Jehová Diosqa sinchʼita sayaspa predicajkunata munakun

1, 2. 1) Mana uyariyta munankuchu chay lugarespi predicaj hermanosmanta yachay, ¿kallpachawanchejchu? (Patapi kaj dibujota qhawariy). 2) ¿Jesús llajtanpi predicashajtin uyarillasqankuchu? (Sutʼinchayninta qhawariy).

UJ QHARIWARMI precursoresmanta parlarina. Paykunaqa sutikunku Sergio, Olinda ima, Estados Unidospitaj tiyakunku, 80 watas kurajniyojñataj kanku. Paykunaqa mana purikuyta atillankuchu chakisninku nanasqanrayku. Chaywanpis uj plazapi carritowan predicankupuni, microspa paradan chaynejpi. Chaymanqa las siete de la mañanataña rinku. Chay plazapi ashkha runas mana rikojman tukojtinkupis, Sergiowan Olindawanqa tukuy pasajkunata asirispa saludankupuni. Las doce chaytataj wasinkuman kutipunku. Paykunaqa sojta diasta chay plazaman predicaj rinku.

² Ashkha hermanospis chay qhariwarmi jinallataj runas mana uyarejtinkupis, lugarninkupi unay watastaña predicanku. Ichá qankunapis ajina lugaresllapitaj predicashankichej. Runas mana uyariyta munajtinkupis Diosmanta mana saykʼuspa willashallankichejpuni.a Ajinata ruwaspaqa, ashkha hermanosta yanapankichej, unaytaña Jehová Diosta sirvejkunatapis. Congregacionesta waturej wakin hermanosqa nerqanku: “Unaytaña mana saykʼuspa predicaj hermanoswan predicaspaqa, mayta kallpachawan mana saykʼuspa predicanallaypajpuni”, nispa. Wakintaj ninku: “Diosta unaytaña sirvej hermanosta rikuspaqa, mayta kallpachakuni, Diosmanta willashaspapis mana manchachikunichu”, nispa. Wakintaj ninku: “Unaytaña Diosmanta willaj hermanoswan predicaspaqa, kallpachasqa kani”, nispa.

 3. ¿Imastataj qhepan parrafospi yachakusunchej?

³ Qhepan parrafospeqa, yachakusunchej imajtinchus wakin kutis predicaspa llakikusqanchejta. Yachakullasuntaj imachus niyta munasqanta ‘sumajta poqoy’. Chantapis yachakusunchej, imata yachaychus yanapanawanchejta runas mana uyariwajtinchejpis predicanallapajpuni. Kaykunata yachayqa, tukuy sonqo predicanallapajpuni yanapawasunchej, ajinamantataj Jesuspa kamachisqanta juntʼasunchej.

 4. 1) ¿Imaynataj Pablo kashasqa ashkha judíos mana uyariyta munasqankumanta? 2) ¿Imaraykutaj Pabloj sonqon mayta nanasqa?

⁴ Wakin kuteqa mayta llakikunchej, predicashajtinchej runas Diospa Gobiernonmanta mana uyariyta munasqankurayku. Apóstol Pablopis mayta llakikorqa ajinapi rikukuspa. Payqa 30 watasta jina Diosmanta willarqa, ashkha runastataj yanaparqa cristianosman tukunankupaj (Hech. 14:21; 2 Cor. 3:2, 3). Jinapis wakin judiosllata cristianos kanankupaj yanaparqa. Imajtinchus ashkha judiosqa Pablota mana uyariyta munarqankuchu, astawanpis wakin judiosqa qhatiykacharqanku (Hech. 14:19; 17:1, 4, 5, 13). Ajinapi rikukuspataj Pablo nerqa: ‘Noqaqa Cristoj yachachisqan jina cheqata parlashani, llakiyniy jatun, sonqoypitaj mana tukukoj nanay tiyan’, nispa (Rom. 9:1-3). Arí, Pabloj sonqonqa mayta nanarqa Diospa khuyakuyninta judíos qhesachasqankumanta. Imajtinchus Pabloqa runasta munakusqanrayku mayta predicayta munaj.

 5. 1) ¿Imaraykutaj runasman Diosmanta willamunchej? 2) ¿Imajtintaj wakin kuti llakikusunman?

