Jehovawan khuska llankʼayqa mayta kusichiwanchej

 1. ¿Imapajtaj wajyariwanchej Jehová may atiyniyoj kaspapis?

JEHOVÁ tukuy imata ruwan. Paylla may yachayniyoj, may atiyniyojtaj. Chaytataj Job sutʼita entienderqa, nerqataj: “Noqa yachani qanqa tukuy imata ruwayta atisqaykita; qampajqa mana imapis kanchu mana atikojqa”, nispa (Job 42:2). Arí, Jehovaqa imatachá ruwayta munan chayta ruwayta atinman ni pejpa yanapaynillanwan. Chaywanpis munakuwasqanchejrayku paywan khuska llankʼanapaj wajyariwanchej.

 2. ¿Imata ruwanantataj Jehová wawanta saqerqa?

² Jehovaqa niraj ni imata ruwashaspa Jesusta ruwarqa. Chantapis janaj pachapi, kay pachapi tukuy imata ruwaysinanta saqerqa (Juan 1:1-3, 18). Apóstol Pablo Jesusmanta nerqa: “Paynejtamin Diosqa tukuy kaj chhikata ruwarqa: Janaj pachapi kaj imasta, kay pachapi kaj imastapis, mana rikukoj imasta, sutʼipi kaj imastapis, kamachejkunata, kurajkunata, atiyniyojkunata ima. Dios Tataqa tukuy kaj chhikata ruwarqa paynejta, paypajtaj”, nispa (Col. 1:15-17). Jehovaqa wawan ruwaysinanta saqespapis, wajkunapis chayta yachanankuta saqerqa. Chayta ruwasqantaj, ¡may sumaj!

 3. ¿Imata ruwanantataj Adanta Jehová saqerqa, imaraykutaj?

³ Chantapis Jehovaqa runasta paywan khuska llankʼanankuta saqerqa. Sutʼincharinapaj, Jehovaqa Adanta tukuy animalesman sutita churananta kamacherqa (Gén. 2:19, 20). Adanqa sapa uj animal imaynachus kasqanpi maytachá tʼukurerqa ima sutitachus churananpaj. Jehovaqa chay animalesta ruwasqanrayku sutista churayta atinman karqa, chaywanpis Adanta mayta munakusqanrayku chay animalesman sutista churananta saqerqa, kay Jallpʼatapis uj paraisoman tukuchinanta nerqa (Gén. 1:27, 28). Llakikunapaj jina Adanqa Jehovawan manaña llankʼarqachu, chayta ruwasqanraykutaj mayta ñakʼarerqa, jinallataj mirayninpis (Gén. 3:17-19, 23).

 4. ¿Pikunataj Jehovawan llankʼarqanku munayninta juntʼananpaj?

⁴ Aswan qhepamanpis Jehovaqa waj runas paywan khuska llankʼanankuta saqerqa. Sutʼincharinapaj, Noeqa uj arcata ruwarqa Jatun Parapi pay, familian ima salvakunankupaj. Moisestajrí israelitasta Egiptomanta orqhomorqa, Josuetaj Sumaj Jallpʼaman israelitasta pusaykorqa. Salomontaj Jerusalenpi templota ruwarqa. Mariatajrí Jesuspa maman karqa. Kay cheqa sonqo runas, waj runas ima, Jehová munayninta juntʼananpaj paywan khuska llankʼarqanku.

 5. 1) ¿Imatataj tukuypis ruwayta atisunman? 2) ¿Jehová necesitanchu yanapananchejta? (28 paginapi dibujota qhawariy.)

⁵ Kunanpis Jehová Diosqa Reinon ñauparinanpaj tukuy atisqanchejta ruwajta saqewanchej. Chaytataj tukuy imaymanamanta ruwayta atisunman. Mana tukuychu kikin imasta Jehovapaj ruwaspapis, tukuyninchej Diospa Reinonmanta runasman willamuyta atinchej. Jehovaqa kay llankʼaypi yanapananchejta mana necesitanchu. Munaspaqa janaj pachamantapacha runasman pay parlamunman. Chantapis Jesús nisqanman jina rumistapis parlachiyta atinman, Reinonmanta, Reinonpi pichus kamachinanmanta ima, runasman willananpaj (Luc. 19:37-40). Chaywanpis Jehová paywan ‘khuska trabajajtaʼ saqewanchej (1 Cor. 3:9). Apóstol Pablo qhelqarqa: “Ajina ari Diosta yanapajkuna kaspa, qankunata mañayku ama qhasipajchu kananta Diospa qhasilla kʼacha yanapayninta japʼisqaykichejqa”, nispa (2 Cor. 6:1). Jehovawan khuska trabajanapaj wajyarisqa kayqa may sumaj. Kunantaj imasraykuchus Jehovawan khuska llankʼay kusiyta apamuwasqanchejta qhawarisunchej.

