Ama phutikuychu, noqaqa Diosniyki kani

 1. ¿Imaynatataj Isaías 41:10 versículo hermananchej Yoshikota yanapasqa?

YOSHIKO sutiyoj hermanamanta parlarina. Doctoranqa payman nisqa: “Killasllataña kausanki”, nispa. Ajinata nejtintaj, hermananchejqa Isaías 41:10 (leey) versiculota yuyarikusqa. Chay gustasqan versiculoqa mayta sonqochasqa, tukuy sonqowan Jehová Diospi atienekunanpajtaj yanapasqa. Chayrayku mana phutikuspa doctoranman nisqa: “Wañuytaqa mana manchachikunichu, imaraykuchus Jehová Diosqa makiymanta japʼishawan”, nispa.b Jehová Diosqa Yoshikota jinallataj sonqochawasunman ima problemapi rikukojtinchejpis. Chayta astawan entiendenapajqa, qhawarinachej imaraykuchus Jehová Dios Isaías 41:10 versiculota qhelqachisqanta.

 2. ¿Isaías 41:10 versículo yanapawasunmanchu?

² Jehová Diosqa Isaías 41:10 versiculota qhelqacherqa judiosta sonqochananpaj. Imaraykuchus judiosqa Babiloniaman esclavos jina apasqa kananku karqa. Chantapis Jehová Diosqa chay versiculota qhelqacherqa tukuy kamachisnin kallpachasqas kanankupaj (Isa. 40:8; Rom. 15:4). Kay tiempopi kausay may llakiy kasqanrayku, maytataj sajrayasqanrayku Diosninchej kallpachanawanchejta necesitanchej (2 Tim. 3:1). Payqa maytapuni Isaías libronejta sonqochawanchej.

 3. 1) ¿Imatataj Jehová Dios Isaías 41:10 versiculopi nisqa? 2) ¿Imaraykutaj Jehová Dios kallpachanawanchejta necesitanchej?

³ Qhepan parrafospi ukhunchasunchej imastachus Jehová Dios Isaías 41:10 versiculopi nisqanta.c Jehová Diospa nisqasnintaj creeyninchejta kallpachanqa. Jehová Diosqa niwanchej: ‘Noqaqa qanwanpuni kashani, noqaqa Diosniyki kani, yanapasqaykitaj’, nispa. Tukuypis Jehová Dios kallpachanawanchejta necesitanchej, hermana Yoshiko jina ashkha problemaspi rikukusqanchejrayku. Kallpachanawanchejta necesitallanchejtaj runas matʼiykuwasqanchejrayku, wakin autoridades qhatiykachawasqanchejrayku ima.

 4. 1) ¿Imatataj Jehová Dios niwanchej? (Notanta qhawariy). 2) Chanta, ¿imatataj Diosninchej niwanchej munakuwasqanchejrayku? 3) ¿Jehová Diospa nisqasnin kallpachawanchejchu?

⁴ Jehová Diosqa niwanchej: “Ama manchachikuychu, imaraykuchus noqaqa qanwampuni kashani”, nispa.d Jehová Diosninchejqa noqanchejwan kasqanta rikuchinawanchejpaj, munakuwanchej, uyariwanchej, tukuy ima necesitasqanchejtataj qowanchej. Payqa mayta munakuwasqanchejrayku niwanchej: “Noqaj ñawpaqeypi may kʼacha, allintaj kanki, munakuykitaj”, nispa (Isa. 43:4). Jehová Diospa munakuyninmantaqa ni imapis tʼaqawasunmanchu. Chantapis payqa khuyakuwasunchejpuni (Isa. 54:10). Mayta kallpachakunchej Jehová Dios amigosninta jina qhawawasqanchejta, munakuwasqanchejtataj yachaspa. Jehová Diosqa tukuy imamanta jarkʼawasunchej, imaynatachus amigon Abrahanta jarkʼarqa, ajinata. Jehová Diosqa Abrahanta nerqa: “Ama manchachikuychu, Abram, imaraykuchus noqa qampa jarkʼakojniyki kani”, nispa (Gén. 15:1).