⁵ Noqanchejpis Pablo jinallataj, runasta munakusqanchejrayku predicamunchej (Mat. 22:39; 1 Cor. 11:1). Chantapis munanchej wajkuna reparanankuta Diosta sirvispalla kusisqa kausakuyta atisqankuta. Imaynatachus noqanchej Diosta sirvispalla kusisqa kausakunchej, ajinata. Chayrayku runasta kallpacharimunchej Diosmanta yachakunankupaj, imastachus runaspaj Diosninchej ruwananmantawan yachakunankupaj. Chayta ruwaspaqa, runasman uj jatun regalota jina apashanchej, kay jinata nispa: “Kay sumaj willaykunata uyarillay ari”, nispa. Mana uyariwajtinchejtaj, Pablota jina sonqonchej mayta nanawanchej. Chaytaj mana pisi creeyniyoj kasqanchejraykuchu, manaqa runasta munakusqanchejrayku. Chayrayku runas mana uyariwajtinchejpis predicamullanchejpuni. Chaymanta parlaspa uj precursora Elena sutiyoj, nin: “Mana Diosmanta willayta atillanichu. Pero Diosmanta willaspalla aswan kusisqa kani”, nispa. Payqa 25 watas kurajtaña precursora jina llankʼashan.

 6. ¿Imatataj qhepan parrafospi yachakusunchej?

⁶ Mayllapipis kashaspa tukuy sonqo predicayta atisunman. Chayrayku qhepan parrafospi Jesuspa iskay rijchʼanachinasninmanta parlarisunchej. Chay rijchʼanachinasqa ‘sumaj poqoymanta’ parlanku (Mat. 13:23). Kunanqa uva sachʼa kikinchaymanta parlarina.

 7. 1) ¿Pikunawantaj ninakun uva sachʼa, uva huertapi llankʼaj, uvaj ramasnin ima? 2) ¿Jesús nerqachu imawanchus sachʼaj poqoynin ninakusqanta?

⁷ (Juan 15:1-5, 8 leey). Jesús cheqa kaj uva sachʼawan kikinchakushajtenqa, uva huertapi llankʼajqa Tatan kasqanta nerqa. Nillarqataj yachachisqasnin uva sachʼaj ramasnin kasqankuta.b Chantá Jesús yachachisqasninman nerqa: “Tatayqa jatunchasqa kanqa, qankuna ashkhata poqojtiykichej, yachachisqasniy kasqaykichejtataj rikuchejtiykichej”, nispa. Jesusqa, chay kikinchaypi mana nerqachu imawanchus sachʼaj poqoynin ninakusqanta. Chaywanpis chay kikinchaymanta wakin imasta sumajta entiendespaqa, yachasunman imawanchus chay sachʼaj poqoynin ninakusqanta.

 8. 1) ¿Imawantaj mana ninakusqachu poqoyniyoj kay? 2) ¿Jehová Dios mana atinapaj jinachu imatapis ruwananchejta mañawanchej?

⁸ Jesús nerqa: ‘Noqapi kaj mana poqoj ramataqa Tatay kʼutonqa, poqoj ramatataj podanqa’, nispa. Kayqa reparachiwanchej Diospa kamachisnin kanapajqa, poqoyniyoj kananchej kasqanta (Mat. 13:23; 21:43). Chayrayku poqoyniyoj kayqa, mana ninakunchu runasta Jesuspa yachachisqasninman tukuchiywan (Mat. 28:19). Sichus chaywan ninakunman chayqa, ni pita Jesuspa yachachisqanman tukuchej hermanosqa, mana poqoj ramawan ninakunkuman. Chaywanpis chayqa mana jinachu. Imaraykuchus runastaqa mana obligasunmanchu Jesuspa yachachisqasninman tukunankupaj. Chantapis Jehová Diosqa, munakuwasqanchejrayku atinapaj jinalla imatapis ruwananchejta mañawanchej (Deu. 30:11-14).

 9. 1) ¿Imawantaj uva sachʼaj poqoynin ninakusqa? 2) ¿Ima kikinchaytataj ukhunchasunchej?

⁹ Uva sachʼaj poqoynenqa, ninakun “Diospa Gobiernonmanta sumaj” willaykunata willaywan.c Jehová Diostaj munan tukuy kamachisnin Gobiernonmanta willamunanchejta (Mat. 24:14). Chayta aswan sutʼita entiendesunman tarpoj runamanta kikinchayta ukhunchaspa. Chay kikinchaymanta astawan parlarina.

10. 1) ¿Imawantaj mujuwan, jallpʼawan ninakusqa? 2) ¿Imataj trigoj poqoynin?

