Wajkunata Jesuspa kamachisqanta kasukunankupaj yanapana

 1. Mateo 28:18-20 nisqanman jina, ¿imatataj Jesús yachachisqasninman kamacherqa?

JESÚS kausarinpusqantawan, yachachisqasnenqa Galileapi tantasqa kasharqanku. Jesustaj chaypi paykunaman rikhurispa, imatachus Mateo 28:18-20 (leey) nisqanta kamacherqa.

 2. ¿Ima tapuykunamantaj kutichisun?

² Jesús “runasta yachachisqasniyman tukuchimuychej” nisqantaqa, noqanchejpis juntʼanallanchejtaj tiyan. Chayrayku kay kinsa tapuykunaman kutichisun: Ñaupaj kaj, estudiosninchejman, ¿Diospa kamachiykunasnillantachu yachachinanchej tiyan, chayri imatawantaj ruwananchej tiyan? Iskay kaj, ¿imaynatá tukuy congregación estudios ñauparinankupaj yanapakunman? Kinsa kaj, ¿imaynatataj chiriyapoj hermanosta yanapasunman watejmanta predicanankupaj?

 3. ¿Imatataj Jesús ruwananchejta nerqa?

³ Jesusqa niwanchej, imastachus kamachisqanta runasman yachachimunanchejta. Chay kamachiytaj sutʼi. Jinapis kayta mana qonqananchejchu tiyan. Jesús nillarqataj: “Yachachimuychej [...] paykunapis kasukunankupaj”, nispa. Chaywanqa nisharqa, kamachiykunasninta runasman yachachispapis, kasukuytawan yachachinanchej kasqanta. ¿Imaynatá chayta ruwasunman? Estudiosninchejmanqa mana ninallanchejchu tiyan: “Kayta ruwanayki tiyan”, nispa. Manaqa yachachinallanchejtaj tiyan, imaynatachus chayta ruwanankutapis (Hech. 8:31). Qhepan parrafopi, imajtinchus chayta ruwanapuni kasqanta qhawarisun.

 4. ¿Imaynatá estudiosninchejta Jesusta kasukuyta yachachisunman? Uj kikinchaywan sutʼinchariy.

⁴ Estudiosninchejman Jesuspa kamachisqanta kasukuyta yachachinapaj, ¿imatachus ruwanallankutachu nina tiyan? Mana. Chayta entiendenapaj, imaynatachus uj albañil, wawanman oficionta yachachisqanpi piensarina. Ichapis albañilqa wawanman willarin imaynatachus mezclata ruwayta, perqayta, waj imastawan. Jinapis mana chayllatachu ruwan, manachayqa paypuni rikuchin imaynatachus ruwananta. Chantá wawantañataj yachachisqanman jina ruwachin. Jinapis mana sapantachu wawanta saqerpayan, manaqa paywan khuska trabajan yanaparinanpaj. ¿Imatá kay kikinchaymanta yachakusunman? Qhepan parrafopi chaymanta parlarisun.

 5. 1) Juan 14:15; 1 Juan 2:3 nisqanman jina, ¿imatataj estudionchejman yachachinallataj tiyan? 2) ¿Imaynatá estudionchejman Bibliaj nisqanta kasukuyta yachachisunman?

⁵ Uj runaman Bibliamanta yachachishaspaqa, Diospa kamachiykunasninta payman yachachinchej. Jinapis, ¿chayllatachu ruwananchej tiyan? Mana. Payman yachachinallanchejtaj tiyan, imaynatachus chay kamachiykunaman jina kausakunanta (Juan 14:15; 1 Juan 2:3 leey). ¿Imaynatá chayta ruwasunman? Estudionchejman yachachisunman, colegiopi, trabajopi chayri kusirikushaspa, imaynatachus Bibliaj nisqanta kasukuyta. Chaypajqa payman willarisunman, imaynatachus Bibliaj nisqanta kasukuy wakin llakiykunamanta librawasqanchejta. Chayrí willarisunman, Biblia imatapis sumajta ruwanapaj yanapawasqanchejta. Chantapis paywan kashaspaqa, Jehovamanta mañakusunman atiyninwan yanaparinanpaj (Juan 16:13).

 6. Estudiosninchejman Jesuspa kamachisqanta yachachishaspa, ¿imatawantaj ruwananchej tiyan?

⁶ Estudiosninchejman Jesuspa kamachisqanta yachachishaspa, ¿imatawan ruwananchej tiyan? Paykunata yanapananchej tiyan, wajkunaman yachachiyta munanankupaj. Ichá wakin estudiosninchejqa, Diosmanta willayta manchachikunku. Jina kajtin, pacienciawan paykunata yanaparinanchej tiyan. Chaypajqa Bibliaj nisqanta paykunaman astawan entiendechina. Bibliaj yachachiykunasnin sonqonkuman chayanqa chayqa, paykunaqa predicayta munallanqanku. Qhepan parrafopi, imaynatachus chayta ruwanata qhawarisun.

