“Rispa, tukuy laya runasta yachachisqasniyman tukuchimuychej”

1, 2. ¿Imatataj uj ángel warmisman nerqa, chanta imatataj Jesús paykunaman nerqa?

KAY 33 watamanta 16 de nisanpi laqha llaqhallaraj kashajtin, Jehová Diosta yupaychaj wakin warmis, Jesuspa sepulturanman may llakisqas rerqanku. Señor Jesucristoj ayanqa, casi iskay diaña chaypi kasharqa. Chay warmisqa, Jesuspa ayanta sumaj qʼapayniyoj qhoraswan, perfumasqa aceiteswan ima jawiykunankupaj rerqanku. Jinapis Jesuspa sepulturanta chʼusajllata taripaspa mancharikorqanku. Chayllapi uj ángel paykunaman nerqa: Jesusqa “wañusqas ukhumanta kausarinpun. Payqa ñaupaqeykichejta Galileaman rishan, chaypi paywan tinkunkichej”, nispa (Mat. 28:1-7; Luc. 23:56; 24:10).

² Chay warmis sepulturamanta llojsisqankutawan, kikin Jesús paykunaman nerqa: “Ama manchachikuychejchu. Rispa hermanosniyman willamuychej, Galileaman rinankuta. Chaypi noqawan tinkukonqanku”, nispa (Mat. 28:10). Ajinata Jesusqa, kausarimuytawan discipulosninta uj reunionman wajyacherqa. Chay reunionpitaj, sumaj kamachiykunata paykunaman qorqa.

3, 4. Mateo 28:19, 20 versiculospi rikhurej kamachiy, ¿11 apostolesllapajchu karqa? (Kay revistaj tapanpi dibujota qhawariy).

³ (Mateo 28:16-20 leey). Jesusqa yachachisqasninwan tantasqa kashaspa, paykunaman uj sumaj kamachiyta qorqa. Chay kamachiytataj juntʼanankupuni karqa. Noqanchejpis chay kamachiyta juntʼashallanchejtaj. Jesusqa yachachisqasninman kamacherqa: “Rispa, tukuy laya runasta yachachisqasniyman tukuchimuychej [...]. Yachachimuychej paykunaman imastachus noqa kamacherqaykichej, chayta paykunapis kasukunankupaj”, nispa.

⁴ Chay kamachiytaqa, mana 11 cheqa sonqo apostolesnillanmanchu qorqa. Jesusqa tukuy yachachisqasnin predicanankuta munan. ¿Imaynatá chayta yachanchej? Jesús chay kamachiyta Galilea orqopi qoshajtin, mana apostolesllachu chaypi tantasqa kasharqanku. Yachakunchej jina, angelqa sepulturaman rej warmisman nerqa: Galileapi “paywan tinkunkichej”, nispa. Chayrayku chay warmispis, Galilea orqopichá kasharqanku.

 5. ¿Imaraykutaj nisunman 1 Corintios 15:6, Galilea orqopi karqa chay reunionmanta parlashasqanta?

⁵ Apóstol Pablopis nillarqataj: Jesusqa “rikhurillarqataj 500 kuraj tantasqa hermanosman”, nispa (1 Cor. 15:6). Pabloqa chayta nispa, Galilea orqopi karqa chay reunionpichá piensasharqa, mayqenmantachus Mateo capítulo 28 parlan, chaypi. ¿Imaraykutaj chayta ninchej? Ñaupaj kaj, Jesuspa casi tukuynin yachachisqasnenqa Galileamanta karqanku. Ashkha kasqankuraykutaj, aswan allin karqa Galilea orqopi tantakunanku, Jerusalenpi uj wasipi tantakunankumanta nisqaqa. Iskay kaj, Jesusqa kausarinpuytawan 11 apostolesninwan Jerusalenmanta uj wasipi tinkorqaña. Sichus apostolesnillan predicanankuta, yachachinankuta ima munanman karqa chayqa, chaypiña paykunaman kamachinman karqa. Jesusqa mana paykunata, warmista, waj yachachisqasnintawan, Galileaman wajyachinmanchu karqa (Luc. 24:33, 36).

 6. 1) ¿Imaynatataj Mateo 28:20 rikuchiwanchej Jesuspa kamachisqan noqanchejpajwan kasqanta? 2) ¿Imaynatá Jesuspa nisqan kay tiempopi juntʼakushan?

⁶ ¿Imaraykutaj nillanchejtaj “runasta yachachisqasniyman tukuchimuychej” nisqa kamachiy mana 11 apostolesllapajchu kasqanta, nitaj ñaupa tiempomanta cristianosllapajchu kasqanta? Imaraykuchus Jesusqa, chay kamachiyta yachachisqasninman qoshaspa, jinata nispa tukucharqa: “Noqaqa qankunawan tuta pʼunchay kasaj, kay mundoj imasnin tukukunankama”, nispa (Mat. 28:20). Jesuspa nisqantaj juntʼakushanpuni. Imajtinchus kay tiempopi may chhika runas Jesuspa yachachisqasninman tukushanku. Sapa wata casi 300 mil runas Jehovaj testigosnin kanankupaj bautizakunku. Ajinamanta Jesucristoj yachachisqasninman tukushanku.