¹⁰ (Lucas 8:5-8, 11-15 leey). Jesusqa tarpoj runamanta parlashaspa, nerqa “mujoqa Diospa palabran” chayri Diospa Gobiernonmanta sumaj willaykuna kasqanta, jallpʼataj runaj sonqon kasqanta. Chantá nerqa: “Mujutaj sumaj jallpʼaman tʼakakusqa, pʼutumuytawantaj sapa muju pachajta poqosqa”, nispa. Chay mujoqa ichapis trigo kanman karqa. Uj trigo mujumantaqa ñaupajta yura wiñamun, chantá trigo muju espigapi poqon. Jesustaj kikinchayninpi nerqa, sapa muju pachaj mujusta poqosqanta. Kunantaj qhawarinachej imatachus kay kikinchaymanta yachakuyta atisqanchejta.

11. 1) Tarpoj runa kikinchaymanta, ¿imatataj yachakusunman? 2) ¿Imaynatataj runaspa sonqonpi mosoj mujuta tarpumusunman?

¹¹ Tatasninchej chayri waj hermanos Diospa Gobiernonmanta por primera vez yachachishawajtinchejqa, uj mujutapis uj sumaj jallpʼapi tarpushankuman jina karqa. Pichá yachachiwarqanchej chaytaj, maytachá kusikorqa noqanchej Diosmanta astawan yachakuyta munasqanchejmanta. Chay mujitutaj sonqonchejpi pʼutumorqa chantá yurachakorqa chaymantataj poqoyniyoj karqa. Yachanchej jina trigo mujoj poqoynenqa mana waj yuraschu, manaqa ashkha mosoj trigo. Ajinallataj noqanchejwanpis, noqanchejpa poqoyninchejqa, mana uj runata bautizachiychu, manaqa “Diospa Gobiernonmanta” sumaj willaykunata willamuy.d Arí, Diospa Gobiernonmanta willamuspaqa runaspa sonqonpi mosoj mujuta tarpunchej (Luc. 6:45; 8:1). Tarpoj runamanta kikinchayqa, yachachiwanchej “sinchʼita sayaspa” sumajta poqona kasqanta, nisunman llakiykuna kajtinpis sinchʼita sayaspa Diospa Gobiernonmanta willamunallapuni kasqanta.

12. 1) ¿Imatataj yachakusunman uva sachʼa kikinchaymanta, tarpoj runa kikinchaymantawan? 2) Chay iskay kikinchaykuna, ¿sonqochawasunmanchu?

¹² Uva sachʼa kikinchaymanta, tarpoj runa kikinchaymantawan, yachakunchej sumaj poqoyniyoj kanapajqa, mana runas predicasqanchejta uyarinankumantapunichu kasqanta, manaqa mana saykʼuspa predicamunamanta. Pablopis jinata nerqa: “Sapa uj ruwasqanman jina tʼinkanta japʼenqa”, nispa (1 Cor. 3:8). Arí, Jehová Diosqa tʼinkata qowasunchej ruwasqanchejman jina, manataj mashkha runastachus Jesuspa yachachisqasninman tukuchisqanchejman jinachu. Chaymanta parlaspa hermananchej Matilda nin: “Maytapuni kusikuni Jehová Dios ruwasqanchejman jina, tʼinkata qonawanchejta yachaspa”, nispa. Payqa 20 watastaña precursora jina sirvishan.

13, 14. ¿Imaraykutaj apóstol Pablo israelitasman predicallasqapuni?

¹³ Kunanqa qhawarinachej, imaynatachus “llakiykuna kajtinpis sinchʼita sayaspa” Diosmanta willamunapuni kasqanta. Chaypajqa apóstol Pablomanta yachakuna. Pablo nerqa, sonqon mayta nanasqanta israelitas Diospa Gobiernonmanta mana uyariyta munasqankurayku. Chaywanpis Pabloqa paykunaman predicallarqapuni. Imayna sonqowanchus paykunaman predicasqanmantataj, jinata nerqa: “Tukuy sonqo munani, jinallataj Diosmantapis mañakuni israelitas salvasqa kanankuta. Noqa paykunamanta kayta niyman: Diosta tukuy sonqo qhatiyta munanku, chaywanpis mana cheqa yachayman jinachu”, nispa (Rom. 10:1, 2). Kunantaj chayta astawan ukhuncharina.

¹⁴ Apóstol Pabloqa, israelitasman predicallarqapuni ‘tukuy sonqo yanapayta munasqanrayku’. Payqa israelitas salvakunankutapuni munarqa (Rom. 11:13, 14). Chantapis Pabloqa Diosmanta mañakorqa israelitasrayku. Payqa Diosman nerqa, sapa israelitata yanaparinanta Gobiernonmanta sumaj willaykunata yachakunankupaj. Chantapis Pabloqa israelitasmanta kayta nerqa: “Diosta tukuy sonqo qhatiyta munanku”, nispa. Apóstol Pabloqa repararqa israelitas Diosta tukuy sonqo yupaychayta atisqankuta. Reparallarqataj, chay israelitas pay jina Jesuspa yachachisqasninman tukuyta atisqankuta.

