Jehovaqa llajtanta salvayta yachan

“[Jehova]qa cheqan kajman jina kawsajkunata ñakʼariymantapis librayta yachan.” (2 PED. 2:9.)

¿IMARAYKÚ KAYKUNAMANTA MANA ISKAYRAYANCHEJCHU?

Jehovaqa maykʼajchus munaynin juntʼakunanta yachan.

Jehovaqa llajtanta salvananpaj atiyninta apaykachanqa.

Jehovaqa profeciasnin juntʼakunanpaj imaschus pasananta yachan.

 1. ¿Imastaj “manchay ñakʼariy” tiempopi kanqa?

RUNAS mana suyashajtillanku, Supaypa pachanta Dios ujllata chinkachenqa (1 Tes. 5:2, 3). “Tata Diospa jatun pʼunchayn[inpe]qa”, kay pachapi may llakiy kanqa (Sof. 1:14-17). May chhika ñakʼariy kanqa, tukuy imapis pisiyanqa. “Kay pacha qallarikusqanmantapacha[qa] manaraj chay jina karqachu, nitaj jaykʼajpis kanqachu” (Mateo 24:21, 22 leey).

2, 3. a) ¿Imapitaj Diospa llajtan “manchay ñakʼariy” tiempopi rikukonqa? b) ¿Imataj qhepaman imachus jamunanmanta mana manchachikunapaj kallpachawasun?

² “Manchay ñakʼariy” tiempo tukukuyninman chayashajtin, “Magog jallpʼaman[ta Gog]” Diospa llajtanpa contranpi “may atiyniyoj ashkha soldados[nejta]” sayaykonqa. Paykunataj “yana phuyus jina jallpʼata pʼampayk[onqanku]” (Eze. 38:2, 14-16). Chay kutipeqa, kay pachamanta ni mayqen gobiernopis yanapawasunchu. Salvasqa kananchejqa Jehovaj yanapaynillanmanta kanqa. ¿Imatá Diospa enemigosnin, llajtanta tukuchiyta munashajtinku ruwasunchej?

³ Jehovaj kamachisnenqa, kayta tapurikunanchej tiyan: “¿Cheqamantapunichu Jehová manchay ñakʼariy tiempopi libranawanchejta creeni?”, nispa. Apóstol Pedroj nisqanta yuyarikuna, pay nerqa: “[Jehovaqa] cheqan kajman jina kawsajkunata ñakʼariymantapis librayta yachan, yachallantaj sajra runasta juicio pʼunchaypi castigasqa kanankupaj qhepachiyta”, nispa (2 Ped. 2:9). Ñaupa tiempopi imaynatachus Dios llajtanta librasqanpi tʼukurispaqa, qhepaman imachus jamunanmanta mana manchachikusunchu. Kinsa kutispi Jehová imaynatachus llajtanta librasqanta qhawarina. Chaytaj paypi atienekunanchejpaj kallpachawasun.

JATUN PARAMANTA SALVAKORQANKU

 4. ¿Imaraykutaj maykʼajchus Jatun Para chayamunanta yachakunan karqa?

⁴ Ñaupajtaqa Jatun Paramanta parlarina. Chaypeqa, Diospa munaynin juntʼakunanpaj maykʼajchus chayamunanta yachakunan karqa. Niraj Jatun Para qallarishajtin, arcataraj ruwakunan karqa, animalestataj qhatiykunanku karqa. Jehovaqa Jatun Parata apamunanpaj, mana arca tukusqa kanantarajchu suyarqa. Chay pʼunchaytaqa mana qhepacherqachu, arca mana tukukunanta yuyaspa. Astawanqa niraj Noeman arcata ruwananpaj kamachishajtin, maykʼajchus Jatun Para qallarinanta nerqaña, chaytaj Génesis libropi rikukun. ¿Imaynamantá?

 5. ¿Imatataj Jehová Génesis 6:3 versiculopi nerqa, maykʼajtaj chayta nerqa?

⁵ Bibliaqa, Jehová janaj pachapi kayta nisqanta nin: “Mana saqesajchu runasqa kay pachapi wiñaypaj kawsanankuta, imaraykuchus paykunaqa aychalla kanku. Chayrayku kawsanqanku pachaj iskay chunkayoj watasllata”, nispa (Gén. 6:3). Chayta nispa, ¿runas 120 watasniyojkamalla, kausanankutachu nisharqa? Mana. Astawanqa maykʼajchus Jallpʼamanta sajra kajta chinkachinanta nisharqa.a Jatun Paraqa 2370 watapi, Jesús niraj jamushajtin (J.n.j.) karqa. Diosqa maykʼajchus Jatun Para kananta, 2490 watapi (J.n.j.) willasqanta nisunman. Chaypajqa Noé 480 watasniyojña karqa (Gén. 7:6). Iskay chunka watasninmantaj 2470 watapi (J.n.j.), Noej churisnin naceyta qallarerqanku (Gén. 5:32). Jatun Para chayamunanpajqa 100 watas jinaraj faltarqa. Jehovataj imaynatachus runas salvakunankuta niraj Noeman sutʼincharqachu. ¿Mashkha unaytataj suyarqa willananpaj?