 7. ¿Imaynatá estudionchejta yanapasunman predicayta munananpaj?

⁷ Estudionchejta tapurisunman: “Bibliaj nisqasninta kasukuy, ¿yanapasunkichu aswan sumajta kausakunaykipaj? Wajkunatarí, ¿yanapanmanchu? ¿Imaynapí Bibliaj nisqanta paykuna yachankuman?”, nispa (Pro. 3:27; Mat. 9:37, 38). Chantá Bibliata estudiachinapaj publicacioneswan yanapachikusunman. Chay publicaciones ukhupeqa tratados kashan. Chayrayku estudionchejman, tukuynin tratadosta rikuchisunman. Chantá tapurisunman: “¿Mayqenmantataj familiaresniyki, amigosniyki chayri trabajomanta compañerosniyki yachakuyta munankuman?”, nispa. Chaymantataj payman wakin tratadosta jaywasunman. Chantá chay tratadosta kʼacha simiwan jaywananpaj yachachisunman. Estudionchej congregacionwan predicayta qallarejtintaj, yanaparinapaj paywan khuska llojsisunman (Ecl. 4:9, 10; Luc. 6:40).

 8. ¿Imajtintaj estudiosninchej Jehová Diosta, runa masinkutawan munakunanku tiyan? (“¿Imatá ruwasunman estudionchej Diosta munakunanpaj?” nisqa recuadrota leeriy).

⁸ Jesusqa kamachiwarqanchej: “Yachachimuychej paykunaman imastachus noqa kamacherqaykichej, chayta paykunapis kasukunankupaj”, nispa. Aswan kuraj kamachiykunataj kashan: Jehová Diosta munakuy, runa masinchejta munakuy ima. Chay iskay kamachiykunaqa, predicanapaj, runasman Bibliamanta yachachinapaj ima yanapawanchej (Mat. 22:37-39). ¿Imaraykutaj chayta ninchej? Imaraykuchus Diosta, runa masinchejtawan munakusqanchejrayku predicanchej. Jinapis estudiosninchejqa, ichá predicacionman riyta manchachikonqanku. Jina kajtin, paykunaman nina Jehová Dios paykunata yanapananta. Paypa yanapayninwanqa, niña runasta manchachikonqankuchu (Sal. 18:1-3; Pro. 29:25). ¿Imatá ruwasunman estudiosninchej Jehovata astawan munakunankupaj? Tawa kaj paginapi recuadroqa, chayta ruwanapaj yanapawasun. Jinapis, ¿noqallanchejchu estudiosninchejta yanapasunman Diosta, wajkunatapis astawan munakunankupaj? Mana. Waj hermanospis paykunata yanapallankumantaj. Qhepan parrafospi chaymanta yachakusun.

 9. ¿Imaynasmantataj albañilpa wawan sumajta yachakullanmantaj?

⁹ Watejmanta albañilpa wawanmanta parlarina. Payqa mana ruwaspallachu yachakun, manaqa tatanta, waj albañilesta qhawaspapis yachakullantaj. Ichapis tatanqa, imaynatachus waj albañil perqata cheqetanta ruwasqanta rikuchin. Chayrí waj albañilta rikuchispa nin: “Qhawariy wawáy, payqa mana mezclata pampaman laqʼaspalla revocashan. Kikisitunta ruwanki”, nispa. Wawanqa waj albañilespa ruwasqankuta qhawaspa, ashkha imasta yachakunman.

10. ¿Imataj Bibliamanta yachakojta ñauparinanpaj yanapanman?

¹⁰ Bibliamanta yachakojqa, albañilpa wawan jinallataj, wajkunamanta yachakuyta atinman. Jehová Diosta sirviyta qallarejqa, mana yachachejnillanmantachu yachakunman, manaqa waj cristianosmantapis yachakullanmantaj. Chayrayku Bibliamanta yachakojqa, ñauparinanpaj reunionesman jamunanpuni tiyan. Imajtinchus reunionpeqa Bibliamanta astawan yachakonqa, creeynin sinchʼiyanqa, Jehová Diostapis astawan munakonqa (Hech. 15:30-32). Chantapis salonpeqa, estudionchejman pay jina llakiyniyoj hermanosta rejsichisunman. ¿Imaynatataj chay hermanos estudionchejta yanapankuman? Qhepan parrafopi chaymanta parlarisun.

11. ¿Imayna hermanostataj estudionchej tantakuyman jamuspa rejsinman, paykunata rejsiytaj yanapanmanchu?