5, 6. 1) ¿Imatataj Dios niwanchej mana problemasninchejwan atipachikunanchejpaj? 2) ¿Imatataj hermananchej Yoshikomanta yachakusunman?

⁵ Jehová Diosqa mana munanchu problemasninchejwan atipachikunanchejta. Chayrayku pay niwanchej: “Yakusta chimpashajtiykeqa, noqa qanwan kasaj, manataj mayupis apasonqachu. Nina chawpita purishaspapis, mana ruphachikunkichu; larwaynimpis mana qʼaspallasonqapischu”, nispa (Isa. 43:2).

⁶ Chay versículo nisqanman jina wakin problemasninchejqa mayu jina kanman, wakin problemasninchejtaj laurashaj nina jina kanman. Chaywanpis Jehová Diosqa mana saqenqachu problemaswan atipachikunanchejta chayri anchata sufrinanchejta. Manallataj saqenqachu chay problemasrayku paymanta karunchakunanchejta. Ajina kajtinpis Jehová Diosqa mana niwanchejchu problemasninchejta chinkachinanta. Astawanpis niwanchej ima problemapi rikukojtinchejpis noqanchejwan kananta yanapanawanchejpaj. Diosninchejqa wañuy patapiña kashajtinchejpis yanapawasunchej mana anchata llakikunapaj, ni imarayku paymanta karunchakunapajtaj (Isa. 41:13). Jehová Diosqa, hermananchej Yoshikotapis wañupunankama yanaparqa mana anchata llakikunanpaj. Yoshikoj warmi wawan nin: “Tʼukorqayku mamay wañuy patapiña kaspapis mana phutisqachu kashasqanmanta. Jehová Diospuni sonqonta tiyaykucherqa. Mamayqa wañupunankama doctoritasman, waj onqosqasmanwan hospitalpi Jehová Diosmanta, sumaj kausay kananmantataj willarqa”, nispa. Hermananchej Yoshikomanta yachakusunman, mana manchachikuspa ima problemata aguantanapajpis Jehová Dios noqanchejwan kashasqanpi atienekuna kasqanta.

 7. 1) ¿Imatataj Jehová Dios nillawanchejtaj? 2) ¿Ima niyta munan “phutikuy” palabra hebreo parlaypi?

⁷ Jehová Diosqa nillawanchejtaj: Ama phutikuychu, noqaqa Diosniyki kani, nispa. “Phutikuy” palabraqa hebreo parlaypi niyta munan, uj peligromanta jarkʼakunapaj mancharisqa qhepata qhawaykachay chayri kharkatispa tukuy ladota qhawaykachay.

 8. 1) ¿Imaraykutaj Jehová Dios judiosta ‘Diosniykichej kani’ nispa kallpacharqa? 2) ¿Imatataj Jehová Dios nisqa Isaías 46:3, 4 versiculospi judiosta kallpachananpaj?

⁸ Jehová Diosqa judiosta ‘Diosniykichej kani’ nispa kallpacharqa, mana Babilonios jina manchariymanta kharkatinankupaj. Imaraykuchus yacharqa judíos Babiloniapi 70 watasta esclavos jina kashajtinku Medopersiamanta soldados babiloniosta atacanankuta. Diosqa Medopersiamanta soldadoswan judiosta librananta nerqa (Isa. 41:2-4). Babiloniamanta runas, waj llajtayoj runaspis, enemigosninku qayllaykamushasqankuta reparaspa, mana manchachikunankupaj ninakorqanku: “Kallpachakuy”, nispa. Chantapis ashkha santosta ruwakorqanku: Kay dioskuna enemigosninchejmanta jarkʼawasunchej, nispa (Isa. 41:5-7). Jehová Diostajrí kamachisninta mana manchachikunankupaj nerqa: “Qanrí Israel, [waj llajtasmanta nisqaqa] kamachiy kanki”, nispa. Chantapis nillarqataj: Ama phutikuychu, noqaqa Diosniyki kani, nispa (Isa. 41:8-10). “Diosniyki kani” nispaqa, payta kasukoj judiosman nisharqa paykunamanta mana qonqakusqanta, llajtallanpunitaj kasqankuta. Chantá paykunaman nillarqataj: “Tukuy imapi yanapasqaykichej, librasqaykichejtaj”, nispa. Judiosqa Jehová Diosta uyarispa maytachá kallpachakorqanku (Isaías 46:3, 4 leey).

