¿Jehovaj testigosnin waj iglesias jinachu Señorpa Cenanta ruwanku?

Imaraykuchus noqaykoqa “Señorpa Cenanta” ruwanaykupaj Bibliaj nisqanta qhawariyku, chaypi nisqanman jinataj ruwayku (1 Corintios 11:20). Waj iglesiastajrí creenciasninkuman jinalla chayri costumbresninkuman jinalla ruwanku, manataj Bibliaj nisqanman jinachu.

Señorpa Cenanta ruwayku, Jesús noqanchejrayku wañusqanta yuyarikunaykupaj, chaymanta agradecekunaykupaj ima (Mateo 20:28; 1 Corintios 11:24). Wakin runas yuyanku Señorpa Cenanpi tʼantata mikhuspa, vinotawan ujyaspa juchasninku perdonasqa kananta. Jinapis Bibliaqa mana chaytachu yachachin. Astawanpis nin, juchasninchej pampachasqa kananpajqa Jesuspi creenanchej kasqanta, nitaj ima costumbretapis ruwanachu kasqanta (Romanos 3:25; 1 Juan 2:1, 2).

Jesusqa discipulosninman chay Cenata ruwanankuta kamachishaspa, mana nerqachu watapi mashka kutistachus ruwanankuta (Lucas 22:19). Wakenqa yuyanku sapa killa chay Cenata ruwana kasqanta, wakintaj sapa semana, wakintajrí sapa día. Wakin runastaj ninku: “Sapa ratopis ruwallasunman, chayqa noqallanchejmanta kashan”, nispa.a Jinapis mashkha kutistachus Señorpa Cenanta ruwanata yachanapajqa, kay imaspi piensarina kanman:

Jesusqa ima diachus judíos Pascuata ruwaj kanku, chay diallataj Señorpa Cenanta qallaricherqa. Chaymanta aswan qhepa horasmantaj wañuporqa (Mateo 26:1, 2). Ichá chayrayku Bibliaqa Jesusmanta nin: “Cristoqa Pascua corderonchej”, nispa (1 Corintios 5:7, 8). Judiosqa Pascuata watapi uj kutillata ruwaj kanku (Éxodo 12:1-6; Levítico 23:5). Ñaupa cristianospis Señorpa Cenanta watapi uj kutillata ruwaj kanku. Chayrayku noqaykupis Jesuspa wañuyninta yuyarinapaj, watapi uj kutillata Señorpa Cenanta ruwayku. Ajinamanta Bibliaj nisqanta kasukuyku.

Chayta yachanapajqa maykʼajchus Jesús chay Cenata qallarichisqanta yachana tiyan. Jesusqa Señorpa Cenanta qallaricherqa, 33 watamanta 14 de nisán pʼunchaypi inti yaykupusqantawan. Chaytaj karqa ñaupa tiempomanta judiospa calendarionkuman jina. Paykunaj calendarionkutaj killaman jina ruwasqa karqa (Mateo 26:18-20, 26). Ñaupa tiempomanta cristianospis 14 de nisanllapitaj, Señorpa Cenanta ruwaj kanku. Chayrayku noqaykupis chay fechallapitaj Jesuspa wañuyninta yuyarinapaj tantakuyku.b

Kay 33 watamanta 14 de nisanqa, calendarionchejpi viernes pʼunchayman urmarqa. Jinapis chay fechaqa mana kikin diallamantajchu sapa wata urman. Ima diamanchus 14 de nisán urmasqanta yachanaykupajqa, Jesuspa tiemponmanta judíos jina killata qhawayku, manataj kay tiempomanta judíos jinachu ruwayku.c

Jesusqa Señorpa Cenanta qallarichinanpaj, mana levadurayoj tʼantata, vinotawan oqharerqa. Chay mikhuykunaqa Pascua fiestamanta puchorqa (Mateo 26:26-28). Chayrayku noqaykupis Jesuspa wañuyninta yuyarinaykupaj, mana ni imitayoj tʼantata, vino purituta ima wakichiyku. Tʼantaqa yakituwan jakʼituwan ruwasqalla. Vinotaj mana uvas jugochu, nitaj waj imaswan chajrusqachu.

Wakin iglesiasqa Señorpa Cenanta levadurayoj tʼantawan ruwanku. Jinapis Bibliapi levaduraqa, ashkha kutispi juchawan, sajra kajwan ima ninakun (Lucas 12:1; 1 Corintios 5:6-8; Gálatas 5:7-9). Chayrayku levadurayoj tʼantaqa, mana ninakuyta atinmanchu Jesuspa mana juchayoj cuerponwan. Chaypajqa mana levadurayoj tʼantapuni kanan tiyan (1 Pedro 2:22). Wakin iglesiasqa Señorpa Cenanta uvas jugowan ruwanku. Imaraykuchus paykunaqa pisi alcoholtapis tomayta juchapaj qhawanku. Jinapis chayqa mana Bibliaj nisqanman jinachu kashan (1 Timoteo 5:23).

