Diosman agradecekuna mana rikukoj valorniyoj imasmanta

 1. ¿Imamantataj Jesús orqopi yachachishaspa parlarqa?

ASWAN valorniyoj imastaqa, mana ñawisninchejwan rikuyta atinchejchu. Jesusqa uj orqopi yachachishaspa, cielopi valorniyoj imasmanta parlarqa. Chaykunataj kapuyniyoj kaymanta nisqa, aswan valorniyoj. Chantá pay nerqa: “Maypichá valorniyoj imasniyki kashan, chayllapitaj sonqoykipis kanqa”, nispa (Mat. 6:19-21). Sonqonchejqa imastachus may valorniyojpaj qhawanchej, chayman aysawanchej. ¿Imatá ruwasunman ‘valorniyoj imasta cielopi tantanapaj’? Jehová Diospa ñaupaqenpi sumaj runapaj rejsisqa kanapaj chayri allinpaj qhawasqa kanapaj kallpachakuna. Cielopi valorniyoj imas kapuwasun chayqa, Jesús nerqa jina, mana pipis chaykunata qhechuwasunchu, nitaj chinkanqachu.

 2. 1) Kay 2 Corintios 4:17, 18 nisqanman jina, ¿imata ruwanapajtaj kallpachakunanchej tiyan? 2) ¿Imastataj kay yachaqanapi yachakusun?

² Apóstol Pablo nerqa: “Yuyayninchejqa mana rikukoj imaspi kashan”, nispa. Chayta ruwanapajtaj kallpachakunanchej tiyan (2 Corintios 4:17, 18 leey). Jehová Diosqa paraisopi ashkha bendicionesta qonawanchejta niwanchej. Chay bendicionesta manaraj rikojtinchejpis, manchay valorniyoj kanku. Jinapis Jehová Diosqa, kunanña mana rikukoj valorniyoj imasta qoshawanchej. Kay yachaqanapitaj tawamanta parlarisunchej. Chaykuna kanku: 1) Jehová Dioswan amigos kayta atisqanchej. 2) Paymanta mañakuyta atisqanchej. 3) Dios atiyninwan yanapawasqanchej. 4) Jehovawan Jesuswan angeleswan ima willaypi llankʼayta atisqanchej. Chantapis yachakullasuntaj, imaynatachus chay valorniyoj imasmanta agradecekunata.

 3. 1) ¿Imataj aswan valorniyoj? 2) ¿Imaraykutaj Jehová Diospa amigosnin kayta atinchej?

³ Mana rikukoj valorniyoj imasmanta ujqa, Jehová Dioswan amigos kayta atisqanchej. Chaytaj tukuy imamanta aswan valorniyoj (Pro. 3:32). Jehová Diosninchejqa manchay llimphu kaspapis, juchasapa runasta amigosnin kanankuta saqen. ¿Imaraykutaj chayta ruwan? Imaraykuchus Jesusqa “kay mundomanta juchata” chinkacherqa (Juan 1:29). Jehová Diosqa Jesús niraj wañushajtinña yacharqa, Jesús wañupunankama payta kasukunanta, runastataj salvananta. Chayrayku Jesús niraj kausayninta qoshajtinpis, wakin runasta amigosninpaj qhawarqaña (Rom. 3:25).

 4. ¿Pikunataj Diospa amigosnin karqanku Jesús niraj wañupushajtin?

⁴ Jehová Diospa wakin amigosninmanta parlarina. Paykunaqa niraj Jesús wañupushajtin kausarqanku. Ujqa Abrahán karqa. Payqa ni mayqen runa jina Jehová Diospi creerqa. Jehová Diostaj Abrahán wañupusqanmanta waranqa watasninman jina, payta “kawsaqey” nerqa (Isa. 41:8). Jehovaqa amigosnin wañupojtinkupis, paykunata amigosnillanpajpuni qhawan. Abrahanqa Jehová Diospaj kausashallanpuni (Luc. 20:37, 38). Jobpis Diospa amigollantaj karqa. Uj pacha, ángeles cielopi tantasqa kasharqanku. Chaypachataj Jehová Diosqa, Jobmanta tukuy sonqo nerqa: “Payqa mana juchayoj, cheqan runa, Diosta manchachikun, sajra ruwaykunatataj chejnikun”, nispa (Job 1:6-8). Profeta Danielpis 80 watasta jina Jehová Diosta mana wasanchaspa sirverqa. Payqa waj dioskunata yupaychaj llajtapi tiyakorqa. Viejituña kashajtintaj, angelesqa kinsa kutita Danielman nerqanku “Diospa may munasqa kamachin” kasqanta (Dan. 9:23; 10:11, 19). Jehová Diosqa wañupoj amigosninta maytapuni kausarichiyta munashan (Job 14:15).

