Jehová yanapawanchej predicanallapajpuni

 1. ¿Ima kanantataj yachanchej, chanta imamantataj mana iskayrayanchejchu?

PREDICANCHEJ chay runasmanta wakin churanakuwajtinchejqa mana tʼukunchejchu, qhepamanqa ichapis astawanraj churanakuwasun (Dan. 11:44; 2 Tim. 3:12; Apo. 16:21). Jinapis mana iskayrayanchejchu Jehová yanapanawanchejmanta. ¿Imajtintaj chayta ninchej? Jehovaqa ñaupa tiempopi kamachisninta yanaparqapuni ima llankʼaytachus qosqanta juntʼanankupaj, chay llankʼay mana atinapaj jina kajtinpis. Chay ajinapuni kasqanta astawan sutʼita reparanapaj, profeta Ezequielpa kausayninmanta wakin imasta qhawarina. Payqa Babiloniaman preso apasqa kaj judiosman predicarqa.

 2. 1) Ezequiel predicanan karqa chay judiosmanta, ¿imatá Jehová nerqa? (Ezequiel 2:3-6). 2) ¿Ima kinsa imastataj kay yachaqanapi qhawarisun?

² Ezequiel predicanan karqa chay runas, ¿imaynataj karqanku? Jehovaqa chay judiosta nerqa “mana kasukoj”, “mana uyarikoj”, ‘kʼullu sonqoyojtaj’ kasqankuta. Paykunaqa khishkas jina sajras karqanku, alacranes jina peligrosostaj. Chayraykuchá Jehovaqa Ezequielman kutin kutita nerqa: ‘Ama manchachikuychu’, nispa (Ezequiel 2:3-6 leey). Ezequieltaqa kay kinsa imas yanaparqa imatachus Jehová kamachisqanta juntʼananpaj: 1) Jehová payta kacharqa, 2) Jehová espíritu santonwan payta kallpacharqa, 3) Diospa Palabrantaj creeyninta astawan sinchʼiyacherqa. ¿Imaynatá chay kinsa imas payta yanaparqa? ¿Imaynatá noqanchejtapis kay tiempopi yanapawanchej?

 3. ¿Jehovaj ima nisqantaj Ezequielta kallpacharqa, chanta imaynatá Jehová rikucherqa paywanpuni kananta?

³ Jehová Ezequielman nerqa: “Kachashayki”, nispa (Eze. 2:3, 4). Chayqa maytachá payta kallpacharqa. Payqa yuyarikorqachá Jehovaqa Moisestawan Isaiastawan profetasnin kanankupaj ajllashaspa, chay kikin palabrasllatataj oqharisqanta (Éxo. 3:10; Isa. 6:8). Ezequielqa yacharqa Jehovaqa chay profetasninta, mana atinapaj jina ruwaykunata juntʼanankupaj yanapasqanta. Chayrayku Jehová iskay kutispi “kachashayki” nispa nejtin, payqa yacharqa Jehová yanapanantapuni. Chantapis Ezequielqa qhelqasqan libropi ashkha kutista kayta nerqa: “Jehová Diosqa kayta niwarqa”, nispa (Eze. 3:16). Ashkha kutispi qhelqallarqataj: “Watejmanta Jehová Diosqa niwarqa”, nispa (Eze. 6:1). Arí, Ezequielqa mana iskayrayarqachu Jehovapuni payta kachasqanmanta. Chantapis tatanqa sacerdote karqa, payqa yachacherqachá Jehovaqa profetasninman yanapanantapuni nisqanta. Jehovaqa Isaacman, Jacobman, Jeremiasman ima nisqa: “Noqa qanwan kashani”, nispa (Gén. 26:24; 28:15; Jer. 1:8).

 4. ¿Imasta Jehová nisqantaj Ezequielta kallpachanman karqa?

