Purajmanta munanakunallapuni

1, 2. ¿Imaraykutaj purajmanta munanakunanchej tiyan?

IMAJTINCHUS purajmanta munanakunanchej kasqantaqa Bibliapi qhawarina. Bibliaqa nin: “Munakuymanta, cheqa kajmantapis amapuni karunchakuychu”. “Ajinamanta allinpaj qhawasqa kanki, allin yachayniyoj kasqaykipis sutʼi kanqa Diospa qhawayninpi, runaspa qhawayninpipis”. “Uj runa kʼacha kajtenqa pay kikinpaj allin kajta tarin”. “Cheqan runa kananpaj, munakuyniyoj kananpaj kallpachakojqa, kausayta tarenqa”, nispa (Pro. 3:3, 4; 11:17; 21:21).

² Chay versiculospi reparanchej kinsa imasrayku purajmanta munanakunanchej kasqanta. 1) Purajmanta munanakojtinchej Diosqa may valorniyojpaj qhawawanchej. 2) Purajmanta munanakusqanchejqa allinninchejpaj. Imajtinchus sumaj amigosniyoj kayta atinchej. 3) Purajmanta munanakojtinchej aswan qhepaman ashkha bendicionesta japʼisun, wiñay kausaytapis. Chayrayku Jehová kamachiwasqanchejta kasukunapuni. Pay kamachiwanchej: ‘Purajmanta munanakuychej, khuyanakuychejtaj’, nispa (Zac. 7:9).

 3. ¿Ima tapuykunamantaj kay yachaqanapi kutichisun?

³ Kay yachaqanapeqa kay tawa tapuykunaman kutichisun: ¿Pikunatataj munakunanchej tiyan? ¿Imatataj Rut libropi purajmanta munanakuymanta yachakusunman? ¿Imaynasmantá hermanosninchejta munakusqanchejta rikuchisunman? ¿Imaynatataj chay yanapawanchej?

 4. ¿Imaynatá hermanosninchejta Jehová jina munakusunman? (Marcos 10:29, 30).

⁴ Ñaupaj yachaqanapi yachakorqanchej jina, Jehová Diosqa munakun, pikunachus payta munakunku, sirvinkutaj chaykunallata, nisunman Jehovaqa paykunallaman sumaj kʼaskasqa (Dan. 9:4). Efesios 5:1 nin: “Diospa munasqa wawasnin kaspa, pay jina ruwaychej”, nispa. Chay nisqantaqa kasukuytapuni munanchej. Chayrayku hermanosninchejman sumaj kʼaskasqa kayta munanchej (Marcos 10:29, 30 leey).

5, 6. ¿Imaraykutaj uj runa kikin empresapi trabajallanpuni?

⁵ Hermanosninchejta imaynatachus munakunanchej kasqanta entiendespaqa, paykunata astawan munakuyta atillasun. Chayta sutʼita entiendenapajtaj, uj kikinchaypi piensarina.

⁶ Ashkha watastaña uj empresapi trabajaj runapi piensarina. Payqa chay empresapi ashkha watastaña trabajaspapis ichá ni mayqen dueñota rejsinchu. Chantapis chay empresapi trabajanapaj wakin kamachiykunaqa ichá wakin kutis mana allinchu rijchʼanman. Jinapis payqa chaypi ashkha watastaña trabajan sumajta pagasqankuraykulla, manataj chaypipuni trabajayta munasqanraykuchu. Mana waj ladopi aswan sumaj trabajota tarispaqa, jubilakunankama chaypi trabajallanqapuni.

7, 8. 1) ¿Imaynatataj Diospa kamachisnin munanakunku? 2) ¿Imajtintaj allin kanman Rut libroj wakin versiculosninta estudiananchej?

⁷ Reparanchej jina chay empresapi trabajaj runaqa, mana chaypi trabajayta munasqanraykupunichu trabajan, manaqa sumajta ganakusqanraykulla. Jinapis ñaupa tiempomanta Diospa kamachisnenqa, mana tanqasqa jinallachu munanakorqanku, manaqa sonqomantapachapuni. Rey Davidmanta parlarina. Paytaqa Jonatanpa tatan wañuchiyta munarqa. Jinapis Davidqa munasqa amigon Jonatanta sonqomantapacha munakullarqapuni. Jonatán wañupusqanmanta aswan qhepamanpis, Davidqa Jonatanpa wawan Mefibosettapis munakullarqataj (1 Sam. 20:9, 14, 15; 2 Sam. 4:4; 8:15; 9:1, 6, 7).

