Familia jina tukuy sonqo munanakunallapuni

 1. ¿Imaraykutaj nisunman kay tiempopi runas, mana runa masinkuta munakusqankuta?

BIBLIAQA nerqa, qhepa pʼunchaykunapi runas ‘runa masinkuta mana munakunankuta’ (2 Tim. 3:1, 3). Chaytaj juntʼakushanpuni. Ashkha familiasqa tʼaqanasqas kausanku. Qhariwarmisqa divorciakunku, nitaj rikunakuytapis munankuchu. Wawasninkutaj ni pi paykunata munakusqanta yuyanku. Wakin familiastaj khuska tiyakuspapis, waj runaspis kankuman jina kausanku. Familiasta yuyaychaj runa nin: “Ashkha familiaspeqa, tatas, mamas, wawaspis mana parlarikuyta yachankuchu. Sapa ujpis computadora, tablet, celular, chayri videojuegos qhawarisqalla kanku. Chay familiasqa uj wasillapi tiyakuspapis, mana allintachu rejsinakunku”.

2, 3. 1) Romanos 12:10 nisqanman jina, ¿pikunatataj munakunanchej tiyan? 2) ¿Imatataj kay yachaqanapi yachakusun?

² Kay sajra mundomanta runasqa, mana munakuyniyojchu kanku. Noqanchejtaj mana paykuna jina kayta munanchejchu (Rom. 12:2). Astawanpis familianchejta, hermanosninchejtapis astawan munakunanchej tiyan (Romanos 12:10 leey). Imaynatachus tatanchejta, mamanchejta, hermanosninchejtapis munakunchej, ajinallatataj cristiano hermanosninchejta munakunanchej tiyan. Chayta ruwasun chayqa, Jehová Diospa familian ujchasqallapuni kananpaj yanapakusun (Miq. 2:12).

³ Chayrayku kay yachaqanapeqa, Jehovamanta, wakin kamachisninmantawan yachakusun. Paykunamanta yachakoyqa, hermanosninchejta familianchejta jina munakunapaj yanapawasun.

 4. ¿Imatá Salmo 86:5; Santiago 5:11 niwanchej Jehovaj munakuyninmanta?

⁴ Bibliaqa willawanchej, imayna kʼachachus Jehová Dios kasqanta. Chayrayku nin: “Diosqa munakuymin”, nispa (1 Juan 4:8). Chayta yachaspaqa, payman qayllaykuyta munanchej. Jinapis Diospa Palabranqa, Jehová “jatun munakuyniyoj” kasqanta nillawanchejtaj (Salmo 86:5; Santiago 5:11 leey). Bibliaqa manchay kʼachitutapuni willawanchej, imaynatapunichus Jehová Dios munakuwasqanchejta.

 5. 1) ¿Imatataj Jehová Dios khuyakuyniyoj kasqanrayku ruwan? 2) ¿Imaynatataj hermanosninchejta Jehová Dios jina khuyakusunman?

⁵ Santiago 5:11 versiculopi leerinchej jina, Jehová Diosqa khuyakuyniyoj. Chayta yachaspataj payman astawan qayllaykuyta munanchej (Éxo. 34:6). Jehovaqa munakuwasqanchejrayku khuyakuwanchej. Khuyakuwasqanchejraykutaj juchasninchejta perdonawanchej (Sal. 51:1). Noqanchejpis hermanosninchejmanta khuyakusunman, sonqonchejta nanachiwajtinchej paykunata perdonaspa, nitaj paykunapaj phiñasqallapuni kaspa (Efe. 4:32). Bibliaqa “khuyakuy” nispa, mana wajkunata perdonayllamantachu parlashan. Parlashallantaj wajkunata sufrejta rikuspa yanaparinamantapis. Jehová Diosqa, maytapuni yanapayta munawasqanchejta niwanchej. Payqa uj mama wawitanta yanapayta munasqanmanta, astawanraj yanapayta munawanchej (Isa. 49:15). Jehová Diosqa llakiypi kashajtinchej, khuyakuwasqanchejrayku yanapawanchej (Sal. 37:39; 1 Cor. 10:13). Noqanchejpis hermanosninchejta khuyakusunman, llakiypi kashajtinku paykunata yanaparispa. Hermanosninchejta munakusqanchejrayku khuyakuspaqa, Tatanchej Jehová jina ruwashanchej. Payqa ni pi jina manchay munakuyniyoj, khuyakuyniyojtaj (Efe. 5:1).