 5. ¿Imatá ruwana tiyan Diospa amigosnin kanapaj?

⁵ Kunanpis may chhika qharis, warmis, wawas ima, Jehová Diospa sumaj amigosnin kanku. Paykunaqa juchasapas kaspapis, Jehová Diospa amigosnin kayta munasqankuta, ruwasqankuwan rikuchishanku. Bibliaqa nin: ‘Jehová Diosqa cheqanta ruwajkunawan allinta kausakun’, nispa (Pro. 3:32). Jehovawan allinta kausakunapajqa, Jesuspa wañuyninpi creena tiyan. Jesús juchamanta kacharichiwasqanchejrayku, Jehová Diosman kausayninchejta jaywapuyta, bautizakuytataj atinchej. Chayta ruwaspaqa, jallpʼantinpi may chhika cristianosman ujchaykukunchej. Paykunapis Jehová Diosman kausayninkuta qoporqanku, bautizakorqankutaj. Chayraykutaj tukuy atiyniyoj Diospa sumaj amigosnin kanku.

 6. ¿Imaynatá Jehová Diosman agradecekusunman amigosnin kayta atisqanchejmanta?

⁶ ¿Imaynatá Jehová Diosman agradecekusunman amigosnin kayta atisqanchejmanta? Abrahán jina, Job jinataj ruwana. Paykunaqa 100 watas kurajta Jehová Diosta tukuy sonqo sirverqanku. Noqanchejpis unayña cristianos kaspapis, Jehová Diosta paykuna jinallataj tukuy sonqo sirvina. Chantapis Daniel jina ruwana. Payqa Jehová Diosmanta mana karunchakunanrayku, wañuytapis mana manchachikorqachu (Dan. 6:7, 10, 16, 22). Jehová Diospa yanapayninwanqa, ima llakiytapis aguantayta atisun, amigosnillanpunitaj kasun (Fili. 4:13).

 7. 1) Proverbios 15:8 nisqaman jina, ¿Jehová Dios mañakusqanchejta uyariyta munanchu? 2) ¿Imaynatá Jehová Dios mañakuyninchejman kutichiwanchej?

⁷ Mana rikukoj valorniyoj imasmanta wajqa, Jehová Diosmanta mañakuyta atisqanchej. Sumaj amigosqa, imastachus yuyasqankuta, sonqonkupi imaschus kasqantapis willanarikunku. Jehová Diospis chayllatataj amigosninwan ruwan. Payqa Palabrannejta parlawanchej. Chaypi willawanchej imatachus yuyasqanta, imachus sonqonpi kasqantapis. Noqanchejrí Jehová Dioswan mañakuynejta parlanchej. Paywan parlarishaspaqa, sonqomantapacha tukuy imata willakuyta atinchej. Paytaj tukuy sonqo uyariwanchej (Proverbios 15:8 leey). Diosqa munakuwasqanchejrayku, mana uyarillawanchejchu, manaqa imatachus mañakusqanchejtapis qowanchej. Wakin kutisqa, mañakuyninchejman chay rato kutichiwanchej. Wakin kutistaj, mañakunallanchejpuni tiyan. Jinapis Jehová Diosninchejqa, mañakuyninchejman maychus tiemponpipuni kutichiwanchej. Chantapis imatachus necesitashanchej, chaytapuni qowanchej. Jinapis wakin kutisqa, mana munasqanchejtapunichu qowanchej. Ichapis Jehová Diosmanta llakiyninchejta chinkachinanta mañakunchej. Paytajrí chay llakiyta chinkachinanmantaqa, aguantanapaj yachayta, kallpatawan qowanchej (1 Cor. 10:13).

