Dios joqʼaritasmanta llakikun

Kunan tiempo mundo enteropi 70 millones jina joqʼaritas tiyan. Chay joqʼaritasmanta ashkhastaj makisninkuwan parlanku 200 kuraj señas parlaykunapi. Jinapis casi tukuy tiempo ashkha runas joqʼaritasta pisipaj qhawanku, chaytataj sutʼita reparanchej kayta nisqankupi:

• Asociación Nacional de Sordos de Estados Unidos nin: “Wakin kutis joqʼaritaspaj chantapis mana as walejta uyariyta atejkunaj derechosninkuta mana valechillankuchu”, nispa.

• Federación Mundial de Sordos nin: “Mana ancha qhapaj nacionespi tiyakoj joqʼaritasqa, wajchasmantapis aswan wajchasraj kanku. Joqʼaritaspajqa mana ancha escuelas kanchu, trabajotapis mana tarikuyta atillankuchu”, nispa.

¿Dios joqʼaritasta munakunchu? ¿Biblia ima nintaj joqʼaritasmanta? ¿Imatataj Jehovaj testigosnin ruwashanku paykunata yanapanankupaj?

¿Imaynatá Dios qhawan joqʼaritasta?

Bibliaqa nin Jehováa joqʼaritasmanta llakikusqanta, Diosqa mana munanchu joqʼaritasta pisipaj qhawanata, manachayqa munan yachachiykunasninwan joqʼaritas yanapachikunankuta.

Biblia nin: “Ama uj joqʼara runataqa maldecinkichu” (Levítico 19:14).

Biblia nin: ‘Diosqa tukuy runasta uj rejllata qhawan’ (Hechos 10:34).

Biblia nin: “Jesusqa tukuy llajtasta, tukuy ranchostawan muyumorqa, […] Diospa Gobiernonmanta sumaj willaykunata willaspa” (Mateo 9:35).

Biblia nin: ‘Jesusqa joqʼarasta uyaricherqa, opastapis parlaricherqa’ (Marcos 7:37).

Biblia nin: “Joqʼaraspis uyarenqanku” (Isaías 35:5).

¿Ima niytá munan? Jehová nin joqʼaritas tumpamantawan uyarinankuta (Isaías 29:18).

¿Imatataj Jehovaj testigosnin ruwashayku joqʼaritasta yanapanaykupaj?

Jehovaj testigosnenqa jallpʼantinpi joqʼaritasman yachachiyku ima suyakuytachus Dios qowasqanchejta. ¿Imaynatá chayta ruwayku? 100 kuraj señas parlaykunapi Bibliata videospi ruwayku, Bibliata estudianapaj waj videostapis ruwallaykutaj. Chantapis joqʼaritasta Bibliamanta yachachiyku, tantakuykunatapis señas parlaykunapi ruwayku Diosmanta yachakunankupaj. Chaytataj ruwayku mana ni mashkhata cobraspalla. Noqaykoqa mana cobraykuchu Jesús kayta nisqanrayku: “Qankunaqa mana pagaspalla japʼerqankichej, qoshaspaqa amallataj pagachikuychejchu” (Mateo 10:8).

Chay yanapastaqa kaykunapi tariwaj:

Internetpi jw.org nisqapi. Chayman yaykuspa pata kantupi idiomata cambianapaj cheqapi ñitʼiykuy, chaypitaj mayqen señas parlaytachá munanki chayta ajllay. Chantá imamantachus yachayta munanki chayta maskʼay.

JW Library Sign Language aplicacionpi. Chay aplicacionta celularniykiman chayri tabletniykiman uraqachikuy, ajinamanta señas parlaypi videosta uraqachiyta atinki, chayri mana uraqachispalla qhawayta atinki.

¿Imastá ruwayku Bibliamanta yachachinaykupaj?

