Diospa Reinonqa enemigosninta chinkachin

1, 2. 1) ¿Imastaj rikuchin Rey Jesucristo 1914 watamantapacha kamachishasqanta? 2) ¿Imatá kay yachaqanapi qhawarisun?

DIOSPA Reinon enemigosninpa chaupinpi, imastañachus ruwasqanta yachayqa, mayta creeyninchejta kallpachan (Sal. 110:2). Reyninchej Jesucristoqa, ashkha willajkunata wakicherqa. Yachachisqasnintaqa kausayninkupi, Diosta yupaychayninkupipis llimphuchasqa kanankupaj yanaparqa. Enemigosninchej churanakuwajtinchejpis, uj familia jinalla Jallpʼantinpi ujchasqa kananchejpaj yanapawanchej. Chaykunata, waj imastawan ruwasqanta ukhunchasqanchejqa, Rey Jesucristo enemigosninpa chaupinpi 1914 watamantapacha kamachishasqanta rikuchin.

² Diospa Reinonqa, aswan qhepaman sumaj imastawanraj ruwanqa. Tukuynin enemigosninta tukuchej jamonqa (Dan. 2:44; Mat. 6:10). Chaywanpis niraj chayta ruwashajtin, Biblia nisqanman jinaqa waj imasraj kanqa. Kunanqa chaykunamanta wakinta qhawarina.

 3. ¿Imatataj mayta suyakushanchej?

³ Tukuy imapis allillan kasqanta nikonqa. Pabloqa, Tesalonicensesman cartanpi imachus ñaupajta kananmanta parlarqa, chaytataj mayta suyakushanchej (1 Tesalonicenses 5:2, 3 leey). Chay cartapeqa Jehovaj “pʼunchayni[nmanta]” parlarqa. Chaytaj qallarenqa llulla religionta chinkachikusqanwan (Apo. 17:5). Jehovaj pʼunchaynin qallarinanpajña kashajtintaj, pachantinmanta kamachejkunaqa “tukuy imapis allillan; ni imamanta llakikuna kanchu” nispa nenqanku. Chaytaqa ichapis uj kutillata chayri kutin kutita nenqanku. ¿Religionta kamachejkunarí imatá ruwanqanku? Kay pachallamantataj kasqankurayku, ichapis politicosman ujchaykukonqanku “tukuy imapis allillan” nispa ninankupaj (Jer. 6:14; 23:16, 17; Apo. 17:1, 2). Chayta nisqankoqa, Jehovaj pʼunchaynin qallarinanpajña kashasqanta rikuchenqa. Diospa Reinonpa enemigosnenqa, “mana ayqeyta atenqankuchu”.

 4. ¿Imaraykutaj tukuy imapis allillan ni imamanta llakikuna kanchu nisqa profeciata entiendey yanapawanchej?

⁴ ¿Imaraykutaj chay profeciata entiendey yanapawanchej? Pablo nerqa: “Qankunarí, hermanos, mana laqhapichu kashankichej, jaqay pʼunchayqa suwa jina taripasunaykichejpaj”, nispa (1 Tes. 5:3, 4). Noqanchejqa, runasmanta nisqaqa kay tiempopi rikushasqanchej imas, imapichus tukunanta yachanchej. Chaywanpis, ¿imaynatapunitaj “tukuy imapis allillan; ni imamanta llakikuna kanchu” nisqa profecía juntʼakonqa? Chayta rikunapajqa, suyakunanchej tiyan. Chayrayku “ama puñuspa qhawana. Chʼaki sonqo runas jina yuyayninchejpi kana” (1 Tes. 5:6; Sof. 3:8).

 5. ¿Imataj manchay ñakʼariy tiempopi ñaupajta tukuchisqa kanqa?

