¿Testigosqa manañachu religionninkumanta qharqochikojkunata parlapayanku?
Pillapis Jehovaj testigon jina bautizakuytawan manaña willaj llojsinchu, congregacionmantataj karunchakun chayqa, watejmanta Jehovaman qayllaykunanpaj, llajtanmantaj kutinpunanpaj kallpachariyku.
Pillapis Jehovaj testigon jina bautizakuytawan uj jatun juchapi urman chayqa congregacionmanta qharqochikunman. Chaywanpis juchallikojtaqa mana chay ratochu congregacionmanta qharqokun, manaqa Bibliaj kamachiykunasninta kʼullukuspa manapuni kasukojtin, manataj sajra ruwayninmanta pesachikojtin. Congregacionmanta hermanostaj manaña paywan masichakunkuchu, nitaj parlapayankuchu. Biblia nin: “Qankuna [...] chay juchallikojta chawpiykichejmanta qharqoychej”, nispa (1 Corintios 5:13).
¿Imataj kanman uj tata qharqochikojtin, familiantaj Jehovaj testigollanpuni kajtin? Qharqochikojwan Bibliamanta manaña parlayta atejtinkupis, familia jinallapuni kausakuyta atinku. Sutʼincharinapaj, qharqochikoj tataqa warminwan wawasninwan ima parlariyta atillanmanpuni.
Chantapis qharqochikojkunaqa tantakuyniykuman jamuyta atinku, munanku chaytaj ancianospa yanapayninkutapis mañakuyta atinku. Chaytaj ruwakun watejmanta Jehovaj testigosnin kanankupaj. Arí, qharqochikojkuna millay kausayninkuta saqenku, Bibliaj yuyaychaykunasninman jina kausakuyta munasqankuta rikuchinku ima chayqa, watejmanta Jehovaj testigon kayta atinku.