9, 10. 1) ¿Imaraykutaj mana phutikunachu kasqa? 2) ¿Imamantataj Juan phutikusqa?

⁹ Kay tiempomanta runasqa, mayta phutikunku tukuy runas sajrayashasqankumanta, tukuy imapis mana allinman tukushasqanmanta. Noqanchejtapis chaykuna llakichiwasunman. Chaywanpis mana phutikunanchejchu kashan, imaraykuchus Jehová Diosqa niwanchej: “Noqaqa Diosniyki kani”, nispa. ¿Diospa nisqan maytacharí sonqochawanchej?

¹⁰ Juanwan Brunowan hospitalpi tinkusqankupi piensarina. Juanqa lastimayta onqoyninmanta phutikushanman, “wañupullaymanñapis” nispa. Brunotaj chayta reparaspa, Juanman ninman: “Ama phutikuychu Juan. Kay doctorta sumajta rejsini. Payqa sumaj doctor, sanoyachisonqa, noqatapis sanoyachiwarqa”, nispa.

11. ¿Imatataj Brunomanta yachakusunman?

¹¹ Noqanchejqa Bruno jina ni imata manchachikunchejchu, imaraykuchus sumajta rejsinchej Jehová Diosninchejta, payqa sumaj doctorninchej jina. Diosninchejqa yanapawasunchej mana llakiyninchejwan atipachikunapaj, llakiyninchej kay qhepa pʼunchaykunapi onqoy jina kajtinpis (Isa. 35:4). Kay mundomanta runasqa imachus paykunawan kananmanta mancharisqa kashanku. Noqanchejtajrí ni imata manchachikunchejchu Jehová Diosninchejpi atienekusqanchejrayku (Isa. 30:15). Chantapis Bruno jinallataj wajkunaman willarinchej Jehová Diospi atienekusqanchejmanta. Ajinamanta runasqa noqanchej jinallataj ima problemapi rikukuspapis Jehová Dios yanapananpi atienekonqanku.

12. 1) ¿Imatataj Jehová Diosninchej nillawanchejtaj? 2) ¿Imapajtaj “maki” palabra Bibliapi oqharikoj kasqa?

¹² Jehová Diosqa nillawanchejtaj: “Noqa kallpachasqayki, yanapallasqaykitaj”, nispa. Isaiasqa nerqaña imaynatachus Jehová Dios llajtanta kallpachananta. Isaías nerqa: “Tukuy Atiyniyoj Tata Diosqa jatun atiyninwan jamushan, makinwan tukuy imata kamachispa”, nispa (Isa. 40:10). Bibliapeqa maki palabra oqharikun atiymanta parlanapaj. Chayrayku Isaiaspa nisqanqa yuyarichiwanchej Jehová Dios may atiyniyoj Rey kasqanta. Jehová Diosqa ñaupa tiempopi kamachisninta jatun atiyninwan yanaparqa, jarkʼarqataj. Kay tiempopipis Jehová Diosqa paypi atienekojkunata kallpachashan, jarkʼashantaj (Deu. 1:30, 31; Isa. 43:10).

13. 1) ¿Maykʼajtaj sutʼita reparanchej Jehová Dios kallpata qowasqanchejta? 2) ¿Imatataj Jehová Dios niwanchej mana manchachikunanchejpaj?

¹³ Jehová Diosqa kallpata qowanchejpuni. Chaytaqa sutʼita reparanchej enemigosninchej qhatiykachawajtinchej. Wakin lugaresmanta enemigosninchejqa, tukuy imata ruwashanku manaña Diosmanta willananchejpaj chayri prohibinawanchejpaj. Qhatiykachasqa kaspapis mana anchata phutikunchejchu. Imaraykuchus Jehová Diosqa niwanchej: “Mana mayqen arma ruwasqankupis qanta chinkachisunampaj jina kanqachu”, nispa (Isa. 54:17). Chayta yachaspaqa ni imata manchachikunchejchu, astawanpis Jehová Dios yanapanawanchejpi atienekunchej. Chantapis Diospa nisqanqa kinsa imasta yuyarichiwanchej.

