Jehovallata yupaychaspaqa aswan kusisqa kanchej

1, 2. Jehová yupaychasqanchejta allinpaj qhawananpaj, ¿imastataj ruwananchej tiyan?

DIOSTA yupaychay palabrasta uyarispa, ¿imapitaj piensarinchej? Ichá piensanchej uj hermano qonqor chakimanta Jehovamanta mañakushasqanpi. Chayrí ichá piensanchej uj familia kusiywan Bibliata estudiashasqankupi.

² Chay hermanosqa Jehovamanta mañakuspa, Bibliata estudiaspataj Jehovata yupaychashanku. Jehovaqa chay yupaychasqankuta allinpaj qhawanqa paypa munayninman jina ruwajtinku, payta munakojtinku, jatunpajtaj qhawajtinku. Noqanchejqa Jehovata mayta munakunchej, yachanchejtaj paylla yupaychanapaj jina kasqanta. Chayrayku payta sumajta yupaychayta munanchej.

 3. ¿Imastataj kay yachaqanapi yachakusun?

³ Ñaupa tiempopi, ¿imayna yupaychaytataj Jehová allinpaj qhawarqa? Chayta kay yachaqanapi qhawarisunchej. Qhawarillasuntaj kay tiempopi pusaj imaynasmanta yupaychasqanchejta Jehová allinpaj qhawasqanta. Chaykunata estudiashaspaqa, piensarina imaynatachus Jehovata astawan yupaychayta atisqanchejpi. Yachakullasuntaj imaraykuchus Jehovallata munayninman jina yupaychaspa kusisqa kasqanchejta.

 4. Ñaupa tiempopi Jehovaj kamachisnin, ¿imasta ruwaspataj rikucherqanku payta munakusqankuta, jatunpajtaj qhawasqankuta?

⁴ Ñaupa tiempopi Abel, Noé, Abrahán, Job ima Jehovata jatunpaj qhawarqanku, maytataj munakorqanku. Chaytataj rikucherqanku payta kasukuspa, paypi creespa, tukuy imatataj payrayku ruwaspa. Bibliaqa mana sutʼita willanchu imaynasmantachus payta yupaychasqankuta. Jinapis tukuy atisqankuta ruwarqanku Jehovata sumajta yupaychanankupaj, Jehovataj chayta allinpaj qhawarqa. Aswan qhepamantaj Jehovaqa israelitasman Moisesnejta Leyta qorqa. Chay Leypitaj nerqa imaynatachus payta yupaychanankuta.

 5. Jesús kausarimusqanmanta qhepaman, ¿imaynatataj Jehovata yupaychanchej?

⁵ Jesús kausarimusqanmanta qhepaman, Jehovaqa manaña suyarqachu llajtan Moisespa Leyninta kasukunankuta (Rom. 10:4). Astawanpis cristianosqa “Cristoj leyninta” kasukunanku karqa (Gál. 6:2). Chaypajqa manaña necesitarqankuchu ashkha leyesta, imastachus mana ruwanatapis de memoria yachayta. Manaqa Jesús jina, yachachisqanman jinataj kausakunanku karqa. Kay tiempopipis cristianosqa tukuy atisqankuta ruwanku Cristo jina kausakunankupaj. Ajinamanta Jehovata kusichinankupaj, samariytataj tarinankupaj (Mat. 11:29).

 6. Kay yachaqanata qhawarishaspa, ¿ima tapuykunapitaj piensarinanchej tiyan?

⁶ Jehovata imaynasmantachus yupaychashasqanchejta kay yachaqanapi qhawarishaspa, kay tapuykunapi piensarina: “¿Diosta yupaychaypi astawanñachu ñauparinchej? ¿Jehovata aswan sumajta yupaychanapaj kallpachakusunmanchu?”. Kunankama imastañachus Jehovata yupaychanapaj ruwashasqanchejmanta kusikusunman. Jinapis allin kanman Jehovamanta mañakunanchej imaspichus astawan ñauparinata reparachinawanchejta.

 7. ¿Imajtintaj Jehová munan tukuy sonqo orakunanchejta?

⁷ Orakuspaqa Jehovata yupaychanchej. Inciensotaqa ñaupa tiempopi sumajta wakichej kanku, Jehovapaj qʼoshñichinankupaj Diosta yupaychana toldopi, aswan qhepamantaj templopi. Bibliataj Diosmanta mañakusqanchejta chay inciensowan kikinchan (Sal. 141:2). Chay inciensoqa Diospaj ima munayta qʼaparej. Ajinallatataj tukuy sonqo Jehovaman orakusqanchejqa “paypa sonqonta kusichin”, pisi palabrasllawan mañakojtinchejpis (Pro. 15:8; Deu. 33:10). Jehová Diosqa payta munakusqanchejta, agradecekusqanchejtataj mayta uyariyta munan. Payqa munallantaj willarinanchejta imastachus ruwayta munasqanchejta, imaschus llakichiwasqanchejta, imastatajchus mayta suyakushasqanchejta. Chayrayku allin kanman, niraj orakushaspa sumajta piensarinanchej imatachus ninanchejpi. Ajinamanta orakusqanchejqa, Tatanchej Jehovapaj ima munay qʼaparej “incienso jina” kanqa.