 6. Jesús Tatanwan khuska llankʼaspa, ¿imaynataj kasharqa?

⁶ Jehovawan khuska trabajaspaqa mayta kusikunchej. Niraj kay Jallpʼaman jamushaspa, Jesús nerqa: “Tata Diosqa ruwasqasninmanta noqataraj ñawpajta ruwawarqa, [...] noqa paywan khuska karqani, [yanapaj maestro jina, NM] tukuy imata maypichus kananman churaspa. Sapa pʼunchay paypa kusikunan karqani, tukuy rato paypa ñawpaqempi kusikuspa”, nispa (Pro. 8:22, 30). Jesús Tatanwan khuska llankʼaspa mayta kusikorqa, imaraykuchus ashkha imasta ruwarqa, Tatan mayta munakusqantataj yacharqa. ¿Ima nisunmantaj noqanchejmanta?

 7. ¿Imaraykutaj runasman willamuspa mayta kusikunchej?

⁷ Jesusqa wajkunaman qorispa, wajkuna qoriwajtinchej ima kusikusqanchejta nerqa (Hech. 20:35). Cheqa kajmanta yachakushaspaqa mayta kusikorqanchej. Wajkunaman cheqa kajmanta yachachispapis mayta kusikullanchejtaj, imaraykuchus rikunchej runas Bibliaj yachachisqanmanta yachakuspa, Diosta rejsiyta qallarispa ima kusikusqankuta. Chantapis kusikullanchejtaj ñaupaj kausayninkuta saqespa Bibliaj nisqanman jina kausakuyta qallarisqankumanta. Yachanchejtaj Jehovawan amigos kay wiñay kausayta japʼinankupaj yanapasqanta (2 Cor. 5:20). Runasman willayqa uj sumaj llankʼay, maytataj kusichiwanchej.

 8. ¿Imaynataj wakin hermanos sientekunku Jehovawan khuska llankʼaspa?

⁸ Runas willayninchejta uyariyta munasqankumanta kusikojtinchejpis, Diospa munayninta ruwashasqanchejmanta, Jehová payta sirvinapaj kallpachakusqanchejta jatunpaj qhawashasqanmanta ima mayta kusikullanchejtaj (1 Corintios 15:58 leey). Italiamanta Marco sutiyoj uj hermano nin: “Jehovapaj llankʼaspa imayna kusisqachus kashasqayta mana niyta atillanichu, imaraykuchus Jehovaqa paypaj llankʼasqanchejta mana qonqanchu”, nispa. Italiamanta Franco sutiyoj hermano nillantaj: “Jehovaqa sapa pʼunchay Biblianejta, publicacionesnejta, tantakuykunanejta ima mayta munakuwasqanchejta yuyarichiwanchej. Ni imata paypaj ruwasqanchejta yuyajtinchejpis, payqa may jatunpaj qhawan payta sirvinapaj kallpachakusqanchejta. Chayrayku Jehovawan khuska llankʼayqa mayta kusichiwan, reparachiwantaj kausayniy mana qhasipajchu kasqanta”, nispa.

 9. ¿Imaynatataj Jehovawan Jesuswan kausakoj kanku, imaraykutaj?

⁹ Munakusqanchej runawan llankʼaspaqa, payman astawan qayllaykunchej. Imayna runachus kasqantapis astawan rejsinchej. Chantapis imastachus ruwayta munasqanta, chayta ruwananpaj imastachus ruwashasqanta ima yachanchej. Jesusmanta parlaspa ajinallataj karqa, payqa manaraj kay Jallpʼaman jamushaspa may chhika watasta Jehová Diosninchejwan khuska llankʼarqa. Munakuyninku may sinchʼi kasqanraykutaj, ni ima paykunata tʼaqayta aterqachu. Chayraykuchá Jesús nerqa: “Noqawan, Dios Tatawanqa ujlla kayku”, nispa (Juan 10:30). Cheqamantapuni paykunaqa may ujchasqas kasharqanku, imaraykuchus khuska llankʼaspa mayta kusikoj kanku, yanapanakojtaj kanku.

10. ¿Imaraykú runasman willay Jehovaman, hermanosman ima qayllaykuchiwanchej?

