Congregacionta ñaupajman apajkuna Timoteomanta yachakuychej

PASAJ watapi mundontinpi may chhika hermanosqa ancianos jina, siervos ministeriales jinataj churasqa karqanku. Hermanóy, qanpis kusisqachá kashanki kunallanraj ancianota jina chayri siervo ministerialta jina churasusqankumanta.

Chaywanpis ichá mancharisqa kashanki imaynatachus ruwanaykita juntʼanaykimanta. Chaymanta parlaspa, uj joven anciano Jason sutiyoj jinata nin: “Ancianota jina churashawajtinku, yuyarqani: ‘Nichá kay cargota juntʼayta atiymanchu’”, nispa. Moiseswan Jeremiaswanpis ajinallapitaj rikukorqanku. Paykunaqa, yuyarqanku cargonkuwan mana juntʼayta atinankuta (Éxo. 4:10; Jer. 1:6). Hermanóy, ichá qanpis paykuna jinallataj yuyashanki. Chayrayku kunan parlarisun imaynatachus ruwanasniykita sumajta juntʼanaykimanta. Chaypajqa Timoteomanta yachakusunchej (Hech. 16:1-3).

Pabloqa, ichá Timoteota 20 watayoj jina kashajtin nerqa paywan misionero jina viajananta. Timoteotaj jovenllaraj kasqanrayku, ichapis manchachikorqa imaynatachus ruwanasninta juntʼananta (1 Tim. 4:11, 12; 2 Tim. 1:1, 2, 7). Ajina kajtinpis Pabloqa chunka watanman jina, Filipos llajtapi kaj congregacionman nerqa: ‘Señor Jesuspa munaynin kajtenqa, suyashani pisimantawan qankunaman Timoteota kachamuyta. Imaraykuchus qankunaman kachamunaypajqa, mana pipis Timoteo jina kanchu’, nispa (Fili. 2:19, 20).

Reparanchej jina, Timoteoqa sumaj wakichisqa anciano karqa. Paymantataj sojta imasta yachakusunchej.

1. Wajkunata tukuy sonqo yanaparqa. Pabloqa Filipos llajtapi kaj hermanosman nerqa: ‘Timoteoqa tukuy sonqo yanapasonqachej’, nispa (Fili. 2:20). Timoteoqa tukuy sonqopuni hermanosta yanapaj. Diosmanta sumajta yachachispataj hermanosta kallpachaj. Tukuy kapusqanwantaj hermanosta yanapaj.

Chayrayku hermanóy, mana wakin choferes jinachu kanayki tiyan. Wakin choferesqa paradankuman horanpi chayanankurayku, mana pasajerosta oqharinkuchu, paykunallapi yuyasqankurayku. Chaymanta parlaspa 20 watasta jina sirvej uj anciano William sutiyoj, mosoj ancianosman, mosoj siervos ministerialesmanpis jinata nin: “Hermanosta kʼachamantapuni parlapayaychej. Chantapis kallpachakuychejpuni necesitasqankupi yanapanaykichejpaj. Amataj congregacionpi ruwanasnillaykichejwanchu musphaychej”, nispa.

2. Diosmanta willayta ñaupajman churarqa. Timoteoqa mana waj hermanos jinachu karqa. Chayrayku Pablo jinata nerqa: “Tukuy chay ujkunaqa paykunaj allinnillankuta maskʼanku, manataj Jesucristoj munaynintachu”, nispa (Fili. 2:21). Apóstol Pabloqa chayta nishaspa Romapi kasharqa. Chaypitaj repararqa, Romamanta hermanos ruwanasnillankuwan musphashasqankuta. Reparallarqataj Diosmanta willanankupajpis mana kallpachakusqankuta. Timoteotajrí mana chay hermanos jinachu karqa. Imajtinchus Diosmanta astawan willananpaj invitajtinku Isaías jina nej: “Kaypi kani, noqata kachaway ari”, nispa (Isa. 6:8).

Hermanóy, ama ruwanasnillaykiman qokunaykipajqa, “imaschus aswan allin imas kasqanta” reparay (Fili. 1:10). Chaypajqa Diospa munayninta juntʼanaykipaj kallpachakuy. Tiempoykitapis sumajta qhawarikuy, ama qhasi imaspi usuchinaykipaj. Pabloqa Timoteoman nerqa: “Imastachus jóvenes munapayanku chaykunamanta ayqey. Astawanqa tukuy atisqaykita kallpachakuy: cheqan kausayniyoj, creeyniyoj, munakuyniyoj, sonqo tiyaykuyniyoj ima kanaykipaj”, nispa (2 Tim. 2:22).

3. Diospaj esclavo jina llankʼarqa. Pabloqa Filipos llajtapi kaj hermanosman nerqa: “Yachankichej jina, Timoteoqa allin runa kasqanta rikucherqa. Imaraykuchus payqa, noqawan khuska esclavo jina llankʼarqa sumaj willaykunata willaspa. Imaynatachus uj wawa tatanwan khuska llankʼan, ajinata”, nispa (Fili. 2:22). Arí, Timoteoqa, Pablowan esclavos jina llankʼarqanku Diosmanta willaspa. Jinamantataj iskayninku yuntas karqanku.

