¿Imaynatá Jesuspa wañuynin yanapawanchej?

Ñaupa tatasninchej Adanwan Evawan Diosta mana kasukusqankurayku juchayoj kanchej, sufrinchej, wañunchejtaj.a Jinapis Jehovaqa juchamanta, wañuymanta kacharichinawanchejpaj Wawan Jesucristota kachamorqa. Bibliapi nin Jesuspa wañuynenqa juchamantawan wañuymantawan kacharichinawanchejpaj uj pago jina kasqanta. Chayqa uj presochasqa runata kacharichinapaj pagay jina karqa. Jesusqa kacharichinawanchejpaj mana juchayoj kausayninta qorqa (Mateo 20:28 leey). Jesusqa mana juchayoj kasqanrayku, Jehovatapis kasukusqanrayku, atinman karqa kay jallpʼapi wiñaypaj kausakuyta. Jinapis mana chaytachu ruwarqa, astawanqa noqanchejrayku kausayninta qorqa. Ajinamanta imatachus Adanwan Evawan chinkacherqanku chayta watejmanta japʼinapaj. Chantapis reparanchej Jehovawan Wawan Jesuswanqa mayta munakuwasqanchejta. Kaypitaj yachakusun Jesús noqanchejrayku wañusqanmanta agradecekunapaj imatachus ruwanata.

1. ¿Jesuspa wañuynin yanapawanchejchu?

Biblia nin: “Cristoqa juchasrayku uj kutillata wañorqa, wiñaypajtaj. Arí, uj cheqan runa wañorqa, mana cheqan runasrayku, Diosman pusasunaykichejpaj”, nispa (1 Pedro 3:18). Juchasapa kasqanchejrayku Diospa chejnisqan imasta ruwanchej. Chayrayku perdonninta tarinapajqa juchasninchejmanta arrepientekuna, Jesuspa sutinpi Diosmanta perdonta mañakuna, mana kikin juchapi urmanapajtaj kallpachakuna (1 Juan 2:1).

2. Jesús wañusqanrayku, ¿imatataj aswan qhepaman japʼisun?

Jesús mana juchayoj kausayninta qosqanrayku wiñay kausayta japʼisun. Jehová Diosqa tumpamantawan llakiykunata, sajra ruwaykunata ima chinkachenqa. Payqa “uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj” (Juan 3:16). Chayrayku Jesuspa wañuyninpi creesun chayqa, kay jallpʼa uj kʼacha paraisoman tukojtin, chaypi wiñaypaj kusisqa kausakusun (Isaías 65:21-23).

ASTAWAN YACHAKUNA

3. Jesusqa juchamantawan wañuymantawan kacharichiwanchej

VIDEO: ¿Imapajtaj Jesús wañorqa? (1 kaj) (2:01)

• ¿Imapitaj Adán rikukorqa mana Jehová Diosta kasukusqanrayku?

Romanos 5:12 leeriychej, chantá yachakojta tapuriy:

• Adán juchallikusqanrayku, ¿imapitaj sapa ujninchej rikukunchej?

Juan 3:16 leeriychej, chantá yachakojta tapuriy:

• ¿Imapajtaj Jehová Dios Wawanta kay jallpʼaman kachamusqa?

1. Adanqa mana juchayoj runa karqa, jinapis Diosta mana kasukusqanrayku juchayojman tukorqa. Chayrayku noqanchejpis juchasapas kanchej, wañunchejtaj.

2. Jesusqa mana juchayoj runa karqa, Diostataj kasukorqa. Kasukusqanraykutaj wiñay kausayta japʼisunchej, mana juchayojmantaj tukusunchej.

4. Jesuspa wañuynenqa tukuyta yanapawanchej

VIDEO: ¿Imapajtaj Jesús wañorqa? (2 kaj) (2:00)

• ¿Imaraykutaj ninchej Jesuspa wañuynin tukuyta yanapawasqanchejta?

1 Timoteo 2:5, 6 leeriychej, chantá yachakojta tapuriy:

• Adanqa mana juchayoj runa kashaspa juchallikorqa. Chayrayku noqanchejpis juchayoj kanchej, wañunchejtaj. Jesusqa Adán jinallataj mana juchayoj runa karqa. Jinapis, ¿imatataj pay ruwarqa juchamantawan wañuymantawan kacharichinawanchejpaj?

5. Jehovaqa Wawanta noqanchejrayku qorqa

Jehová Diospa kamachisnenqa Jesuspa wañuyninta may valorniyojpaj qhawanchej. Apóstol Pablopis ajinallatataj qhawarqa. Gálatas 2:20 leeriychej, chantá yachakojta tapuriy:

• ¿Apóstol Pablo imatataj nisqa Jesús payrayku wañusqanta may valorniyojpaj qhawasqanrayku?

Adán juchallikusqanrayku tukuyninchej wañunchej. Jinapis Jehová Diosqa Wawanta kay jallpʼaman kachamorqa noqanchejrayku wañunanpaj, ajinamantataj wiñay kausayta japʼinanchejpaj.

Juan 19 capitulomanta wakin versiculosta leerishaspa, piensariy imaynatachus Jehová Diospa sonqon nanasqanpi Wawanta wañuchishajtinku. Juan 19:1-7, 16-18 leeriychej, chantá yachakojta tapuriy:

• Jehová Dioswan Jesuswan sapa ujninchejrayku imatachus ruwasqankuta yachaspa, ¿imatataj ruwayta munanchej?

¿IMASTÁ YACHAKUNCHEJ?

Kaypi yachakunchej Jesús wañusqanrayku Jehová perdonawasqanchejta, wiñaypajtaj kausakuyta atisqanchejta.

Yuyarikunapaj

• ¿Jesuspa wañuynin imasmantá kacharichiwanchej?

• ¿Imaraykutaj mana juchayoj runapuni wañunan karqa tukuyninchejta salvanawanchejpaj?

• ¿Jesús wañusqanrayku imatataj japʼisunchej?

ASTAWAN YACHAKUNAYKIPAJ

¿Imaraykutaj mana juchayoj runa wañunan karqa? Chayta yachanaykipaj kayta leeriy.

“¿Imaynatá Jesús kausayninta qospa ‘ashkha runasta kacharicherqa’?” (Chaytaqa Internetpi jw.org nisqapi tarinki)

¿Imatataj ruwananchej kanman salvakunanchejpaj? Chayta yachanaykipaj kayta leeriy.

“¿Imaynatá Jesús salvawanchej?” (Chaytaqa Internetpi jw.org nisqapi tarinki)

¿Jatun juchasta ruwajtinchej Jehová perdonawasunmanchu? Chayta yachanaykipaj kayta leeriy.

“Bibliaj kutichiykunasnin” (Torremanta Qhawaj, 1 de mayo de 2013)

Uj runataqa Jesús payrayku wañusqanta yachay kausayninta cambiananpaj yanaparqa. Paymanta yachanaykipaj kayta leeriy.

“Maqanakuyta munasqallaywan atipachikusharqani” (Chaytaqa Internetpi jw.org nisqapi tarinki)