“Waj llajtayojkunaqa” cheqa Diosta ujchasqa sirvinku

 1. ¿Imatataj wakin runas waj llajtayojkunamanta yuyanku, imaraykutaj pantasqa kashanku?

KINSA kaj yachaqanapi rikorqanchej jina, wakenqa waj llajtayoj kajkunata mana allinpajchu qhawanku chayri chejnikunku. Chaywanpis, waj suyuyoj runasmanta aswan sumaj kasqankuta yuyakojkunaqa, mana pitapis jatunpajchu qhawasqankuta rikuchinku. Uj libropi nin: “Imaymana laya runas kajtinpis, Biblia nisqanman jinaqa tukuyninku hermanos kanku”, nispa. Hermanitos kajkuna mana kikinkamallachu kajtinkupis, hermanosllapuni kanku.

2, 3. ¿Imaynatá Jehová waj llajtayojkunata qhawan?

² Waj llajtayojkunaqa tukuynejpi kanpuni. Ñaupa Israel llajtapipis kallarqataj. Jehovaqa chay llajtawan uj tratota ruwarqa, chayraykutaj allinpaj qhawarqa. Chaywanpis, Leyta qosqanpeqa waj llajtayoj kajkunata, israelitas jatunpaj qhawanankuta kamachikorqa, nitaj ima sajratapis paykunapaj ruwanankuta. Kunanpis, cheqa cristianosqa mana wakillantachu allinpaj qhawanchej, manaqa tukuyta allin ñawiwan qhawanchej. Pedro nisqanman jinataj, “Diosqa mana wakillantachu allimpaj qhawan, manachayqa mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawan” (Hech. 10:34, 35).

³ Waj llajtayoj runas israelitaswan tiyakusqankoqa, imaynatachus Jehová forasterosta qhawasqanta rikuchin. Aswan qhepaman apóstol Pablo taporqa: “Diosqa judiospa Diosnillanchu? Manachu mana judío kajkunajpatapis Diosnillantaj? Cheqamanta paykunajtapis Diosnillantaj”, nispa (Rom. 3:29; Joel 2:32).

 4. ¿Imaraykutaj “Diospa nacionnin Israel” ukhupi tukuy uj llajtayoj jinalla kasqankuta nisunman?

⁴ Jehovaqa mosoj tratota ruwaspa Israelta qhesacharqa, chayrayku niña ajllasqa llajtanchu karqa. Cuentanmantaqa, ajllasqa cristianoswan chay tratota ruwarqa, kunantaj paykuna “Diospa nacionnin Israel kanku” (Gál. 6:16). Pabloqa chay mosoj nacionmanta parlaspa nerqa: “Manaña imananchu mana judío kasqan, chayrí judío kasqan, nitaj circuncidasqa kasqan, chayrí mana circuncidasqa kasqan. Manallataj imananchu waj llajtayoj kay, monte runa kay, nitaj wata runa kay, chayrí mana wata runa kaypis. Manachayqa Cristoñamin aswan sumajqa, paytaj tukuyninchejpi kashan”, nispa (Col. 3:11). Chayrayku, ajllasqa cristianos ukhupeqa tukuy uj llajtayoj jinalla kanku.

5, 6. a) ¿Ima tapuytaj rikhurinman Isaías 61:5, 6 versiculopi profeciamanta? b) ¿Pikunataj “Tata Diospa sacerdotesnin” kanku chantá pikunataj waj llajtayojkuna kanku? c) ¿Imaynamantataj iskaynin qotus khuska llankʼanku?

⁵ Chaywanpis, Isaías 61 capitulopi profeciamanta parlarina. Chay profecía juntʼakusqanqa cristiana qotuchakuywan khuskachasqa kashan. Kay 5, 6 versiculospi, “waj llajtayojkunaqa” “Tata Diospa sacerdotesnin” kajkunata yanapasqankumanta parlan. ¿Imaraykutaj chay versiculospi waj llajtayojkunamanta parlan?