⁴ ¿Ezequielpa willasqanta israelitas uyarinkumanchu karqa? Jehovaqa Ezequielta nerqa: “Israel nacionmanta kajkunaqa mana uyarisuyta munanqankuchu, imaraykuchus paykunaqa mana uyariyta munawankuchu”, nispa (Eze. 3:7). Israelitasqa profeta Ezequielta qhesachaspa, Jehovata qhesachasharqanku. Jehová imatachus Ezequielman nisqanqa, maytachá payta sonqocharqa. Imajtinchus runas payta qhesachasqankoqa mana ninayarqachu llankʼayninpi pantashasqanta. Chantapis Jehovaqa sutʼita payman nerqa, juchachana willayta willasqan juntʼakojtin, judiosqa ‘paykuna ukhupi uj profeta kasqanta yachanankuta’ (Eze. 2:5; 33:33). Jehová Ezequielman kallpachananpaj jina imastachus nisqanqa, maytachá payta yanaparqa willayninta juntʼananpaj.

 5. ¿Imajtintaj Isaías 44:8 mayta kallpachawanchej?

⁵ Noqanchejtapis Jehovapuni kachawasqanchejta yachayqa mayta kallpachallawanchejtaj. Jehovaqa ‘testigosnin’ kanapaj ajllakuwanchej, chaytaj may sumajpuni (Isa. 43:10). Payqa Ezequielta nerqa: “Ama manchachikuychu”, nispa. Noqanchejtapis nillawanchejtaj: “Ama mancharikuychejchu”, nispa. ¿Imajtintaj mana manchachikunanchejchu tiyan churanakuwanchej chay runasta? Noqanchejtapis Ezequielta jinallataj Jehová kachawanchej, yanapawanchejtaj (Isaías 44:8 leey).

 6. 1) ¿Imaynatá Jehová rikuchiwanchej yanapanawanchejtapuni? 2) ¿Imataj sonqochawanchej, kallpachawanchejtaj?

⁶ Jehovaqa yanapanawanchejtapuni niwanchej. Payqa niraj “testigosniy kankichej” nishaspa, kayta nerqa: “Yakuta chimpashajtiyki noqa qanwan kasaj, mayusta chimpashajtiykipis yakoqa mana apakapusonqachu. Nina chaupita pasashajtiyki mana ruphasonqachu, nina laurayqa mana qʼasparasonqachu”, nispa (Isa. 43:2). Wakin kutis predicashaspaqa chʼampaykunapi, pruebaspipis rikukusunman. Chaykunataj kankuman mayus jina chayri nina lauray jina. Jinapis Jehovaj yanapayninwanqa predicallanchejpuni (Isa. 41:13). Noqanchejtapis Ezequielta jinallataj, ashkha runas mana willasqanchejta uyariyta munawanchejchu. Jinapis chayqa mana ninayanchu mana allintachu willasqanchejta. Jehovaqa mayta kusikun mana saykʼuspa willallasqanchejmantapuni, chayta yachaytaj mayta sonqochawanchej, kallpachawanchejtaj. Apóstol Pablo nerqa: “Sapa uj ruwasqanman jina tʼinkanta japʼenqa”, nispa (1 Cor. 3:8; 4:1, 2). Uj hermana unayña precursora, pay nin: “Mayta kusikuni Jehovaqa kallpachakusqanchejmanta tʼinkawasqanchejta yachaspa”, nispa.

 7. Ezequiel mosqoypi jina rikusqanpi sapa piensarispa, ¿imamantataj astawan convencekorqa? (Tapapi dibujota qhawariy).

⁷ Ezequielqa rikorqa Diospa espíritu santonqa may atiyniyojpuni kasqanta. Ezequielqa mosqoypi jina rikusqanpi repararqa, Jehovaqa espíritu santonwan atiyniyoj angelesta yanapashasqanta, carretanpa jatuchaj ruedasnintapis purichishasqanta (Eze. 1:20, 21). Chayta rikuspa, ¿imaynataj Ezequiel kasharqa? Pay qhelqarqa: “Chayta rikuspa pampakama kʼumuykukorqani”, nispa. Payqa tʼukulla kasharqa, chayraykutaj pampakama kʼumuykukorqa (Eze. 1:28). Ezequielqa imatachus mosqoypi jina rikusqanpi sapa piensarispa, astawanchá convencekorqa espíritu santoj yanapayninwanqa willayninta juntʼanantapuni.

