“Allinta qhawakuychej, pajtataj pipis presota jina apakapusunkichejman”

 1. Colosenses 2:4, 8 nisqanman jina, ¿imaswantaj Satanás umanchejta muyuchiyta munawanchej?

SATANASQA Jehová Diosta wasanchananchejta munan. Chaypajtaj umanchejta muyuchiyta munawanchej. Supayqa pay jina yuyananchejpaj, imastachus sonqonchejpi munasqanchejwan engañayta munawanchej (Colosenses 2:4, 8 leey).

2, 3. 1) ¿Imaraykú Colosenses 2:8 nisqanta kasukunanchej tiyan? 2) ¿Imatataj kay yachaqanapi yachakusun?

² Satanás, ¿noqanchejtapis urmachiwasunmanchu? Arí. Kaypi piensarina. Apóstol Pabloqa Colosenses 2:8 nisqanta, ajllasqa cristianosman qhelqarqa, nitaj Diospi mana creej runasmanchu (Col. 1:2, 5). Paykunaqa Diospa atiyninwan ajllasqa kaspapis, Satanaspa tojllasninmanta qhawarikunanku karqa. Noqanchejpis astawanraj qhawarikunanchej tiyan (1 Cor. 10:12). ¿Imaraykutaj? Imaraykuchus Satanasqa kay jallpʼaman wijchʼuchikamorqa, maytataj pantachiyta munashawanchej (Apo. 12:9, 12, 17). Chantapis qhepa pʼunchaykunapi kausakushanchej, “chʼaukiyaj sajra runasrí, astawan astawan” sajrayashanku (2 Tim. 3:1, 13).

³ Kay yachaqanapi yachakusun, imaynatachus Satanás “qhasi manakaj yachachiykunawan” umanchejta muyuchiyta munawasqanchejta. Yachakullasuntaj ima kinsa ‘tojllaswanchusʼ chayri ‘trampaswanchusʼ urmachiyta munawasqanchejta (Efe. 6:11, sutʼinchaynin). Qhepan yachaqanapitaj yachakusun, imaynatachus chay pantasqa yachachiykunata sonqonchejmanta, yuyayninchejmantawan orqhonanchejta. Jinapis ñaupajtaqa, qhawarina imaynatachus Satanás israelitasta Sumaj Jallpʼaman yaykusqankutawan engañasqanta. Chantá qhawarisun imatachus yachakuyta atisqanchejta.

4-6. Deuteronomio 11:10-15 nisqanman jina, ¿imaynatataj israelitas Sumaj Jallpʼapi chajrata ruwananku karqa?

⁴ Satanasqa israelitasta llulla dioskunata yupaychachinanpaj, sumajta yuyaychakorqa. Payqa yacharqa, israelitas mikhunankupaj llankʼananku kasqanta. Israelitasqa Sumaj Jallpʼaman yaykuspa, waj jinamanta chajrata ruwananku karqa. Egiptopi kashajtinkoqa, chajrasninkuta Nilo mayumanta yakuwan qarpaj kanku. Jinapis Sumaj Jallpʼapeqa mana chay jina jatun mayu karqachu. Chayrayku israelitasqa chhullata chayri paray tiempota suyakunanku karqa (Deuteronomio 11:10-15 leey; Isa. 18:4, 5). Paykunaqa jallpʼata waj jinasmanta llankʼananku karqa. Chaytaj mana atinapaj jinallachu karqa. Imaraykuchus chajrata ruwayta yachaj israelitasmantaqa, casi tukuyninku chʼin pampaspi wañorqanku.

⁵ Jehovaqa israelitasman nerqa, Sumaj Jallpʼapi kausayqa manaña Egiptopi jinachu kananta. Chantá Jehová Diosqa chajrata ruwanankumanta parlashaspa, israelitasman nerqa: Noqamanta “amapuni tʼaqakunkichejchu waj dioskunata yupaychaspa, paykunamantaj qonqorikuspa”, nispa (Deu. 11:16, 17). ¿Imaraykutaj Jehová Dios chajrata ruwanamanta parlashaspa, israelitasman waj dioskunata mana yupaychanankuta nerqa?

⁶ Israelitasqa chajrata mana ruwayta yachasqankurayku, ichapis muyuyninkupi kaj nacionesta tapukamuyta munankuman karqa. Jehová Diostaj chayta allinta yacharqa. Cananeosqa jallpʼata unaytaña llankʼaj kanku. Israelitastaj paykunamanta yachakuyta atinkuman karqa. Jinapis juchapi mana urmanankupaj allinta qhawarikunanku karqa. Imaraykuchus cananeosqa chajrata ruwayta, Baal nisqa diosta yupaychaywan chajroj kanku. Paykunaqa yuyaj kanku, Baal cielomanta dios kasqanta, parachimusqanta ima. Jehová Diostaj mana munarqachu, israelitas kikinta yuyanankuta. Jinapis paykunaqa kutin kutita Baal diosta yupaycharqanku (Núm. 25:3, 5; Jue. 2:13; 1 Rey. 18:18). Qhepan parrafospi yachakusun, imaynatachus Satanás israelitasta engañaykusqanta.

