LECCIÓN 48
Sumaj amigosta ajllana
Sumaj amigosqa kusisqa kajtinchej noqanchejwan khuska kusikunku, llakiypi kajtinchejtaj yanapawanchej. Jinapis Bibliaqa niwanchej mana tukuychu sumaj amigos kasqankuta. Chayrayku kaypi yachakusun imaynatachus sumaj amigosta ajllanata.
1. ¿Imaraykutaj amigosninchejta sumajta ajllana tiyan?
Pikunawanchus astawan masichakunchej, chay runas jina ruwayta qallarisunman. Chayrayku sumajta qhawarikunanchej tiyan pikunawanchus masichakusqanchejta, pikunawanchus Internetpipis parlasqanchejta. Biblia nin: “Allin yachayniyoj runaswan purejqa allin yachayniyojllataj kanqa. Mana yuyayniyojkunawan [Jehovata mana munakojkunawan] purejtaj mana allinman chayanqa”, nispa (Proverbios 13:20). Jehovata munakoj, payta yupaychaj amigosqa yanapawanchej Jehovaj qayllallanpipuni kanapaj, imatapis sumajta ajllanapaj. Jinapis amigosninchej mana congregacionmantachu kanku chayqa, Jehovamanta karunchawasunman. Chayrayku Bibliaqa yuyaychawanchej amigosninchejta sumajta ajllana kasqanta. Jehovata munakojkunawan masichakusun chayqa, Jehovata munakunapaj yanapawasun, noqanchejpis paykunata yanapasun. Ajinamanta purajmanta ‘sonqochanakusun, kallpachanakusuntaj’ (1 Tesalonicenses 5:11).
2. Jehovata kusichinapaj, ¿imayna amigostataj ajllana tiyan?
Jehovaqa amigosninta sumajta ajllan. Chayrayku Biblia nin: “Cheqan runastataj amigosninpaj qhawan”, nispa (Proverbios 3:32). Jehovata mana munakojkunawan masichakuspaqa, payta mayta llakichinchej (Santiago 4:4 leey). Jinapis allin amigoswan masichakojtinchej, Jehovaman astawan qayllaykojtinchej, payta munakojkunawan amigos kajtinchejqa, Jehová mayta kusikonqa, sumaj amigosninpajtaj qhawawasun (Salmo 15:1-4).
ASTAWAN YACHAKUNA
Kaypi yachakusun imaraykuchus amigosninchejta sumajtapuni ajllanata. Yachakullasuntaj imaynatachus may sumaj amigosta tarinatapis.
3. Mana allin amigosmanta qhawakuna
Mana allin amigosqa Diosta mana munakojkuna, nitaj kamachisqasnintapis kasukojkuna kanku. VIDEOTA qhawariychej, chantá yachakojta tapuriy.
¿Imaynapitaj mana reparakuspalla mana allin runaswan masichakushasunman?
1 Corintios 15:33 leeriychej, chantá yachakojta tapuriy:
¿Pikunawan masichakunanchejtaj mana allinchu kanman? ¿Imaraykutaj chayta ninki?
Salmo 119:63 leeriychej, chantá yachakojta tapuriy:
¿Pikunawan masichakunanchejtaj allin kanman?
Uj qʼetayasqa manzanaqa sano manzanastapis qʼetayachinman, ajinallatataj mana allin amigospis mana allinman chayachiwasunman.
4. Tukuy laya runaswan amigos kayta atinchej
Bibliaqa parlan Davidwan Jonatanwan sumaj amigos kasqankumanta. Paykunaqa mana kikin edadniyojchu, nitaj kikin kausayniyojchu kaspapis sumaj amigos karqanku. 1 Samuel 18:1 leeriychej, chantá yachakojta tapuriy:
¿Imayna runastaj amigosninchej kananku tiyan, edadninchejmantapunichu, wajchapunichu, qhapajpunichu? ¿Imaraykú chayta ninki?
Romanos 1:11, 12 leeriychej, chantá yachakojta tapuriy:
Jehovata munakojkunawan amigos kaspa, ¿imasmanta parlaspataj kallpachanakunchej?
Uj jovenqa uj sumaj amigota tarerqa. Chaymanta astawan yachanapaj VIDEOTA qhawariychej, chantá yachakojta tapuriy.
Akilpa tatasnin, ¿imaraykutaj mana munarqankuchu wawanku escuelamanta compañerosninwan masichakunanta?
¿Imaraykutaj Akilman compañerosninwan masichakuy gustarqa?
¿Imatá ruwarqa sumaj amigota tarinanpaj?
5. Sumaj amigosniyoj kana
Kaypi yachakuna imaynatachus sumaj amigota tarinata, imaynatachus noqanchejpis sumaj amigo kanata. VIDEOTA qhawariychej.
Proverbios 18:24; 27:17 leeriychej, chantá yachakojta tapuriy:
¿Imaynasmantá sumaj amigos yanapanakunku?
Kay versiculospi parlan sumaj amigosmanta, ¿qanpaj amigosniyki ajinachu kanku? Mana ajina sumaj amigosniyki kanchu chay, ¿imatá ruwawaj sumaj amigosniyoj kanaykipaj?
Filipenses 2:4 leeriychej, chantá yachakojta tapuriy:
Sumaj amigosniyoj kanapajqa, noqanchejraj sumaj amigo kana tiyan. ¿Imatá qan ruwawaj sumaj amigo kanaykipaj?
Sumaj amigosniyoj kanapajqa, noqanchejraj sumaj amigo kana.
WAKIN RUNAS NINKU: “Imayna kausayniyoj runawanpis amigos kayta atillanchej”, nispa.
¿Imatá qan chaymanta niwaj?
¿IMASTÁ YACHAKUNCHEJ?
Kaypi yachakunchej sumaj amigosta ajllaspaqa Jehovata kusichisqanchejta, noqanchejpajpis sumaj amigosniyoj kayqa may allin kasqanta.
Yuyarikunapaj
¿Imaraykutaj Jehová munan amigosninchejta sumajta ajllanata?
¿Pikunawantaj mana masichakunachu tiyan?
¿Imastá ruwasunman sumaj amigosniyoj kanapaj?
ASTAWAN YACHAKUNAYKIPAJ
¿Imaynatá amigosninchej llakiy tiempospi yanapawasunman? Chayta yachanaykipaj kayta leeriy.
¿Imatá ruwasunman sumaj amigosniyoj kanapaj? Chayta yachanaykipaj kayta leeriy.
¿Imaraykutaj sumajta qhawarikuna tiyan Internetpi amigosta ruwakushaspa? Chayta yachanaykipaj kay videota qhawariy.
Imaraykuchus uj runa amigosninta saqepusqanta yachanaykipaj “Tatayoj kayta munarqani” nisqata leeriy.
“Bibliamanta yachakusqankoqa kausayninkuta tijracherqa” (Torremanta Qhawaj, 1 de julio de 2012)