Señorpa Cenanpi mana levadurayoj tʼantaqa, Cristoj cuerponwan ninakun, vinotaj yawarninwan. Wakin runasqa yuyanku, tʼantaqa Jesuspa cuerponman tukusqanta, vinotaj yawarninman. Wakintaj ninku, tʼantawan vinowan Jesuspa cuerponwan yawarninwan ima chajrukusqanta. Jinapis chayqa mana Biblia nisqanman jinachu kashan. Imaraykuchus chayta nisqanchejta qhawarina.

• Sichus Jesús discipulosninman yawarninta tomanankuta kamachinman karqa chayqa, Diospa kamachisqanman churanakushanman karqa. Imaraykuchus Diosqa kamacherqa, yawarta mana mikhunankuta, nitaj tomanankuta (Génesis 9:4; Hechos 15:28, 29). Jinapis Jesusqa mana Diospa kamachiykunasninman churanakunmanchu karqa. Imaraykuchus payqa Diospa kamachiykunasninta, yawartapis jatunpaj qhawaj (Juan 8:28, 29).

• Sichus apóstoles Jesuspa yawarnintaña tomashankuman karqa chayqa, Jesusqa mana ninmanchu karqa yawarnin jichʼasqa kananta. Jinapis chaytapuni nerqa. Yawarnintaj aswan qhepamanraj jichʼasqa karqa (Mateo 26:28).

• Jesusqa kausayninta noqanchejrayku qorqa “uj kutillata wiñaypaj” (Hebreos 9:25, 26). Sichus Señorpa Cenanpi tʼantawan vinowan Jesuspa cuerponman yawarninman ima tukunman chayqa, sapa kutipis Jesús kausayninta qoshanman jina kanman.

• Jesusqa nerqa: “Kayta ruwallaychejpuni noqamanta yuyarikuspa”, nispa. Manataj nerqachu: “Kayta ruwallaychejpuni qankunarayku sapa kuti cuerpoy entregasqa kananpaj”, nispa (1 Corintios 11:24).

¿Imaraykutaj wakin runas piensanku tʼantawan vinowan Jesuspa cuerponman yawarninman imapuni tukusqanta? Wakin Biblias wakin versiculosta mana sutʼitachu tijrachisqankurayku. Chaykunamanta ujqa, Mateo 26:28 kashan. Ashkha Bibliaspi chay versiculota kay jinata tijrachinku: “Kayqa tratomanta yawarniy”, nispa. Jinapis Jesuspa palabrasnenqa, kay jinata nikullanmantaj: ‘Kay ujyanaqa yawarniywan ninakun’, nispa.d Jesusqa chay kutipi, waj kutispi jinallataj uj kikinchaywan parlasharqa (Mateo 13:34, 35).

Señorpa Cenanpi kashaspaqa, mana tukuychu tʼantata mikhuyku, nitaj vinotapis ujyaykuchu. ¿Imaraykutaj ajinata ruwayku?

Jesusqa yawarninta jichʼaspa uj ‘mosoj tratota’ ruwarqa. Chay tratotaj, Jehová Dios Israel llajtawan ruwasqan tratoj cuentanmanta sayarichisqa karqa (Hebreos 8:10-13). Chay mosoj tratopi kajkunalla, Señorpa Cenanpi tʼantata mikhuyta atinku, vinotapis ujyayta atinku. Paykunataqa Dios kikin wajyan cielopi Cristowan gobernamunankupaj. Bibliataj nin, 144 mil runaslla wajyasqa kasqankuta (Lucas 22:20, 28-30; Hebreos 9:15; Apocalipsis 5:9, 10; 14:1, 3).

Paykunaqa ‘juchʼuy tropa ovejas’ nisqa kanku. Jinapis Bibliaqa waj grupo cristianosmanta parlallantaj. Chay grupotaj ‘may chhika runas’ nisqa kanku, kay jallpʼapitaj wiñaypaj paraisopi kausakonqanku (Lucas 12:32; Apocalipsis 7:9, 10). Chay grupomanta kajkunaqa, mana Señorpa Cenanpi tʼantata mikhuykuchu, nitaj vinotapis tomaykuchu. Jinapis Jesús kausayninta qosqanmanta agradecekunaykupaj, sapa wata chay Cenaman riykupuni (1 Juan 2:2).