 8. ¿Imata ruwaspataj Diosman uj sumaj jaywanatapis jaywashasunman jina ruwashanchej?

⁸ Jehovata jatunchaspaqa payta yupaychanchej (Sal. 34:1). ¿Imata ruwaspataj Jehovata jatunchanchej? Jehová Diosninchej imaynachus kasqanmanta, imastatajchus ruwasqanmanta runasman willarispa. Jehovaman tukuy sonqo agradecekunchej chayqa, paymanta sumaj imasta parlasunpuni. Jehová sumaj imasta noqanchejrayku ruwasqanpi tʼukurisun chaytaj, payta jatunchasunpuni. Runasman Diosmanta parlarispaqa, “Diosman uj jaywanatapis jaywashasunman jina” ruwashanchej, nisunman Diosta siminchejwan jatunchashanchej (Heb. 13:15). Niraj orakushaspaqa sumajta piensarinchej imatachus ninanchejpi. Ajinallatataj runasman predicanapajqa sumajta piensarinanchej tiyan imatachus ninanchejpi. Noqanchejqa munanchej Jehovata jatunchasqanchej uj sumaj jaywana jina kananta. Chayrayku runasmanqa Diosmanta tukuy sonqo willarinchej.

 9. 1) ¿Imaynatá reunionesman riy israelitasta jina yanapawanchej? 2) ¿Imaynatá reuniones qanta yanapasunki?

⁹ Reunionesman rispa Jehovata yupaychanchej. Israelitasmanqa kay kamachiy qosqa karqa: “Jehová Diosniykichejpa ñaupaqenmanqa, tukuy qharis rinkichej watapi kinsa kutita. Ima lugartachus pay ajllakonqa chayman rinkichej” (Deu. 16:16). Paykunaqa mana necesitarqankuchu pimanpis encargakuyta wasinkuta, jallpʼankuta ima. Imajtinchus Jehová Diosqa paykunaman nerqa: ‘Mana pipis chay jallpʼaykichejtaqa munapayanqachu, nitaj japʼikaponqachu Jehová Diosniykichejpa ñaupaqenman wicharinaykichejkama’, nispa (Éxo. 34:24). Israelitasqa Jehovapi atienekusqankurayku sapa wata chay fiestasman rej kanku. Chay fiestastaj paykunata mayta yanapaj. Imajtinchus chay fiestaspeqa Diospa Leyninta astawan sumajta entiendej kanku, tʼukurej kanku imastachus Jehová paykunapaj ruwasqanpi, chay fiestasman rejkunawan khuskataj kusirikoj kanku (Deu. 16:15). Noqanchejtapis reunionesman rinapaj kallpachakusqanchejqa, israelitasta jinallataj mayta yanapawanchej. Jehovaqa mayta kusikun reunionespi pisi parlayllapi sumajta comentanapaj wakichisqa rejtinchej.

10. ¿Imajtintaj Jehovaman tukuy sonqo takirinanchej tiyan?

¹⁰ Hermanosninchejwan khuska takirispa Jehovata yupaychanchej (Sal. 28:7). Israelitasqa Jehovata yupaychanankupaj takirejpuni kanku. Rey Davidqa 288 levitasta ajllarqa templopi takinankupaj (1 Cró. 25:1, 6-8). Kay tiempopipis Jehovata munakusqanchejta rikuchinchej, payman tukuy sonqo takirispa. Jehovata takirispa jatunchanapajqa, mana sumajta takiyta yachajkunapunichu kananchej tiyan. Parlaspaqa “tukuyninchej ashkha kutista pantanchej”. Ajinata pantaspapis congregacionpi, predicacionpipis parlallanchejpuni (Sant. 3:2). Ajinallatataj mana allinta takiyta yachaspapis, Jehovamanqa tukuy sonqo takirinallapuni.

