May kʼachita warmi

SARA cuarton chaupipi muyuyninpi kaj imasta qhawarishasqanpi tʼukuriy. Payqa qʼoñi lugarmanta, manchay kʼacha ñawisniyojtaj. Payqa ichapis llakisqa kashan. Imaraykuchus paywan qosanwan unayña chay wasipi kusisqa kausakunku.a Ajinata kausakunankupaj iskayninku mayta kallpachakorqanku.

Paykunaqa Ur llajtapi tiyakorqanku. Chay llajtaqa qhapaj karqa, ashkha imasta sumajta ruwajkunamanta, negociantesmanta ima juntʼa. Paykunapis ashkha imasniyojchá karqanku. Saraqa wasinta mana kapusqanta jallchʼananpaj lugarta jinallachu qhawarqa. Paywan, qosanwan ashkha watasta chay wasinkupi llakiypi, kusiypi ima kausakorqanku. Chaypi kashaspataj ashkha kutispi Jehová Diosmanta mañakorqanku. Chayrayku Saraqa chay lugarpi tiyakuyman yachasqa karqa.

Jinapis Saraqa wakichisqa karqa tukuy imata saqenanpaj. Chantá 60 watasniyojña kashaspa mana rejsisqan lugaresman rinan karqa. Llakiykunapitaj rikukunan karqa. Nitaj yacharqachu llajtanman kutipunantachus manachus. ¿Imaraykutaj chayta ruwarqa? ¿Imatataj creeyninmanta yachakusunman?

Ichapis Saraqa Ur llajtapi wiñakorqa. Kunanqa chay llajta raqayllaña chayri laqayasllaña, chʼimpachataj. Saraj tiemponpi negociantesqa Éufrates mayunnejta barcospi Ur llajtaman chayaj kanku, tukuy ladomanta mercaderiasta apaspa. Ur llajtaj kʼullku, llinkʼu llinkʼu callesninta runaqa juntʼa purej kanku. Barcospis takanarikuspa chayaj kanku. Mercadosninpis mercaderiasmanta juntʼa kaj. Saraqa chay qhapaj llajtapi familianwan tiyakorqa. Ichapis llajta masisninta sutisninkumanta rejserqa, llajta masisninpis ajinallatatajchá payta rejserqanku. Imaraykuchus payqa kʼachita warmi karqa.

Bibliaqa Sara sinchʼi creeyniyoj kasqanmanta parlan. Payqa mana killa diospichu creerqa. Ur llajtamanta runasqa chay diosta yupaychaj kanku, uj jatun torretataj chay diospaj ruwarqanku. Saraqa cheqa Dios Jehovata yupaycharqa. Bibliaqa mana ninchu pichus sinchʼi creeyniyoj kananpaj yanapasqanta. Jinapis Bibliaqa nin uj tiempota tatan llulla dioskunata yupaychasqanta. Imayna kajtinpis Saraqa Abrahanwan casarakorqa. Abrahantaj paymanta 10 watawan kuraj karqa, “tukuy creejkunaj” tatankutaj karqa (Génesis 17:17; Romanos 4:11).b Qhariwarmi kausayninkoqa sumaj ujchasqa karqa, imaraykuchus purajmanta respetanakoj kanku, parlarikoj kanku, llakiykunasninkutapis iskayninku atipaj kanku. Astawantaj Diosta munakusqankurayku sumaj ujchasqas karqanku.

Sara qosanta mayta munakorqa, Ur llajtapitaj familiankoj qayllanpi kausakorqanku. Casarakusqankumanta pisi tiemponmantaj llakiypi rikukorqanku. Bibliaqa Sara mana wijsallikuyta atisqanta nin (Génesis 11:30). Chaytaj Ur llajtapi pʼenqay karqa. Jinapis payqa Diosta, qosanta ima mana wasancharqachu. Subrinonku Lotqa tatamanta wajcha wawa karqa, chayraykutaj wawankuta jina qhawarqanku. Ajinata kausakushajtinku, uj día tukuy ima cambiarqa.