¹¹ Ichapis Bibliamanta yachakojqa, wawasninta sapallan uywashan. Salonman jamuspaqa, pay jina warmisapa hermanata rejsinman. Chay hermanata wawitasninta reunionesman pusamojta rikuspaqa, paypis kikillantataj ruwayta munanqa. Waj estudiotaj ichapis cigarrota pitayta mana saqeyta atishanchu. Tantakuyman jamuspaqa, cigarro pitayta qonqaj hermanota rejsinman. Chay hermanotaj payman willarinman, imaynatachus Jehová Diosta munakusqan cigarrota qonqananpaj yanapasqanta (2 Cor. 7:1; Fili. 4:13). Chayta uyarispa, Bibliamanta yachakojqa nenqa: “Noqapis cigarrota pitayta saqepuyta atiyman”, nispa. Kunantaj uj jovencita Bibliata estudiashasqanpi piensarina. Payqa tantakuyman jamuspa, Jehová Diosta kusisqa sirvej hermanitata rikunman. Chayta rikuspataj, ichapis imaraykuchus chay hermanita ajina kusisqa kasqanta yachayta munanqa.

12. ¿Imajtintaj ninchej tukuyninchej Bibliamanta yachakojkunata yanapariyta atisqanchejta?

¹² Hermanosninchejqa Cristoj kamachisqanman jina Diosta, runa masinkutawan munakunankupaj kallpachakunku. Chayrayku estudionchejqa, paykunata rejsispa kikinta ruwayta yachakunman (Juan 13:35; 1 Tim. 4:12). Chantapis parlarerqanchej jina, Bibliamanta yachakojqa, pay jina llakiyniyoj hermanosmanta mayta yachakunman. Chay hermanosta rejsispaqa, paypis Jesuspa discipulon kananpaj cambiayta atisqanta yachanqa (Deu. 30:11). Congregacionmanta tukuypuni, Bibliamanta yachakojkunata ñauparinankupaj yanaparisunman (Mat. 5:16). Chayrayku sapa ujpis, reunionesman jamoj estudiosta imaynatachus yanaparinapi piensarina.

13, 14. ¿Imaynatataj Jesús sonqo pʼakisqa apostolesninta yanaparqa?

¹³ Chiriyapoj hermanosninchejqa, niña predicashankuchu, nitaj runastapis Jesuspa yachachisqasninman tukuchishankuchu. Noqanchejtaj paykunata yanapariyta munanchej. Chayrayku imaynatachus Jesús sonqo pʼakisqa apostolesninta yanapasqanta yachakuna.

¹⁴ Jesusta enemigosnin wañuchinankupajña kashajtinku, tukuynin apostolesnin “saqerpayaspa ayqerikaporqanku” (Mar. 14:50; Juan 16:32). ¿Imatataj Jesús ruwarqa? Jesusqa yacharqa apostolesnin sonqo pʼakisqas kashasqankuta. Chayrayku kausarimuytawan, wakin yachachisqasninman nerqa: ‘Ama manchachikuychejchu. Rispa hermanosniyman willamuychej kausarimusqayta’, nispa (Mat. 28:10 qallariynin). Jesusqa ‘hermanosniy’ nispa, apostolesninmanta parlasharqa. Payqa apostolesnin saqerparejtinkupis, mana paykunata qhesacharqachu. Astawanpis hermanosninta jinallapuni qhawarqa. Chantapis Jehová Dios jina paykunata khuyakorqa, perdonarqataj (2 Rey. 13:23).

15. Chiriyapoj hermanosninchejta, ¿qonqapunchejchu?

¹⁵ Noqanchejpis Jesús jinallataj chiriyapoj hermanosninchejmanta llakikunchej. Paykunataqa hermanosninchejta, hermanasninchejta jinallapuni qhawanchej, maytataj munakunchej. Chantapis Jehová Diospaj llankʼasqankuta mana qonqapunchejchu. Paykunamanta wakenqa, Jehovapaj unayta llankʼarqanku (Heb. 6:10). Chayrayku chiriyapoj hermanosninchejta mayta faltachanchej (Luc. 15:4-7). ¿Imaynatataj Jesús jina paykunamanta llakikusqanchejta rikuchisunman? Qhepan parrafospi chayta qhawarisun.

16. ¿Imaynatá chiriyapoj hermanosninchejmanta llakikusqanchejta rikuchisunman?

¹⁶ Tantakuykunaman wajyarina. Jesusqa sonqo pʼakisqa apostolesninta kallpacharinanpaj, uj reunionman paykunata wajyacherqa (Mat. 28:10 tukukuynin; 1 Cor. 15:6). Noqanchejpis chiriyapoj hermanosninchejta, Jesús jinallataj tantakuykunaman wajyarisunman. Chaytataj ichapis kutin kutita ruwananchej kanqa. Jesusqa maytachá kusikorqa, yachachisqasnin wajyachisqan reunionman jamojtinku. Noqanchejpis kikillantataj kusikusun, chiriyapoj hermanosninchej reunionman jamojtinku (Mateo 28:16; Lucas 15:6, kikinchay).

