35 YACHAQANA

¿Imatá ruwayman Diospa amigon kanaypaq?

Gabrielqa, juk jatun chʼampaypi kachkaspa, Diospa amigon kay, may sumaq kasqanta rikurqa. Pay nin: “Tatayqa, 12 watayuq kachkaptiy, saqirpawarqayku. Yuyarikuni, juk tuta cuartoypi kachkaspa, tatay kutimunanta, Jehovamanta mayta mañakusqayta”.

Gabrielqa llakisqa kachkaspa, Bibliata ñawiriyta qallarirqa. Chaypitaq, Salmos libromanta juknin qillqaq, imatachus Jehovaman nisqanmanta, juk pʼitipi ñawirirqa, chay pʼitipitaq nin: “Qanmanqa mana piniyojkuna chayamusunku; qanqa wajcha wawasta yanapanki”, nispa (Salmo 10:14). Gabrielqa, chay ñawirisqan sunqunman chayasqanta nirqa, nintaq: “Ñawirisqayqa, Jehová Tatay kasqanta yuyarichiwarqa, jinamanta Jehová yanapachkawasqanta repararqani. Payjina sumaq tataqa mana pipis kanchu”, nispa.

¿GABRIELPA chʼampayninpijinachu qampis rikukunki? Ichá. Chaywanpis, kayqa sutʼi: Jehovaqa amigon kanaykita munan. Biblia niwanchik: “Diosman astawan qayllaykuychej; paypis qayllamusonqachej”, nispa (Santiago 4:8). Jehovata manapis rikunchikchu, manapis payjina may atiyniyuqchu kanchik, Payqa, ¡amigon kananchikpaq waqyawanchik!

Chaywanpis, Diospa amigon kanaykipaqqa, mana jinallachu qhipakunayki tiyan. Sutʼinchanapaq; juk plantita kapususqanpi tʼukuriy. Allinta wiñananpaq, qʼumirllapuni kananpaq ima, ¿imatá ruwanayki tiyan? Maypichus allinta wiñarinman, chayman churanayki tiyan, maychus tiemponpitaq qarpanayki tiyan, mana jinallata saqirpariwaqchu, ¿icharí? Jinallataq Diospa amigon kanallaykipaqpuniqa, mana jinallachu qhipakunayki tiyan. Payman astawan qayllaykunaykipaq, ¿imatá ruwanayki tiyan?

Bibliata ñawirillaypuni

Yachankijina, iskay amigos sumaqta apanakunankupaqqa, parlapayanakunanku, uyarinakunanku ima tiyan. Diospa amigon kananchikpaqpis, payta uyarinanchik tiyan. Chaywanpis, ¿imaynatá Jehovata uyarisunman? Paypa Palabranta ñawirispa, ukhuncharispa ima (Salmo 1:2, 3).

Arí, ichá Bibliata ukhunchay mana anchatachu gustasunki. Ichá teleta, peliculasta qhaway, amigoswan lluqsiy ima, astawan gustasunki. Chaywanpis, Diospa amigon kayta munanki chayqa, imatachus Palabranniqta nisusqanta uyarinayki tiyan.

Ama yuyaychu Bibliata ñawiriy saykʼukunapaqjina kasqanta. Astawanqa, librosta ñawiriy mana gustasuptinpis, Bibliata ñawirispa kusiyta tarinki. Chaywanpis Bibliata ñawirinapaq tiempochakuna. ¿Imaynatá? Ichá Leslijina ruwaspa, pay nin: “Juk horariota wakichikuni, sapa pʼunchay camaymanta jatarikuytawan Bibliamanta juk tʼaqata ñawirinaypaq”, nispa. María 15 watayuq jukjinamantataq ruwan, nintaq: “Sapa tuta, manaraq puñuchkaspa, Bibliata ñawirini”, nispa.

¿Qamri? ¿Ima horapitaq sapa pʼunchay Bibliata ñawiriyta munanki? Ñawpaqta, kay 292 paginapi imatachus nisqanta ñawiriy. Chantá, sapa pʼunchay ima ratopichus 30 minutosta Bibliata ñawiriyta munasqaykita, kaypi qillqay.

․․․․․

Chaywanpis Bibliata ñawiriyta qallarispaqa, ichá wakin kuti imamantachus ñawirichkasqaykita mana japʼiqayta atillankichu. Jezreel, 11 watayuq nin: “Bibliamanta wakin pʼitikunata mana japʼiqayta atillanichu”, nispa. Ichá qampis payjina yuyanki. Chaywanpis, Bibliata ñawirillaypuni. Ajinata ruwaspa amigoyki Jehovata uyarichkasqaykita yuyarikuy. Ñawirinallaykipaqpuni astawan kallpachakuspaqa, ñawirisqaykiwan astawan miskʼirichikunki, Diosmantaq astawan qayllaykunki.