 6. ¿Maykʼajtaj Noeman arcata ruwananpaj kamachikorqa?

⁶ Noeqa, ashkha watasninmanraj imatachus Dios ruwananmanta yacharqa. ¿Imaraykutaj chayta ninchej? Diospa Palabranqa Noeman arcata ruwananta kamachishajtin, churisnin machusña, casarasqasñataj kasqankuta nin. Jehová payman nerqa: “Qanwantajrí ruwasaj uj tratota. Qan yaykunki arcaman, jinallataj yaykonqanku churisniyki, warmiyki, ñojchʼasniyki ima”, nispa (Gén. 6:9-18). Chayrayku Noé arcata ruwananpaj kamachisqa kashajtin, Jatun Para chayamunanpaj ichapis 40 chayri 50 watasllaña karqa.

 7. a) ¿Imaynamantá Noé, familian ima creeyninkuta rikucherqanku? b) ¿Maykʼajtaj Noeman, ima pʼunchaychus Jatun Para qallarinanta Dios willarqa?

⁷ Noewan familianwanqa, arcata ruwasqankuman jina maykʼajchus Jatun Para kananta, imaynatachus Diospa munaynin juntʼakunanta ima tapukorqankuchá. Mana yachaspapis arcata tukucharqankupuni. Bibliapi nin: “Ajinata Noeqa ruwarqa, Dios imaynatachus payman nisqanman jina”, nispa (Gén. 6:22). Jatun Parapaj qanchis pʼunchayllaña kashajtin, Jehovaqa ima pʼunchaypunichus kananta willarqa, chay pʼunchaykunapitaj animalesta arcaman qhatiykunanku karqa. Ajinamanta tukuy imapis wakichisqaña karqa. “Chaypacha karqa chunka qanchisniyoj pʼunchay iskay kaj killapi. Noetaj karqa sojta pachaj watasniyoj. [...] Cielopi kaj yakupis tʼojyamuspa, musphayta jichʼakamorqa” (Gén. 7:1-5, 11).

 8. Biblia Jatun Paramanta parlasqan, ¿imaynatá Jehová maykʼajchus kamachisninta salvananta yachasqanpi atienekunapaj kallpachawanchej?

⁸ Jatun Paramanta Bibliapi parlasqanqa, Dios munasqanman jina tukuy imata maychus tiemponpi ruwasqanta, Kacharichej kasqanta ima rikuchin. Kay sajra pacha tukukunanpajqa aswan pisi tiempollaña. Imatachus ruwananta nisqantaj tiemponpipuni juntʼakonqa. Arí, “ima pʼunchaychus, ima horachus” chay kananta nisqanpi (Mat. 24:36; Habacuc 2:3 leey).

PUKA QOCHAMANTA KACHARICHISQAS

9, 10. ¿Imaynamantá Jehová llajtanta apaykacharqa, egipciospa soldadosninta wañuchinanpaj?

⁹ Kaykamaqa, Dios munasqanman jina tukuy imata maychus tiemponpi ruwasqanta ukhunchanchej. Kunanqa Jehová llajtanta kacharichiyta atisqanpi atienekuyta atisqanchejta rikusun. Payqa, munaynin juntʼakunanpaj wiñay atiyninta apaykachanqa. Jehovaqa llajtanta salvayta atinpuni. Chaywanpis wakin kutipi enemigosninta chinkachinanpaj, llajtan ñakʼarinanta saqen. Chaytaj israelitas Egiptopi wata runas kasqankumanta kacharichisqa kasqankupi rikukun.

¹⁰ Egipto llajtamantaqa, ichapis runas kinsa millones jina llojsimorqanku. Moisesqa israelitasta Jehová kamachisqanman jina pusarqa, ajinamanta uma muyusqas, chinkasqa jina kashasqankuta Faraón yuyananpaj (Éxodo 14:1-4 leey). Chayrayku Faraonqa, soldadosninwan israelitaspa qhepankuta rispa Puka Qochaj kantunpi muyuykorqanku, ni mayman ayqenankuta yuyaspa (Éxo. 14:5-10). Israelitasqa ni imamanta manchachikunankuchu karqa. ¿Imaraykú? Imaraykuchus Dios llajtanrayku maqanakunan karqa.

