Satanaswan ama chʼawkiyachikunachu

“ASIRIAMANTA rey Senaqueribpa kachasqan Rabsacesqa, Jerusalenpi tiyakuqkunaman ajinata nirqa: “Ama chʼawkiyakuychikchu. Chay Diosniykichikqa mana yanapasunqachikchu. Kawsayta munaspaqa, atipasqaña kasqaykichikta niychik”, nispa. Asiriamanta soldadosqa, Judá llaqtaman juntʼaykurqankuña, Rabsacestaq parlasqanwan Jerusalenmanta runasta, manaña paykunawan maqanakunankupaq, kʼumuykachachiyta munarqa (2 Rey. 18:28-35).

Asiriosqa, saqra runasmanta riqsisqa karqanku. Paykunaqa wak suyusta manchachinankupaq, imaynatachus presosta japʼispa ñakʼarichisqankuta tukuyniqpi willachiq kanku. Unay tiempo runasmanta qillqaq Philip Taylor, jinata nin: “Asiriosqa, atipasqa llaqtas mana uqharikunankupaq, wak suyusta manchachinankupaq ima, presosta mayta ñakʼarichisqankuta tukuyniqpi willachiq kanku, ajinamanta runasta kʼumuykachachiq kanku”, nispa. Taylor nisqanmanjina chayjina willaykunawanqa, “runap yuyayninta munayninkumanjina qʼiwiq kanku”.

Kay tiempopi chiqa cristianosqa, “mana runaswanchu maqanakushanchej, manachayqa [...] patapi kaj sajra espirituspa contrampi”, nisunman Diosman churanakuq espirituswan (Efe. 6:12). Kamachiqninku Satanaspis, tukuy imaymanamanta chʼawkiyayta maskʼan.

Kuraq Supayqa, tukuy runasta Diosman churanachinanta nin. Jobpa tiemponpipis, Jehová Diosman ajinata nirqa: “Kawsayninrayku runaqa imatapis qonampaj jinalla”, nispa. Wak parlaypiqa, runas juchaman tanqasqa kaspa Diosta wasanchanankuta nirqa (Job 2:4). ¿Chay chiqachu? ¿Runa kawsayninta salvananpaq imatapis ruwananpaqjinallachu? Kuraq Supayqa, chayta yuyachiyta munawanchik. Chaypaqtaq, pantasqa yuyaykunata umanchikman wañuchiq unquytajina yaykuchin. Chayrayku, imastachus chʼawkiyanawanchikpaq apaykachasqanta ukhuncharina, imaynatachus atipanatataq qhawarina.

“Runasqa jallpʼa tʼuru jinalla sayasqa kanku”

Satanasqa, Jobpa juknin “amigon” Elifazniqta, runas juchaman tanqasqa kaptinku urmanallankuta nirqa. Elifaztaq nirqa: “Runasqa jallpʼa. Tʼuru jinalla sayasqa kanku”. Chantá nillarqataq: “Paykunaqa thuta jinalla sarurparisqa kayta atinku. Tutamanta chʼisiyaykamalla chinkachisqas kanku. Paykunaqa wiñaypaj wañunku, nitaj pipis paykunamanta dakunchu”, nispa (Job 4:19, 20).

Diospa Palabranqa, pʼakikuq ‘tʼuru vasoswan’ kikinchawanchik (2 Cor. 4:7). Juchata Adanmanta japʼikusqanchikraykutaq, juchasapa runas kanchik (Rom. 5:12). Chayrayku sapallanchikqa, mana Kuraq Supayta atipasunmanchu. Chaywanpis cristianosqa, Jehovap yanapayninwan kanchik. Paytaq juchasapa runas kaptinchikpis, may allinpaq qhawawanchik (Isa. 43:4). Chantapis mañakuptinchikqa, espíritu santota quwanchik (Luc. 11:13). ‘Chay may sumaq atiyniqtataq’, Satanás ñakʼariykunata churasqanta muchuyta atinchik (2 Cor 4:7; Fili. 4:13). Chayrayku ‘payman churanakuspa creesqanchikpi sinchita sayasunchik’ chayqa, Diosninchik mana urmanapaq kallpachawasun (1 Ped. 5:8-10). Kuraq Supayta, ¡ama manchachikunachu!