⁸ Rut libroj wakin versiculosninta estudiaspa, mayta yachakusunman purajmanta munanakuymanta. ¿Imastataj yachakusunman chay libropi parlaj runasmanta? ¿Imaynatataj paykunamanta yachakusqanchejman jina congregacionninchejpi ruwasunman?b

 9. ¿Imaraykutaj Noemí yuyarqa Jehová paypa contranpi kashasqanta?

⁹ Rut libroqa parlan Noemimanta, ñojchʼan Rutmanta, Boazmanta ima. Boazqa Diosta munakorqa, Noemij qosanpa ujnin familiarnintaj karqa. Noemiqa qosanwan iskaynin wawasninwan ima, Moab llajtaman riporqanku Israel llajtapi ancha yarqhay kasqanrayku. Chaypitaj qosan wañuporqa. Aswan qhepamantaj iskaynin wawasnin casarakorqanku. Jinapis paykunaqa wañupullarqankutaj (Rut 1:3-5; 2:1). Chayrayku Noemiqa maytapuni llakikorqa. Chay jina llakisqapuni kashasqanrayku, payqa yuyarqa Jehová contranpi kashasqanta. Noemiqa Diosmanta ajinata nerqa: ‘Jehová Dios contraypi kashasqanrayku Tukuy Atiyniyoj Diosqa may llakiypi rikhurichiwan’, nispa. Chantapis nillarqataj: “Tukuy Atiyniyoj Jehová Diosqa contraypi kashan, kay jina llakiypitaj rikhurichiwan”, nispa (Rut 1:13, 20, 21).

10. ¿Imatá Jehová ruwarqa Noemí paymanta mana allin imasta parlajtin?

¹⁰ Jehovaqa, Noemí paymanta mana allin imasta parlajtinpis, mana saqerparqachu. Astawanpis khuyakullarqapuni. Jehovaqa yachan “ñakʼariypi kaspa sumaj yachayniyoj runaqa mana ruwanasta” ruwananta chayri mana parlanasta parlananta (Ecl. 7:7). Jinapis Noemiqa Jehová paywan kashasqanta reparananpaj yanapata necesitarqa. ¿Imaynatá Dios payta yanaparqa? (1 Sam. 2:8). Jehovaqa Rutpa sonqonta kuyuricherqa suegran Noemita yanapananpaj. Rutqa munakuywan Noemita yanaparqa manaña anchata llakikunanpaj, Jehová munakullasqantapunitaj reparananpaj. Rutmantaqa mayta yachakunchej.

11. ¿Imaraykutaj ashkha hermanos llakisqa kajkunata yanapanku?

¹¹ Llakisqa kajkunata munakusqanchejrayku yanapanchej. Rutqa Noemita llakiypi kashajtin mana saqerparqachu. Ajinallatataj kay tiempopipis ashkha hermanosqa, congregacionninkupi llakisqa chayri sonqo pʼakisqa kaj hermanosta yanapashallankupuni. Paykunaqa hermanosninkuta munakusqankurayku tukuy imapi yanapayta munanku (Pro. 12:25; 24:10). Ajinamanta apóstol Pabloj yuyaychasqanta kasukunku. Pay nerqa ‘llakisqa kajkunata sonqochanata, llauchhiyajkunata yanapanata, tukuypajtaj pacienciayoj kanata’ (1 Tes. 5:14).

12. ¿Imasta ruwaspataj llakisqa hermanota sumajta yanapasunman?

¹² Llakisqa kaj hermanotaqa mayta yanapasunman llakiyninta willariwajtinchej sumajta uyarispa, munakusqanchejta nispataj. Jehová Diosqa, mana qonqapunchu munasqa kamachisninta yanapanapaj tukuy imata ruwasqanchejmanta (Sal. 41:1). Proverbios 19:17 nin: “Wajcha runata yanaparejqa Jehová Diosman manurin, paytaj chay runaman kutichiponqa chay ruwasqanmanta”, nispa.

13. ¿Imaynamantá Rut, Orpamanta nisqaqa suegranta mayta munakusqanta rikucherqa? (Kay revistaj tapanpi dibujota qhawariy).

