LECCIÓN 07

¿Imaynataj Jehová Dios?

Imprimisqapi

¿Jehová Dios imayna kasqantataj yuyanki? Wakin runasqa ninku: “Diosqa may jatun tʼukunapaj jinataj. Paymanqa mana qayllaykuyta atisunmanchu”, nispa. Wakin runastaj ninku: “Diosqa may atiyniyoj, ¡imatá noqanchejmanta llakikonqari!”, nispa. ¿Jehová Diosninchej ajinachu kanman? Payllataj Bibliapi willawanchej imaynachus kasqanta, noqanchejmanta llakikusqantachus manachus chaytapis.

1. ¿Imaraykutaj Diosta mana rikunchejchu?

“Diosqa uj espíritu”, cielopitaj tiyakun (Juan 4:24). Jehová Diosqa mana noqanchej jinachu aycha cuerpoyoj. Chayrayku mana payta rikuyta atinchejchu.

2. ¿Imaynataj Jehová Dios?

Biblia nin: “Jehová Diosqa justiciata munakun, nitaj jaykʼajpis payta kasukojkunataqa saqerparenqachu”, nispa (Salmo 37:28). Chantapis payqa “manchay munakuyniyoj, khuyakuyniyojtaj”. Sufrishanku chay runasmantataj astawanraj llakikun (Santiago 5:11). “Jehová Diosqa sonqo pʼakisqa runaspa qayllallanpi kashan. Paymin llakisqa kajkunataqa salvan” (Salmo 34:18). Rikunchej jina, Jehová Diosninchejqa manchay kʼacha. Chayrayku payta mana rikuspapis munakuyta atisunman. Imatachus ruwasqanchejqa payta kusichinman chayri llakichinman. Mana allin imasta ruwaspaqa, sonqonta nanachisunman (Salmo 78:40, 41). Allin imasta ruwaspatajrí kusichisunman (Proverbios 27:11 leey).

3. ¿Jehová Dios munakuwanchejchu?

Jehová Diosqa mayta munakuwanchej. Bibliaqa paymanta nin: “Diosqa munakuymin”, nispa (1 Juan 4:8). Jehová Diosqa munakuwasqanchejrayku Bibliata qowanchej, tukuy ima kaj chhikatataj ruwarqa (Hechos 14:17 leey). Imayna ruwasqachus kasqanchejpi piensarina. Noqanchejqa imaymana kʼachitu coloresta rikuyta atinchej. Takiykunata uyarispa kusirikuyta atinchej. Mikhunawanpis miskʼirichikuyta atinchej. Chaytaj rikuchiwanchej Jehová Dios kusisqa kausakunanchejta munasqanta.

ASTAWAN YACHAKUNA

Kaypi yachakusun imaynatachus Jehová Dios tukuy imata ruwasqanta. Yachakullasuntaj imayna kʼachachus pay kasqanta.

4. Espíritu santoqa Diospa atiynin

Dibujos: Diosqa kay imasta espíritu santonwan ruwarqa: 1) cielota, planetasta, estrellasta ima. 2) Bibliata qhelqaj runa Dios yuyaychasqanman jina qhelqashan.

Noqanchejqa makisninchejwan imatapis ruwanchej. Jehová Diostajrí, espíritu santonwan tukuy imata ruwan. Biblia nisqanman jina espíritu santoqa mana Dioschu, manachayqa paypa atiynin. Diosqa chay atiywan tukuy imata ruwan. Lucas 11:13; Hechos 2:17 leeriychej, chantá yachakojta tapuriy:

Leerinchej jina, Diosqa mañakojtinchej espíritu santonta ‘tʼakaykamunawanchejta’ niwanchej. Jina kajtin, ¿espíritu santo uj runachu chayri Diospa atiyninchu? ¿Imaraykú chayta ninki?

Jehová Diosqa espíritu santonwan tʼukuna imasta ruwan. Salmo 104:30; 2 Pedro 1:20, 21 leeriychej, chantá yachakojta tapuriy:

¿Imastataj Jehová Dios espíritu santonwan ruwasqa?

5. Jehová Diosqa may kʼacha

Moisesqa Jehová Diosta tukuy sonqo yupaycharqa. Jinapis payta astawan rejsiyta munaspa, Diosman nerqa: “Rejsichiway ari ñanniykita, qanta rejsisunaypaj”, nispa (Éxodo 33:13). Jehová Diostaj imaynachus kasqanta Moisesman willarqa. Éxodo 34:4-6 leeriychej, chantá yachakojta tapuriy:

¿Imastataj Jehová Dios pay kikinmanta nisqa?
¿Imataj Jehová Diosmanta astawan gustasunki?

6. Jehovaqa noqanchejmanta llakikun

Ñaupa tiempopi Diospa llajtanqa israelitas karqanku. Paykunaqa Egipto llajtapi esclavos karqanku, maytataj sufrisharqanku. Chayta rikuspa Jehová Diospa sonqonqa mayta nanarqa. GRABASQATA uyariychej, Bibliaykichejwantaj qhatiychej, manachayrí Éxodo 3:1-10 leeriychej. Chantá yachakojta tapuriy.

GRABASQA: Jehová Diosqa llajtanmanta sonqonta nanachikorqa (2:45)

¿Runasta sufrejta rikuspa Jehová Dios sonqonta nanachikunchu? (7, 8 versiculosta qhawariy).
¿Jehová Dios yanapayta munawanchejchu? ¿Imaraykú chayta ninki?

7. Jehová Diostaqa ruwasqasninnejta rejsisunman

Dibujos: Jatun pescado uñitantin, tʼikas, uj qori qʼenti ima.

Jehová Diospa ruwasqasninta rikuspa, imaynachus pay kasqanta yachasunman. Chaypaj VIDEOTA qhawariychej, chantá Romanos 1:20 leeriychej. Chaymantataj yachakojta tapuriy.

VIDEO: Diospa munakuynenqa ruwasqasninpi rikukun: Cuerponchejpi (1:57)

Imayna ruwasqachus kasqanchej, ¿imatá Jehová Diosmanta yachachiwanchej?

WAKIN RUNAS NINKU: “Diosqa mana llakikuwanchejchu”, nispa.

Qanrí, ¿imatá niwaj?
¿Imaraykutaj chayta ninki?

¿IMASTÁ YACHAKUNCHEJ?

Kaypi yachakunchej Jehová Diosqa mana rikukoj cuerpoyoj kasqanta. Chayrayku mana rikuyta atinchejchu. Jinapis payqa may kʼacha, astawanqa munakuyniyoj.