11, 12. a) ¿Imaynamantá Jehová llajtanta yanaparqa? b) ¿Imapitaj egipciospa soldadosnin tukorqanku, chantá imatataj Jehovamanta yachachiwanchej?

¹¹ Israelitaspa ñaupaqenkuta rej “phuyupis” maynintachus rinankuta rikuchej chay, qhepankutañataj rerqa. Ajinamanta Faraonpa soldadosninmanta jarkʼarqa, laqhapitaj rikhuricherqa, israelitaspajtajrí tutan kʼancharqa (Éxodo 14:19, 20 leey). Chaymantataj Jehovaqa, inti llojsimuynejmanta sumajta wayrachimuspa, yakuta iskayman khallarparerqa, “chay cheqataj chʼakiman tukorqa”. Chaytaj mana uj ratollapichu karqa, imaraykuchus Biblia nin jina, “tukuy chay tuta” sumajta wayramorqa, “Israelitastaj jatun qochaj chawpinta yaykuspa, chʼaki jallpʼapi pasarqanku”. Faraonpa soldadosninmanta, maqanakunapaj carretasninkumanta ima nisqaqa, israelitas mana apuraytachu risharqanku. Chaywanpis chay soldadosqa mana tariparqankuchu, imaraykuchus Jehová paykunarayku maqanakusharqa. Astawanpis “egipciostaqa pejturparerqa. Carretasninkoj ruedasninta urmaracherqa, umankupis muyusqa jina kajtin, manaña ñawpajman riyta aterqankuchu” (Éxo. 14:21-25).

¹² Tukuy israelitas puka qochaj ujnin kantunpi kashajtinkuña Moiseman, kayta Dios kamacherqa: “Makiykita jaywariy jatun qochanejman, ujllata kutiykuspa, Egiptomanta soldadosta pʼampaykunampaj, carretasninkuta, tukuy caballosninkuta ima”, nispa. Perqa jina kaj yakumanta ayqekuyta munajtinkupis Jehovaqa, “Egiptomanta soldadosta yakuwan jatun qochapi chinkarparicherqa”. Manapuni ayqeyta aterqankuchu. “Chaykunamanta mana ujpis kawsashaj puchorqachu” (Éxo. 14:26-28). Ajinamanta Jehovaqa, imallamantapis llajtanta salvananpaj may atiyniyoj kasqanta rikucherqa.

JERUSALENPA THUÑIYNINMANTA AYQERQANKU

13. ¿Imastataj Jesús discipulosninman kamacherqa, imatataj paykuna tapukunkuman karqa?

¹³ Jehovaqa, munaynin juntʼakunanpaj imaschus kananta allinta yachan. Ñaupa cristianospa tiemponkupi Jerusalenta Romamanta soldados muyuykusqanku chayta sutʼita rikucherqa. Chaytataj kunanqa qhawarisunchej. Jehovaqa Churinnejta Jerusalenmanta, Judeamanta ima kaj cristianosman, llajtaj thuñiyninmanta ayqenankupaj kamachiykunata qorqa. Chay thuñiytaj 70 watapi karqa. Jesús nerqa: “Maypachachus rikunkichej chay chejnina millay millachikunata Diospa Templompi sayashajta, mayqenmantachus profeta Daniel parlasqanta chaypacha, Judeapi kashajkuna ayqechunku orqosman”, nispa (Mat. 24:15, 16). Chaywanpis, ¿imaynamantá Jesuspa discipulosnin chay profecía juntʼakushasqanta reparankuman karqa?

14. ¿Imaynatá Jesuspa kamachisqan imaschus pasasqanman jina sutʼinchakorqa?

¹⁴ Imaschus pasasqanqa, imatachus Jesús niyta munasqanta sutʼincharqa. Kay 66 watapi Cestio Galoj kamachiyninpi, romanospa soldadosninku, judiospa oqharikuyninkuta sayachinankupaj Jerusalenman chayarqanku. Oqharikojkunaqa, zelotes sutiwan rejsisqa kajkuna, temploj ukhunpi pakaykukorqanku. Romanostaj temploj perqasninta thuñiyta qallarerqanku. Ajinamanta cristianosqa, imachus chay pasasqan niyta munasqanta sutʼita rikorqanku: “Chay chejnina millay millachikuna[paj]” (Romanospa soldadosnin lantiwan ninakoj estandaresninkuwan), “Diospa Templo[npa]” perqasninkama chayarqa. Cristoj discipulosninpajtaj tiempo karqa “orqosman” ayqenankupaj. Chaywanpis soldadoswan muyurisqa kaspa, ¿imaynatataj ayqenkuman karqa? Mana yuyasqankuman jinalla chay ruwaykuna tijrakunman karqa.

