¿Imatataj Biblia nin tantalla tiyakunamanta?

Diosqa ‘khuchichakuy juchamanta tʼaqakunanchejta’ munan (1 Tesalonicenses 4:3). Biblia nisqanman jina, “khuchichakuy jucha” ukhupi kashan: qhenchachakuy, niraj casarashaspa qhariwarmi jina puñuykuy, qharipura chayri warmipura qhariwarmispis kankuman jina puñuykuy ima.

• ¿Imaraykutaj Dios qhariwarmis casarakunankuta munan?

• ¿Allinchu kanman casarayta munajkuna tantalla tiyakunanku, allintachus manachus kausanankuta yachanankupaj?

• ¿Imatá ruwana kanman casado vidapi kusisqa kausakunapaj?

• Casado kausaytaqa Dios rikhuricherqa. Chaytataj ruwarqa ñaupaj qhariwarmita casarachispa (Génesis 2:22-24). Diosqa mana munarqachu, qhariwarmis tantalla tiyakunankuta ima ratopis tʼaqanarpakunankupaj.

• Diosqa imachus noqanchejpaj allin kasqanta yachan. Payqa familiaspa allinninkupi piensaspa, qhariwarmita casaracherqa. Ajinamanta wiñaypaj khuska kausakunankupaj. Uj roperota armayta munasqanchejpi piensarina. Roperota allinta armanapajqa, pichus yachajta tapurikunanchej tiyan, pay niwasqanchejman jinataj ruwananchej tiyan. Ajinallatataj ruwanachej tiyan kusisqa familiayoj kanapajqa. Familiata rikhurichejqa Diosninchej. Chayrayku imatachus familiasman kamachisqanta kasukusun chayqa, kusisqa kausakusunchej (Isaías 48:17, 18).

  

• Manaraj casarashaspa qhariwarmi jina puñuykojkunaqa, ashkha llakiykunapi rikhurinku. Mana munaspalla wawayoj rikhurinku, millay onqoykunata chimpachikunku, llakisqastaj kanku.

• Diosqa qharitawan warmitawan ruwarqa khuska puñuykuspa wawasniyoj kayta atinankupaj. Diosqa kausayta may valorniyojpaj qhawan, qhariwarmi jina puñuykuytaj paymanta uj sumaj regalo. Chayrayku Diosqa casarasqa kajkunalla qhariwarmi jina puñuykunankuta munan. Chay kamachiyta kasukojkunaqa, Diospa regalonta jatunpaj qhawasqankuta rikuchinku (Hebreos 13:4).

Mana. Mana allinchu kanman casarayta munajkuna concubinolla tiyakunankoqa. Imaraykuchus tantalla tiyakuspaqa, ima ratopis separanakullankuman. Chaytaj llakiy kanman. Jinapis casarasqa kajkunaqa, casarashaspa ninakunku wañupunankukama khuska kanankuta, ima problematapis khuska allinchanankuta.a Chayrayku casarasqa kajkunaqa, mana facilta separanakunkuchu (Mateo 19:6).

Casado vidapeqa problemas kanpuni. Jinapis casarasqas Bibliaj kamachisqanta kasukunku chayqa, kusisqa kausakuyta atinkuman. Imatachus Biblia casarasqasman nisqanta qhawarina:

• Qanpa allinnillaykita maskʼanaykimantaqa, qosaykej chayri warmiykej allinninta ñaupajta maskʼay (1 Corintios 7:3-5; Filipenses 2:3, 4).

• Purajmanta munanakunaykichejpaj kallpachakullaychejpuni, sapa diataj astawan respetanakuychej (Efesios 5:25, 33).

• Imata ninakunaykichejpajpis sumajtaraj piensariychej (Proverbios 12:18).

• Paciencianakuychej, usqhaysitutataj perdonanakuychej (Colosenses 3:13, 14).