¹⁰ Jesusqa, Jehovamanta mañakorqa yachachisqasninta jarkʼananta. ¿Imaraykú chayta mañakorqa? Jesusllataj nerqa: “Paykuna uj sonqolla kanankupaj, qanwan noqawan ujlla kanchej, ajinata”, nispa (Juan 17:11). Jehová imatachus Biblianejta niwasqanchejta kasukuspa, runasman willamuspa ima, Jehovaj kʼacha kaykunasninta aswan sumajta rejsinchej. Rikunchejtaj, paypi atienekuy, niwasqanchejta kasukuy ima, aswan sumaj kasqanta. Paywan amigos kananchejpaj kallpachakusunchej chayqa, amigosninta jina qhawawasunchej (Santiago 4:8 leey). Diosta kasukuy, runasman willamuy imaqa hermanosninchejman qayllaykuchiwanchej. Imaraykuchus tukuyninchej kikin chʼampaykunasniyoj, kikin kusikuyniyoj ima kanchej. Chantapis kikin imasta ruwayta munanchej, kikin chʼampaykunata ima aguantanchej. Inglaterramanta Octavia sutiyoj hermana nin: “Jehovawan khuska llankʼayqa payman, hermanosman ima qayllaykuchiwan”, nispa. ¿Imaraykú ajinata nin? Imaraykuchus amigosninpis pay jinallataj Jehovapaj astawan llankʼayta munanku. ¿Manachu noqanchejpis chay hermana jinallataj nisunman?

11. ¿Imaraykú paraisopi Jehovawan, hermanosninchejwan ima ujchasqas kasunchej?

¹¹ Kay tiempopi Jehovata, hermanosninchejta ima mayta munakuspapis, paraisopi astawanraj munakusunchej. Hermanosninchejwan paraisopi imastachus ruwananchejpi tʼukurina. Paraisopeqa wañuymanta kausarimojkunawan tinkusunchej, Jehovamantataj yachachisunchej. Kay Jallpʼatapis uj paraisoman tukuchisunchej. Jesuspa kamachiyninpitaj hermanosninchejwan khuska trabajaspa, pisimanta pisi juntʼa runasman tukuspa ima mayta kusikusunchej. Sapa pʼunchaytaj Jehovawan, hermanosninchejwan ima astawan ujchasqas kasunchej. Cheqamanta Jehovaqa tukuy ima necesitasqanchejta qowasunchej (Sal. 145:16).

12. ¿Imaynatá Diosmanta willay jarkʼawanchej?

¹² Satanaspa sajra pachanpi kausakusqanchejrayku, pantaj runas kasqanchejrayku ima, sumajta qhawarikunanchej tiyan mana kay pachamanta runas jina yuyanapaj, ruwanapaj ima. Imaynatachus may chhika yakuyoj mayuta waytʼaspa pasanapaj mayta kallpachakunchej, ajinallatataj Jehovawan amigos kasqanchejta jarkʼanapaj mayta kallpachakunanchej tiyan. Diosmanta runasman willayqa Jehovawan amigos kasqanchejta jarkʼanapaj yanapawanchej. Imaraykuchus Diosmanta, Bibliamanta ima runasman parlaspaqa, aswan sumaj imaspi yuyanchej, nitaj imaschus creeyninchejta llauchʼiyachin chay imaspichu (Fili. 4:8). Chantapis runasman willayqa Diospi creeyninchejta astawan sinchʼiyachin, imaraykuchus imatachus Dios noqanchejpaj munasqanta, kamachiykunasninta ima yuyarichiwanchej. Chantapis kʼacha kaykunata rikuchinapaj yanapawanchej, mayqenkunachus Satanasmanta, pachanmanta ima jarkʼawanchej (Efesios 6:14-17 leey).

13. ¿Imaraykú Australiamanta uj hermano runasman willamuyta jatunpaj qhawan?

¹³ Runasman willay, Bibliata ukhunchay, hermanosta yanapay imaqa, mana llakiykunasnillanchejpi yuyanapaj yanapawanchej. Australiamanta Joel sutiyoj hermano, imaraykuchus runasman willamuyta may jatunpaj qhawasqanta willawanchej. Pay nin: “Diosmanta runasman willamoyqa kay pachapi runas ashkha chʼampaykunasniyoj kasqankuta reparanaypaj yanapawan. Chantapis Bibliaj yuyaychaykunasnin allinniypaj kasqanta mana qonqanaypaj yanapallawantaj. Astawanqa runasman willamuy llampʼu sonqo kanaypaj, Jehovapi, hermanospi ima atienekunaypaj yanapawan”, nispa

14. ¿Imaynatá yachanchej Jehová espíritu santonwan yanapashawasqanchejta?