¹³ Imaynachus munakuyniyoj runa kasqanta sumajta entiendenapajqa, Noemimanta parlarinallapuni. Paypa qosan, iskaynin wawasnin ima wañupusqankumanta qhepaman, ¿imataj karqa? Noemiqa “Moabpi kashaspa uyarisqa Jehová Diosqa nacionninta ujtawan bendecisqanta, yarqhay watastapis tukuchipusqanta”. Chayraykutaj llajtanman kutiporqa (Rut 1:6). Iskaynin ñojchʼasnintaj paywan khuska rerqanku. Ñanpitaj Noemiqa ñojchʼasninta kinsa kutita nerqa Moab llajtankuman kutipunallankuta. Chayrayku “Orpaqa suegranta muchʼaykuspa kutiporqa. Ruttajrí mana suegranta saqerparerqachu” (Rut 1:7-14). Orpaqa Noemita kasuspa Moabman kutiporqa. Rutpis kutipullaytataj atinman karqa, jinapis payqa suegranta yanapaytapuni munasqanrayku mana saqerparqachu (Rut 1:16, 17). Rutqa chayta ruwarqa maytapuni suegranta munakusqanrayku. Paymantaqa maytapuni yachakunchej.

14. 1) ¿Kay tiempopi imatataj ashkha hermanos ruwanku? 2) Hebreos 13:16 nisqanman jina, ¿imata ruwasqanchejtaj Diosta mayta kusichin?

¹⁴ Wajkunata munakuspaqa mayta kallpachakunchej paykunata yanapanapaj. Kay tiempomanta Jehovaj testigosnenqa, ñaupa tiempomanta Diospa kamachisnin jinallataj ruwanku. Paykunaqa hermanosninkuta mayta munakunku, mana rejsispapis. Chayrayku mayllapipis uj jatun llakiy kajtin, imaynallamantapis chay rato yanapakuyta munanku. Chayri congregacionmanta uj hermano qolqemanta pisisqa kashasqanta yachaspa, chay rato yanapallankutaj. Apostolespa tiemponkupi Macedonia llajtamanta cristianosqa, hermanosninkuta yanapanankupaj “atisqankumantapis astawanraj” qorqanku (2 Cor. 8:3). Kay tiempomanta cristianospis, ñaupa tiempomanta cristianos jinallataj pisichikoj hermanosta yanapanku. Jehová Diostaj chayta ruwasqankumanta maytapuni kusikun (Hebreos 13:16 leey).

15, 16. ¿Imatá Rut ruwarqa suegran mana munajtinpis?

¹⁵ Rutmantawan Noemimantawanqa ashkha imastapuni yachakusunman. Qhepan parrafospi wakinmanta parlarisun.

¹⁶ Ama saykʼunachu. Rut Noemiwan khuska Judaman riyta munajtin, Noemiqa qallariypi mana munarqachu. Jinapis Rutqa riytapuni munarqa. Chayrayku “Noemiqa Rut paywanpuni riyta munasqanta reparaspa manaña imatapis nerqachu” (Rut 1:15-18).

17. ¿Imataj yanapawasun llakisqa kajkunata yanapanallapajpuni?

¹⁷ ¿Imatá yachakunchej? Llakisqa kajkunata yanapanapajqa, mayta pacienciakuna, nitaj saykʼupunachu kasqanta. Ichapis yanapata necesitaj hermanaqa qallariypi mana yanapananchejta munanmanchu.c Jinapis payta munakusqanchejrayku, mana munajtinpis yanapallasunpuni (Gál. 6:2). Aswan qhepamantaj yanapananchejta, sonqochananchejta ima ichá munallanqaña.

18. ¿Imataj Rutpa sonqonta mayta nanachinman karqa?

¹⁸ Ama phiñakunachu. Noemiwan Rutwan Belenman chayajtinku, Noemiqa chay llajtapi tiyakoj vecinasninman ajinata nerqa: “Kaymantaqa tukuy imayoj riporqani. Jehová Diostajrí, chʼusaj makillata kutichimuwan”, nispa (Rut 1:21). Rutqa chayta uyarispa maytachá llakikorqa. Imajtinchus payqa maytapuni kallpachakorqa Noemita yanapananpaj. Rutqa paywan khuska waqarikorqa, sonqocharqa, ashkha diastataj paywan khuska purerqa. Jinapis Noemiqa nerqaraj: ‘Jehová Diosqa, chʼusaj makillata kutichimuwan’, nispa. Noemiqa Rutpa ruwasqanta manapis valechinmanchu jina parlasharqa. Noemijpa parlasqanqa, maytachá Rutpa sonqonta nanacherqa. Jinapis payqa manapuni Noemita saqerparqachu.

19. ¿Imapajtaj mayta kallpachakunchej?

¹⁹ ¿Imatá yachakunchej? Llakisqa kaj hermanaqa yanaparinapaj mayta kallpachakojtinchejpis, ichá sonqonchejta nanachinawanchejpaj jina imatapis parlarpanqa. Jinapis mayta kallpachakunchej mana sienterpakunapaj. Chantapis yanapallanchejpuni, Jehovamantataj yanapata mañakunchej imaynallamantapis payta sonqocharinanchejpaj (Pro. 17:17).

