¿Wakichisqañachu kashanki kausayniykita Jehovaman qopunaykipaj?

1, 2. ¿Imatataj ruwananchej tiyan niraj bautizakushaspa?

PASAJ phishqa wataspi uj millonmanta astawan runas bautizakorqanku Jehovaj testigosnin jina. Ashkhasqa wawitamantapacha Jehovamanta yachakorqanku, Timoteo jina (2 Tim. 3:14, 15). Wakintaj jatunña kaspa chayri may machitusña kaspa Jehovata rejserqanku. Niraj unaychu, uj awelita Bibliata estudiaspa, 97 watasniyojña kashaspa bautizakorqa.

² Qanrí, ¿estudiashankichu Bibliata? Chayrí, ¿tatasniykichu Bibliamanta yachachishasunku Jehovaj testigosnin kasqankurayku? Imayna kajtinpis, ichapis bautizakuyta munashanki, chaytaj may sumajpuni. Chaywanpis niraj bautizakushaspaqa Jehovamanraj kausayniykita qopunayki tiyan. Kay yachaqanapi sutʼinchakonqa imachus niyta munasqanta kausayninchejta Jehovaman qopuy. Chantapis sutʼinchakullanqataj imaraykuchus mana manchachikunaykichu kasqanta Jehovaman kausayniykita qopuyta, bautizakuytapis, sichus chayta ruwanaykipaj wakichisqaña kashanki chayqa.

¿IMA NIYTÁ MUNAN KAUSAYNINCHEJTA JEHOVAMAN QOPUY?

 3. ¿Pikunataj ñaupa tiempopi Diospaj tʼaqasqa karqanku?

³ Bibliapeqa pipis Diospaj tʼaqasqa kasqanta nejtin, payta sirvinanpaj ajllasqa chayri tʼaqasqa kasqanta niyta munan. Israelqa Jehovapaj tʼaqasqa nación karqa. Chaywanpis wakin israelitasqa waj jinamanta Diospaj tʼaqasqa karqanku. Por ejemplo, Jehovaqa Aaronta ajllarqa kuraj kaj sacerdote kananpaj. Chayrayku uma maytʼunanpa ñaupajninpeqa kasharqa qorimanta ruwasqa lliphipej cinta, ‘Diospaj tʼaqasqa kasqanta rikuchej santa señal’ (Lev. 8:9). Nazareospis waj jinallamantataj Jehovapaj tʼaqasqa karqanku. Nazareo palabraqa hebreo parlaypi nazír palabramanta jamun. Chaytaj niyta munan “tʼaqasqa” chayri “jaywasqa”. Moisespa Leyninpitaj, paykunapaj waj kamachiykuna karqa (Núm. 6:2-8).

 4. 1) ¿Imataj niyta munan kausayninchejta Jehovaman qopuy? 2) ¿Imataj niyta munan “pay kikinta chejnikuchun” nisqan? (Dibujotawan qhawariy).

⁴ Kay tiempopipis kausayninchejta Diosman qopuspaqa paypaj tʼaqasqa jina kanchej. Kausayninchejta Jehovaman qopuspaqa Jesuspa discipulosnin kananchejta nishanchej, Diospa munaynintataj kausayninchejpi ñaupajman churananchejta. Chay imachus niyta munasqanmanta Jesús nerqa: “Sichus pipis qhepayta jamuyta munan chayqa, pay kikinta chejnikuchun”, nispa (Mat. 16:24). Griego parlaypi “pay kikinta chejnikuchun” nisqanqa, nikullanmantaj “amaña pay kikinpaj kausachunchu”. Chayqa kanman sapa ujninchejtapis qhesachakushasunman jina. Qanpis kausayniykita Jehovaman qopunki chayqa, imastachá Diosninchej chejnikun tukuy chayta qhesachanayki tiyan (2 Cor. 5:14, 15). Qhesachananchej tiyan chay imastaj kanku ‘runaj sajra munayninman jina ruwaykuna’, ujnintaj kashan khuchichakuy jucha (Gál. 5:19-21; 1 Cor. 6:18). Chayta ruway, ¿mana atinapaj jinachu? Mana ajinachu. Sichus Jehovata munakunchej, kamachiykunasnintaj allinninchejpajpuni kasqanmanta mana iskayrayanchejchu chayqa, ruwayta atillasun (Sal. 119:97; Isa. 48:17, 18). Nicholas sutiyoj hermano nin: “Jehovaj kamachiykunasnenqa noqanchejpaj kanman uj carcelpa rejasnin jina, ni imata ruwajta saqewasqanchejta yuyasqanchejrayku. Chayri uj zoologicoj rejasnin jina kanman, leonmanta jarkʼawasqanchejrayku”, nispa.