⁵ Religionta chinkachikun. Pablo nerqa: “Maypachachus runas nishanqanku: Tukuy imapis allillan; ni imamanta llakikuna kanchu, nispa chaypacha, ujllata paykuna tukuchisqa kanqanku”, nispa. Arí, imaynatachus lliuj lliuj kasqantawan qhon qhonkuna uyarikun, ajinallatataj tukuy imapis allillan; ni imamanta llakikuna kanchu nispa nikusqantawan “ujllata” tukuchisqa kanqa. ¿Imataj tukuchisqa kanqa? Ñaupajtaqa “Jatun Babilonia”, mayqenchus Jallpʼantinpi tukuy llulla religioneswan ninakun. Bibliapeqa Jatun Babiloniata “phisu” warmi nispa sutichakullantaj (Apo. 17:5, 6, 15). Tukuy llulla religionesta, cristiano nichikojkunatapis chinkachikusqanqa, “manchay ñakʼariy” tiempo qallarisqanta rikuchenqa (Mat. 24:21; 2 Tes. 2:8). Ashkha runasqa, chayta rikuspa mayta tʼukonqanku. ¿Imaraykú? Imaraykuchus phisu warmeqa, reina jina kasqanta yuyan, nitaj waqaytapis rikunanta. Chaywanpis ujllata pantasqa kasqanta reparakonqa. Payqa “uj pʼunchayllapi” nisunman usqhayllata chinkachisqa kanqa (Apo. 18:7, 8).

 6. ¿Pitaj chayri imataj Jatun Babiloniata chinkachenqa?

⁶ ¿Pitaj chayri imataj Jatun Babiloniata chinkachenqa? “Chunka” wajrasniyoj “puka phiña” animal. Apocalipsis libropi nisqanman jina, chay phiña animalqa Naciones Unidas (ONU) nisqawan ninakun. Chunka wajrasnintaj kay tiempomanta tukuy gobiernos kanku, pikunachus chay phiña animalta yanapanku (Apo. 17:3, 5, 11, 12). Jatun Babiloniaqa qʼala chinkachisqa kanqa. Naciones Unidasmanta kaj suyusqa, tukuy imanta qhechonqanku, aychanta mikhukaponqanku, “ninawantaj ruphachenqanku” (Apocalipsis 17:16 leey).a

 7. 1) ¿Imaynatá ñaupaj kutirayku Jesús, Mateo 24:21, 22 versiculospi nisqan juntʼakorqa? 2) ¿Imaynatataj Jesuspa nisqan qhepaman juntʼakonqa?

⁷ Chay pʼunchaykuna pisiyachisqa kanqa. Jesusqa manchay ñakʼariy tiempopi imachus kananmanta, jinata nerqa: “Ajllasqasraykutaj chay pʼunchaykuna pisiyachisqa kanqanku”, nispa (Mateo 24:21, 22 leey). Chay nisqanqa ñaupaj kutirayku 66 watapi J.j. juntʼakorqa, maypachachus Jehová, Romamanta soldados Jerusalenman thuñej yaykusqankuta “pisiyach[erqa]” (Mar. 13:20). Chay kasqanraykutaj Jerusalenpiwan Judeapiwan tarikoj cristianosqa salvakorqanku. ¿Imaynatataj Jesuspa nisqan Jallpʼantinpi juntʼakonqa? Jehovaqa Naciones Unidas religionesman sayaykusqanta pisiyachenqa, Rey Jesucristonejta. Ajinamanta cheqa religionqa mana chinkachisqachu kanqa, llulla religionwan khuska (Sal. 96:5). ¿Imataj chaymanta kanqa? Chayta qhawarina.

8, 9. ¿Imasmantataj Jesús parlashanman karqa, imatataj runas ruwanqanku?

⁸ Jesús qhepa pʼunchaykunamanta imastachus nisqanqa, niraj Armagedón maqanakuy qallarishajtin ashkha imas kananta rikuchin. Kunanqa, Jesuspa nisqanmanta iskayta ukhuncharina. Chaykunataj Mateo, Marcos, Lucas Evangeliospi tarikun (Mateo 24:29-31 leey; Marcos 13:23-27; Lucas 21:25-28).

