Diosman qayllaykuy

¿‘Diosta riqsiyta’ atisunmanchu?

JEHOVÁ DIOSQA, may valorniyuq qullqi pʼampasqatajina juk sumaq regalota quwanchik, chayta maskʼananchiktataq munan. Chayta tarispataq mana qhapaqyasunchu, chaywanpis sunqu tiyaykuyta, sunqu juntʼasqa kayta ima tarisunman, chaytataq ni wañunanchikkama llamkʼaspapis rantiyta atisunmanchu. ¿Imatataq Jehová quwanchik? Rey Salomón chayta Proverbios 2:1-6 sutʼinchan.

Payqa, chay may valorniyuq qullqi pʼampasqata, “Diosta rej[siywan]” kikincharqa. Nisunman Diosmanta chiqa kaqta, imastachus aswan qhipaman ruwanamanta ima riqsiyta, imaynatachus Biblia nisqanmanjina (versículo 5). Kunantaq kaykunata qhawarina.

Chiqa yachachiykuna. Bibliaqa kay tapuykunaman kutichin: ¿Imataq Diospa sutinrí? (Salmo 83:18, NM.) ¿Maymantaq wañupuspa ripunchikrí? (Salmo 146:3, 4.) ¿Imapaqtaq kaypi kachkanchikrí? (Génesis 1:26-28; Salmo 115:16.) Kay tapuykunap kutichiyninta yachay, ¿machkha qullqipaq kasqantataq niwaq?

Yanapanawanchikpaqjina yuyaychaykuna. Bibliaqa, imaynatachus kusisqa kawsakunata yachachin. Sutʼinchanapaq; Bibliaqa nin, casarasqas jukchasqasllapuni kanankupaq imatachus ruwanankuta (Efesios 5:28, 29, 33), tatas wawasninku atienekunapaqjina kanankupaq, imaynatachus uywanankuta (Deuteronomio 6:5-7; Efesios 6:4), chayri imaynatachus kusisqa kanata ima (Mateo 5:3; Lucas 11:28). Kay tapuykunap kutichiyninta yachay, ¿machkha valorniyuq kasqantataq niwaq?

Imayna Dioschus kasqanta nin. Biblialla Diosmanta chiqa kaqta niwanchik. ¿Imayna Diostaq pay? (Juan 1:18; 4:24.) ¿Ñuqanchikmanta dakunchu? (1 Pedro 5:6, 7.) ¿Ima kʼacha kaykunasniyuqtaq? (Éxodo 34:6, 7; 1 Juan 4:8.) ¿Manachu Diosmanta chiqa kaqta yachay, may valorniyuq kasqanta niwaq?

Chiqamanta nisunman “Diosta rejsi[yqa]” may valorniyuq kasqanta. ¿Imaynatataq Diosta riqsiyta atisunman? Salomón Proverbios 2:4 versiculopi, Diosta riqsiyta “qullqi pʼampasqata” maskʼaywan kikincharqa. Arí, chiqamantapuni qullqi pʼampasqata tariyqa mana atikullanchu. Tarinapaqqa mayta kallpachakuna tiyan. Jinallatataq Diosta riqsinapaqqa mayta kallpachakuna. Imaraykuchus qullqi pʼampasqajinallataq, Diosmanta yachayqa Bibliapi pʼampasqa kachkan.

Chantá, ¿imaynatá Diosta riqsisunman? Salomonllataq sutʼincharqa kayta nispa “nisqasniytachus japʼikunki chayqa” chayri “yuyayniyoj kayman sonqoykita” churanki, nispaqa kasukuq sunquyuq kananchikta nichkarqa (versículos 1, 2). Chantapis Salomonqa, Diosmanta mañakunata, maskʼanallatapuni ima nirqa, nisunman Diosta riqsiytapuni munasqanchikta rikuchinanchikta (versículos 3-5). Wak parlaypi nisunman “Diosta rejsina[paqqa]” tukuy sunqu Bibliata ukhunchana tiyan (Lucas 8:15).

Chayta ruwasun chayqa, Jehová, payta riqsinapaq yanapawasun. Imaraykuchus versículo 6 nin: “Diosmin qon yachaytaqa”, nispa, chayrayku Diospa yanapaynillanwan Bibliap chiqa yachachiykunasninta entiendeyta atisun (Juan 6:44; Hechos 16:14). Qam Bibliata leenki chayqa, chiqamantapuni “Diosta rejsin[ki]” chaytaq kawsayniykipi mayta yanapasunqa (Proverbios 2:10-21).a

[Sutʼinchaynin]