 5. 1) ¿Imaynatá kausayninchejta Jehovaman qopunchej? 2) ¿Imapitaj mana kikinchu kanku kausayninchejta Jehovaman qopuywan bautizakuywan? (Fotostawan qhawariy).

⁵ ¿Imaynatá kausayninchejta Jehovaman qopunchej? Uj oracionpi Jehovaman ninchej payllata yupaychananchejta, kausayninchejpitaj munayninta ruwaytapuni ñaupajman churananchejta. Waj palabraspi Jehovaman ninchej payta munakunanchejta ‘tukuy sonqonchejwan, tukuy kausayninchejwan, tukuy yuyayninchejwan, tukuy kallpanchejwantaj’ (Mar. 12:30). Kausayninchejtaqa Jehovaman qopunchej sapallanchejpi paywan parlarispa. Bautizakuytaj mana sapallanchejpichu, tukuy rikuwanchej bautizakusqanchejta. Chaypitaj yachanku kausayninchejta Jehovaman qopusqanchejtaña. Jehovaman kausayninchejta qopoyqa mana pujllakuy jinallachu. Qanpis kausayniykita Jehovaman qopunki chayqa, chay nisqaykita juntʼayta munanki, Jehovapis chayta ruwanaykita munan (Ecl. 5:4, 5).

¿IMARAYKUTAJ KAUSAYNINCHEJTA JEHOVAMAN QOPUYTA MUNANCHEJ?

 6. ¿Imaraykutaj kausayninchejta Jehovaman qopuyta munanchej?

⁶ Jehovaman kausayninchejta qopunchej chayqa, astawanqa payta munakusqanchejrayku chayta ruwanchej. Chay munakuytaj mana uj ratollapajchu. Manaqa pisimanta pisi wiñan Jehovamanta yachakusqanchejman jina, ‘allinta rejsisqanchejman jina’, ‘Diospa qosqan yuyaytataj’ japʼisqanchejman jina (Col. 1:9). Bibliamanta yachakushaspaqa sutʼita repararqanchej kay kinsa imasta: 1) Jehová kasqantapuni, 2) Biblia qhelqakunanpaj espíritu santonwan yuyaychasqanta. 3) Diostaj llajtannejta munayninta ruwachishasqanta.

 7. ¿Imastataj ruwashananña tiyan pipis kausayninta Jehovaman qopuyta munan chay?

⁷ Sichus pipis kausayninta Jehovaman qopuyta munan chayqa, Bibliamanta qallariy yachachiykunata rejsinanña tiyan, Diospa kamachiykunasninta kasukushananña tiyan, atisqanman jinataj yachakusqanmanta runasman willarishananña tiyan (Mat. 28:19, 20). Chantapis Jehovata mayta munakunan tiyan, tukuy sonqotaj payllata yupaychayta munanan tiyan. Qan, ¿ajinatachu Jehovata munakunki? Sichus Jehovata tukuy kallpaykiwan munakunki chayqa, mana Bibliamanta yachachisojta kusichinaykiraykullachu kausayniykita Jehovaman qopunki, bautizakunkipis. Jovenllaraj kanki chaytaj mana tatasniykita kusichinaykiraykullachu, nitaj amigosniyki bautizakushasqankuraykullachu chayta ruwanki.

 8. ¿Imatá ruwayta munanchej Jehovaman agradecekusqanchejrayku? (Salmo 116:12-14).

⁸ Imastachus Jehová ruwapususqanpi piensarispaqa, agradecekusqaykirayku payman kausayniykita qopuyta munanki (Salmo 116:12-14 leey). Bibliaqa nin “tukuy ima allin kaj regaloqa, aswan sumaj regalopis” Jehovamanta jamusqanta (Sant. 1:17). Aswan sumaj regalotaj Wawan Jesusta noqanchejrayku wañunanpaj kachamusqan kashan. Chay regalota qowasqanchejrayku Diospa amigon kayta atinchej, wiñaypajtaj kausakuyta atisunchej (1 Juan 4:9, 10, 19). Chay jinatapuni munakuwasqanchejmanta, imastachus ruwapuwasqanchejmantapis agradecekusqanchejrayku, payman kausayninchejta qopuyta munanchej (Deu. 16:17; 2 Cor. 5:15). Chaymanta parlashan Wiñaypaj kusisqa kausakuy libro lección 46 punto 4. Chaypi uj video rikhurin, sutikuntaj Jehová Diosman regalosta qona.

¿WAKICHISQAÑACHU KANKI JEHOVAMAN KAUSAYNIYKITA QOPUNAYKIPAJ, BAUTIZAKUNAYKIPAJPIS?