 6. Jonatanwan Davidwan, ¿sumaj amigospunichu karqanku?

⁶ Bibliaqa willawanchej, wakin runas sumaj amigos jina munanakusqankuta. Jonatanmantawan Davidmantawan parlarina. Bibliaqa paykunamanta nin: “Jonatanqa Davidpa may sumaj kawsaqen ruwakorqa. Chayrayku Davidta pay kikinta jinapuni munakorqa”, nispa (1 Sam. 18:1). Jehová Diosqa Davidta ajllarqa, Saulpa cuentanmanta rey kananpaj. Saultaj Davidpaj mayta phiñakorqa, wañuchiytataj munarqa. Saulpa wawan Jonatantajrí, mana tatan jinachu karqa. Payqa mana Davidta wañuchiypi yanapakuyta munarqachu. Jonatanwan Davidwanqa, tratota ruwarqanku sumaj amigosllapuni kanankupaj, purajmantataj yanapanakunankupaj (1 Sam. 20:42).

 7. ¿Imataj Jonatantawan Davidtawan amigos kanankupaj jarkʼayta atinman karqa?

⁷ Jonatanwan Davidwanqa, ashkha imas jarkʼajtinpis sumaj amigos karqanku. ¿Imastaj paykunata jarkʼanman karqa? Jonatanqa Davidmanta 30 wataswan jina kurajnin karqa. Ichapis Jonatanqa Davidmanta ninman karqa: “¿Kay lloqallitutachu amigoypaj qhawakuyman? Wawallarajqa, niraj imatapis yachanchu”, nispa. Jinapis Jonatanqa mana chaytachu nerqa, nitaj Davidta pisipaj qhawarqachu.

 8. ¿Imajtintaj nisunman Jonatán Davidpa sumaj amigonpuni kasqanta?

⁸ Jonatanqa Davidmanta envidiakuyta atinman karqa. Rey Saulpa wawan kasqanrayku, qhepan rey kananpaj derechonta valechiyta munanman karqa (1 Sam. 20:31). Jinapis Jonatanqa kʼumuykukoj sonqo karqa, Jehová Diostataj kasukuyta munarqa. Chayrayku David rey kananpaj ajllasqa kajtin, mana phiñakorqachu. Chantapis Jonatanqa tatan mayta phiñakojtinpis, Davidpa amigollanpuni karqa (1 Sam. 20:32-34).

 9. ¿Imaynapí yachanchej Jonatán mana Davidta enemigonta jinachu qhawasqanta?

⁹ Jonatanqa Davidta tukuy sonqo munakorqa. Chayrayku mana Davidta enemigonta jinachu qhawarqa. Jonatanqa sumajta flechasta kachariyta yacharqa. Chantapis guerrapi maqanakunapaj wapu karqa. Runasqa paymanta, tatanmantawan nej kanku: ‘Ankasmanta aswan usqhayta phawanku. Leonesmantapis aswan kallpasniyoj kanku’, nispa (2 Sam. 1:22, 23). Jonatanqa maqanakuspi atipasqanmanta jatunchakuyta atinman karqa. Jinapis payqa mana Davidta atipayta maskʼarqachu, nitaj Davidpa ruwasqasninmanta envidiakorqachu. Astawanpis Jonatanqa Davidta jatunpaj qhawarqa. Imaraykuchus Davidqa maqanakupaj wapu karqa, Jehovapitaj atienekorqa. Arí, Jonatanqa manapuni envidiosochu karqa. Chayta yachanchej, David Goliatta atipajtin imatachus ruwasqanpi. Jonatanqa Davidta envidiakunanmantaqa, pay kikinta jina munakuyta qallarerqa. Noqanchejrí, ¿imaynatá hermanosninchejta tukuy sonqo munakusunman? Chayta qhepan parrafospi yachakusun.

10. ¿Imaynatá hermanosninchejta ‘sonqomantapacha mayta munakusunman’?