‘Runaqa juchata ruwachkan yakutapis ukyachkanmanjina’

Elifaz tapurqa: “Imataj runa kasqa mana juchayojpuni kanampajri? Warmimanta nacesqa runaqa, imaynatataj cheqan kanmanri?”, nispa. Payllataq jinata kutichirqa: “Diospa angelesnimpis mana atienekunapaj jinachu kanku. Diospa rikuynimpeqa janaj pachapis mana llimphuchu. Astawanraj mana atienekonqachu juchasapa millay runapeqa, mayqenchus sapa pʼunchay juchata ruwashan yakutapis ujyashanman jina, chaypeqa”, nispa (Job 15:14-16). Elifazqa, Jobman kay rimaykunawan, Jehová ni pita chiqanpaq qhawasqanta nichkarqa. Kuraq Supayqa, mana allin yuyaykunawan urmachiyta munawanchik. Astawanpis, ñawpaqpi pantasqanchikmanta mayta phutikunanchikta, juchachakunanchikta, ni imapaq valesqanchikta yuyananchikta ima, munan. Chantapis, Dios anchata mañawasqanchikta, mana khuyakuq, nitaq yanapayta munawasqanchikta ima, yuyananchikta munan.

Arí, “tukuy runas juchallikusqankurayku, [...] Diospa jatun kaynimpa kʼanchayninta mana taripayta atinkuchu”. Chayrayku, Jehovap chiqa kamachiykunasninta mana juntʼayta atillanchikchu (Rom. 3:23; 7:21-23). Jina kaptinpis Jehovaqa, allinpaq qhawallawanchikpuni. Arí, Dios Tatanchikqa, “jallpʼalla kasqanchejta” yachan, chayraykutaq ñuqanchikwan kʼacha kanqa, nitaq juk juchamanta ‘kʼamillawasunpunichu’ (Sal. 103:8, 9, 14). Astawanqa, “ñawpa katari, pichus sutichasqa Kuraj Supay, Satanastaj”, juchasapa kasqanchikrayku urmananchikpaq tanqachkawasqanchikta yachan (Apocalipsis 12:9, 10).

Jehovaqa, sunqumantapacha juchanmanta pesachikuspa kutirikuq runataqa, “juchanta kantumanta pampachanqa” (Isa. 55:7; Sal. 51:17). Chay runap juchasnin, “may jina pukapis kachunku, ritʼi jina yuraj kanqanku” (Isa. 1:18). Kayta yachayqa, Diospa munayninta ruwanallapaqpuni kallpachawanchik.

Juchasapa kasqanchikrayku, ñuqanchikllamantaqa mana Diospa amigonman tukusunmanchu. Ñawpa tatasninchikqa juchallikusqankurayku, paykunapaq, wawasninkupaq ima, wiñay kawsayta chinkachirqanku (Rom. 6:23). Chaywanpis Jehovaqa, may jatun munakuyninpi Churin Jesucristota, juchasninchikrayku wañunanpaq kay Jallpʼaman kachamurqa (Mat. 20:28; Juan 3:16). “Diospa qhasilla kʼacha yanapaynin[qa]”, ¡may sumaq! (Tito 2:11.) Juchasninchikqa pampachasqa kayta atinman. Jina kaptin, ¿Satanás juchanchik mana jaykʼaq pampachasqa kananta yuyachinawanchikta, saqillasunpunichu?

“Nanaykuchiy tullunta aychantawan”

Satanasqa, Job mayta unquykuptin, Diosta wasanchananta nirqa. Chayrayku, Jehovaman nirqa: “Nanaykuchiy tullunta aychantawan, chay pacha rikunki uyaykipi maldicisusqanta”, nispa (Job 2:5, Qheshwa Biblia). Kunanpis payqa, unqusqanchikrayku ni imapaq valesqanchikta yuyachiyta munawanchik.