 7. ¿Imatá kay yachaqanapi yachakusun, chanta imaraykutaj chayta yachakunanchej tiyan?

⁷ Ashkha runasqa, Bibliata estudiaytawan ñauparinku, bautizakunkutaj. Jinapis wakenqa, unaysitutaña estudiaspapis bautizakuyta manchachikunku. Paykunamanqa Bibliata estudiay mayta gustan. Jinapis bautismoman chayanankupaj mana ñauparinkuchu. Noqanchejqa estudiosninchejta yanapayta munanchej, yachakusqankuman jina kausakunankupaj, bautizakunankupajtaj. Kay yachaqanapi yachakusun, imaynatachus estudiosninchejta Jehová Diosta munakunankupaj, ñauparinankupaj ima yanapanata. ¿Imaraykutaj chayta yachakunanchej tiyan? Imaraykuchus ichá maykʼajllapis estudionchejta saqepuypi piensarinanchej kanqa.

 8. ¿Imaraykutaj wakin estudiosninchej mana Jehová Diosta munakoj Tatata jina qhawayta atillankuchu?

⁸ Jehová Diosqa munan, payta munakusqanchejrayku sirvinanchejta. Chayrayku estudiosninchejman yachachinanchej tiyan, Jehová Dios paykunamanta llakikusqanta, maytataj munakusqanta. Jehová Diosninchejqa, “wajcha wawaspa Tatanku, viudasmantaj kutikun”. Noqanchejtaj munanchej estudiosninchej Jehovata ajinata qhawanankuta (Sal. 68:5). Estudiosninchej Jehová Dios paykunata munakusqanta yachanqanku chayqa, ichá paykunapis Jehová Diosta munakullanqankutaj. Jinapis wakenqa, mana Jehová Diosta munakuyniyoj Tatata jina qhawayta atillankuchu. Imaraykuchus tatanku mana paykunata munakorqachu (2 Tim. 3:1, 3). Chayrayku estudionchejman yachachishaspaqa, Jehová Dios imayna kʼachachus kasqanmanta parlarinapuni. Ajinamanta estudionchejqa, Jehová Dios wiñay kausayta japʼinanpaj yanapayta munasqanta entiendenqa. ¿Imaynamantawan estudionchejta yanapasunman? Qhepan parrafospi chayta yachakusun.

9, 10. ¿Ima libroswantaj estudionchejta yachachinanchej kasqa, chanta imaraykutaj?

⁹ “¿Imastá Biblia yachachiwanchej?” librowan, “Diospa munakuyninpi kanallapuni” librowan ima yachachina. Chay libroswanqa, runasta yanapasunman Jehová Diosta munakunankupaj. Biblia yachachiwanchej libroj ñaupaj capitulonqa, kay tapuykunaman kutichin: “¿Dios noqanchejmanta phutikunchu chayri rumi sonqochu? ¿Dios sonqonta nanachikunchu llakiypi kajtinchej? ¿Diosman qayllaykuyta atisunmanchu?”. Diospa munakuynin librorí, estudiosta yanapan Bibliaj nisqanman jina kausakunankupaj, Jehová Diosman kʼaskaykunankupajtaj. Chay iskay libroswan wajkunata yachachinchejña chaypis, sapa runaman yachachinapaj sumajta wakichikuna. Wakichikushaspataj imaynatachus chay yachachiywan estudionchejta yanaparinapi piensarina.

¹⁰ Estudiosqa wakin kutis waj imasmanta yachakuyta munanku. Imamantachus yachakuyta munasqankutaj, mana Bibliata estudiachinapaj publicaciones ukhupichu kashan. Jina kajtin, ¿imatá ruwasunman? Chay publicacionta payllamanta leerinanta nisunman. Ajinamanta noqanchejqa, 9 parrafoj qallariyninpi nerqanchej chay libroswan yachachillasunpuni.

11. 1) ¿Maykʼajmantapachataj estudionchejman yachachinapaj oracionta ruwana kasqa? 2) ¿Imaynatá estudionchejwan oracionta ruwanamanta parlasunman?