15, 16. a) ¿Imastataj Jesús kamacherqa, imaraykutaj discipulosnin chayta kasukunankupuni karqa? b) ¿Imatataj ruwananchej kanqa salvasqa kananchejpaj?

¹⁵ Cestio Galo, soldasdosnin ima, jinallamanta rirapuyta qallarerqanku. Zelotestaj qhepankuta rispa, paykunata qhatiykacharqanku. Cristoj discipulosninrí ayqeyta aterqanku, tukuy maqanakojkuna Jerusalenpa jawanpi kashasqankurayku. Jesusqa kapuyninkuta qhepapi saqespa, usqhayllata llojsinankuta sutʼita nerqa (Mateo 24:17, 18 leey). ¿Imaraykutaj Jesuspa kamachisqanta kasukunankupuni karqa? Imaraykuchus, zelotesqa pisi pʼunchaykunasninman kutimorqanku. Paykunataj Jerusalenpi, Judeapi ima tiyakojkunata oqharikuyninkuta yanapanankupaj tanqayta qallarerqanku. Kamachiyta munaspa maqanakusqankurayku, chay llajtapi kausayqa niña allinchu karqa. Tiempo pasasqanman jina, manaña ayqeyta aterqankuchu. Romanos 70 watapi kutimojtinkutaj niñapuni ayqeyta atikorqachu (Luc. 19:43). Mana apurayta llojsejkunataj kikinpi japʼichikorqanku. Jesuspa kamachisqanta kasukojkunarí salvakorqanku. Ajinamanta, Jehová kamachisninta salvayta atisqanta rikorqanku. ¿Imatá kaymanta yachakunchej?

¹⁶ Cristianosqa, manchay ñakʼariy tiempopi, Dios llajtannejta, Palabrannejta ima kamachiwasqanchejta kasukunanchej kanqa. Sutʼincharinapaj, Jesusqa “ayqechunku orqosman”, nerqa. Noqanchejpis ñakʼariy tiempopi ayqekunanchejpaj kamachiykunata japʼisun, jinapis niraj yachanchejchu imaynatachus ayqenanchej kasqanta.b Chaywanpis, Jehová maychus tiemponpi chaykunata sutʼinchananmanta mana iskayrayanchejchu. Salvasqa kananchejqa kasukunanchejmanta kanqa, chayrayku allin kanman kaykunata tapurikuna: “¿Kasukunichu kunan tiempopi Jehová llajtanman kamachiykunata qosqanta? ¿Chay ratochu kasukuni, chayri iskayrayanirajchu?”, nispa (Sant. 3:17).

QAYLLAYKAMOJ IMASPAJQA DIOS KALLPACHAWANCHEJ

17. ¿Imatá Habacucpa profecian tumpamantawan Diospa llajtanpa contranpi oqharikuy kananmanta sutʼinchan?

¹⁷ Gogpa maqanakuyninmantañataj parlarina. Kaymanta profeta Habacuc nerqa: “Kay tukuy imasta uyarispa, manchachikorqani. Parlasqaypipis simiy kharkatiterqa; chakisniy mana sayayta aterqachu, tukuy cuerpoytaj llawchʼiyaporqa. Chaywampis alliywan suyallasaj, maypachachus Dios chay ñakʼarichiwajninchejpa soldadosninta ñakʼariyman churanqa, chay pʼunchayta”, nispa (Hab. 3:16). Rikunchej jina profeta Habacucqa, tumpamantawan Diospa llajtanpa contranpi imachus kananta uyarejtillan manchachikorqa chayri wijsan qʼewirerqa, simin kharkatiterqa, cuerponpis llauchʼiyaporqa. Noqanchejpis ichá Gogpa soldadosnin contranchejpi oqharikushajtinku manchachikusun. Chaywanpis Habacuc jina, jatun pʼunchayninpi Jehová llajtanta salvananpi suyakunanchej, atienekunanchejtaj kanqa (Hab. 3:18, 19).

18. a) ¿Imaraykutaj imachus tumpamantawan kananmanta mana manchachikunchejchu? b) ¿Imatataj qhepan semanapi ukhuncharisun?

¹⁸ Kay kinsa imasmanta ukhuncharisqanchejqa, Jehová llajtanta salvayta atisqantapuni rikuchinku. Munaynenqa juntʼakonqapuni, paytaj atipanqapuni. Chay imasta rikuyta munanchej chayqa, tukukuykama cheqa sonqosllapuni kananchej tiyan. Chaywanpis, ¿imaynatá Jehová kay tiempopi juntʼa sonqosllapuni kananchejpaj yanapawanchej? Chaymanta qhepan yachaqanapi ukhuncharisun.

[Sutʼinchaykunasnin]

[24 paginapi dibujo/foto]

Faraonpa soldadosninta, ¿israelitas manchachikunankuchu karqa?