Chay día Abrahanqa Saraman manchay kusisqa qayllaykorqa. Imatachus rikusqanta mana creeyta aterqachu. Cheqa Dios payman rikhurisqa, uj angelnejtataj parlasqa. Chayta uyarispa Saraqa qosanta tʼukullachá qhawarqa, mana samariyta atispataj tapurerqa: “Ima nisorqataj, willariway”, nispa. Abrahanqa tʼukurerqachá imaynatachus willananta. Chantá Jehovaj kay nisqanta willarqa: “Jallpʼaykita, parientesniykitawan saqespa, noqa rikuchisqayki chay jallpʼaman ripuy”, nispa (Hechos 7:2, 3). Jinata parlariytawan, Jehovaj nisqanpi tʼukurerqanku. Paykunaqa sumaj kausayninkuta saqespa, toldospi tiyakoj rinanku karqa. Sara, ¿ima ninman karqa? Abrahanqa imatachus Sara ninanta suyasharqachá. ¿Sara paywan khuska ripuyta munanmanchu karqa?

Sara imatachus ajllasqanqa tʼukuchisunkiman. Ichapis yuyawaj: “Diosqa ni jaykʼaj warmiywan chayri qosaywan ajinata ripunaykuta mañawaykuchu”, nispa. Jinapis chayman rijchʼakojta imallatapis ajllanchej. Qolqellata maskʼaj runaspa chaupinpi kausakunchej, tanqawanchejtaj tukuy ima patapi kausakuyta maskʼanapaj. Bibliataj yuyaychawanchej Diospa Gobiernonta ñaupajman churanata, Diosta kusichinata ima (Mateo 6:33). Saraj ruwasqanpi tʼukurispa, tapurikusunman: “¿Imatá kausayniypi ruwasaj?”, nispa.

Saraqa Ur llajtamanta ripunanpaj wakichikushaspa, imatachus apananta, imatachus saqenanta ajllanan karqa. Payqa burro chayri camello apayta atisqallanta apanan karqa, toldospi tiyakunanpaj jina. Chayrayku wakin cosasninta vendenan chayri regalanan karqa. Chantapis manaña Ur llajtapi jina aychata, frutata, ropata, waj imasta ima rantikuyta atinmanchu karqa.

Wasintapis nichá saqeyta aterqachu. Yachayniyoj runas tarisqankuman jina, Ur llajtapeqa wakin wasis ashkha cuartosniyoj kaj, sumaj yakusniyojtaj. Pisi qolqeyojkunaj wasisninkupis sumaj perqasniyoj, techosniyoj, sumaj punkusniyoj ima karqanku. Chay jina llajtata saqeyqa nichá atikullarqachu. Toldosllapi tiyakoyqa mana Ur llajtapi jinachu kanman karqa. Imaraykuchus suwasmanta, leonesmanta, leopardosmanta, jukumarismanta, atojkunamanta jarkʼakunanku karqa. Chay tiempopitaj chaykunaqa chay jallpʼaspi juntʼa karqa.

Familianmanta, ¿pikunatataj Sara saqeporqa? Jehovaqa parientesninkuta saqespa waj jallpʼaman ripunankuta nerqa, chaytataj Saraqa nichá kasukuyta atillarqachu. Payqa kʼacha warmi karqa, ichapis hermanosnin, sobrinosnin, tiosnin ima karqanku, paykunamantaj manchay kʼaskasqachá karqa, ichapis paykunawan niña ujtawan tinkunmanñachu karqa. Jinapis Diosta kasukuspa ripunanpaj wakichikullarqapuni.

Tukuy chay imaspi rikukuspapis, Sara ripunan pʼunchaypaj wakichisqa kasharqa. Paykunawan khuska tatanku Taré ripunallantaj karqa. Payqa 200 watasniyoj jinaña kasharqa (Génesis 11:31). Saraqa tatanta viejituña kasqanrayku qhawanan karqa, ichapis chayrayku tukuy ima saqesqanpi yuyananpaj mana tiempon karqachu. Paykunawan khuska sobrinonku Lot ripullarqataj, tukuyninkutaj Dios nisqanman jina “caldeospa jallpʼankuta saqespa” riporqanku (Hechos 7:4).