 9. ¿Imaraykutaj sapa ujpuni qhawarikunan tiyan bautizakunanpaj jinañachus manarajchus kashasqanta?

⁹ Ichapis yuyawaj niraj wakichisqachu kashasqaykita kausayniykita Jehovaman qopunaykipaj, bautizakunaykipajpis. Ichapis kausayniykipi wakin imasta cambianaykiraj tiyan Jehovata kasukunaykipaj, chayri ichapis aswan tiempotaraj necesitanki creeyniykita sinchʼiyachinaykipaj (Col. 2:6, 7). Yuyarikuy, mana tukuy Bibliamanta yachakojkunachu kikin tiempopi ñauparinku. Manallataj tukuy joveneschu kikin tiempopi ñauparinku. Chayrayku sumajta qhawarikuy, reparakuy imaspichus astawan ñauparinayki kasqanta, amataj wajkunawan kikinchakuychu (Gál. 6:4, 5).

10. Kausayniykita Jehovaman qopunaykipaj, bautizakunaykipajpis manaraj wakichisqachu kashasqaykita yuyanki chay, ¿imatá ruwawaj? (“Tatasniyki Jehovaj testigosnin kajtinku” nisqa recuadrotawan qhawariy).

¹⁰ Sichus Jehovaman kausayniykita qopunaykipaj manaraj wakichisqachu kashasqaykita yuyanki chayqa, kallpachakunallaykipuni tiyan. Jehovamanta mañakuy imaspirajchus cambianayki kashan chaykunapi cambianaykipaj yanapasunanta (Fili. 2:13; 3:16). Payqa mañakuykunasniykita uyarisonqapuni, kutichisonqataj, chaymantaqa amapuni iskayrayaychu (1 Juan 5:14).

¿IMARAYKUTAJ WAKIN MANA BAUTIZAKUYTA MUNANKUCHU?

11. ¿Imaynatá Jehová yanapawanchej cheqa sonqos kananchejpaj?

¹¹ Wakin runasqa Jehovaman kausayninkuta qopunankupaj, bautizakunankupajpis wakichisqaña kashanku. Jinapis mana chayta ruwayta munankuchu. Ichapis manchachikunku jatun juchapi urmayta, congregacionmantataj qharqochikuyta. Jinapis Bibliaqa nin Jehovaqa kamachisninman tukuy ima necesitasqankuta qonanta, ‘imastachus payta yupaychajkuna ruwanku chay imasta ruwanankupaj, ajinamanta payta kusichinankupaj’ (Col. 1:10). Chayrayku ama iskayrayaychu allin kajta ruwanaykipaj necesitasqayki kallpata Jehová qosunanmanta. Payqa ashkhastaña yanaparqa (1 Cor. 10:13). Chayrayku uj mashkha runaslla congregacionmanta qharqochikunku. Jehovaj yanapanwanqa payman cheqa sonqos kayta atisunman.

12. ¿Imataj yanapawasunman mana jatun juchapi urmanapaj?

¹² Pantaj runas kasqanchejrayku tukuy aysasqa kanchej sajra imasta ruwayman (Sant. 1:14). Jinapis ajinapi rikukuspaqa ayqeyta atisunman, imaraykuchus allin kajtapis chayri mana allin kajtapis ruwayqa noqanchejmanta kashan. Wakin runasqa ninku sonqonchejpa munayninta mana mandayta atisqanchejta, nitaj imatachus ruwasqanchejtapis, jinapis chayqa mana ajinachu. Yachakusunman sajra munayninchejwan mana atipachikuyta. Chaypajqa sapa día orakuna, sapallanchejpi Bibliata estudianapaj uj sumaj programata ruwakuna, tantakuykunaman, predicacionmanpis rina. Chay imasta ruwallasunpuni chayqa, kausayninchejta Jehovaman qopusqanchejta juntʼanapaj kallpanchej kallanqa. Amapuni kayta qonqanachu: Mana sapallanchejchu kashanchej, Jehová noqanchejwan kashan yanapanawanchejpaj (Gál. 5:16).

13. ¿Imatá Josemanta yachakunchej?

¹³ Juchaman tanqasqa kajtinchej imatachus ruwananchejta ñaupajsitumantaña piensarisun chayqa, Jehovata kasukuyta atillasun. Bibliataj chayta ruwaj runasmanta parlan, paykunaqa noqanchej jinallataj pantaj runas karqanku. Paykunamanta ujnenqa José karqa. Potifarpa warmenqa kutin kutita nej paywan puñuykunanta. Josetajrí sutʼitaña yacharqa imatachus kutichinanta. Biblia nin: “Josetajrí mana munajchu”, nispa. Payqa nej: “¿Imaynatataj ruwayman kasqa chay millaytari, juchallikuymantaj Diospa contrantari?”, nispa (Gén. 39:8-10). Chaypi reparanchej payqa sutʼitaña yachasqanta imatachus ruwananta niraj Potifarpa warmin parlapayashajtin. Chayrayku chay warmi parlapayajtin chay rato nerqa “mana” nispa.