8, 9. 1) ¿Imatataj Jehová Ezequielman kamacherqa? 2) ¿Imaynamantawan Jehová Ezequielta kallpacharqa?

⁸ Jehovaqa Ezequielta kamacherqa: “Runaj wawan, sayariy qanwan parlanaypaj”, nispa. Jehová chayta kamachisqan, espíritu santonta qosqanpis payman kallpata qorqa sayarikunanpaj. Pay qhelqarqa: “Diospa espiritun noqaman yaykuwarqa. Chaytaj sayarichiwarqa”, nispa (Eze. 2:1, 2). Chaymanta qhepaman Diosqa Ezequielta tukuy willayninpi yanaparqa ‘makinwan’, nisunman espíritu santonwan (Eze. 3:22; 8:1; 33:22; 37:1; 40:1). Jehovaqa chay espiritunwan Ezequielta kallpacharqa llajtanmanta ‘tʼuru uma, kʼullu sonqo’ judiosman willananpaj (Eze. 3:7). Jehová payta nerqa: “Noqaqa uyaykita duroyachini paykunaj uyankuta jina, frenteykitapis paykunaj frentenkuta jina duroyachini. Frenteykitaqa diamanteman jina tukuchini, rumimantapis aswan duroman. Ama paykunata manchachikuychu, nitaj uyankuta rikuspapis manchariywan kharkatiychu”, nispa (Eze. 3:8, 9, sutʼinchaynin). Chayqa Jehová Ezequielman kaytapis nishanman jina karqa: “Ama llakikuychu paykuna kʼullukusqankumanta, noqa kallpachasqayki”, nispa.

⁹ Chaymantapacha Diospa espiritonqa Ezequielta pusaykacharqa predicanan karqa chay lugaresninta. Pay qhelqarqa: “Jehová Diospa espiritonqa noqapi sinchʼita trabajasharqa”, nispa. Profeta Ezequielqa, semananmanraj allinta yacharqa, entienderqataj imatachus willanan karqa chayta (Eze. 3:14, 15). Chaymantataj Jehovaqa uj pampaman rinanta nerqa, chaypitaj ‘Diospa espiritun payman yaykorqa’ (Eze. 3:23, 24). Chantá Ezequielqa willayta qallarinanpaj wakichisqa kasharqa.

10. ¿Ima yanapatataj necesitanchej predicanapaj, chanta imajtintaj?

¹⁰ ¿Ima yanapatataj necesitanchej willayninchejta juntʼanapaj? Chayta yachanapajqa Ezequielpi piensarina. Paymanqa niraj predicayta qallarishajtin, espíritu santo necesitasqan kallpata qorqa. Ezequiel jinallataj noqanchejpis espíritu santoj yanapaynillanwan willayta atinchej. Imaraykuchus Satanasqa contranchejpi maqanakun predicacionta sayachiyta munaspa (Apo. 12:17). Runaj qhawayninman jina, Satanaswan maqanakoyqa mana atipayta atinapaj jina kanman. Jinapis predicasqanchejwanqa payta atipashanchej (Apo. 12:9-11). Predicaspaqa rikuchinchej Satanasta mana manchachikusqanchejta. Chayrayku sapa predicaspa payta atipanchej. Churanakuy kajtinpis predicasqanchejqa sutʼita rikuchin espíritu santo kallpata qoshawasqanchejta, Jehovataj allinpaj qhawawasqanchejta (Mat. 5:10-12; 1 Ped. 4:14).

11. ¿Imaynatá espíritu santo yanapawasun, chanta imatá ruwananchej tiyan chaywan yanapachikunallapajpuni?

