¿Imaraykú runas saqrata ruwanku?

RUNAQA, kayta allinta yachanchik: juchasapas kasqanchikrayku, imapipis pantanchik, chantataq pesachikuchkanchik. Chaywanpis, pantaq runas kasqanchikrayku, ¿nisunmanchu saqra ruwaykuna miraykusqan allin kasqanta? Mana. Sapa pʼunchay, imaymana saqra ruwaykunata rikunchik, chayri chaykunamanta telepi, radiopi ima, uyarinchik.

Tukuypis, imachus allin, imataqchus mana allin kasqanta yachanchik. Sapa juktaq, imatachus ruwananchikta akllayta atinchik. Arí, Saqra llullakuyqa, mana juk pantaywan kikinchu. Nillataq runata wañuchiyqa, pillatapis tanqaspa nanarparichiywan kikinchu. Chaywanpis, manajinalla kaqkuna, chayjina saqra ruwaykunata ruwanku. ¿Imaraykú?

Bibliaqa, imaraykuchus runas, yachachkaspa saqrata ruwasqankuta sutʼinchan. Chaykunata qhawarina.

▪ “Cheqamanta sajra ruwaykunaqa yachayniyojta wampuykachachin.” (ECLESIASTÉS 7:7, Qheshwa Biblia)

Biblia nisqanmanjina, runasqa saqra ruwaykunata rikusqankurayku, saqra ruwayman tanqasqa kankuman. Wakinkunaqa, chʼampayninkuta allinchayta munaspa, chayri chiqan kaqta ruwayta munaspa, saqra kaqta ruwanku. Urban Terrorism nisqa libro, sutʼinchan: “Terroristas nisqasqa, kamachiqkunap yuyayninkuta tikranankupaq, ñakʼariq runasta yanapanankupaq, wakchayayta chinkachinankupaq ima, mana imata ruwayta atisqankurayku, saqra ruwaykunawan wakkunata ñakʼarichinku”, nispa.

▪ “Qolqe munakoyqa tukuy imaymana sajra kajpa saphin.” (1 TIMOTEO 6:10)

Wakinkuna nisqankumanjina, kʼacha runaspis, qullqiraykuqa ima saqratapis ruwallankuman. Kaytaq chiqapuni, imaraykuchus kʼacha runaqa, qullqirayku, saqra runaman tukunman. Arí, runasqa, qullqita munasqankurayku; llullakuspa, suwanku, chʼawkiyanku, wañuchinku ima.

▪ “Juchasapa runas mana usqhayta castigasqa kajtinkoqa, runaspa sonqosninku astawan sajra ruwayman qokunku.” (ECLESIASTÉS 8:11)

Runaqa ajinata nin: “Imatapis ruwallankiman mana taripachikuspaqa”, nispa. Chayrayku achkha runas, transitota mana kasunkuchu, examenespi copianku, llaqtap qullqinta suwanku, chayri wak saqra ruwaykunata ruwanku. Leyesta kasukuq runastaq, wakin runas mana kasukusqankuta rikuspa, nillataq kasukuyta munankuchu. Kay Arguments and Facts nisqa revista ninjina, “saqrata ruwaqkuna, mana jasutʼisqa kaptinku [...] wak runasqa, aswan saqra ruwaykunata ruwayta munanku”.

▪ “Sapa runa tanqachikun, maypachachus paypa sajra munaynin payta juchaman apan, sonqonta suwaspa chaypacha. Chantá chay runaqa sajra munayninta kasuspa, juchallikun.” (SANTIAGO 1:14, 15)

Saqra ruwaymanqa, sapa pʼunchay tanqasqa kanchik. Chayrayku, ichá ñuqanchikpis, chayta ruwayta munasunman. Ñawpa tiempopi cristianosman, jinata nikurqa: “Juchaman urmanapaj tanqasqa kankichej chaypis kallpaykichejman jinalla”, nispa (1 Corintios 10:13). Chaywanpis sapa juk, chay saqra munayta, yuyayninmanta urqhunantachus manachus, akllayta atin. Discípulo Santiago, cartanpi nirqajina, mana allinta qhawakuptinchik, chay munayqa sunqunchikpi saphichakunman, chaytaq saqra kaqta ruwachiwasunman.

▪ “Yachayniyojkunawan purejqa yachayniyojllataj kanqa. Wampu runaswan purejrí mana allinman chayanqa.” (PROVERBIOS 13:20)

Pikunawanchus masichakunchik chaykunaqa, allin runa kanapaq yanapawasunman, chayri pierdechiwasunman. Runasqa, wakkunawan tanqachikusqankurayku, chayri saqra runaswan purisqankurayku, sapa kuti mana yuyasqankuta ruwanku. Biblia ninjinataq, “wampu runaswan” puriyqa, mana allinman chayachiwanchik. Kaypiqa, “wampu” nispa, mana pisi yuyayniyuqkunamantachu parlachkan. Manaqa, Diospa Palabranta, mana kasukuqkunamanta. Chayrayku waynas, sipaskuna chayri machu runasña kaspapis, amigosninchikqa, Diospa kamachisqanta kasukuqkuna kananku tiyan. Mana jina kaptinqa, chiqamantapuni “mana allinman” chayasun.

Kaykamaqa, Biblia nisqanmanjina, imaraykuchus wakin runas —manajinalla kaqkunapis—, saqra ruwaykunata ruwasqankuta rikunchik. Chaywanpis, ichá tapukunki: “¿Maykʼaqtaq saqra ruwaykuna tukukunqarí?”, nispa. Bibliaqa, chayta sutʼinchallantaq. ¿Yachayta munawaqchu? ¿Chiqamantapunichu saqra kaq chinkanqa? Qhipan yachaqanata ñawiriy.