⁶ Sacerdotes kajkunaqa ajllasqa cristianos kanku, pikunachus “ñawpaj kaj kawsarimpuypi” kausarimunku. Paykunaqa “Diospata Cristojtawan sacerdotesninku kanqanku, paywantaj waranqa watasta kamachenqanku” (Apo. 20:6). Chaywanpis, may chhika cheqa sonqo cristianos Jallpʼapi wiñaypaj kausakuyta suyashanku. Chayrayku, chay “waj llajtayojkunaqa” paykuna kanku, janaj pachapi sirvenqanku chaykunatataj yanapashanku. Arí, “Tata Diospa sacerdotesnin” kajkunata tukuy sonqo yanapanku. ¿Imaynamantá? Isaiaspa nisqanta juntʼaspa, pay nerqa: “Llankʼanasniykichejta llankʼapusonqanku, jinallataj uva huertasniykichejta qhawapusonqanku”, nispa. Paykunaqa runasman willaspa, cheqa kajta yachachispa ima ajllasqa cristianosta yanapanku, ajinamanta Dios jatunchasqa kananpaj. Chayrayku, ajllasqa cristianos, “waj ovejas” kajkunapiwan, allin sonqoyoj runasta tarispa, Diosta wiñaypaj sirvinankupaj yanapanku (Juan 10:16).

 7. ¿Imapitaj cristianos ñaupa tiempopi Diospa wakin kamachisninman rijchʼakunchej?

⁷ Kinsa kaj yachaqanapi rikorqanchej jina, cheqa cristianosqa Satanaspa pachanpi forasteros jinalla kanchej. Arí, ñaupa tiempomanta Diospa wakin kamachisninman rijchʼakunchej, paykunaqa Abraham jina “kay pachapi forasteros, puriskiri runas jinalla” karqanku (Heb. 11:13). Janaj pachapi chayrí Jallpʼapi kausakuyta suyakuspapis, tukuyninchej Abraham jina Dioswan masichakuyta atinchej. Santiago, jinata nerqa: “Abrahamqa Diospa nisqampi creerqa, chay creesqanraykutaj Diosqa Abrahamta cheqan runapaj qhawarqa nispa. Jinataj Abrahamqa Diospa kawsaqen nisqa karqa” (Sant. 2:23).

 8. ¿Imatataj Abrahamman Dios nerqa, imamantataj Abraham mana iskayrayarqachu?

⁸ Diosqa, Jallpʼantinmanta tukuy familias Abrahamnejta, mirayninnejtawan bendecisqa kanankuta nerqa, manataj uj nacionllachu (Génesis 22:15-18 leey). Chay profecía unaymantaraj juntʼakunan kajtinpis, Abrahamqa juntʼakunanmanta mana iskayrayarqachu. Payqa pachaj watasta, familianwan khuska puriskiri runa jinalla karqa. Chay tiempopitaj, Jehovamanta nipuni karunchakorqachu.

9, 10. a) ¿Imatataj Abrahammanta yachakunchej? b) ¿Ima wajyariypitaj yanapakusunman?

⁹ Abrahamqa Jehovaj nisqasnin mashkha unaypirajchus juntʼakunanta mana yachaspapis, Jehovata munakullarqapuni, yupaychallarqapunitaj. Payqa forastero jinalla kasqanta yachaspa, mana maypipis llajtachakuyta munarqachu (Heb. 11:14, 15). ¿Imatataj paymanta yachakunchej? Kapusqallanchejwan kausakunata, chantapis mana qhapaj kaytachu, nitaj sumajpaj qhawasqa kaytachu chayri sumaj profesionniyoj kaytachu maskʼanata. Kay pachaqa tukukaponqaña. Chayrayku, ¿imatataj tarisunman kay pacha runas jina kausayta maskʼaspa? ¿Imapajtaj qhasi manakajta kallpachakusunman? Noqanchejqa aswan sumaj imasta suyakushanchej, chayta juntʼakojta rikunapajtaj pacienciakuyta munanchej (Romanos 8:25 leey).