11. Salmo 48:13 nisqanman jina, ¿imaraykutaj tiempochakuna tiyan familianchejwan khuska Bibliata estudianapaj?

¹¹ Bibliata estudiaspa, wawasninchejmantaj Jehovamanta yachachispa payta yupaychanchej. Israelitasqa samarikuna pʼunchaypi mana trabajanankuchu karqa. Astawanpis chay diaqa, Jehovaman astawan qayllaykunankupaj tʼaqasqa karqa (Éxo. 31:16, 17). Jehovata tukuy sonqo sirvej israelitasqa Jehovamanta, imastachus paykunarayku ruwasqanmantapis wawasninkuman yachachej kanku. Noqanchejpis tiempochakunallanchejtaj tiyan Bibliata leenapaj, estudianapaj ima. Chayta ruwaspaqa Jehovata yupaychanchej, paymantaj astawan qayllaykunchej (Sal. 73:28). Chantapis familianchejwan khuska Bibliata estudiaspaqa, wawasninchejta yanapasunman Tatanchej Jehovawan sumaj amigos kanankupaj (Salmo 48:13 leey).

12. ¿Imaynatá Jehová qhawarqa israelitas Diosta yupaychana toldota, chaypaj tukuy imastawan ruwasqankuta?

¹² Diosta yupaychanapaj wasista ruwaspa, allinchaspa ima Jehovata yupaychanchej. Israelitasqa Diosta yupaychana toldota, chaypaj tukuy imastawan ruwarqanku. Jehovataj chayta paytapis yupaychashankuman jina qhawarqa (Éxo. 36:1, 4). Jehovaqa ajinallatataj qhawan kay tiempopi Tantakuna Wasista, payta yupaychanapaj wasistapis ruwasqanchejta. Wakin hermanostaj chay llankʼaypi tukuy tiemponkuwan yanapakunku. Ajinata ruwaspa Diospa Gobiernonta yanapakusqankumanta mayta agradecekunchej. Chantapis chay hermanosqa tiempochakunku predicanankupaj. Paykunamanta wakintaj precursores regulares kayta munanku. Ancianostaj chay hermanos precursores regulares kayta atisqankutachus manachus sumajta qhawaykurispa, chayman jina saqenku precursores kanankuta. Ajinamanta ancianospis Diosta yupaychana wasis ruwakunanpaj yanapakushanku. Construccionpi trabajayta yachaspapis manapis, tukuyninchej yanapakusunman chay wasista llimphuchaypi, allinchaypi ima.

13. ¿Imaraykutaj Diospa Gobiernonmanta willakunanpaj qolqesitunchejwan yanapakunanchej tiyan?

¹³ Diospa Gobiernonmanta willanapaj qolqesitunchejwan yanapakuspa, Jehovata yupaychanchej. Israelitasqa Jehová Diospa ñaupaqenman mana chʼusaj makillachu rinanku karqa (Deu. 16:16). Paykunaqa atisqankuman jina Diosman uj jaywanata apananku karqa. Ajinamanta rikucherqanku, Jehová paykunarayku imastachus ruwasqanmanta mayta agradecekusqankuta. Noqanchejrí, ¿imatá ruwasunman Jehovata munakusqanchejta rikuchinapaj, noqanchejrayku imastachus ruwasqanmantataj agradecekunapaj? Atisqanchejman jina qolqesitunchejmanta churarisunman congregacionninchejmanta gastospaj, jallpʼantinpi willakunanpajpis. Apóstol Pabloqa chaymanta parlaspa nerqa: “Sichus pipis sonqomantapacha imatapis qon chayqa, Diosqa chayta allinpaj qhawan. Imaraykuchus payqa suyan sapa uj atisqanman jina qonanta, nitaj mana atisqanman jinachu”, nispa (2 Cor. 8:4, 12). Jehovaqa atisqanchejman jina qolqesitunchejmanta qojtinchej mayta kusikun, pisilla kajtinpis (Mar. 12:42-44; 2 Cor. 9:7).

14. Proverbios 19:17 nisqanman jina, ¿imaynatá Jehová qhawan necesitaj hermanosta yanaparisqanchejta?

¹⁴ Pisichikoj hermanosta yanapaspa Jehovata yupaychanchej. Jehovaqa israelitasman nerqa wajcha hermanosninkuta yanaparejtinku bendecinanta (Deu. 15:7, 10). Noqanchejpis pisichikoj hermanosninchejta yanapanchejpuni. Chaytaj Jehovapajqa, paypajpis ruwashasunman jina (Proverbios 19:17 leey). Uj pacha Filiposmanta cristianosqa, apóstol Pabloman presochasqa kashajtin imatachus necesitasqanta apacherqanku. Pablotaj nerqa chayta ruwasqankoqa, “ima munay qʼapashaj jaywana jina, Diospaj ñaupaqenpitaj allinpaj qhawasqa” kasqanta (Fili. 4:18). Congregacionninchejmanta hermanospi piensarina: “¿Mayqen hermanollatapis chayri hermanallatapis yanapariyta atisunmanchu?”. Yanapata necesitaj hermanosninchejtaqa kallpanchejwan, imastachus ruwayta yachasqanchejwan, kapuwasqanchejwan ima yanaparinchej. Chaypajtaj tiempochakunchej. Chayta ruwaspataj Jehová Diosta mayta kusichinchej. Chantapis Jehovapajqa chayta ruwasqanchej, payta yupaychay jina (Sant. 1:27).