 8. ¿Imaynatá Jehová Diosman agradecekusunman mañakuyta atisqanchejmanta?

⁸ ¿Imaynatá Jehová Diosman agradecekusunman mañakuyta atisqanchejmanta? Ujqa kanman, ‘mana saykʼuspa Diosmanta mañakuspa’. Jehová Diosllataj chayta ruwananchejta niwanchej (1 Tes. 5:17). Payqa mana orakunanchejpaj obligawanchejchu. Astawanpis imatachus ruwanata ajllajta saqewanchej. Chayrayku Jehová Diosman agradecekunapaj, sapa día ashkha kutista paywan parlarina. Orakushaspataj Jehovaman graciasta qona, jatunchanataj (Sal. 145:2, 3).

 9. 1) ¿Imatataj hermano Chris nin, Diosmanta mañakuyta atisqanmanta? 2) ¿Imatá qan niwaj Diosmanta mañakuyta atisqaykimanta?

⁹ Jehová Diosta astawan unayta sirvisqanchejman jina, astawan yachanchej mañakuyninchejta uyariwasqanchejta. Chayrayku payman astawan agradecekunanchej tiyan. Chris sutiyoj hermanomanta parlarina. Payqa 47 watastaña Jehová Diospaj astawan llankʼashan. Pay nin: “Noqaqa tutamanta jatariytawan Diosmanta mañakuni. Chay horasqa ni ima chʼajwa kanchu. Inti llojsimusqanta qhawarini. Inteqa chhullata kʼachituta kʼancharichin. Chay imasta qhawaspaqa, Jehová Diosman agradecekuni tukuy imata qowasqanmanta. Orakuyta atisqaymantapis agradecekunipuni. Niraj puñushaspapis orakullanitaj. Chantataj llimphu sonqowan miskʼita puñukuni”, nispa.

10. ¿Imaynatá Jehová atiyninwan yanapawanchej?

¹⁰ Mana rikukoj valorniyoj imasmanta ujnenqa, Jehová Diospa atiynin chayri kallpan. Jesusqa Diospa atiyninta “mañakullaychejpuni” nerqa (Luc. 11:9, 13). Jehová Diosqa ‘may sumaj atiyninwan’ kallpachawanchej (2 Cor. 4:7; Hech. 1:8). Chay atiytaj kay tiempopi ima llakiytapis aguantanapaj yanapawanchej.

11. ¿Imaynatá Diospa atiynin yanapawanchej?

¹¹ Cristianosqa Jehová Diosta yupaychaypi ashkha ruwanasniyoj kanchej. Diospa atiynintaj chay ruwanasta juntʼanapaj yanapawanchej. Jehová Diosqa imastachus ruwayta yachasqanchejta, astawan sumajta ruwanapaj atiyninwan yanapasunman. Chantapis payta sirviypi allin riwanchej, atiyninwan yanapawasqanchejrayku, manataj noqanchej imata ruwasqanchejraykuchu.

12. Salmo 139:23, 24 nisqanman jina, ¿imapajtaj Diospa atiyninta mañakusunman?

¹² ¿Imaynatá Diospa atiyninta jatunpaj qhawasunman? Jehová Diosmanta mañakuna sonqonchejta qhawaykurinanta. Ajinamanta sonqonchejpi sajra yuyaykuna chayri sajra munaykuna, kanchus manachus chayta reparakusun (Salmo 139:23, 24 leey). Jehová Diosqa atiyninwan rikuchiwasunman, imastachus sonqonchejmanta orqhonanchej kasqanta. Sonqonchejpi ima sajra yuyayllapis chayri ima sajra munayllapis kan chayqa, Diospa atiyninta mañakuna. Paytaj chayta sonqonchejmanta tʼiranapaj kallpata qowasun. Diosmanta atiyninta mañakuspaqa, sajra kajta manapuni ruwayta munasqanchejta rikuchisun. Paytaj atiyninwan yanapallawasunpuni (Efe. 4:30).