⁹ Cielopi tʼukuna imas kanqa. Jesús nerqa: “Inti laqhayaykaponqa; killapis manaña kʼanchanqachu, chʼaskastaj urmaramonqanku”, nispa. Kay tiempo runasqa, llulla religionesta kamachejkuna kausayninkupaj kʼanchay jina kasqanta yuyanku. Tumpamantawantaj niña jinatachu yuyanqanku. ¿Jesús inti laqhayanantachu, killa niña kʼanchanantachu, chʼaskastaj urmaramunankutapunichu nisharqa? Ichapis (Isa. 13:9-11; Joel 2:1, 30, 31). ¿Imatá runas ruwanqanku? Mancharisqas “musphaykachanqanku[...]” (Luc. 21:25; Sof. 1:17). Diospa Reinonpa enemigosnenqa, reyes kajkuna, kamachis kajkunapis “manchariywan, imachus kay pachaman jamunanmanta” uj jinayanqanku. Paykunaqa, Reyninchejpa phiñakuyninmanta maypichus pakakunankuta maskʼanqanku, nitaj tarenqankuchu (Luc. 21:26; 23:30; Apo. 6:15-17).

10. 1) ¿Imaynatá Jesús juzganqa Diospa Reinonta yanapajkunata, churanakojkunatapis? 2) ¿Imatá ovejas jina kajkuna, cabras jina kajkunapis ruwanqanku?

¹⁰ Ovejasta cabrasmanta tʼaqakun. Diospa Reinonpa enemigosninpa llakiynenqa astawan yapakonqa. ¿Imaraykú? Jesús nerqa: “Runaj Churinta rikonqanku phuyupi jamushajta, jatun atiywan, jatun kaynimpa kʼanchayninwan ima”, nispa (Mar. 13:26). Chay jinamanta Jesús jamusqanqa, tukuy runasta juzgananta rikuchenqa. Jesusqa ovejasmanta cabrasmanta rijchʼanachinanpi, qhepa pʼunchaykunamanta parlasqanta astawan sutʼincharqa (Mateo 25:31-33, 46 leey). Diospa Reinonta yanapajkunaqa, ovejas jina kanqanku. Paykunataj umankuta oqharenqanku kacharichisqa kananku “qayllamusha[sqanrayku]” (Luc. 21:28). Chaywanpis Diospa Reinonman churanakojkunaqa, cabras jina kanqanku. Paykunataj “waqanqanku” “wiñay chinkayman, NM” rinankuta yachaspa (Mat. 24:30; Apo. 1:7).

11. ¿Imatataj Diospa Palabran mana sutʼinchanchu?

¹¹ Armagedón maqanakoyqa, mana “tukuy laya” runasta Jesús juzgasqantawanchu qallarenqa (Mat. 25:32). Ñaupajtaqa, waj imasraj kanqa. Chaykunamanta iskayta qhawarina: 1) Gog, Diospa llajtanpa contranpi sayaykonqa, 2) ajllasqa cristianosta janaj pachapi tantakonqa. Yachanchej jina Diospa Palabranqa, mana sutʼinchanchu maykʼajpunichus chaykuna kananta. Ichá chay imasqa ujllapi kanqa.

12. ¿Imatataj Diospa Reinonman churanakuspa Satanás ruwanqa?

¹² Diospa llajtanpa contranpi sayaykukun. Magog jallpʼamanta Gog, Jallpʼapiraj kaj ajllasqa cristianosta, waj ovejasmanta kajkunatawan chinkachiyta munanqa (Ezequiel 38:2, 11 leey). Satanás, Diospa Reinonpa contranpi maqanakusqanqa chaypi tukukonqa. Payqa janaj pachamanta wijchʼuchikamusqanmantapacha ajllasqa cristianospa contranpi maqanakorqa (Apo. 12:7-9, 17). Kuraj Supayqa, ajllasqa cristianosta Diosmanta karunchachiyta munarqa, astawanqa cheqa qotuchakuypi tantasqa kasqankumantapacha (Mat. 13:30). Kay pachamanta llulla religiones chinkachisqaña kajtinku, Diospa llajtanqa mana perqasniyoj jina, mana punkusniyoj jina, nitaj llavenasniyoj jina kanqa. Satanastaj Diospa Reinonpi kajkunata chinkachinan kasqanta yuyanqa. Satanasqa payta yanapajkunata tanqanqa, Diospa Reinonta yanapajkunata chinkachinankupaj.

