankuta munasunman. Chayta ruwaspaqa, uj jatun bendicionta mana japʼishasunmanchu. ¿Mayqentaj chay bendición? Chayqa Deuteronomio 30:19, 20 (leey) versiculospi sutʼinchakun. Versículo 19 nisqanman jina, Jehovaqa israelitasman uj imata ajllanankuta nerqa. Versículo 20 nisqanman jinataj, Jehovaqa israelitas munakuyninkuta rikuchinankuta saqerqa. Noqanchejpis Jehovata yupaychayta ajllakuyta atinchej. Ajinata ruwaspaqa, Jehovata jatunchayta atisunman, munakusqanchejtataj rikuchisunman.

12. ¿Imatá ni jaykʼaj ruwananchejchu tiyan ajllayta atisqanchejwan?

¹² Amigoykiman may sumaj regalota qosqaykipi tʼukuriy. Amigoyki chay regalota qʼopaman wijchʼurpajtin chayri pillatapis chaywan ñakʼarichejtin, ¿maytacharí sonqoyki nanasunkiman? Jehová ajllayta atinapaj jina ruwawasqanchejqa, uj sumaj regalo. Chayrayku maytachá Diospa sonqon nanan, runas mana allin kajta ruwayta ajllajtinku, chayri wajkunata ñakʼarichejtinku. Bibliaqa “qhepaman manchay sajra pʼunchaykuna” kananta nerqa, runaspis “mana graciasta qoyta yachajkuna” kanankuta (2 Tim. 3:1-4). Chayrayku, ¿imaynatá Jehovaman agradecekusunman, ajllayta atinapaj ruwawasqanchejmanta? ¿Imaynatá allin kajtapuni ajllasunman?

13. Kacharichisqa kasqanchejrayku, ¿imatataj mana ruwananchejchu tiyan?

¹³ Tukuypis ajllayta atinchej: amigosninchejta, ima ropatachus churakuyta, imaynatachus kʼachanchakuyta, imawanchus kusirikuytapis. Jinapis allinta qhawarikuna tiyan, ajllayta atisqanchejrayku ama Diospa chejnisqan imasta ruwananchejpaj, nitaj kay mundomanta runas jina kausananchejpajpis (1 Pedro 2:16 leey). Kacharichisqa kasqanchejrayku sajrata ruwanamantaqa, tukuy imata ruwanachej “Dios jatunchasqa kanampaj” (Gál. 5:13; 1 Cor. 10:31).

14. ¿Imaraykú imallatapis ajllashaspa Jehovapi atienekunanchej tiyan?

¹⁴ Jehová niwanchej: “Noqamin Señorniyki Tata Dios kani; noqa yachachiyki imachus qampaj allin kasqanta. Noqa may ñantachus purinaykita rikuchiyki”, nispa (Isa. 48:17). Jehovapi atienekuspaqa, kamachisqanta kasukusunchej, allin kajtataj ajllasunchej. Kʼumuykukoj sonqowan nisun: “Yachani runaqa kawsayninmanta mana dueñochu kasqanta, nitaj kawsaynimpi imatachus ruwananta niyta atisqanta”, nispa (Jer. 10:23). Adanwan israelitaswan, Jehovaj kamachisqasninta mana kasukuyta ajllarqanku, paykunallapitaj atienekorqanku. Ama paykuna jina ruwanachu. Noqallanchejpi atienekunamantaqa, ‘tukuy sonqonchejwan Jehovapi atienekuna’ (Pro. 3:5).

15. ¿Imatataj yachakunchej Gálatas 6:4, 5 versiculosmanta?

¹⁵ Wajkuna kausayninkupi imatapis ajllasqankuta jatunpaj qhawananchej tiyan. Tukuyninchej ajllayta atinapaj ruwasqa kasqanchejrayku, mana kikintachu imatapis ajllasun. Imaynatachus kausanata, imaynatachus Diosta yupaychanatapis, sapa uj ajllananchej tiyan. Gálatas 6:4, 5 (leey) imatachus nisqanta yuyarina. Chay versiculosqa yachachiwanchej, sapa cristiano ruwananta juntʼanan kasqanta. Chayta entiendespaqa, wajkunaj ajllasqankuta mana qhawarasunchu.

16, 17. 1) ¿Ima chʼampaypitaj Corintomanta hermanos rikukorqanku? 2) ¿Imaynatá Pablo Corintomanta hermanosta yanaparqa, chantá imatataj chaymanta yachakusunman?

¹⁶ Hermanosninchejta imatapis ajllajta saqenanchej tiyan. Imaraykuchus chayta ruwananchej kasqanta Bibliapi qhawarina. Corintomanta hermanosqa, uj chʼampaypi rikukorqanku. Paykunaqa mercadopi vendekusqan aychata mikhuy, allinchus manachus kasqanmanta chʼajwasharqanku. Imaraykuchus lantisman jaywasqa aycha karqa. Wakenqa chay aychata mikhullaj kanku, sonqonkutaj mana juchachajchu. Imaraykuchus yacharqanku lantisqa mana imachu kasqankuta. Jinapis Diosta niraj rejsishaspa lantista yupaychajkunaqa, chay aychata mikhuyta juchapaj qhawaj kanku (1 Cor. 8:4, 7). Chayqa uj jatun chʼampay karqa, congregaciontapis tʼaqanachinman karqa. ¿Imaynatá Pablo chay hermanosta yanaparqa?

¹⁷ Pabloqa Corintomanta hermanosta yuyaricherqa: “Mana mikhunachu aswan allimpaj Dioswan qhawachiwanchej”, nispa (1 Cor. 8:8). Chantá Pablo nerqa: “Allinta qhawakuychej, imallatapis ruwayta atisqaykichejqa ama miskʼana jinachu kanampaj pisi creeyniyojkunapaj”, nispa (1 Cor. 8:9). Sonqo yuyayninpi pisi kallpayojkunamantaj nerqa, mercadomanta aychata mikhojkunata ama juchachanankuta (1 Cor. 10:25, 29, 30). Rikunchej jina, Diosta yupaychaypeqa sapa uj cristiano imatachus ruwananta ajllanan tiyan. Chayrayku hermanosninchej imatapis ajllajtinku, juchʼuy imas kajtinpis, jatunpaj qhawananchej tiyan (1 Cor. 10:32, 33).

18. ¿Imaynatá rikuchisunman Diospa qowasqanchej regalota jatunpaj qhawasqanchejta?

¹⁸ Jehovaqa imatachus ruwananchejta ajllajta saqewanchej, chaytaj cheqamantapuni kacharichiwanchej (2 Cor. 3:17). Chayta ruwasqanchejta, may sumajpaj qhawanchej. Imaraykuchus ajllayta atisqanchejwanqa, Jehovata munakusqanchejta rikuchiyta atinchej. Chayrayku Diosta jatunchanapaj jina imatapis ajllana, wajkunaj ajllasqankutapis ama qhawaranachu. Chayta ruwaspaqa Jehová qowasqanchej regalota, jatunpaj qhawasunchej.