Harán jallpʼamanraj puririyta qallarerqanku, chaytaj Éufrates mayunta rispa Ur llajtamanta 960 kilometrospi jina kasharqa. Haranman chayaspataj, uj tiempota chaypi qhepakorqanku, ichapis Taré onqoykuspa manaña viajayta atisqanrayku. Chaypi qhepakorqanku Taré 205 watayoj wañupunankama. Niraj Haranmanta llojsishajtinku Jehovaqa watejmanta Abrahanman nerqa Haranmanta llojsinanta, rikuchinan karqa chay jallpʼaman. Chay kutipitaj nerqa: “Mirayniykimanta ruwasaj uj jatun nacionta”, nispa (Génesis 12:2-4). Haranmanta ripushajtinku Abrahanqa 75 watasniyoj kasharqa, Sarataj 65 watasniyoj, nitaj wawasniyojchu karqanku. ¿Imaynatá Abrahanpa mirayninmanta uj nación rikhurinman karqa? ¿Waj warmitachu oqharikunman karqa? Chay tiempopi runasqa ashkha warmiswan casarakullaj kanku, chayrayku ichapis Saraqa qosan waj warmita oqharikunanpi yuyasharqa.

Imayna kajtinpis Harán jallpʼamanta riporqanku. ¿Pikunataj paykunawan riporqanku? Bibliaqa nin Abrahanwan familianwan ganakusqanku imaswan, “mashkha runastachus” rantikusqankuwan ripusqankuta (Génesis 12:5). Paykunawan ripojkunaqa ichapis kamachisninku karqanku. Abrahanwan Sarawanqa creeyninkumanta parlarej kanku, uyariyta munaj kamachisninkuman. Ñaupa tiempomanta judíos, kay versiculomanta nisqankuman jina chay kamachisninkoqa mana judioschu karqanku, Abrahanwan Sarawan khuskataj Jehová Diosta yupaychayta qallarerqanku. Ajina kajtenqa, Saraj creeynin sinchʼi karqa, chayraykutaj mana manchachikuspa Diosmanta, suyakuyninmanta wajkunaman willarej. Saraj ruwasqanpi tʼukureyqa yanapawasunman, imajtinchus kay tiempopi runasqa pisi creeyniyoj kanku, nitaj suyakuyniyojchu kanku. Chayrayku Bibliamanta yachakuspa, ¿wajkunaman parlarinkichu?

Éufrates mayuta pasaytawan, ichapis 1943 watapi Jesús niraj jamushajtin 14 de nisán pʼunchaypi mayqen jallpʼatachus Dios qonanta nisqanman rerqanku (Éxodo 12:40, 41). Sara muyuyninta qhawarishasqanpi tʼukuriy. Payqa tʼukullachá kasharqa chay lugar kʼachitu kasqanmanta, tukuy imata qhawarispa, sumaj clima kasqanmantawan. Sichem jallpʼaman chayashajtinkutaj More Vallepi Jehovaqa watejmanta Abrahanman rikhurerqa, nerqataj: “Kay jallpʼata mirayniykiman qosaj”, nispa. Abrahanqa “mirayniykiman” nejta uyariytawan, ¡maytachá tʼukorqa! Edén huertapi Jehová nerqa uj miray Satanasta chinkachinanta, chaypichá Abrahanqa yuyayta qallarerqa. Diosqa Abrahanman nerqa mirayninmanta jamoj nacionqa runaspaj ashkha bendicionesta apamunanta (Génesis 3:15; 12:2, 3, 6, 7).

Jinapis Abrahán, familian ima chʼampaykunapi rikukorqanku. Canaanpi kashajtinku sinchʼi yarqhay kasqanrayku Egiptoman riporqanku. Egiptopitaj waj llakiypiñataj rikukorqanku. Chayrayku Saraman nerqa: “Uyariway, noqa yachani qanqa sumaj kʼachita warmi kasqaykita. Egipcios qanta rikususpa, nenqanku: Kay warmeqa chay qharej warmin, nispa jinataj noqata wañuchiwanqanku, qantarí mana. Chayrayku niy ari, qanqa noqaj panay kasqaykita, qanrayku ama wañuchinawankupaj, allintaj rinawampaj”, nispa (Génesis 12:10-13). ¿Imaraykú chayta Abrahán nerqa?