¹⁰ Bibliaqa niwanchej: “Sonqomantapacha mayta munanakuychej”, nispa (1 Ped. 1:22). Jehová Diosqa chayta ruwayta sumajta yachachiwanchej. Payqa mayta munakuwanchej. Chayrayku payta mana wasanchajtinchej, mana imapis munakuyninmanta tʼaqawasunchu (Rom. 8:38, 39). Bibliapi ‘mayta munakuychej’ nispaqa, pitapis munakunapaj mayta kallpachakunamanta parlashan. Wakin kutistaj chaytapuni ruwananchej tiyan. Imajtinchus hermanosninchej phiñachiwajtinchej, mana paykunata munakuyta atillanchejchu. Chay kutispeqa, Bibliaj kay nisqanta kasukunanchej tiyan: “Munakuywan aguantanakuychej. Chantapis qankunapura allinta kausakuychej. Ujchasqallapuni kanaykichejpajtaj mayta kallpachakuychej. Imaraykuchus Diospa atiyninnejta ajina ujchasqa kashankichej” (Efe. 4:1-3). Hermanosninchejwan “ujchasqa” kanapaj kallpachakusun chayqa, mana pantasqasninkuta qhawasunchu. Astawanpis paykunata Jehová Dios jina qhawanapaj kallpachakusun (1 Sam. 16:7; Sal. 130:3).

11. ¿Imaraykutaj hermanosninchejta mana familianchejta jina munakuyta atillanchejchu?

¹¹ Hermanosninchejtaqa mana familianchejta jina munakuyta atillanchejchu, astawanraj imaynachus kasqankuta yachaspa. Ñaupa tiempomanta wakin cristianospis, ajinallapitaj rikukorqanku. Evodiamantawan Sintiquemantawan parlarina. Paykunaqa “sumaj willaykunata willaspa, tukuy atisqankuta” Pablowan khuska llankʼarqanku. Jinapis manasina paykunapura allinta kausakuyta atillarqankuchu. Chayrayku Pabloqa, paykunaman nerqa “Señorpi uj yuyaylla kanankuta” (Fili. 4:2, 3).

12. ¿Imatá ruwasunman hermanosninchejta familianchejta jina munakunapaj?

¹² ¿Imatá ruwasunman hermanosninchejta familianchejta jina munakunapaj? Paykunata astawan rejsina. Chayta ruwaspaqa paykunata entiendesun, astawantaj munakusun. Hermanosninchej kurajkunasninchej, sullkʼasninchej, chayri waj llajtasmanta kajtinkupis, paykunawan amigos kayta atisunman. Jonatanqa Davidmanta 30 wataswan jina kuraj kajtinpis, Davidwan sumaj amigos karqanku. Chayrayku noqanchejpis, kurajkunasninchejwan sullkʼasninchejwanpis, sumaj amigos kanapaj kallpachakuna. Chayta ruwaspaqa, “tukuy hermanosta” munakusqanchejta rikuchisun (1 Ped. 2:17).

13. ¿Imaraykutaj mana tukuywanpunichu sumaj amigos kasun?

¹³ Hermanosninchejta familianchejta jina munakuspapis, ¿tukuywanpunichu sumaj amigos kananchej tiyan? Mana. Mana tukuywanpunichu allin amigos kayta atisun. Wakinwanqa ichá kikin gustosniyoj kasqanchejrayku, aswan sumaj amigos kasun. Chaytaj mana juchachu. Jesusqa tukuynin apostolesnin ‘amigosnin’ kasqankuta nerqa. Jinapis apóstol Juanta astawan munakorqa (Juan 13:23; 15:15; 20:2). Ajinata munakuspapis, mana payllawanchu imatapis ruwaj, nitaj payllamanchu imatapis qoj. Uj pacha, Juanwan hermanon Santiagowan, Diospa Gobiernonpi jatunpaj qhawasqa puestosta mañakorqanku. Jesustajrí paykunaman nerqa: “Pikunachus pañaypi, lloqʼeypiwan tiyaykukunankoqa, mana noqamantachu kashan”, nispa (Mar. 10:35-40). Noqanchejpis Jesús jinallataj, mana amigosnillanchejwanchu tukuy imata ruwananchej tiyan (Sant. 2:3, 4). Chayta ruwasunman chayqa, congregacionta tʼaqanachisunman. Chaytaj mana walejchu kanman (Jud. 17-19).