15. ¿Imajtintaj Jehovata yupaychanapaj tiempochakuyta, kallpachakuytapis atillanchej?

¹⁵ Jehovata munayninman jina yupaychanapajqa, tiempochakunanchej tiyan, kallpachakunanchejtaj tiyan. Chaytataj ruwayta atillanchej (1 Juan 5:3). Imaraykuchus Jehovataqa mayta munakunchej. Uj wawita tatanman regalota qoyta munasqanpi piensarina. Payqa ichapis tatanman regalananpaj uj dibujitota unaypi ruwanman. Jinapis chaytaqa tukuy sonqo ruwan, tatanta munakusqanrayku. Chay regalota qospataj mayta kusikun. Ajinallatataj noqanchejpis, Jehovata munakusqanchejrayku tukuy sonqo tiempochakunchej, kallpachakunchejtaj Jehovata yupaychanapaj.

16. Hebreos 6:10 nisqanman jina, ¿imaynatá Jehová qhawan payta kusichinapaj kallpachakusqanchejta?

¹⁶ Wawasninkuta munakoj tatasqa, mana suyankuchu wawasninku kikin regalosta jaywanankuta. Imaraykuchus paykunaqa yachanku, wawasninkoqa mana kikinchu kasqankuta, nitaj kikin imastachu ruwayta atisqankuta. Ajinallatataj Jehová Diosninchejpis, yachan sapa ujninchej imastachus ruwayta atisqanchejta. Ichapis noqanchejqa amigosninchejmanta nisqa astawan Jehovapaj ruwayta atisunman. Chayrí ichá aswan pisillata ruwasun machitusña kasqanchejrayku, onqosqa kasqanchejrayku, chayrí familianchejta mantienenanchej kasqanrayku. Jinapis ama desanimakunachu (Gál. 6:4). Jehovaqa ni jaykʼaj qonqanqachu paypaj imastachus ruwasqanchejta. Jehovaqa paypaj imatapis tukuy atisqanchejta, tukuy sonqotaj ruwajtinchej mayta kusikonqa (Hebreos 6:10 leey). Jehovaqa yachan imachus sonqonchejpi kasqanta. Chayrayku payqa munan payta yupaychaspa kusisqa, sonqo juntʼasqataj kananchejta.

17. 1) Diosta yupaychaypi ruwanasninchejta mana ruwayta atillanchejchu chay, ¿imatá ruwasunman? 2) ¿Imaynatá yanapawanchej “¿Imastá ruwasunman astawan kusikunapaj?” nisqa recuadropi fotos?

¹⁷ Bibliata estudiayta, predicayta, chayrí Diosta yupaychaypi waj imasta ruwayta mana atillanchejchu chay, ¿imatá ruwasunman? Chaykunata ruwanapaj astawan tiempochakusunman. Ajinamanta ichapis astawan gustachikusun, yanapachikusuntaj. Diosta yupaychaypi ruwanasninchejtaqa, charangota tocayta yachakuywan kikinchasunman. Charangota maypi jinalla oqharispaqa, mana sumajta tocayta yachakusunchu. Jinapis sapa día uj ratollatapis practicanapaj kallpachakuspaqa, sumajta tocayta yachakusun. Tiempo pasasqanman jinataj, sapa día practicanchej chay horas chayamunallantaña suyasun, kusirikusuntaj. Diosta yupaychaypi ruwanasninchejwanpis ajinallatataj ruwasunman.

18. ¿Imajtintaj Jehovata yupaychanapaj kallpachakusqanchej may sumaj?

¹⁸ Jehovata yupaychanapaj tukuy atisqanchejta kallpachakoyqa, may sumajpuni. Imajtinchus chayta ruwaspaqa kusisqa kasun, sonqo juntʼasqa kasun, Jehovatataj wiñaypaj yupaychayta atisun (Pro. 10:22). Noqanchejqa kay tiempopiña sonqo tiyasqa kashanchej. Imaraykuchus yachanchej Jehovaqa problemaspi kashajtinchej yanapawasqanchejta (Isa. 41:9, 10). Munakuyniyoj Tatanchej Jehovata yupaychaspaqa, mayta kusikunchej. Payllamin ‘jatunchanapaj jina, yupaychanapaj jinataj’ (Apo. 4:11).