13. ¿Imatá ruwasunman Diospa atiyninmanta astawan agradecekunapaj?

¹³ Jehová Diospa atiyninmanta astawan agradecekunapajqa, imastachus atiyninwan ruwashasqanpi tʼukurina. Jesusqa niraj cieloman wicharishaspa, discipulosninman nerqa: “Diospa atiynin qankunaman jamojtin atiyta japʼinkichej, noqamantataj testigos jina willamunkichej [...] kay jallpʼaj tukuy kʼuchusnintinpi”, nispa (Hech. 1:8). Chaytaj tʼukunapaj jina juntʼakushan. Diospa atiyninpa yanapayninwanqa, may chhika runas Jehová Diospa kamachisninman tukunku. Mundontinpeqa 8 millones khuskanniyojmanta astawanña kanchej. Tukuyninchejtaj Diospa llajtanpi ujchasqas, kusisqastaj kausakunchej. Ajinata kausakunchej, Diospa atiynin yanapawasqanchejrayku. Chay ateyqa yanapawanchej: munakuyniyoj kanapaj, kusikuyniyoj kanapaj, sonqo tiyasqa kanapaj, pacienciayoj kanapaj, kʼacha sonqoyoj kanapaj, kʼacha kanapaj, creeyniyoj kanapaj, llampʼu sonqoyoj kanapaj, munayninchejwan mana atipachikunapaj ima (Gál. 5:22, 23). Diospa atiynenqa manchay valorniyojpuni.

14. ¿Pikunawan khuskataj predicacionpi llankʼanchej?

¹⁴ Mana rikukoj valorniyoj imasmanta wajqa, Jehová Dioswan Jesuswan angeleswan ima llankʼayta atisqanchej (2 Cor. 6:1). Paykunawan khuska llankʼanchej, Diosmanta runasman willamuspa, yachachimuspa ima. Apóstol Pabloqa paymanta, waj cristianosmanta ima nerqa: “Noqaykoqa Dioswan khuska llankʼayku”, nispa (1 Cor. 3:9). Predicaj rispaqa, Jesuswan khuska llankʼashallanchejtaj. Jesusqa yachachisqasninman nerqa: “Tukuy laya runasta yachachisqasniyman tukuchimuychej”, nispa. Chayta niytawan nillarqataj: “Noqaqa qankunawan tuta pʼunchay kasaj”, nispa (Mat. 28:19, 20). Chanta, ¿angeleswanpis llankʼallanchejtajchu? Arí. Imaraykuchus paykuna yanapashawanchej, “wiñay wiñaypaj sumaj willaykunata jallpʼapi tiyakojkunaman” willananchejpaj (Apo. 14:6).

15. ¿Imaynatá Jehová Dios willaypi yanapawanchej? Lidiamanta parlariy.

¹⁵ Jehová, Jesús, ángeles ima yanapawasqanchejrayku, ¿imastataj ruwashanchej? Diospa Gobiernonmanta willasqanchejqa, mujuta tʼakay jina. Chay mujitu sumaj jallpʼaman chayajtintaj, pʼutumuytawan wiñanpacha (Mat. 13:18, 23). ¿Pitaj chay mujituta sumaj jallpʼawan ninakoj runaspi wiñachin? Jesusllataj nerqa: “Mana pipis qhepayta jamuyta atinmanchu, manachus kachamuwaj Tatay pusamunman chayqa”, nispa (Juan 6:44). Imaynatachus Jehová Dios runasta payman pusamusqanta yachanapaj, Lidiamanta parlarina. Uj pacha, Pabloqa Filipos llajtamanta jawapi warmisman predicarqa. Chay warmismanta ujnintaj Lidia sutikorqa. Bibliaqa paymanta nin: “Jehová Diostaj paypa sonqonta kicharerqa Pabloj nisqanta japʼikunanpaj”, nispa (Hech. 16:13-15). Jehová Diosqa may chhika runasta, Lidiata jinallataj llajtanman pusamushan.