¹¹ ¿Imaynatá yanapawanchej Jehová Ezequielpa uyanta, frententa ima duruyachisqanta yachay? Chayqa sutʼita rikuchiwanchej predicacionpi ima chʼampaypi rikukojtinchejpis, espíritu santo chayta atipanapaj yanapanawanchejta (2 Cor. 4:7-9). Chayrayku, ¿imatataj ruwananchej tiyan Diospa espíritu santonwan yanapachikunallanchejpajpuni? Jehovamanta kutin kutita mañakuna uyarinawanchejmanta mana iskayrayaspa. Jesusqa discipulosninta nerqa: “Mañakullaychejpuni”, “maskʼallaychejpuni”, “punkutapis takallaychejpuni”, nispa. Jehová Diostaj “espíritu santota qonqa mañakojkunaman” (Luc. 11:9, 13; Hech. 1:14; 2:4).

12. Ezequiel 2:9–3:3 nisqanman jina, ¿maymantataj kʼuyuna libro jamorqa, chanta imataj chaypi qhelqasqa kasharqa?

¹² Ezequieltaqa espíritu santo kallpacharqa predicananpaj. Nitaj chayllachu kallpacharqa, Diospa nisqasninpis creeyninta kallpachallarqataj. Ezequielqa mosqoypi jina rikorqa uj makita kʼuyuna libro japʼirisqata (Ezequiel 2:9–3:3 leey). ¿Maymantá chay kʼuyuna libro jamorqa? ¿Imataj chaypi qhelqasqa kasharqa? ¿Imaynatá Ezequielpa creeyninta chay kallpacharqa? Chay kʼuyuna libroqa Jehovaj kamachina tiyananmanta jamorqa. Diosqa ichapis Ezequielpa rikusqan chay tawa angelesmanta ujninwan chay kʼuyuna librota jaywacherqa (Eze. 1:8; 10:7, 20). Chay kʼuyuna libropeqa Diospa nisqasnin kasharqa, nisunman uj sinchʼi willay, mayqentachus Ezequiel Diospa contranta oqharikoj runasman willanan karqa chay (Eze. 2:7). Chay willayqa chay kʼuyuna libroj puraj ladosninpi qhelqasqa kasharqa.

13. Jehová kʼuyuna librowan, ¿imata ruwanantataj Ezequielta nerqa, chanta imaraykutaj Ezequielpaj may miskʼi karqa?

¹³ Jehovaqa profetanta nerqa: “Kʼuyuna librota mikhuykuy, chaywan wijsaykita juntʼaykuchiy”, nispa. Ezequieltaj chayta kasukuspa tukuyninta mikhuykorqa. Mosqoypi jina chayta rikusqan, ¿ima niytá munan? Ezequielqa imatachus willanan karqa chay willayta sumajta entiendenan kasqanta. Payqa chay willaypi creenan karqa, ajinamanta tukuy sonqo willayta atinanpaj. Ezequiel chay kʼuyuna librota mikhuykusqantawantaj, tʼukunapaj jina repararqa “miskʼi jina miskʼipuni” kasqanta (Eze. 3:3). Paypajqa Jehovaj sutinpi willay miskʼirichikunanpaj jinapuni karqa (Sal. 19:8-11). Payqa may agradecesqa kasharqa Jehová profetan kananpaj ajllakusqanmanta.

14. ¿Imataj Ezequielta yanaparqa ruwayninta juntʼananpaj?

¹⁴ Chay qhepatataj Jehovaqa Ezequielman nerqa: “Kay tukuy nisusqayta uyariway, sonqoykipitaj japʼikuy”, nispa (Eze. 3:10). Chaywanqa Jehová payta nisharqa kʼuyuna libropi imastachus nisqanta yuyarikunanta, chaypitaj tʼukurinanta. Ezequiel chayta ruwajtintaj creeynenqa astawan sinchʼiyarqa. Chantapis chaywanqa sutʼita yacharqa ima willaytachus runasman willanan kasqanta (Eze. 3:11). Ezequielqa imatachus willanan karqa chayta sumajta entiendeytawan, chaypitaj creeytawan wakichisqaña karqa willananpaj, tukuchanankamataj chayta ruwananpaj (Sal. 19:14, kikinchay).