13. ¿Imaynatá Jehová Jallpʼapi kamachisninta jarkʼanqa?

¹³ Ezequielqa imachus kananmanta, jinata nerqa: “Wichaynejpi kaj karu jallpʼasniykimanta llojsimuspa [Gog], ashkha nacionespa soldadosninkuwan khuska puririmunki. Paykunaqa caballospi lloqʼasqa may atiyniyoj ashkha soldados kanqanku. [...] Aylluypa contrampi [sayaykonqanku]” (Eze. 38:15, 16). ¿Imatá Jehová ruwanqa chay kajtin? Pay nin: “Kʼajaj phiñakuyniy phatanqa”, “Gogpa contranta wañurachejkunata wajyasaj” nispa (Eze. 38:18, 21; Zacarías 2:8 leey). Diosqa Jallpʼapi kamachisninta jarkʼanqa, Armagedón maqanakuyta qallarichispa.

14, 15. ¿Imataj kanqa Satanás Diospa llajtanpa contranpi churanakuyta qallarejtinña?

¹⁴ Jehová imaynatachus Armagedón maqanakuypi llajtanta jarkʼananta niraj ukhuncharishaspa, imapiwanrajchus kananta ukhuncharina. Chayqa kanqa Diospa kamachisninta Satanás chinkachiyta qallarishajtin, Armagedón maqanakuy qallarishajtintaj. Chunka ujniyoj parrafopi nerqanchej jina, Jallpʼapiraj kaj ajllasqa cristianos janaj pachapi tantasqa kanqanku.

¹⁵ Ajllasqa cristianosta tantakun. Jesusqa, Armagedón maqanakuy niraj qallarishajtin imaschus kananmanta parlashaspa, espíritu santowan “ajllasqa” cristianosmanta parlallarqataj. Chaytataj Mateo, Marcos ima qhelqarqanku (7 parrafota qhawariy). Jesusqa rey kaspa imatachus ruwananmanta, kayta nerqa: “Paytaj angelesninta kachamonqa Diospa ajllakusqasninta kay pachaj tawantin cheqasmanta tantanankupaj, jallpʼaj ujnin kantunmanta janaj pachaj ujnin kantunkama”, nispa (Mar. 13:27; Mat. 24:31). Jesusqa, ajllasqa cristianosta tantakunanmanta parlaspa, mana ajllasqa cristianosta wiñaypaj sellakunanmantachu parlasharqa. Ajllasqa cristianosqa, manchay ñakʼariy qallarinanpajña kashajtin wiñaypaj sellasqa kanqanku (Apo. 7:1-3). Astawanpis parlasharqa, manchay ñakʼariy tiempo kashajtin imachus kananmanta. Chayrayku ichá, Satanás Diospa llajtanpa contranpi churanakuyta qallarejtinña, Jallpʼapiraj kaj ajllasqa cristianos janaj pachaman oqharisqa kanqanku.

16. ¿Imatá ajllasqa cristianos ruwanqanku Armagedón maqanakuypi?

¹⁶ Armagedón maqanakuy qallarinanpaj, ¿tukuy ajllasqa cristianosñachu tantasqa kanqanku? Arí, tukuy ajllasqa cristianosqa niraj Armagedón maqanakuy qallarishajtin, janaj pachapiña kanqanku. Chaypitaj, Jesuswan khuska atiyta japʼenqanku, Diospa Reinonpa enemigosninta “fierro varawan” chinkachinankupaj (Apo. 2:26, 27). Chantataj 144.000 ajllasqa cristianosqa atiyniyoj angelesman ujchakonqanku, pikunachus Maqanakoj Rey Jesucristo kamachinanta suyashanqanku. Jesustaj “ashkha soldados[pa]” contranpi maqanakunanpaj wakichikushanqa, pikunachus Diospa llajtanta chinkachiyta munashanqanku (Eze. 38:15). Chaywantaj Armagedón maqanakuy qallarenqa (Apo. 16:16).