¹¹ Estudionchejta yachachinapaj oracionwan qallarina. May allinpuni pillatapis Bibliamanta estudiachinapaj, tukuchanapajpis oracionta ruwananchej. ¿Maykʼajmantapachataj chayta ruwasunman? Atispaqa estudiachiyta qallarisqanchejmantapacha. Bibliamanta yachakojqa, Diospa atiyninpa yanapaynillanwan Palabranta entiendeyta atisqanta yachanan tiyan. Wakin hermanosqa, oracionmanta parlanankupaj Santiago 1:5 versiculota estudionkuwan leerinku. Chaypi nin: “Sichus qankunamanta pillapis pisi yachayniyoj chayqa, Diosmanta mañakullachunpuni”, nispa. Chantá estudiachishanku chay runata tapurinku: “¿Imatá ruwana kasqa yachayniyoj kanapaj?”, nispa. Runastaj nej kasqanku: “Jehová Diosmanta mañakuna”, nispa.

12. ¿Imaynatá Salmo 139:2-4 versiculoswan estudionchejta yanapasunman Jehová Diosman tukuy imata willakunanpaj?

¹² Estudionchejman yachachina Diosmanta mañakuyta. Yachachishanchej chay runaman nina, Jehová Dios mañakuyninta uyariyta munasqanta. Ichapis jinata nisunman: “Tatanchej Jehovamanqa, tukuy imata willakuwaj, imastachus wajkunaman mana niyta atillankichu chaytapis. Payqa imachus sonqonchejpi kasqanta sumajta yachan”, nispa (Salmo 139:2-4 leey). Estudionchejman nillasunmantaj, pantasqa yuyayninta cambiananpaj, sajra ruwaykunata qonqananpajpis, Jehová Diospa yanapayninta mañakunanta. Kaypi piensarina: Ichapis uj estudionchejqa, Bibliata unaysitutaña estudiaspapis, Navidad fiestata mana qonqayta atinchu. Payqa yachanña chay fiesta qhasi dioskunata yupaychaywan chajrusqa kasqanta, chayraykutaj mana ruwananchu kasqanta. Jinapis familianwan khuska kayta munasqanrayku, chay fiestata ruwallanpuni. ¿Imaynatá estudionchejta yanapasunman? Ichapis nisunman: “Jehová Diosmanta yanapata mañakuy, imatachus chejnisqanta chejninaykipaj. Sonqoykipi kaj chhikata payman willakuy”, nispa (Sal. 97:10).

13. 1) ¿Imaraykutaj estudionchejta qallariymantapacha reunionesman wajyarina? 2) ¿Imatá ruwasunman estudionchej salonman jamuspa mana manchachikunanpaj?

¹³ Estudionchejta qallariymantapacha reunionesman wajyarina. Reunionespi imatachus nikusqan, chaypi imaschus kasqanpis, estudionchejta yanapanman Jehová Diosta munakunanpaj, ñauparinanpajtaj. Estudionchejta reunionesman invitarinapaj, ¿Imaynataj tantakuykunasniyku? nisqa videota rikuchisunman. Atikojtenqa payman nisunman: “Noqa pusariykiman”, nispa. Chantapis may allinpuni estudionchejta yachachimunapaj waj hermanoswan rinanchej. Ajinamanta payqa ashkha hermanosta rejsenqa. Salonman jamuspataj niña manchachikonqachu.

14. ¿Imataj estudionchejta tanqanqa wajkunata yanapananpaj?

¹⁴ Tukuypis estudionchej ñauparinanta munanchej (Efe. 4:13). Wakenqa Biblia kausayninkupi yanapananta munasqankuraykulla estudiayta qallarinku. Jinapis Jehová Diosta astawan munakusqankuman jina, manaña paykunallapichu yuyanku, manaqa wajkunata, hermanostapis yanapariyta munanku (Mat. 22:37-39). Atikojtinkama estudionchejman willarina, Diosmanta willakunallanpajpuni qolqesitunwan yanapakuyta atisqanta.

15. ¿Imaynatá estudionchejman problemasta allinchayta yachachisunman?

¹⁵ Estudionchejman problemasta allinchayta yachachina. Estudionchej predicaj llojsishasqanpiña piensarina. Payqa uj hermano sonqonta nanachisqanta willariwanchej. Jina kajtin, ¿imatá ruwasunman? Pichus juchayoj kasqanta ninamantaqa, imaynatachus chay problemata allinchananta yachachina. Bibliaj nisqanman jina, payqa chay hermanota perdonayta atinman. Chay hermanoj ruwasqanta mana qonqayta atinchu chaytaj, allinyakunankupaj paywan kʼachamanta parlarimuyta atinman (Mateo 18:15, kikinchay). Estudionchejta yanaparina chay hermanowan imaynatachus parlananta yachananpaj. Chaypajtaj apaykachayta yachachina: JW Library^® nisqata, jw.org^® nisqata, Jehovaj testigosnin yachaqanasta maskʼanankupaj nisqa librota ima. Ajinamanta yachananpaj imaynatachus chay problemata allinchayta. Estudionchej niraj bautizakushaspa chay jina problemata allinchayta yachanqa chayqa, aswan qhepamanpis hermanoswan allinta apanakonqa.