14. Filipenses 2:3 nisqanman jina, ¿imataj yanapawasun congregacionpi mana atipanakusta rikhurichinapaj?

¹⁴ Hermanosninchejta familianchejta jina munakuspaqa, mana paykunata atipayta maskʼasunchu. Jonatanmanta watejmanta parlarina. Payqa mana Davidmanta envidiakorqachu, nitaj paymanta rey kayta qhechunakorqachu. Noqanchejpis Jonatán jina ruwasunman. Ama hermanosninchejmanta imatapis sumajta ruwayta yachasqankurayku envidiakunachu. Astawanpis “kʼumuykukoj sonqo kaspa”, paykunata noqanchejmanta “aswan kurajta jina” qhawana (Filipenses 2:3 leey). Congregacionpeqa sapa ujpis imatachus ruwayta yachasqanchejwan yanapakunchej. Kʼumuykukoj sonqo kaspaqa, hermanosninchejpa allin ruwasqasninkuta qhawasun, paykunamantataj yachakusun (1 Cor. 12:21-25).

15. ¿Imatá yachakusunman imapichus hermana Tanya rikukusqanmanta?

¹⁵ Mana suyashajtillanchej ima llakiypis rikhuriwajtinchej, Jehová Diosqa hermanosninchejnejta sonqochawanchej. Hermanosninchejqa munakuwasqanchejrayku yanapawasunman. Imapichus hermana Tanya 2019 watapi rikukusqanmanta parlarina. Payqa “Munakoyqa ni jaykʼaj tukukonqachu” nisqa jatun tantakuyman risqa. Chay tantakoyqa Estados Unidospi karqa. Hermananchejqa sábado tardeta alojamientonman autonpi kutipushasqa. Jinallapi waj auto payta chocarparisqa. Hermananchej nin: “Ni wawaypis, ni noqapis imanakorqaykuchu. Jinapis automanta manchay mancharisqas llojserqayku. Ajinata acerapi sayakushajtiyku, uj runa autonmanta wajyamuwarqayku. Payqa uj hermano kasqa, asambleamantataj kutinpushasqa. Suecia suyumanta phishqa hermanospis, noqaykuta yanapanawaykupaj sayallarqankutaj. Hermanasqa wawaytawan noqatawan abrazaykuwarqayku. Chaytaj sonqoykuta tiyaykucherqa. Tukuy chay hermanosman allillan kashasqaykuta nejtiykupis, paykunaqa mana saqerpariwarqaykuchu. Astawanpis ambulancia chayamunankama noqaykuwan karqanku. Alojamientoykuman kutipunaykupajpis yanapawarqayku. Chayta rikuspa, Jehová mayta munakuwasqaykuta repararqayku. Chantapis hermanosniykuta astawan munakorqayku. Maytapuni Jehová Diosman agradecekorqayku, astawantaj payta munakorqayku”. Ichá noqanchejpis yuyarikunchej, llakiypi kashajtinchej imaynatachus uj hermano munakuywan yanapariwasqanchejta.

16. ¿Imaraykutaj hermanosninchejwan familia jina munanakunanchej tiyan?

¹⁶ Hermanosninchejwan familia jina munanakojtinchej, imaschus kananpi piensarina. Hermanosninchejta sonqomantapacha munakuspaqa, paykunata llakiypi kashajtinku sonqochasunchej. Diospa llajtantataj aswan ujchasqa kananpaj yanapasun. Chantapis Jesuspa yachachisqasnin kasqanchejta rikuchisun. Ajinamantataj llampʼu sonqo runasta Jehovata yupaychayta munanankupaj yanapasun. Jinapis astawanqa Jehová Diosninchejta jatunchasun. “Paymin may khuyakuyniyoj Tata, tukuy imapi sonqochaj Diostaj” (2 Cor. 1:3). Tukuyninchej astawan munakuyniyoj kanapaj kallpachakunallapuni.