¹⁴ Diosmanta runasman willayqa Jehová espíritu santonwan yanapashawasqanchejta rikuchiwanchej. Pillapis tiyakunki chay lugarmanta runasman mikhunata apanaykita nisusqanpi tʼukuriy. Chaywanpis chay runaqa qolqeykiwan chayta ruwanaykita, mana imata pagasunanta ima nisunki. Yachankitaj tiyakunki chay lugarmanta runasqa mikhunata mana apanaykita munasqankuta, apasqaykiraykutaj wakin chejnisusqankuta ima. Manachá ajinata llankʼaspa unayta kawajchu. Ichapis pisi tiemponman chay llankʼayta saqepuwaj. Noqanchejpis Diospa yachachiyninta runasman apanchej. Runas asipayawajtinchejpis, chejnikuwajtinchejpis chay ruwayta juntʼanapaj tiemponchejta, qolqenchejta ima churanchej. Watas pasasqanman jinataj Diosmanta willamullanchejpuni. Kaytaj rikuchiwanchej Jehová espíritu santonwan yanapashawasqanchejta.

15. ¿Imaraykú runasman willamunanchej tiyan?

¹⁵ Runasman willamoyqa Jehovaj munaynin juntʼakunanpaj yanapan. ¿Imaynamantá? Jehovaqa runas wiñaypaj kausakunankuta munarqa, chay munaynintaj Adán juchallikojtinpis mana tijrakorqachu (Isa. 55:11). Jehová Diosninchejqa wañuymanta, juchamantawan kacharichinawanchejpaj, Jesusta kay Jallpʼaman kachamorqa noqanchejrayku kausayninta qonanpaj. Jesuspa wañuynin yanapanawanchejta, wiñaypajtaj kausakuyta munanchej chayqa, Diosta kasukunanchej tiyan. Jesusqa runasman yachacherqa imatachus Dios ruwanankuta munasqanta, yachachisqasninmantaj kikinta runasman yachachimunankuta kamacherqa. Chayrayku Diosmanta willamunchej, runastapis Dioswan masichakunankupaj yanapanchej. Chayta ruwaspataj Jehovawan khuska llankʼashanchej, runasta wañuymanta, juchamanta salvananpajtaj yanapakushanchej.

16. ¿Imaraykú runasman willamuspa iskay kamachiykunata juntʼashasqanchejta ninchej?

¹⁶ Runasman willamuspa, imaynatachus wiñay kausayta japʼinankuta yachachispa ima, runa masinchejta, Jehovata ima munakusqanchejta rikuchishanchej. Payqa “munan tukuy runas salvasqa kanankuta, cheqa kajtataj rejsinankuta” ima (1 Tim. 2:4). Leymanta ujnin yachachej, Jesusta leypa kamachisqasninmanta mayqenchus aswan kuraj kasqanta tapojtin, Jesús kuticherqa: “Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj. Chaymin leypa kamachisqasninmanta aswan kuraj, ñawpaj kajtaj. Qhepan kaj kamachisqapis ñawpaj kajman rijchʼakullantaj: Runa masiykita munakunki qan kikiykita jina”, nispa (Mat. 22:37-39). Runasman willamuspaqa kay iskay kamachiykunata juntʼashanchej (Hechos 10:42 leey).

17. ¿Imaynataj sientekunki sumaj willaykunata willamuspa?

¹⁷ Jehová runasman willamunata kamachiwasqanchejqa mayta kusichiwanchej, payman, hermanosninchejman imataj qayllaykuchiwanchej, creeyninchejtapis sinchʼiyachin. Chantapis munakuyninchejta Jehovaman, hermanosninchejman ima rikuchinapaj yanapawanchej. Jallpʼantinpi Jehovaj kamachisnenqa may chhika kanchej, nitaj tukuychu kikin kausayniyoj kanchej. Chaywanpis tukuyninchej Diosmanta willamunapaj kallpachakunchej, jóvenes, machitus, wajchas, qhapaj, kallpayoj, pisi kallpas kaspapis. Tukuypis Franciamanta Chantal sutiyoj hermananchej jina yuyanchej, pay nerqa: “Kusikuyniyoj, Tukuy atiyniyoj, tukuy imata Ruwaj Dios, niwan: ‘Runasman tukuy sonqowan noqamanta willamuy. Noqataj kallpata qosqayki, Palabraywan yanapasqayki, angelesnejta, hermanosnejta ima yanapallasqaykitaj. Imaynatachus chayta ruwanaykita yachachisqayki, astawan yanapata necesitajtiykitaj imatachus ruwanaykita nisqaykiʼ, nispa. Jehovaqa munayninta juntʼajta, paywan khuska llankʼajta ima saqewanchej. Chayta ruwaytaj ni imawan kikinchakunku”, nispa.