¿Imatá Biblia nin diezmota qonamanta?

Diosqa ñaupa tiempomanta israelitasman kamacherqa watapi imastachus japʼisqankumanta, sapa chunkamanta ujta qonankuta chayri diezmota qonankuta. Chaytaqa qonanku karqa Diosta yupaychay ñauparinanpaj. Dios nerqa: “Chajraykichejpi poqochisqaykichejmantaqa, sapa chunkamanta ujta [chayri “diezmota”] sapa wata apamunkichej”, nispa (Deuteronomio 14:22, sutʼinchaynintawan qhawariy).

Diezmota qonataqa Moisespa Leyninpi kamachikorqa. Chay Leytataj Dios israelitasman qorqa. Cristianosqa manaña chay Leyta juntʼanachu tiyan. Chayrayku diezmotapis manaña qonachu tiyan (Colosenses 2:13, 14). Astawanpis sapa cristiano qolqesitunmanta qonman “sonqonpi yuyasqanman jina [...], mana llakikuspa, nitaj obligasqa jinachu. Imaraykuchus Diosqa kusiywan qojta munakun” (2 Corintios 9:7).

• ¿Ima nintaj Biblia diezmomanta Ñaupa Testamentopi?

• ¿Ima nintaj Biblia diezmomanta Mosoj Testamentopi?

Ñaupa Testamentopeqa ashkha kutista diezmomanta parlakun. Diezmomanta parlan chay versiculostaj, casi tukuynin parlashanku israelitas Diospa Leyninta japʼisqanku tiempomanta qhepaman. Jinapis pisi versiculoslla parlan, Dios israelitasman niraj Leyta qoshajtin, wakin runas diezmota qosqankumanta.

Dios israelitasman niraj Leyta qoshajtin

Bibliaqa nin ñaupaj kutipi Abrán (Abrahán) diezmota qosqanta (Génesis 14:18-20; Hebreos 7:4). Abranqa chay kutillasina diezmota regalota jina qorqa Salemmanta reytaj, sacerdotetaj karqa chay runaman. Bibliaqa mana ninchu Abrahán chayri wawasnin waj kutispi diezmota qosqankuta.

Abrahanmanta aswan qhepata allchhin Jacobñataj diezmota qorqa. Jacobqa Diosman nerqa payta bendicejtin, tukuy ima qosqanmanta “sapa chunkamanta ujta” qonanta (Génesis 28:20-22). Bibliamanta wakin yachajkuna nisqankuman jina, Jacob diezmota qosqanqa ichapis uywa wañuchisqas karqa. Pay chay diezmota qonanta nisqantaqa mana familian juntʼananchu karqa.

Dios israelitasman Leyta qosqanmantaña

Israelitasqa diezmota qonankupuni karqa Diosta yupaychaypi yanapakunankupaj.

• Diezmota churasqankoqa sacerdotesta, waj levitastawan yanapanankupaj karqa. Paykunaqa tukuy tiemponkuta churaj kanku Diosta yupaychanankupaj, nitaj jallpʼasninku karqachu tarpunankupaj (Números 18:20, 21). Israelitasqa mana sacerdoteschu karqanku chay levitasman diezmota qoj kanku, paykunataj chay diezmomanta sacerdotesman “sapa chunkamanta ujta” qoj kanku (Números 18:26-29).

• Chantapis sapa wata waj diezmotawansina qoj kanku. Chay diezmotaj karqa levitaspaj, mana levitaschu kajkunapajpis (Deuteronomio 14:22, 23). Chay tʼaqasqanku diezmoqa israelitaspa fiestasninkupaj karqa. Wakin watastaj chay tʼaqasqanku diezmomanta orqhoj kanku wajcha runasta yanapanankupaj (Deuteronomio 14:28, 29; 26:12).