16. ¿Imaynatataj waj hermanosta pusay estudionchejta yanapanman?

¹⁶ Estudionchejta yachachimunapaj waj hermanosta, congregacionesta waturej hermanotapis pusarina. Yachakorqanchej jina, chayta ruwayqa estudionchejta mayta yanapanman. Chantapis waj hermanosqa, estudionchejta imaspichus noqanchej mana yanapayta atinchejchu, chaypi yanapankuman. Ichapis estudionchejqa, cigarro pitayta qonqayta munaspapis mana atishanchu. Jina kajtin, chay viciota saqej hermanowan yachachej risunman. Chay hermanoqa estudionchejman ninman, imachus yanapananta cigarro pitayta saqepunanpaj. Experienciayoj hermanoj ñaupaqenpi yachachiyta manchachikunchej chayqa, hermanota nisunman pay chay kutipi yachachinanta. Waj hermanospa experienciankoqa, estudionchejta mayta yanapanman. Tukuytaj estudionchej ñauparinanta munanchej.

17, 18. ¿Imastataj qhawarinanchej tiyan uj estudiota saqepuypi piensashaspa?

¹⁷ Estudionchej mana ñauparishanchu chayqa, ichapis saqepunanchejpi piensarinanchej kanqa. Jinapis ñaupajtaqa kaypi piensarina: “¿Atishaspachu mana ñauparishan?”. Wakin runasqa chay rato ñauparinku, wakintaj unaypiraj. Chayrayku kay tapuykunapi piensarina: “Estudioy, ¿atisqanman jinachu ñauparishan? ¿Bibliapi yachakusqanman jinachu ruwashan?” (Mat. 28:20). Uj runa mana chay rato ñauparejtinpis, kausayninta pisimanta pisi cambiananpuni tiyan.

¹⁸ ¿Imatá ruwasunman unaytaña estudiachishanchej chay runa mana ñauparejtin? Kaypi piensarina: Ichapis uj runawan Biblia yachachiwanchej librota estudiayta tukunchejña. Ichá Diospa munakuynin nisqa librotapis estudiachiyta qallarinchejña. Jinapis payqa, ni uj reunionmanpis jamunchu, ni Jesuspa Wañuyninta Yuyarinapaj tantakuymanpis. Chantapis ichá payqa sapa kuti mana suyawanchejchu. Jina kajtin, allin kanman paywan parlarinanchej.b

19. 1) ¿Imatataj nisunman mana ñauparej estudionchejman? 2) Estudionchej, ¿imata ruwajtintaj yanaparillasunmanpuni?

¹⁹ Mana ñauparej estudionchejwan parlashaspaqa, tapurisunman: “Jehovaj testigon kanaykipaj, ¿imata ruwaytataj manchachikunki?”, nispa. Estudionchejtaj ichapis niwasun: “Bibliata estudiaytaqa munashanipunipis, pero manapuni Jehovaj testigon kaymanchu”, nispa. Unaytaña estudiaspapis ajinata niwanchej chayqa, chay estudionchejta saqepunanchej kanman. Jinapis ichá chay estudioqa, ñauparinanpaj imachus jarkʼashasqanta willariwasun. Ichapis payqa niwasun: “Wasimanta wasi predicayta manchachikuni”, nispa. Chayta yachaspaqa yanapariyta atisun.

20. ¿Imaynatá Hechos 13:48 yanapawasunman uj estudiota saqepunatachus manachus yachanapaj?

²⁰ Wakin runasqa, Ezequielpa tiemponmanta israelitas jina kanku. Jehová Dios paykunamanta Ezequielman nerqa: “Qanqa paykunapaj munanakojkunaj takiyninkuta takej jinalla kanki, sumaj arpawan, kʼacha kunkawan takej jinalla. Parlasqasniykita uyarinku, manataj juntʼankuchu”, nispa (Eze. 33:32). Ichapis estudionchejman mana niyta atillanchejchu, niña estudiachinanchejta. Jinapis “tiempoqa pisillaña kashan” (1 Cor. 7:29). Mana ñauparej estudiosta yachachinamantaqa, “wiñay kausayta japʼinankupaj allin sonqoyoj” kajkunata maskʼana (Hechos 13:48 leey).

21. ¿Mayqentaj kay 2020 watapaj texto, chanta imapajtaj yanapawasun?

²¹ Kay 2020 watapaj textoqa nin: Rispa, runasta yachachisqasniyman tukuchimuychej, bautizaspa (Mat. 28:19). Chay palabrasqa orqhosqa kashan, Jesús Galilea orqopi yachachisqasninwan tantasqa kashaspa imatachus nisqanmanta. Chay textoqa, aswan sumaj yachachejkuna kanapaj yanapawasunchej.