Diosmanta mañakullaypuni

Diosqa, paymanta mañakuyta juk sumaq regalotajina quwanchik. Ajinamanta paywan parlariyta atinchik. Kaypi tʼukuriy: ima ratochá munanki, Dioswan parlayta atinki, imaraykuchus payqa uyarinawanchikpaq wakichisqapuni kachkan, mañakusqanchiktataq uyariyta munan. Chayrayku Bibliaqa, “tukuy imamanta graciasta qospallapuni”, “imatachus” munasqaykita ‘mañakunaykita’ yuyaychasunki (Filipenses 4:6).

Chaytaq ninayan tukuy imamanta, nisunman llakiyniykimanta, chʼampayniykimanta ima, Jehovaman willakuyta atisqaykita. Chantá, tukuy imamanta pachis ninaykipis may allin. Imaraykuchus amigosninchikta imapipis yanapawasqanchikmanta agradecekunchikpuni. Ni mayqin amigoyki Jehovajinaqa qamrayku tukuy imata ruwanchu (Salmo 106:1).

Imasmantachus Jehovaman agradecekuyta munasqaykita kaypi qillqay.

․․․․․

Wakin kutipi chʼampaykunasniykirayku manchay llakisqa kachkanki chayqa, ¿imatá ruwawaq? Chay “llakiyniykita Tata Diosman saqey. Payqa sinchʼita sayachisonqa. Payqa cheqan runata ni jaykʼaj urmajta saqenqachu” (Salmo 55:22).

Ima llakiyniykimantachus Diosman willayta munasqaykita kaypi qillqay.

․․․․․

Imaynatachus Jehová yanapasusqanta ama qunqaychu

Davidqa, Diospa amigon kanallanchikpaqpuni imatawanchus ruwananchikta juk takiypi rikuchiwanchik, nintaq: “Qhawaychej, yachaychejtaj Tata Diosqa kʼacha kasqanta”, nispa (Salmo 34:8). Kay takiytataq, juk jatun chʼampayta atipasqantawan qillqarqa. Chaypachaqa, rey Saúl wañuchinanpaq qhatiykachachkarqa. Mana imata ruwayta atispataq, pakakunanpaq enemigosnin filisteospa llaqtankuman ayqirqa, paykunataq David kasqanta chay ratopacha riqsirparqanku. Mana salvakunanpaqjina kachkaspapis, salvakurqa. ¿Imaynamantá? Loco locoman tukuspa (1 Samuel 21:10-15).

Chaywanpis Davidqa, mana yuyarqachu sumaq yuyayniyuq kasqanrayku filisteosmanta salvakusqanta. Astawanqa, takiyninpa qallariyninpi Jehovap yanapayninwan salvakusqanta nirqa, jinata nispa: “Tata Diosta qhaparikorqani, paytaj uyariwarqa. Tukuy manchachikuykunamanta pay librawarqa” (Salmo 34:4). Jehovap yanapayninta rikusqanrayku, pay nirqa: “Qhawaychej, yachaychejtaj Tata Diosqa kʼacha kasqanta”.a

Juk chʼampaypi kachkaptiyki, imaynatachus Jehová yanapasusqanta kaypi qillqay. Chaytaq mana tʼukunapaqjinapunichu kanan tiyan, astawanpis ichá kanman imaynatachus Jehová pisi imaspi yanapasusqallanmanta.

․․․․․

Sapa jukninchik Diospa amigon kanallanchikpaqpuni kallpachakunanchik tiyan, tatasninchik Diospa yuyaychasqanmanjina uywachkawaptinchikpis. ¿Qamri? Diospa amigon kanallaykipaqpuni, ¿kallpachakuchkankichu? Mana jina kaptin, kay yachaqanaqa, Diospa amigon kanaykipaq yanapasunqa. Jehovaqa, amigon kanaykipaq kallpachakusqaykimantataq bendecisunqa, imaraykuchus Biblia niwanchik: ‘Mañakullaychikpuni qusunqachiktaq, maskʼallaychikpuni tarinkichiktaq’, nispa (Mateo 7:7).

ASTAWAN YACHAKUNAYKIPAQ, ÑAWPAQ KAQ LIBROMANTA 38, 39 YACHAQANASTA ÑAWIRIY

[Sutʼinchaynin]

BIBLIAMANTA

“May cusiskas cancu sonkoncupi Diosmanta pisiskas caskancuta khawacojcunaka.” (Mateo 5:3, Dios Parlapawanchej)

JUK YUYAYCHAY

Sapa pʼunchay Bibliamanta 3 chayri 5 tʼaqasta ñawirispaqa, juk watapi Bibliata ñawiriyta tukunki.

¿YACHARQANKICHU?

Chiqamanta qamqa, kay librota ñawirichkanki, kay libropi Bibliap nisqanmanjina yuyaychakusqantataq kasukuchkanki, imaraykuchus Jehová, paypa amigon kanaykita munan (Juan 6:44).