20. ¿Imataj Rutta yanaparqa ñaupajllamanpuni rinanpaj?

²⁰ Yanapata necesitajta kallpacharina. Rutqa Noemita llakiypi kashajtin, munakusqanrayku yanapallarqapuni. Jinapis Rutqa kallpachanata necesitallarqataj. Chayrayku Jehovaqa Boaznejta payta kallpacharqa. Boazqa Rutman nerqa: “Jehová Dios bendecisuchun imatachus ruwasqaykimanta. Israelpa Diosnin Jehová pagapusuchun chay ruwasqaykimanta. Qanqa paypa lijrasnin urapi pakakoj jamorqanki”, nispa. Chay kʼacha palabrasqa Rutta maytapuni kallpacharqa. Chayrayku nerqa: “Qanqa mayta sonqochariwanki, kʼacha palabraswantaj parlapayariwanki”, nispa (Rut 2:12, 13). Boaz kʼacha palabraswan Rutta kallpacharisqanqa, maytapuni yanaparqa ñaupajllamanpuni rinanpaj.

21. Isaías 32:1, 2 nisqanman jina, ¿imatataj ancianospis hermanosta munakusqankurayku ruwanku?

²¹ ¿Imatá yachakunchej? Wajkunata kallpacharejkunapis kallpacharinata necesitallankutaj. Boazqa Rutta nerqa Noemita tukuy sonqo yanapaspa sumajta ruwasqanta. Ajinallatataj kay tiempomanta ashkha hermanospis, llakiypi tarikoj hermanosta yanapanku, maytataj munakunku. Ancianostaj chay hermanosta sumajta ruwashasqankuta ninku. Chay kʼacha palabrasqa chay yanapaj hermanosta mayta kallpachan ñaupajllamanpuni rinankupaj (Isaías 32:1, 2 leey).

22, 23. ¿Imaraykutaj Noemí manaña ñaupajta jinachu yuyarqa? (Salmo 136:23, 26).

²² Boazqa Ruttawan Noemitawan yanaparqa mana mikhunanku faltananpaj (Rut 2:14-18). Noemiqa, Boaz paykunata yanapasqanrayku nerqa: “Jehová Dios payta bendecichun. Diosqa kausajkunatapis, wañojkunatapis khuyakunpuni”, nispa (Rut 2:20 qallariynin). Reparanchej jina Noemiqa manaña qallariypi jinachu yuyarqa. Chayrayku pay nerqa: ‘Jehová Diosqa khuyakunpuni’, nispa. Jinapis aswan ñaupajta llakisqa kashaspa nerqa: “Jehová Diosqa contraypi kashan”, nispa. Imachus Noemita yanapasqanta qhepan parrafopi qhawarisun.

²³ Noemiqa chay kutipiraj repararqa Jehová ni jaykʼaj saqerparisqanta. Jehovaqa Noemí Judaman kutipushajtin, Rutnejta yanaparqa (Rut 1:16). Noemiqa, reparallarqataj Jehová payta Rutta ima Boaznejta yanapasqantad (Rut 2:19, 20 tukukuynin). Payqa ajinatachá nerqa: “Kunanraj reparani Jehová ni jaykʼaj saqerpariwasqanta”, nispa (Salmo 136:23, 26 leey). Noemiqa maytachá agradecekorqa Rutwan Boazwan mana saykʼuspa yanapallasqankumantapuni. Rutwan Boazwanqa kusisqa kasharqanku Noemí watejmanta kusisqa, kallpachasqataj kasqanmanta. Noemipis kusisqallataj kasharqa.

24. ¿Imaraykutaj hermanosninchejta munakuywan yanapallanchejpuni?

²⁴ ¿Imatataj Rut libropi yachakunchej? Llakiypi tarikoj hermanosninchejta munakusqanchejrayku yanapanallanchejpuni kasqanta, manataj saykʼupunachu kasqanta. Chantapis paykunata munakusqanchejrayku, yanaparinapaj tukuy atisqanchejta kallpachakuna kasqanta. Ancianospis llakisqa hermanosta kallpachajkunata, kʼacha palabraswan kallpacharinallankutaj kasqanta. Llakiypi tarikoj hermanosninchej Jehovata sirvispa watejmanta kusikojtinku, noqanchejpis mayta kusikunchej (Hech. 20:35). Chantapis hermanosninchejta munakuywan yanapallanchejpuni Jehová jina ruwayta munasqanchejrayku, kusichiytataj munasqanchejrayku. Imajtinchus Jehovaqa “may jina munakuyniyoj” (Éxo. 34:6; Sal. 33:22).