¹⁰ Jehovaqa, tukuy nacionesmanta runasta wajyarishallanpuni, Abrahampa mirayninnejta bendecisqa kanankupaj. Chayrayku, “Tata Diospa sacerdotesnin” kajkuna, nisunman ajllasqa cristianos, chantapis waj llajtayojkuna, nisunman waj ovejas, Jallpʼantinpi runasta wajyarishanku 600 kuraj qalluspi.

11. ¿Imatataj Salomonpa mañakuynin rikuchin?

¹¹ Jesús niraj jamushajtin 1026 watapi, Salomonqa Templota Diosman jaywashaspa uj mañakuyta ruwarqa. Chay mañakuynintaj, Jehová imaynatachus tukuy nacionesmanta runasta qhawasqanta rikucherqa. Salomonqa Jehová tukuy nacionesmanta runaspa mañakuyninkuta uyarinanta mañakorqa. Ajinamanta, Dios Abrahamman nisqanwan yanapachikunkuman karqa. Salomón nerqa: “Ajinallatataj mana israelita kaj forasteropis jamusunkiman sutiykimanta uyarispa, imaraykuchus uyarenqanku sutiyki manchay jatun kasqanta, jatun atiyniykimantapis; sichus kay wasiman mañakusoj jamusunkuman chayqa, qanqa janaj pachamanta uyarimuy, maypichus tiyakunki, chaymantapacha, ruwaytaj forasteroj mañakususqanman jina, chay jinamanta tukuy naciones rejsisunankupaj, sutiykitataj manchachikunankupaj Israel aylluyki jina”, nispa (1 Rey. 8:41-43).

12. ¿Imaraykutaj wakin runas Jehovaj testigosninta mana allinpajchu qhawanku?

¹² Yachanchej jina, uj forastero runaqa mana llajtanpichu tiyakun. Ajinallatataj, Jehovaj testigosnenqa mayqen suyupi tiyakuspapis forasteros jinalla kanku. Paykunaqa ima kajtinpis Diospa gobiernonman cheqa sonqos kanankuta ninku, chay gobiernoj Reynintaj Jesucristo. Chayrayku, politicapi ni imarayku satʼikunkuchu, wakin runas chay ruwasqankuta mana allinpajchu qhawajtinkupis.

13. a) ¿Imataj yanapawasunman mana pitapis waj llajtayojta jinachu qhawanapaj? b) ¿Imaynamantataj yachanchej Jehová tukuyta uj llajtayojta jinalla qhawawasqanchejta?

¹³ Yachanchej jina, waj llajtayoj kajkunaqa sutʼi rejsiy kanku: waj qalluta parlanku, uj jina costumbresniyoj kanku, rijchʼayninkupis chayri pʼachallikusqankupis uj jina. Chaywanpis, tukuy runasqa ashkha imaspi rijchʼakunchej. Wakin runasqa waj llajtayojkuna imaspichus mana paykuna jinachu kasqallankuta qhawanku, chayraykutaj uj jinitas kasqankuta yuyanku. Chaywanpis, imaspipunichus waj jina kasqankupi sumajta tʼukurispaqa, tukuy runaspis kikillan kasqanchejta reparanku. Chantapis, Jallpʼantinpi uj gobiernolla kanman chayqa tukuypis uj llajtayoj jinalla kasunman. Jehovataj, ajina kanantapuni munarqa, nisunman tukuy runas gobiernonpa kamachiynillanpi uj familia jina ujchasqa kausakunankuta. ¿Atisunmanchu kay tiempopi ajinata kausakuyta?

14, 15. ¿Imamantataj Jehovaj testigosnin mayta kusikunku?

¹⁴ Kay pacha runasqa jatunchakunku, suyunku aswan sumaj kasqantataj yuyanku. Chayrayku, mana ajinata yuyaj runas kasqanta yachayqa may sumaj. Chaywanpis, tukuyta allin ñawiwan qhawayqa mana atikullanchu. Telepi uj may rejsisqa canalta rikhurichej runamanta parlarina. Payqa ashkha suyusmanta runaswan llankʼarqa, nerqataj: “Waj suyusmanta runasta rejseyqa may sumaj karqa. Tukuy runas kikin Jallpʼapi kausakusqanchejrayku, mana pitapis waj llajtayoj runata jinañachu qhawarqani”, nispa. Chantapis, chay runaqa chay canalpi niña forastero rimayta oqharikunanta kamacherqa.