¡RUWAYTA QALLARIY!

Bibliata ukhunchachkaspa sumaqta yachakunaypaq, kayta ruwasaq: ․․․․․

Diosmanta sapa kuti mañakunaypaq, kayta ruwasaq: ․․․․․

Kay yachaqanamanta, ¿imatá tatayta chayri mamayta tapuyta munani? ․․․․․

QHAWASQAYKIMANJINA

● Bibliata ñawiriywan miskʼirichikunaykipaq, ¿imatá ruwawaq?

● ¿Imaraykutaq Jehová Dios juchasapa runaspa mañakusqankuta uyariyta munan?

● Diosman kikillanmantapuni sapa kuti mana parlanaykipaq, ¿imatá ruwawaq?

[291 paginapi sutʼinchaynin]

“Wawallaraq kachkaspa Diosmanta mañakusqayqa, yaqha kikillan karqa. Kunanqa sapa pʼunchay imaynachus riwasqanmanta parlani. Sapa pʼunchaytaq jukjina riwasqanrayku, manaña kikillanmantapunichu Diosman parlani.” (Eva)

[292 páginapi recuadro, dibujo/foto]

Bibliaykita allinta ñawiriy

 1. Bibliamanta imatachus ñawiriyta munasqaykita akllay. Ñawirichkasqaykita sumaqta japʼiqanaykipaqqa, Jehovamanta yachayta mañakuy.

 2. Allillanmanta ñawiriy. Ama usqhayllata ñawiriychu, manaqa allinta japʼiqanaykipaqjina ñawiriy, nisunman, imamantachus ñawirichkasqaykita rikuchkawaqpisjina, pikunamantachus ñawirichkasqayki, paykunata uyarichkawaqpisjina, imachus qʼaparisqanta muskhirichkawaqpisjina, mikhuywan miskʼirichikuchkawaqpisjina ima, ñawiriy.

 3. Tapuykunata ruwakuy. Bibliamanta imamantachus ñawirichkasqaykita tukuytawan tapurikuy:

● ¿Imaraykutaq Jehová Palabranpi kayta qillqachirqa?

● Ñawirisqaymanjina, ¿pikunajinataq ruwanay tiyan, pikunajinataq mana?

● Kawsayniypi yanapanawanpaqjina, ¿imastá yachakuni?

● Imayna Dioschus Jehová kasqanmanta, ¿imatá yachakuni?

 4. Diosman graciasta quy. Bibliamanta imatachus yachakusqaykimanta, imaynatachus yachakusqaykimanjina ruwanaykimantapis, Jehovaman willay. Chantá, Bibliata qillqachisqanmantapis graciasta quy.

[Dibujo/foto]

“Palabraykeqa purinaypi kʼanchana jina, ñanniypitaj kʼanchay jina.” (Salmo 119:105)

[294 paginapi recuadro, dibujo/foto]

Aswan allin kaqta ñawpaqman churay

Bibliata ukhunchanaykipaq, Diosmanta mañakunaykipaq ima, ¿manachu tiempochakuyta atillanki? Jina kaptin, kawsayniykipi imatachus ñawpaqman churanayki kasqanta yachayqa, yanapasunqa.

Kayta ruway: Juk baldeta maskʼaytawan jatuchaq rumista chayman churay. Chantá tʼiyuwan juntʼaykuchiy. ¿Ima rikukun? Rumimanta, tʼiyumanta ima juntʼasqa balde, ¿icharí?

Kunantaq baldeta chʼusaqchaspa, tʼiyutañataq ñawpaqta churay patanmantaq rumista churaykuy, ¿tukuynin rumischu yaykun? Mana, ¿icharí? ¿Imarayku? Imaraykuchus ñawpaqtaqa tʼiyutaraq churarqanki.

¿Imatá yachakunchik? Juchʼuy imasta, nisunman sunquta kusirichiyta, kawsayniykipi ñawpaqman churaspaqa, mana tiempoyki kanqachu jatuchaq imasta ruwanaykipaq, nisunman Bibliata ukhunchanaykipaq, Diosmanta mañakunaykipaq ima. Chayrayku Biblia yuyaychawanchik, “aswan allin kajta” ñawpaqman churananchikta (Filipenses 1:10). Kay yuyaychaymanjina ruwaspaqa, Bibliata ukhunchanaykipaq tiempoyki kanqa, wakin kuti sunquykita kusirichinaykipaqpis. Chaypaqqa, aswan allin kaqta kawsayniykipi ñawpaqman churanayki kasqanta, ama qunqaychu.

[290 paginapi dibujo/foto]

Plantitayki wiñananpaqqa, mana jinallachu qhipakunayki tiyan, jinallataq Diospa amigon kanaykipaqqa, mana jinallachu qhipakunayki tiyan