LECCIÓN 08
Dioswanqa sumaj amigos kayta atinchej
Jehová Diosqa sumaj amigosnin kananchejta munan. Chayrayku imaynachus kasqanta, imastachus ruwayta munasqanta ima willawanchej. Ñankunasnintapis rejsichiwanchej. Jinapis, ¿Diospa amigosnin kayta atisunmanchu? (Salmo 25:14 leey). ¿Imatá ruwasunman paypa amigosnin kanapaj? Biblia chay tapuykunaman kutichiwanchej. Chantapis willawanchej Jehová Diospa amigosnin kayqa may sumaj kasqanta.
1. ¿Imatá ruwasunman Jehová Diospa amigosnin kanapaj?
Biblia nin: “Diosman qayllaykuychej, paytaj qankunaman qayllaykamusonqachej”, nispa (Santiago 4:8). Jinapis wakin runas ninku: “Pero Diostaqa mana rikunchejchu, ¿imaynatá amigosnin kasunmanri?”, nispa. Jehová Diosqa payta rejsinanchejpaj imaynachus kasqanta Bibliapi willawanchej. Chayrayku Bibliata leespaqa, Jehová Diosta mana rikuspapis, paywan sumaj amigos kayta atisunman.
2. ¿Imaraykutaj Jehová Dios may sumaj amigopuni?
Imaraykuchus payqa, ni pi jina munakuwanchej. Chantapis kusisqa kausakunanchejta munan, yanapaytataj munawanchej. Mana chayllachu, ‘Diosqa noqanchejmanta llakikun, chayrayku tukuy llakiyninchejta paypa makinman saqepuna’ (1 Pedro 5:7). Jehová Diosqa wakichisqa kashan yanaparinawanchejpaj, sonqochanawanchejpaj, uyarinawanchejpajpis (Salmo 94:18, 19 leey).
3. ¿Pikunatataj Jehová Dios amigosninpaj qhawan?
Jehová Diosqa tukuy runasta munakuspapis, ‘cheqan runasta amigosninpaj qhawan’ (Proverbios 3:32). Payqa munan amigosnin allin kajta munakunankuta, sajra kajtataj chejnikunankuta. Ichá wakin ninku: “Manasina Diospa munayninman jina kausayta atiymanchu”, nispa. Jinapis Jehová Diosqa atisqallanchejta mañawanchej. Chayrayku payta tukuy sonqo munakojtinchej, kasukunapaj kallpachakojtinchej ima, payqa amigosninpaj qhawawasun (Salmo 147:11; Hechos 10:34, 35).
ASTAWAN YACHAKUNA
Kaypi yachakusun imatachus ruwanata Diospa amigosnin kanapaj. Chantá yachakullasuntaj imaraykuchus Jehová Dios may sumaj amigo kasqanta.
4. Abrahanqa Jehová Diospa amigon karqa
Bibliaqa Abrahán sutiyoj runamanta parlan (payqa Abrán sutikullantaj). Paymanta yachakusunman imatachus ruwanata Diospa amigosnin kanapaj, ima bendicionestachus Diospa amigosnin japʼisqankuta ima. Génesis 12:1-4 leeriychej, chantá yachakojta tapuriy:
¿Imata ruwanantataj Jehová Dios Abrahanman nerqa?
¿Ima bendicionestataj Jehová Dios qonanta nerqa?
Abrahanrí, ¿Jehová Diosta kasukorqachu?
5. Jehová Diosqa uj imata amigosninmanta suyan
Sapa uj suyanchej amigosninchej kʼachas kanankuta.
¿Imatataj qan amigosniykimanta suyanki?
1 Juan 5:3 leeriychej, chantá yachakojta tapuriy:
¿Imatataj Diospa amigosnin ruwananku kasqa?
Jehová Diosta kasukunapajqa, ichapis kausayninchejta chayri imaynachus kasqanchejta cambiananchej kanqa. Isaías 48:17, 18 leeriychej, chantá yachakojta tapuriy:
¿Imaraykutaj Jehová Dios munan amigosnin kamachiykunasninta kasukunankuta?
Sumaj amigonchejqa imatapis allinninchejpaj niwanchej. Jehová Diospis kikillantataj amigosninwan ruwan.
6. Jehová Diosqa amigosninta yanapan
Jehová Diosqa amigosnin llakiypi kajtinku paykunata yanapan. VIDEOTA qhawariychej, chantá yachakojta tapuriy.
Kay videopi rikusqanchejman jina, ¿imaynatá Jehová Dios yanapasqa?
Isaías 41:10, 13 leeriychej, chantá yachakojta tapuriy:
¿Imatataj Jehová Dios tukuy amigosninman nin?
¿Jehová Dios uj sumaj amigopunichu? ¿Imaraykú chayta ninki?
Sumaj amigonchejqa yanapariwanchejpuni. Jehová Diospis kikillantataj amigosninta yanaparin.
7. Jehová Dios sumaj amigonchej kananpajqa, paywan parlarinanchej tiyan
Sumaj amigonchejwanqa tukuy tiempo parlarikunchej. Salmo 86:6, 11 leeriychej, chantá yachakojta tapuriy:
¿Imaynatá Jehová Dioswan parlarisunman?
Jehová Diosrí, ¿imaynatá noqanchejwan parlarin?
Noqanchejqa Jehová Dioswan mañakuynejta parlarinchej. Paytajrí Biblianejta parlariwanchej.
WAKIN RUNAS NINKU: “Nipuni creenichu Diospa amigosnin kayta atisqanchejtaqa”, nispa.
¿Chayta nejkunaman Bibliamanta mayqen versiculotataj rikurichiwaj?
¿IMASTÁ YACHAKUNCHEJ?
Kaypi yachakunchej Jehová Diosqa amigosnin kananchejta munasqanta, chaypajtaj yanapayta munawasqanchejta.
Yuyarikunapaj
¿Imaynatá Jehová Dios amigosninta yanapan?
¿Imaraykutaj Jehová Dios amigosnin kamachiykunasninta kasukunankuta munan?
¿Jehová Diospa kamachiykunasnin mana juntʼayta atinapaj jinachu? ¿Imaraykutaj chayta ninki?
ASTAWAN YACHAKUNAYKIPAJ
¿Imaynatá yanapasunkiman Diospa amigon kay? Chayta yachanaykipaj kayta leeriy.
“Jehová Diosta rejseyqa mayta yanapawasunman” (La Atalaya, 15 de febrero de 2003)
Diospa amigon kanaykipaj, ¿imatataj ruwawaj? Chayta yachanaykipaj kayta leeriy.
Uj warmeqa Jehová Diosmanta yachakusqan kausayninpi mayta yanapasqanta nin. Paymanta astawan yachanaykipaj kayta leeriy.
“¡Mana wañuyta munarqanichu!” (Torremanta Qhawaj, 1 kaj 2017)
Wakin jóvenes imatachus Jehová Diosmanta nisqankuta yachanaykipaj kay grabacionta uyariy.