Jehovaqa, manaña ñawpaqtajina ruwaptinchikpis, paypaq tukuy atisqanchikmanjina ruwasqanchikta allinpaq qhawan. Munasqa amigonchikta maqaspa parti wañusqata saqiptinku, ¿imatá ruwasunman? Manaña ñawpaqtajina ruwayta atisqanrayku, ¿pisipaqchu qhawasunman? Mana. Astawanpis yanapanawanchikrayku ajinapi rikukuptin, jampiykusunchik, astawantaq munakusunchik. Kikintachu, ¿Jehová qhawawanchik? Bibliaqa sutʼita kutichin: “Diosqa cheqan kaspa, mana qonqaponqachu ruwasqasniykichejmanta, jinallataj Diospa sutinta munakusqaykichejmantapis” (Heb. 6:10).

Bibliaqa, ‘juk waqcha viudatamanta’ parlan, ichá kay viudaqa watastaña chiqa Diosta yupaycharqa. Jesustaq templopi qullqi churanasman, “iskay phatasllata churaykojta” rikurqa, ¿pisipaqchu chay ruwasqanta qhawarqa? Mana. Astawanpis, Jehovata yupaychananpaq atisqanmanjina ruwasqanta, may allinpaq qhawarqa (Luc. 21:1-4).

Jehovaman chiqa sunqu kasunchik chayqa, unquptinchikpis, machuyaptinchikpis, chayri juchasapa kasqanchikrayku ima chʼampaypi kaptinchikpis, payqa allinpaq qhawallawasunchikpuni. Jehovaqa atisqanchikmanjina ruwaptinchik, ni jaykʼaq saqirpariwasunchu (Sal. 71:9, 17, 18).

“Salvacionta monterata jina umaykichejman churakuychej”

Satanaswan mana chʼawkiyachikunapaq, ¿imatá ruwasunman? Pablop yuyaychasqanta kasukuna, pay nirqa: “Kallpachakuychej Señorpi, jatun atiynimpitaj. Diospa qosqan maqanakuna pʼachawan pʼachallikuychej, Kuraj Supay urmachiyta munasojtiykichej, chaykunawan sinchʼita sayanaykichejpaj”, nispa. Chay maqanakuna pʼachasmanta jukninqa, ‘Salvacionmanta montera’ (Efe. 6:10, 11, 17). Satanasta atipanapaqqa, chay monterata churakunapuni tiyan. Imaynatachus chay montera maqanakuqpa umanta jarkʼan, ‘salvasqa kayta suyakuyqa’, —nisunman imatachus Dios musuq pachapi juntʼananpi atienekuyqa— kikillantataq Satanaspa llulla cuentosninmanta yuyayninchikta jarkʼan (1 Tes. 5:8). Chay suyakuyninchikta mana qunqanapaqtaq, Bibliata ukhunchanallapuni.

Jobta, Satanaswan mana atipachikunanpaq, ¿imataq yanaparqa? Wañusqas kawsarimunankupi sinchita iñisqan. Chayrayku, Jehovamanta mana karunchakunanrayku, wañuytapis mana manchachikurqachu. Astawanpis kayjinata nirqa: “Qan wajyariwankiman, noqataj uyarisuykiman. Munakuywan qhawawankiman, imaraykuchus ruwawajniy kanki”, nispa (Job 14:15). Wañupuptinpis, Jehová kawsarichimunanmanta mana iskaychakurqachu, imaraykuchus, Dios kamachisninta mayta munakusqanta yacharqa.

Chiqa Diospiqa, tukuyninchik ajinata atienekunanchik tiyan. Jehovaqa, Satanás, kamachisnin ima, ñakʼarichiwasqanchikta chinkachiyta atin. Pablop nisqanta ama qunqanachu: “Diosqa cheqamin, manataj saqesonqachejchu mana sayay atinata tanqasqa kanaykichejta. Astawanqa juchaman urmanapaj tanqasqa kashajtiykichej, Diosllataj yanapasonqachej imaynatachus chay juchaman urmanamanta lluspʼinaykichejpaj” (1 Cor. 10:13).

[20 paginapi dibujo/foto]

Jehovaqa paypaq chiqa sunquwan llamkʼasqanchikta may allinpaq qhawan

[21 paginapi dibujo/foto]

Salvacionmanta monterata churakunanchikpuni tiyan