15. 1) ¿Imatataj ruwasunman Pablo jina predicamunallapajpuni? 2) ¿Imatataj wakin hermanosmanta yachakusunman?

¹⁵ Noqanchejqa runas mana uyariwajtinchejpis, apóstol Pablo jina predicamullasunmanpuni. Chaypajqa, tukuy sonqo munananchej tiyan “wiñay kausayta japʼinankupaj allin sonqoyoj” kajkunata tariyta. Chantapis Jehová Diosmanta mañakunanchej tiyan kʼacha sonqoyoj runasta uyarinawanchejpaj yanapananta (Hech. 13:48; 16:14). Hermananchej Silvanapis Diosmanta mañakunpuni. Payqa 30 watasta jinaña precursora regular jina Diosta sirvishan. Pay nin: “Niraj wasimanta wasi predicaj rishajteyqa, Dios yanapanawanta mañakunipuni kusisqa predicanaypaj”, nispa. Diosmanta mañakullasunmantaj angelesninwan yanapanawanchejta, allin sonqoyoj runasta tarinapaj (Mat. 10:11-13; Apo. 14:6). Hermanonchej Robertmanta parlarina. Payqa 30 watas kurajtaña precursor regular jina sirvishan. Pay nin: “Angeleswan yanapachikoyqa may sumajpuni. Imajtinchus paykunaqa yachanku imaynachus runas kashasqankuta”, nispa. Chantapis predicashaspaqa kallpachakunchej runas mana sajraspunichu kasqankuta reparanapaj. Paykunataqa Jehová Diospa kamachisnin kayta atinankupaj jina qhawanchej. Hermanonchej Carlmanta parlarina. Payqa 50 watas kurajña bautizasqa kashan, anciano jinataj sirvishan. Pay nin: “Predicashaspaqa kallpachakunipuni runas allin sonqoyoj kasqankuta reparanaypaj. Chaytataj reparani asirisqankupi, kʼachamanta parlapayawasqankupi chayri imallatapis tapuriwasqankupi”, nispa. Chay hermanos jinallataj ruwasunchej chayqa, apóstol Pablo jina “llakiykuna kajtinpis sinchʼita sayaspa” predicamullasunpuni.

16, 17. 1) ¿Imatataj Eclesiastés 11:6 versiculomanta yachakusunman? 2) ¿Imatataj Sergiomanta señoranmantawan yachakusunman?

¹⁶ Ama qonqanachu, predicaspa waj runasta yanapashasqanchejta, wakin runas mana uyariwajtinchejpis (Eclesiastés 11:6 leey). Runasqa ñawillankupi purichishawanchej. Reparankutaj maychus kajta vestikusqanchejta, wajkunawan kʼachas kasqanchejta, tukuyta saludarisqanchejtapis. Chayta reparaspa noqanchejmanta mana allinta yuyaj runasqa, tiemponman cambiankuman. Hermanonchej Sergiowan señoranwanqa chayta kausayninkupi rikorqanku.

¹⁷ Sergio nin: “Señoraywan plazapi predicajpuni kayku. Uj tiempotaj chay plazaman mana predicaj rerqaykuchu onqoykusqaykurayku. Sanoyasqaykutawan chay plazaman predicaj kutejtiykutaj, uj runa jinata niwarqayku: ‘¿Maypi chinkaporqankichejri? Mayta faltacharqayku’”, nispa. Sergioj señorantaj nin: “Choferespis autonkumantapacha saludarimuwarqayku, niwarqaykutaj: ‘Allintapuni ruwashankichej’, nispa. Wakenqa revistastapis mañakuwarqayku. Uj runapis carritowan predicashajtiyku qayllaykamuwarqayku, tʼikastataj jaywawarqayku. Niwarqaykutaj runasta sumajtapuni yanapashasqaykuta. Qosaywanqa tʼukulla kasharqayku”, nispa.

18. ¿Imajtintaj predicamunallapuni kasqa runas mana uyariwajtinchejpis?

¹⁸ Runas mana uyariwajtinchejpis predicamunallapuni amataj ‘tiyakunallachu’. Imajtinchus “Diospa Gobiernonmanta” jallpʼantinpi “tukuy laya” runasman willamunanchejpuni kashan (Mat. 24:14). Chayta ruwaspaqa Jehová Diosta kusichisunchej, noqanchejpis kusisqa kasunchej. Jehová Diosqa munakun “llakiykuna kajtinpis sinchʼita sayaspa” predicajkunata.