16. Predicacionpi chayri runasman yachachiypi allin riwajtinchej, ¿pitataj jatunchana tiyan?

¹⁶ Predicacionpi chayri runasman yachachiypi allin riwajtinchej, ¿pitataj jatunchana kanman? Pablo chay tapuyman kutichiwanchej. Payqa Corinto llajtapi hermanosman nerqa: “Noqa plantarqani, Apolostaj qarparqa, Diostajrí wiñachillarqapuni. Chayrayku plantajpis qarpajpis, mana imachu kanku. Astawanpis wiñachej Dioslla tukuy imaqa”, nispa (1 Cor. 3:6, 7). Chayrayku predicacionpi chayri runasman yachachiypi allin riwajtinchejqa, Pablo jina Jehová Diosta jatunchananchej tiyan.

17. ¿Imaynatá Jehová Diosman agradecekusunman, paywan Jesuswan angeleswan ima llankʼayta atisqanchejmanta?

¹⁷ ¿Imaynatá Jehová Diosman agradecekusunman, paywan Jesuswan angeleswan ima llankʼayta atisqanchejmanta? Runasman tukuy atisqanchejta predicana. Chaytataj ruwasunman “tukuypa rikunanta, wasimanta wasi”, waj jinasmantawan (Hech. 20:20). Ashkha hermanos mayllapipis kashaspa predicankupuni. Mana rejsisqanku runawan tinkuspaqa, payta kʼachamanta saludarinku, parlarichinankupajtaj kallpachakunku. Chay runa paykunawan parlariyta munan chaytaj, Diospa Gobiernonmanta allillanmanta willarinku.

18, 19. 1) ¿Imaynatá tarpusqanchej mujuta qarpanchej? 2) ¿Imaynatá Jehová Dios uj hermanota yanaparqa?

¹⁸ ‘Dioswan khuska llankʼashasqanchejrayku’, mujuta tarpuytawanqa qarpananchej tiyan. Uj runa Bibliamanta yachakuyta munan chayqa, payta yachachinapaj kutinanchej tiyan. Mana atispataj, waj hermanota chay runata yachachimunanta nisunman. Bibliamanta yachakoj ñauparejtenqa, mayta kusikunchej. Imaraykuchus rikunchej, Jehová Dios chay runaj yuyayninta, sonqontapis cambiasqanta.

¹⁹ Sudáfrica suyupi uj hermanomanta parlarina. Payqa yatiri karqa. Bibliata estudiayta qallarispa, mayta kusikusqa imastachus yachakusqanmanta. Ajinapi Diospa Palabranpi leesqa, Jehová Dios aysirista chejnikusqanta. Payqa chay yachachiyta mana japʼikuyta atillarqachu (Deu. 18:10-12). Chantapis payqa yatirimanta trabajakoj. Jinapis Jehová Dioswan yanapachikorqa yuyayninta cambiananpaj. Tiemponmantaj manaña yatirichu karqa. Kunanqa 60 watasniyojña, nintaj: “Anchatapuni agradecekuni Jehovaj testigosninta. Paykunaqa ashkhata yanapawarqanku, waj trabajota tarikunaypajpis yanapawarqanku. Astawanqa Jehová Diosniyman agradecekuni, llimphu kausayniyoj kanaypaj yanapawasqanmanta. Kunanqa bautizasqaña kani, waj runasmanpis Diosmanta yachachishani”, nispa.

20. ¿Imatataj ruwananchej tiyan?

²⁰ Kay yachaqanapeqa, tawa valorniyoj imasmanta parlarqanchej. Chaykunamanta aswan valorniyoj kajqa, Jehová Diospa sumaj amigosnin kayta atisqanchej. Paywan allinta kausakusqanchejrayku, paymanta mañakuyta atinchej, atiynintapis japʼiyta atinchej. Chantapis paywan Jesuswan angeleswan ima, willaypi llankʼayta atinchej. Chayrayku tukuy atisqanchejta ruwana, chay valorniyoj imasta astawan jatunpaj qhawanapaj. Jehová Dios sumaj amigonchej kasqanmantataj agradecekunallapuni.