¹⁵ Jallpʼantinpeqa Jehovaj testigosnillan tukuy runasta Dios jina allin ñawiwan qhawayta yachakunku, chayrayku niña pitapis waj llajtayojta jinachu qhawanku. Paykunaqa mana yuyankuchu waj suyusmanta runas, mana atienekunapaj jinachu kasqankuta, nitaj chejnikunkuchu. Astawanqa tukuy rijchʼayniyoj runas kasqanmanta, waj imasta ruwayta yachasqankumantapis mayta kusikunku, sumajpajtaj qhawanku. ¿Tʼukurerqankichu Jehovaj testigosnin ajina ujchasqa kasqanchej may sumaj kasqanpi, chaytaj tukuywan allinta kausakunapaj mayta yanapawasqanchejpi?

16, 17. Apocalipsis 16:16 chantá Daniel 2:44 juntʼakojtin, ¿imaynataj kausayninchej kanqa?

¹⁶ Tumpamantawanqa tukuy naciones Diospa gobiernonpa contranpi maqanakonqanku. Chay jatun maqanakuytaj, “hebreo parlaypi Armagedón nisqa” (Apo. 16:14, 16; 19:11-16). Danielqa 2500 kuraj watas ñaupajta, Diospa contranpi churanakoj gobiernos chinkachisqa kanankumanta nerqa: “Chay reykuna kamachishajtinku, janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajrí wiñaypaj sayanqa”, nispa (Dan. 2:44).

¹⁷ Chay profecía juntʼakojtin, ¿imaynachus kausayniyki kananpi tʼukurerqankichu? Runas fronterasta rikhurichisqanku niña kanqachu, chayrayku tukuy uj llajtayoj jinalla kausakusunchej. Chay tiempopeqa, runas imaymana rijchʼayniyojllapuni kasunchej, chaytaj Diospuni tukuy layata ruwawasqanchejta rikuchenqa. Chayqa, ¡may sumaj kanqa! Chayrayku, Ruwawajninchej Jehovata jatunchanapaj, yupaychanapajpis kallpachakunallapuni.

18. ¿Imataj rikuchin runas rikhurichisqanku fronterasta chinkachiyta atikusqanta?

¹⁸ ¿Cheqamantachu ajinata kausakusunman? Arí. Noqanchejqa juntʼakunanmanta mana iskayrayanchejchu. Astawanpis kay tiempopiña, hermanosninchejta maymanta kajtinkupis allin ñawiwan qhawanchej. Sutʼincharinapaj, sumaj willaykunata aswan sumajmanta willakunanpaj, kunallanraj wakin sucursalesta ujchakun (Mat. 24:14). Chay sucursalesta ujchakunanpajqa kay pachapi fronteras kasqan mana jarkʼarqachu. Chaytaj, Jehovaj churasqan Rey Jesucristo, runas rikhurichisqanku fronterasta chinkachishasqantaña rikuchin. Pisimantawantaj, “atipaspa llojse[n]qa, atipanallampajtaj” (Apo. 6:2).

19. ¿Imaynatataj llimphu parlay ujchawanchej?

¹⁹ Jehovaj testigosnenqa ashkha suyusmanta kanchej, imaymana qallustataj parlanchej. Chaywanpis, tukuyninchej llimphu parlayta nisunman cheqa yachayta yachakunapaj kallpachakunchej, chaytaj ujchawanchej, nitaj imapis tʼaqanachiwasunmanchu (Sofonías 3:9 leey). Kay sajra pachapi kausakuspapis, ni imapi chhapukunchejchu. Jallpʼantinpi uj familia jinalla kasqanchejqa, tumpamantawan tukuy uj llajtayoj jinalla kausakunanchejta rikuchin. Chaypitaj, qallariypi parlasqanchej libroj nisqan cheqapuni kasqanta rikusun, chaypi nin: “Imaymana laya runas kajtinpis, Biblia nisqanman jinaqa tukuyninku hermanos kanku”, nispa.