17. ¿Imatá ruwasunman chiriyapoj hermanonchej tantakuyman jamojtin?

¹⁷ Allin jamusqa kasqankuta nina. Jesusqa yachachisqasnin paywan tantakoj rejtinku, payraj ñaupajta parlapayarqa. Ajinamanta rikucherqa, yachachisqasnin jamusqankumanta kusikusqanta (Mat. 28:18). Noqanchejrí, ¿imatá ruwasunman chiriyapoj hermanonchej tantakuyman jamojtin? Payman chimpaykuspa, allin jamusqa kasqanta nina. Chaywanpis ichá ninchej: “¿Ima nispataj qayllaykusajri?”, nispa. Jinapis ama manchachikunachu. Astawanpis hermanonchejta mana pʼenqachispalla, jamusqanmanta may kusisqa kashasqanchejta nina.

18. ¿Imatataj ruwasunman chiriyapoj hermanosta kallpacharinapaj?

¹⁸ Sonqomantapacha kallpacharina. Jesuspa discipulosnenqa, ichapis yuyarqanku mana jallpʼantinpi willamuyta atinankuta. Jesustajrí paykunata kallpachananpaj nerqa: “Ama qonqaychejchu, noqaqa qankunawan tuta pʼunchay kasaj”, nispa (Mat. 28:20). Jesuspa nisqan, ¿yachachisqasninta kallpacharqachu? Arí. Imaraykuchus pisi tiemponman, paykunaqa “sumaj willaykunata yachachisharqanku, willasharqankutaj” (Hech. 5:42). Chiriyapoj hermanospis kallpacharinata necesitanku. Ichá paykunaqa watejmanta predicayta manchachikushanku. Chayrayku paykunaman nisunman, mana sapallankuchu predicanankuta. Watejmanta predicayta qallarejtinkutaj, paykunawan khuska predicasunman. Chayta ruwajtinchej, paykunaqa maytapuni kusikonqanku. Chiriyapoj hermanosta, familianchejta jinallapuni qhawasun chayqa, paykunaqa watejmanta Jehová Diosta noqanchejwan khuska yupaychanqanku. Chayta ruwajtinkutaj, tukuynin congregación mayta kusikusun.

19. ¿Imatataj ruwayta munanchej, chanta imaraykutaj?

¹⁹ ¿Maykʼajkamataj runasta Jesuspa yachachisqasninman tukuchimunanchej tiyan? Kay sajra mundoj tukukuynin chayamunankama (Mat. 28:20; Glosariopi “Kay mundoj imasninpa tukukuynin” nisqata leeriy). Jesusqa runasta yachachisqasninman tukuchimunata kamachiwarqanchej. Chayta juntʼanapajtaj tiemponchejta, kallpanchejta, kapuyninchejta ima churashanchej. Ajinamanta “wiñay kausayta japʼinankupaj allin sonqoyoj” runasta maskʼashanchej (Hech. 13:48). Chayta ruwaspaqa, Jesús jina ruwashanchej. Pay nerqa: “Mikhunayqa kachamuwajniypa munayninta ruwanay, kamachiwasqantataj tukuchanay”, nispa (Juan 4:34; 17:4). Noqanchejpis chayllatataj ruwayta munanchej. Chayrayku imatachus Jesús kamachiwasqanchejta, tukunakama ruwayta munanchej (Juan 20:21). Chantapis chiriyapoj hermanosninchejta, waj runastapis yanapayta munanchej. Ajinamanta paykunapis, noqanchejwan khuska tukukuykama llankʼanankupaj (Mat. 24:13).

20. Filipenses 4:13 nisqanman jina, ¿imajtintaj Jesús kamachiwasqanchejta juntʼayta atisun?

²⁰ Jesuspa kamachisqanta juntʼayqa, mana atikullanchu. Chaywanpis mana sapanchejchu chay llankʼayta ruwashanchej. Imaraykuchus Jesusqa yanapanawanchejta nerqa. Arí, runasta Jesuspa yachachisqasninman tukuchinapajqa, “Dioswan khuska”, ‘Cristowan khuskataj’ llankʼashanchej (1 Cor. 3:9; 2 Cor. 2:17). Chayrayku chay sumaj llankʼaytaqa ruwasunpuni. Jesuspa kamachisqanta juntʼay, wajkunatapis chayta juntʼanankupaj yanapareyqa, ¡may sumajpuni! (Filipenses 4:13 leey).