15. Willayta mana saqenapaj, ¿imatataj ‘sonqonchejpi japʼikunallanchejpuni’ tiyan?

¹⁵ Noqanchejpis willayta mana saqenapajqa Diospa nisqasninwan creeyninchejta kallpachanallapuni tiyan. Jehovaj tukuy ima nisqasninta ‘sonqonchejpi japʼikunanchej’ tiyan. Kay tiempopi Jehovaqa Palabran Biblianejta parlawanchej. ¿Imatataj ruwasunman Diospa Palabran sonqonchejman yaykunallanpajpuni, chayman jina yuyanallapajpuni, chayman jinataj ruwayta munanallapajpuni?

16. ¿Imatá ruwananchej tiyan Diospa Palabranta sumajta entiendenapaj?

¹⁶ Mikhojtinchej, cuerponchejtaj chay mikhusqanchejta chʼonqajtin, aswan kallpitayoj kanchej. Ajinallatataj creeyninchejpis astawan sinchʼiyan Diospa Palabranta estudiajtinchej, chaypitaj tʼukurejtinchej. Ezequiel mosqoypi jina kʼuyuna librota rikusqanmanta chayta yachakunchej. Jehovaqa munan Palabranwan “wijsanchejta juntʼachinanchejta”, nisunman Palabranta allinta entiendenanchejta. Chaytataj ruwanchej orakuspa, leespa, tʼukurispa ima. Orakuspaqa sonqonchejta wakichinchej Diospa nisqasninta japʼikunapaj. Chantá Bibliata leerinchej, chaymantataj imatachus leesqanchejpi sumajta tʼukurinchej. Astawan tʼukurispaqa Diospa Palabranta astawan entiendesun, creeyninchejtaj astawan sinchʼiyanqa.

17. ¿Imaraykutaj Bibliata leesqanchejpi tʼukurinanchejpuni tiyan?

¹⁷ ¿Imaraykutaj Bibliata leenanchejpuni tiyan, chaypitaj tʼukurinanchejpuni tiyan? Chayta ruwayqa kay tiempopi Diospa Gobiernonmanta willanapaj, tumpamantawantaj juchachana willayta willanapaj necesitasqanchej kallpata qowanchej. Chantapis Jehovaj kʼacha kaykunasninpi piensarispaqa paywan aswan sumaj amigos kanchej. Ajinamanta sonqo tiyasqa, sonqo juntʼasqataj kanchej, chaytaj noqanchejpajqa miskʼi jina miskʼipuni (Sal. 119:103).

18. Predicasqanchej runas, ¿imatataj sutʼita reparanqanku?

¹⁸ Noqanchejqa mana Ezequiel jina profetaschu kanchej. Jinapis Diospa yuyaychasqan Palabran kapuwanchej, chaytataj Jehová manaña willananchejta niwasun chaykama willayta munanchej. Jehová Diospa juicio pʼunchaynin chayamojtin, predicarqanchej chay runasqa mana niyta atenqankuchu mana willasqanchejta, chayri Dios paykunamanta qonqapusqanta (Eze. 3:19; 18:23). Astawanpis sutʼita reparanqanku predicarqanchej chay willayqa Diosmantapuni jamusqanta.

19. ¿Maymantataj kallpata orqhosun predicanallapajpuni?

¹⁹ ¿Maymantataj kallpata orqhosun predicanallapajpuni? Ezequielta jinallataj kay kinsa imas predicanapaj kallpachawasun: Jehová kachawasqanchejrayku, espíritu santo kallpata qowasqanchejrayku, Diospa Palabrantaj creeyninchejta sinchʼiyachisqanrayku. Jehovaj yanapanwanqa predicallaytapuni munanchej, ‘tukukuykamataj’ aguantayta (Mat. 24:13).