17. ¿Imataj Armagedón maqanakuypi kanqa cabras jina kajkunawan?

¹⁷ Chinkachisqa kanqanku. Manchay ñakʼareyqa Armagedón maqanakuypi tukukonqa. Chay chayamojtin, Jesusqa “tukuy laya runas[ta]” juzgaj, chinkachejtaj kasqanta rikuchenqa, imaraykuchus “cabras[...]” jina kasqankuta nerqa chaykunata wiñaypaj chinkachenqa (Mat. 25:32, 33). Rey Jesusqa, tukuy laya runasta “uj filo” espadawan wañuchenqa. Arí, tukuy cabras jina kaj runasta, nisunman reyes kajkunata, kamachis kajkunata ima wiñaypaj Jallpʼamanta chinkachenqa (Apo. 19:15, 18; Mat. 25:46).

18. 1) ¿Imataj ovejas jina kajkunawan kanqa? 2) ¿Imatá Jesús ruwanqa maqanakuyninta tukuchananpaj?

¹⁸ Ovejas jina kajkunaqa, mana chinkachisqachu kanqanku. Satanasta yanapaj cabras jina kajkunaqa, mana piniyoj ovejas jina kajkunata, “manchay ñakʼariy” tiempopi mana chinkachiyta atenqankuchu. Arí, “may chhika” runasmanta kajkunataqa mana enemigosninku chinkachenqachu (Apo. 7:9, 14). Jesusqa, Diospa Reinonman churanakojkunata atipaspa chinkachiytawan, Satanasta, supaykunasninta ima chinkay chinkay ukhuman wijchʼuykonqa. Paykunaqa waranqa watasta wañusqa jina kanqanku, nitaj imatapis ruwayta atenqankuchu (Apocalipsis 6:2; 20:1-3 leey).

19, 20. ¿Imatá Isaías 26:20; 30:21 versiculospi nisqanman jina ruwananchej tiyan?

¹⁹ ¿Imaynatá pachantinpi kanqa chay imaspaj wakichikusunman? Kay pasaj wataspi Torremanta Qhawaj revistapi nerqa “kausanapajqa kasukuna” kasqanta. ¿Imaraykú? Chaypajqa Jehová, judiosman Babiloniapi wata runas jina kashajtinku uj kamachiyta qosqanmanta parlarina. Jehovaqa nerqa Babilonia atipasqa kananta, chaypajtaj llajtanqa wakichisqa kananta. Jehová judiosman nerqa: “Kunanqa, aylluymanta kajkuna, rispa, wasiykichejman yaykuychej, punkuykichejtataj wisqʼakamuychej. Chaypi uj pisita pakakuychej Tata Diospa kʼajaj phiñakuynin tukukunankama”, nispa (Isa. 26:20). Kay versiculospi “rispa” “yaykuychej” “wisqʼakamuychej” “pakakuychej” nisqanqa kamachiykuna karqa. Chay kamachiykunata judíos kasukunankupajqa, wasinkupi wisqʼasqa qhepakunanku karqa, mana soldadoswan rikuchikunankupaj, pikunachus callespi purisharqanku. Rikunchej jina, kausanankupajqa Diospa kamachisqanta kasukunanku karqa.b

²⁰ ¿Imatá Diospa ñaupa tiempo kamachisnin ruwasqankumanta yachakunchej? Jehovaj kamachisqanta kasukuspalla, imaschus aswan qhepaman kanqa chaypi mana wañunanchejta (Isa. 30:21). Chay kamachiykunataqa qotuchakuynejta japʼisun. Chayrayku kunanmantapacha tukuy sonqo kasukuyta yachakuna imatachus niwasqanchejta (1 Juan 5:3). Kunanmantapacha kasukusun chayqa, aswan qhepaman kasukuyta atillasun. Jinamantataj Tatanchej Jehová, Reyninchej Jesuspis jarkʼawasun (Sof. 2:3). Jarkʼasqa kasqanchejraykutaj, Diospa Reinon enemigosninta chinkachishajtin rikuyta atisun. ¡Chayqa mana qonqanapaj jinapuni kanqa!