Diospa llajtanpeqa ashkha ruwanas tiyan. Qantaj hermanóy, chaypi yanapakuwaj. Diospaj astawan llankʼaspaqa, sonqo juntʼasqa kanki, hermanoswanpis aswan ujchasqa kanki. Chayrayku “Señorpa ruwayninpi ashkhata” llankʼanaykipaj kallpachakullaypuni (1 Cor. 15:58).

4. Pabloj yuyaychasqanta uyarerqa. Pabloqa Timoteoman nerqa: “Qantajrí yachachisqayta sumajta uyarerqanki, qhaterqankitaj kausayniyta, imatachus ruwayta munasqaytapis. Chantapis rikorqanki creesqayta, pacienciayta, munakuyniyta, sinchʼita sayasqayta ima”, nispa (2 Tim. 3:10). Timoteoqa Pablo jina ruwasqanrayku, jatuchej ruwanasta japʼerqa (1 Cor. 4:17).

Hermanóy, experienciayoj hermanoswan amigos ruwakuy. Ajinamanta paykunawan sumajta yuyaychachikunaykipaj. Chaymanta parlaspa, uj experienciayoj anciano Tom sutiyoj jinata nin: “Uj experienciayoj ancianoqa amigoyman tukuspa mayta yanapawarqa. Imata ruwanaypajpis payta tapurikojpuni kani. Yuyaychawasqantapis uyarej kani. Jinamantataj ruwanasniyta juntʼayta atillarqani”, nispa.

5. Diosman qayllaykunanpaj kallpachakullarqapuni. Pablo Timoteoman nerqa: “Tukuy atisqaykita kallpachakuy, Diosta tukuy sonqo yupaychayta atinaykipaj”, nispa (1 Tim. 4:7). Kayta entiendenapajqa, uj futbolistamanta parlarina. Uj futbolista sumajta pujllananpajqa, uj entrenador mayta yanapan. Chaywanpis chay futbolistaqa, sapallan kashaspapis sumajta entrenanallantaj tiyan. Chantachá Pabloqa Timoteoman nerqa: “Diosmanta Qhelqasqata wajkunaj ñaupaqenpi leellaypuni. Wajkunata kallpachay, yachachiytaj [...]. Chay imaspi tʼukuriy. Chaykunapi sonqoykita churay. Ajinamanta ñauparishasqaykita tukuy runas sutʼita rikunankupaj”, nispa (1 Tim. 4:13-15).

Qanpis hermanóy, Bibliata astawan entiendenaykipaj kallpachakullaypuni. Ruwanasniykita sumajta juntʼanaykipajpis, Diospa llajtan kamachisqanman jinapuni ruway. Amataj yachasqallaykipi atienekuychu experienciayoj kajtiykiñapis. Timoteo jinataj, imatachus yachachishasqaykita sapa kuti allinta qhawarikuy (1 Tim. 4:16).

6. Jehová Diospa atiyninwan yanapachikorqa. Pabloqa Timoteo Diospaj mayta llankʼasqanmanta tʼukurispa, payman nerqa: “Chay valorniyoj japʼisqayki imastaqa, allinta waqaychay Diospa atiyninpa yanapayninwan, mayqenchus noqanchejpi kashan, chaywan”, nispa (2 Tim. 1:14). Timoteoqa Diospa qayllallanpipuni kananpaj, Diospa atiyninwan yanapachikorqa.

Chaymanta parlaspa, hermanonchej Donald pichus unayña anciano jina llankʼashan, jinata nin: “Diospa llajtanta ñaupajman apajkunaqa, Diospa qayllallanpipuni kanankupaj Bibliata ukhunchanallankupuni tiyan. Ajinamanta ‘kallpankoqa astawan astawan yapakonqa’. Chantapis Diospa atiyninta mañakojtinku paypa munayninman jinataj kausakojtinkoqa, hermanosta sumajta yanapanqanku”, nispa (Sal. 84:7; 1 Ped. 4:11).

Maytapuni kusikunchej ashkha hermanos kunallanraj ancianos jina chayri siervos ministeriales jina churasqa kasqankuta rikuspa. Hermanonchej Jasontaj, jinata nin: “Unay watastaña anciano jina Diosta sirvishani. Chay wataspeqa ashkhata yachakorqani. Chayrayku kunanqa ruwanasniyta juntʼayta atillani. Anciano jina llankʼaspa may kusisqa kashani. Anciano kaytaj noqapaj uj sumaj bendición”, nispa.

Qanpis hermanóy, Diospa llajtanpi ñauparillaypuni. Timoteo jina kanaykipajtaj kallpachakuy. Ajinamanta hermanosta sumajta yanapanki.