14. ¿Imaynatá yachakusunman Jehovaj chejnisqan imasta qhesachayta?

¹⁴ ¿Imaynatá José jina ruwasunman juchaman tanqasqa kaspa allin kajtapuni ruwanapaj? Kunanña piensarinanchej tiyan imatachus ruwananchejta juchaman tanqasqa kajtinchej. Imatachus Jehová chejnikusqantaqa chay rato qhesachayta yachakunanchej tiyan, mana ni uj ratitollatapis piensarispa (Sal. 97:10; 119:165). Chay yanapawasunchej mana jatun juchaman urmanapaj, ajinamanta juchaman tanqasqa kajtinchej sutʼitaña yachasun imatachus ruwananchejta.

15. ¿Imaynatá rikuchiwaj “sonqo kʼajaywan” Jehovata maskʼajkunamanta kasqaykita? (Hebreos 11:6).

¹⁵ Ichapis yachankiña cheqa kajta tarisqaykita, Jehovatataj tukuy sonqo sirviyta munashanki. Chaywanpis, ¿imachu jarkʼashasunki Jehovaman kausayniykita mana qopunaykipaj, bautizakunaykipajpis? Jina kajtenqa rey David jina ruwawaj, Jehovamantataj mañakuwaj: “Diosníy, allinta qhawaykuriway, sonqoytapis allinta rejsiy. Allinta qhawaykuriway, sonqoypi phutiyniytapis allinta rejsiy. Allinta sonqoyta qhawaykuriy, ichus ima sajra yuyaypis llakiy ñanman apawanman, wiñay ñantataj pusaway”, nispa (Sal. 139:23, 24). Kausayniykita Jehovaman qopunaykipaj, bautizakunaykipajpis kallpachakushanki chayqa, sonqo kʼajaywan payta maskʼashasqaykita rikuchishanki. Bibliataj niwanchej chayta ruwajkunata Jehová bendecisqanta (Hebreos 11:6 leey).

JEHOVAMAN QAYLLAYKULLAYPUNI

16, 17. ¿Imaynatá Diosninchej testigospa wawasninta congregacionman pusamun? (Juan 6:44).

¹⁶ Jesusqa nerqa runastaqa Jehová llajtanman pusamusqanta (Juan 6:44 leey). Chay nisqantaj may kʼachitupuni. Pero, ¿ima niytá munan? Jehovaqa sapa ujpi reparan allin kajta, chayraykutaj llajtanman pusamun. Paypajqa sapa uj kamachin “aswan sumaj”, may valorniyojpuni (Deu. 7:6). Qanpis ajinallataj Jehovapaj kanki.

¹⁷ Joven, sichus tatasniyki Jehovamanta yachachishasunku chayqa, ichapis yuyawaj paykuna apasusqankuraykulla congregacionpi kashasqaykita, manataj Jehovachu pusamususqanta. Chaywanpis Biblia nin: “Diosman qayllaykuychej, paytaj qankunaman qayllaykamusonqachej”, nispa (Sant. 4:8; 1 Cró. 28:9). ¿Imataj chay niyta munan? Sichus qan ñaupajta Jehovaman qayllaykunki chayqa, paypis qanman qayllaykamullasonqataj. Jehovapajqa may valorniyojpuni kanki. Tukuypis congregacionpi kashanchej Jehová sapa ujninchejta pusamuwasqanchejrayku. Testigospa wawasnintapis Jehovallataj pusamun. Sichus pipis payraj Jehovaman ñaupajta qayllaykun chayqa, Santiago 4:8 nin jina Diospis payman qayllaykullantaj (2 Tesalonicenses 2:13, kikinchay).

18. ¿Imatá qhepan yachaqanapi yachakusun? (Salmo 40:8).

¹⁸ Jesusqa bautizakuspa, Tatanpa ñaupaqenpi kasharqa imatachá ruwananta munasqanta tukuy sonqo ruwananpaj (Salmo 40:8 leey; Heb. 10:7). Qanpis kausayniykita Jehovaman qopuy, bautizakuytaj, ajinamanta Jesús jinallataj kasqaykita rikuchinki. Qhepan yachaqanaqa yanapasonqa bautizakuytawan, Jehovata tukuy sonqo sirvinallaykipajpuni.