Bibliata señas parlaypi ruwayku: Señaspi ñaupaj Bibliaqa enteritun traducikorqa Lenguaje de señas americano nisqapi. Chaytaj kashan Diospa Palabran nisqa Biblia. Chay Bibliaqa kanña tukuynin chayri wakin librosllapis ashkha señas parlaykunapi. Chantapis sapa wata astawan ashkha señas parlaykunaman traducikushan. (Mashkha parlaykunapichus kasqanta yachanaykipaj, chayri Bibliata Internetpi qhawanaykipaj “Mosoj Jallpʼapi Kausajkunapaj Diospa Palabran señas parlaypi” nisqa recuadrota qhawariy).

• Imaynatachus Biblia señas parlaypi traducikusqanta yachanaykipajqa kay videota qhawariy, La Traducción del Nuevo Mundo completa en lenguaje de señas americano ya está disponible nisqata.

• JW Library Sign Language nisqa aplicacionta celularniykiman chayri tabletniykiman oraqachikuwaj. Ajinamanta Bibliata señas parlaypi qhawaspa sumajta entiendenki, chay aplicacionpeqa facilta tariyta atinki ima versiculostachá munanki chayta.

• Dmytrowan Vitawan joqʼaritas kanku, iskaynin wawasninkutaj mana joqʼaritaschu kanku. Qhawarina imaynatachus kay familiata sapa día Bibliata señas parlaypi qhawasqanku yanapasqanta.

Bibliamanta yachachinapaj videosta ruwayku. Jehovaj testigosnenqa señas parlaypi runas Bibliamanta yachakunankupaj videosta ruwayku. Chay videostaj paykunata yanapan Bibliaj nisqasninta entiendenankupaj, Bibliaj yuyaychasqasninman jinataj kausakunankupaj. Chay yuyaychaykunaqa wakichisqa kashan:

• Casarasqaspaj familiaspajwan

• Jovencitospaj, jovenespajwan

• Wawaspaj

Sapa runaman Bibliamanta yachachiyku. Bibliamantaqa señas parlaypi atisqaykiman jinalla yachakuwaj. Chaypajtaj uj hermano chayri uj hermana yanapasonqa. Testigos Bibliamanta yachachisunankuta mañakuy, paykunaqa indicasonqanku imaynatachus mana cobraspalla Bibliamanta yachachisqaykuta.

Jeson Senajonon Filipinaspi tiyakun. Bibliamanta yachachisqaykoqa yanaparqa Dioswan amigos kanankupaj, chayta qhawarina.

Mario Antunezqa Honduraspi pastor karqa. Paypajqa Bibliamanta wakin imas mana sutʼichu karqa. “Tenía muchas preguntas y pocas respuestas” nisqa yachaqanapi qhawarina imachus Bibliata sumajta entiendenanpaj yanapasqanta.

Tantakuykunata, jatun tantakuykunatawan ruwayku. Jallpʼantinpi joqʼaritaspaj señas parlaypi congregaciones, grupos ima kapuwayku. Chaypi sapa semana joqʼaritas tantakunku Diosmanta yachakunankupaj, paytataj yupaychanankupaj. Chantapis sapa wata jatun tantakuykunata ruwayku Bibliamanta yachachinaykupaj, tantakuykunasniykupi chantá jatun tantakuykunasniykupipis pikunachus joqʼaritastaj cieguitustaj kanku chaykunata yanapayku makisninkumanta japʼispa señasta ruwaspa. Chantapis braillepi publicacionesta mana cobraspalla jaywayku.

• Tantakuna wasita tiyakunki chaynejpi maskʼay.

• Kaypi qhawariy maypichus jatun tantakuykunasniyku ruwakunanta.

• Jesuspaj Wañuyninta Yuyarinapaj tantakuyman jamuriy. Chay tantakuymanqa sapa wata rinapuni, chay tantakoyqa tukuy tantakuykunamanta aswan sumaj.

José Luis Ayala Mexicopi tiyakun. Payqa joqʼarita nacekorqa, tiemponmantaj ciegoyaporqa. Kunanqa payqa Bibliamanta sumajta yachachin wajkuna yanapasqankurayku, chayta kaypi qhawariy.