Mana manchali kasqanraykuchu, nitaj llullakusqanraykuchu, wakin yachayniyoj runas ninku jina. Saraqa tatamanta hermananpuni karqa. Chayrayku Abrahanqa yacharqa imatachus ruwashasqanta. Iskayninkutaj yacharqanku Dios paykunanejta uj mirayta, uj jatun naciontawan rikhurichinan may sumaj kasqanta. Chayrayku Abrahán kausayninta jarkʼananqa may sumaj karqa. Chantapis yachayniyoj runas tarisqankoqa rikuchin Egiptopi atiyniyoj runas casarasqa warmista japʼikapusqankuta, chay warmispa qosasninkutataj wañuchisqankuta. Chayrayku Abrahán imatachus ruwasqanqa may allin karqa, Sarataj llampʼu sonqowan kasukorqa.

Pisi tiemponmantaj Abrahanpa yuyasqanman jina juntʼakuyta qallarerqa. Faraonpa yanapajkunasnenqa rikorqanku Sara kuraj warmiña kajtinpis may kʼachita kasqanta. Chaytataj Faraonman willarqanku, Faraontaj kamachinan wasiman pusachimorqa. Abrahanwan, Sarawanqa mancharisqachá kasharqanku. Jinapis manasina Sarata uj esclavata jinachu qhawarqanku, manaqa uj sumaj invitadankuta jinasina. Ichapis Faraonqa Sarawan casarananpaj qhapaj kayninwan sonqonta suwayta munarqa, jinamanta Abrahanmanta mañaqananpaj (Génesis 12:14-16).

Saraqa, Egiptopi kamachina wasej ventananmanta chayri terrazamanta Egiptoj muyuyninpi kaj imasta qhawarishan. ¿Imaynataj pay kashanman karqa watejmanta uj sumaj wasipi sumaj miskʼi mikhunasta rikuspa? ¿Tukuy imata rikuspa Ur llajtapi jinachu tiyakuyta munanman karqa? Satanasqa mayta kusikunman karqa Sara Abrahanta saqespa Faraonwan casarakojtin. Jinapis Saraqa mana qosanta saqerparej warmi jinachu karqa. Payqa qosanta, nitaj Jehová Diostapis wasancharqachu. May sumaj kanman tukuy casarasqas Sara jina kananku, khuchichakuy aywirej mundopi tiyakuspapis. Familiareswan, amigoswan Sara jina kayqa, ¡may sumajpuni!

Jehová Diosqa Sararayku Faraonta ñakʼaricherqa ashkha castigoswan, jinallataj tukuy familiantapis. Faraonqa Sara Abrahanpa warmin kasqanta yachaspa, Sarata qosanpaman kachaporqa, Egiptomanta ripunankutataj nerqa (Génesis 12:17-20). Abrahanqa maytachá kusikorqa payman Sara kutinpusqanmanta. Imaraykuchus ñaupajpiña Saraman nerqa: “Yachani qanqa sumaj kʼachita warmi kasqaykita”, nispa. Jinapis Abrahanqa mana kʼachita kasqallantachu sumajpaj qhawarqa, manaqa sonqonpi imayna warmichus kasqanta, chaytataj Jehovaqa may valorniyojpaj qhawan (1 Pedro 3:1-5). Tukuypis sonqonchejpi allin runas kasunman. Qhapajyaymanta nisqaqa Diosta yupaychayta kausayninchejpi ñaupajman churana. Diosmantapis wajkunaman parlarina. Khuchichakuy juchaman tanqasqa kaspataj llimphu kausayniyoj kanapaj Diospa leyesninta kasukuna. Jinamanta Sara jina sinchʼi creeyniyoj kasun.