14. ¿Enemigosninchej ñakʼarichinawanchejpunichu kasqa?

¹⁴ Yuyarikunanchej tiyan “tukuy runaspa chejninan” kananchej kasqanta (Mat. 10:22). Señorninchej Jesusqa nerqa yachachisqasninta qhepa pʼunchaykunapi runas mayta qhatiykachanankuta (Mat. 24:9; Juan 15:20). Chantapis yuyarikunanchej tiyan imatachus Isaías nisqanta. Payqa mana nerqachu runas chejninallawanchejta, manaqa tukuy imaymanamanta ñakʼarichinawanchejta. Ajinapunitaj, runasqa mana reparayllata engañayta munawanchej, chantapis llullakuspa imaymana sajrata niwanchej, qhatiykachawanchejtaj (Mat. 5:11). Jehová Diosqa saqeshallan runas tukuy imaymanamanta ñakʼarichinawanchejta (Efe. 6:12; Apo. 12:17). Chaywanpis enemigosninchejta mana manchachikunanchejchu tiyan.

15. 1) ¿Imatataj yuyarikunallanchejtaj kasqa? 2) Chanta, ¿imatataj Isaías 25:4, 5 niwanchej?

¹⁵ Yuyarikunallanchejtaj tiyan imatachus Jehová Dios niwasqanchejta. Pay nerqa: “Mana mayqen arma ruwasqankupis qanta chinkachisunampaj jina kanqachu”, nispa. Jehová Diosqa sajra runasmanta jarkʼawanchej, imaynatachus uj perqa loco wayramanta jarkʼawanchej, ajinata (Isaías 25:4, 5 leey). Chantapis enemigosninchejqa ni jaykʼaj chinkachiyta atiwasunchejchu (Isa. 65:17).

16. Isaías 41:11, 12 nisqanman jina, ¿imataj enemigosninchejwan kanqa?

¹⁶ Chantapis Jehová Diosqa niwanchej: ‘Tukuy chejnikusojkunaqa kʼumuykachachisqa tukuchisqataj kanqanku’, nispa (Isaías 41:11, 12 leey). Chayta yachaytaj yanapawanchej astawan Jehová Diosmanta japʼikunapaj. Imaraykuchus yachanchej enemigosninchej tukuy imata contranchejpi ruwajtinkupis, “manapis kankumanchu jina tukuchisqa” kanankuta.

17, 18. 1) ¿Imatataj ruwana kasqa Jehová Diospi tukuy sonqo atienekunapaj? 2) ¿Imaraykutaj kay watapaj ajllasqa textopi tʼukurina kashan?

¹⁷ Jehová Diospi tukuy sonqo atienekunapajqa, payta sumajta rejsinanchej tiyan. Paytataj sumajta rejsisunman Bibliata leespa, leesqanchejpitaj tʼukurispa. Bibliaqa willawanchej imaynatachus Jehová Dios ñaupa tiempopi llajtanta jarkʼasqanta. Chaykunata yachaspaqa Jehová Dios jarkʼanawanchejpi tukuy sonqo atienekusunchej.

¹⁸ Isaiasqa Jehová Diosta uj michejwan kikincharqa. Isaías, Jehová Diosmanta nerqa: “Corderosta makisninwan marqʼarikonqa”, nispa (Isa. 40:11). Sonqonchej tiyaykojtin, manataj imamantapis manchachikojtinchejqa, reparanchej Jehová Dios marqʼarikuwasqanchejta. Chayrayku mana llakiyninchejwan atipachikunapajqa, allin kamachi yuyayniyoj 2019 watapaj Isaías 41:10 textota ajllarqa. Chaypi nin: Ama phutikuychu, noqaqa Diosniyki kani, nispa. Chay palabraspi tʼukurina kachun. Chaypi tʼukurejtinchejqa ni imata manchachikusunchu. Ima problemaspi rikukuspapis mana llakiywan atipachikusunchu.