¿Imaynatá yachaj kanku mashkhatachus qonankuta? Israelitasqa sapa wata, chajrasninku poqosqanmanta sapa chunkamanta ujta tʼaqaj kanku (Levítico 27:30). Sichus chay tʼaqasqankumanta qolqepi qoyta munaj kanku chayqa, chay qosqanku mashkhachus valen chayta pagananku karqa, chaypa valorninmantaj phishqaman tʼaqaspa ujnintawan yapananku karqa (Levítico 27:31). Chantapis “wakasmanta, ovejasmanta, cabrasmanta imaqa sapa chunkamanta ujta” qonallankutaj karqa (Levítico 27:32).

Israelitas uywasninkumanta sapa chunkamanta ujta qonankupajqa, uywasninku kanchamanta llojsimushajtinku yupashaspa sapa chunka kajta Diospaj tʼaqananku karqa. Chantapis Ley nisqanman jina, mana qhawaykunankuchu karqa allinchus manachus kasqanta, nitaj wajwan cambiayta aterqankuchu, nillataj qolqetapis chay uywasmanta qoyta aterqankuchu (Levítico 27:32, 33). Jinapis fiestaspaj karqa chay iskay kaj diezmomantaqa, qolqetapis qoyta atillarqanku. Chayqa may sumajpuni karqa karumanta fiestaman jamoj israelitaspaj (Deuteronomio 14:25, 26).

¿Maykʼajtaj israelitas diezmota qoj kanku? Israelitasqa sapa wata diezmota qonanku karqa (Deuteronomio 14:22). Jinapis qanchis kaj watapeqa mana diezmota qojchu kanku. Imaraykuchus chay wataqa, samarikuna wata karqa. Israelitastaj mana jallpʼasninkupi tarpojchu kanku (Levítico 25:4, 5). Chayrayku chay wataqa cosecha tiempopi mana diezmota qojchu kanku. Chantapis sapa qanchis watasmanta kinsa kaj watapi, sojta kaj watapipis, iskay kaj diezmomanta wajchasman, levitasman ima qoj kanku (Deuteronomio 14:28, 29).

¿Ima castigotaj karqa diezmota mana qojkunapaj? Ley nisqanman jina mana ni ima castigopis kajchu. Israelitasqa Diosta kusichinankupaj diezmota qonanku karqa. Paykunaqa Diospa ñaupaqenpi ninanku karqa diezmota qosqankuta, chantaraj paypa bendicionninta mañakunanku karqa (Deuteronomio 26:12-15). Israelitas mana diezmota qojtinkoqa, Diosmantapis suwashankuman jina karqa (Malaquías 3:8, 9).

¿Diezmota qoy mana juntʼanapaj jinachu karqa? Mana. Diosqa israelitasman nerqa diezmota qojtinku paykunata ashkhata bendecinanta, nitaj ni imankupis pisinanta (Malaquías 3:10). Israelitas mana diezmota qojtinkutaj, mana allinchu rej. Jehovaqa mana paykunata bendicejchu. Chantapis paykunaqa sacerdotesta, levitasta mana yanapasqankurayku, paykunaj llankʼayninkuwan mana yanapachikojchu kanku (Nehemías 13:10; Malaquías 3:7).

Jesús kay jallpʼapi kashajtin diezmota qojraj kanku. Jinapis wañupusqanmanta qhepamanqa manaña qonankuchu karqa.

Jesuspa tiemponpi

Bibliaqa Mosoj Testamentopi willawanchej Jesús kay jallpʼapi kashajtin israelitas diezmota qosqankutaraj. Jesusqa yacharqa chay tiempopi runas diezmota qonankuraj kasqanta. Jinapis religionta kamachejkunata juchacharqa, imajtinchus paykunaqa ‘aswan allin kajta qonqaporqanku: cheqan kajta, khuyakuyta, Diosta mana wasanchaytapis’ (Mateo 23:23).

Jesús wañupusqanmanta qhepata

Jesús kausayninta qosqanmantapacha manaña diezmota qonachu tiyan. Jesús kausayninta qosqanrayku Moisespa Leynenqa manaña valerqachu. Chayrayku “sapa chunkamanta ujta” qonata kamachikusqantapis manaña juntʼanachu tiyan (Hebreos 7:5, 18; Efesios 2:13-15; Colosenses 2:13, 14).