 7. Israelitas Sumaj Jallpʼaman yaykusqankutawan, ¿imaspitaj rikukorqanku?

⁷ Uj kaj, Satanasqa israelitasta parananta munasqankuwan urmachiyta munarqa. Sumaj Jallpʼapeqa, abril killa tukukuymanta septiembre killakama may pisillata paraj. Paray tiempoqa octubre killata qallarej. Sumajta paraj chayqa, chajrasqa sumajta poqoj. Israelitaspa muyuyninkupi kaj llajtasqa, imaymana costumbresta ruwaspa diosesninkumanta parata mañakoj kanku. Satanastaj israelitasta yuyacherqa, kausay kananpaj, chajrasninku sumajta poqonanpajpis, chay costumbresta ruwananku kasqanta. Jehovapi mana atienekoj israelitasqa, chʼaki wata mana kananpaj chay costumbresta ruwananku kasqanta creerqanku. Chayrayku Baal diospaj millay costumbresta ruwarqanku.

 8. ¿Imawantaj Satanás israelitasta urmachisqa?

⁸ Iskay kaj, Satanasqa israelitasta sajra munayninkuwan urmacherqa. Israelitaspa muyuyninkupi kaj nacionesqa, diosesninkuta yupaychanankupaj millay khuchiriosta ruwaj kanku. Templosninkupeqa phisu warmis, khuchi qharis ima kaj. Chay llajtaspeqa, qharipura chayri warmipura khuchichakuyta, waj millay khuchiriostapis mana juchapajchu qhawaj kanku (Deu. 23:17, 18; 1 Rey. 14:24). Paykunaqa chay tukuy imasta ruwaj kanku, chajrasninku sumajta poqonanpaj. Ashkha israelitas chay millay imasta ruwarqanku, llulla dioskunatataj sirverqanku. Ajinamanta Satanaswan chʼaukiyachikorqanku.

 9. Oseas 2:16, 17 nisqanman jina, ¿imaynatá Satanás israelitasta Jehovamanta pantasqata yuyachisqa?

⁹ Kinsa kaj, Satanasqa israelitasta Jehovamanta pantasqata yuyacherqa. Profeta Jeremiaspa tiempopi, Jehová Diosqa llulla profetasta juchacharqa. Imaraykuchus chay profetasqa, Baal diosrayku, israelitasta Jehovaj sutinta qonqacherqanku (Jer. 23:27, NM). Israelitasqa Jehovaj sutinpa cuentanmanta, Baal sutillatañasina oqharisharqanku. Baal suteqa “Dueño” chayri “Patrón” niyta munan. Israelitasqa manaña sutʼitachu yacharqanku, pichus Jehová kasqanta, pitajchus Baal kasqanta. Ajinamanta Jehová Diosta yupaychayta, Baalta yupaychanapaj millay costumbreswan chajruykorqanku (Oseas 2:16, 17 leey).

10. ¿Imaswantaj Satanás kay tiempopi urmachiyta munawanchej?

¹⁰ Satanasqa imaswanchus israelitasta urmacherqa, chayllawantaj kay tiempopi urmachiyta munawanchej. Payqa engañayta munawanchej, imatachus sonqonchejpi munasqanchejwan, khuchichakuywan, Jehovamanta llullasta yachachisqanwan ima. Ñaupajtaqa imatachus Jehovamanta nisqanta yachakusun.

11. ¿Imatataj llulla cristianos Diospa sutinwan ruwasqanku?

¹¹ Satanasqa runasta Jehovamanta pantasqata yuyachin. Apóstoles wañupusqankutawan, wakin cristianosqa llulla yachachiykunata yachachiyta qallarerqanku (Hech. 20:29, 30; 2 Tes. 2:3). Chay llulla cristianosqa, runasta kʼata Diosninchejmanta qonqachiyta qallarerqanku. Paykunaqa Diospa sutinta Bibliamanta orqhorparqanku, cuentanmantataj “Señor” palabrata chayri waj palabrasta churarqanku. Chayrayku runasqa, Bibliata leeshaspa manaña yacharqankuchu Jehová Diosmantachus chayri mayqen ‘señormantachusʼ parlashasqanta (1 Cor. 8:5). Chantapis chay llulla cristianosqa, Jehová Diospajpis, Jesuspajpis “Señor” palabrata Bibliapi churarqanku. Chayrayku runasqa niña entienderqankuchu, Jehovawan Wawan Jesuswan mana kikinchu kasqankuta (Juan 17:3). Ajinamanta ashkha runas creeyta qallarerqanku, Dioswan, Jesuswan, espíritu santowan ima ujlla kasqankuta. Bibliatajrí mana chaytachu yachachin. Chay llulla yachachiyrayku, ashkha runas yuyanku, Diosqa mana rejsiy atina kasqanta. Jinapis Diostaqa tukuy rejsiyta atinchej (Hech. 17:27).

12. 1) ¿Imastataj iglesiaspi runasta ruwajta saqellanku? 2) Romanos 1:28-31 nisqanman jina, ¿imaynataj Diosta mana kasukoj runas kanku?

¹² Satanasqa sajra munayninchejwan urmachiyta munawanchej. Israelitaspa tiemponpi, Satanasqa llulla dioskunata yupaychaywan paykunata millay kausayniyoj kanankupaj tanqarqa. Kunanpis chayllatataj ruwashan. Ashkha iglesiaspi millay kausayniyoj runasta qhawallanku, chayri chay ruwaykuna allillan kasqanta yachachinku. Chayrayku ashkhas, Diosta sirvisqankuta nispapis, mana llimphu kausayniyojchu kanku. Apóstol Pabloqa romanosman qhelqasqanpi, imaynachus chay runas kasqankuta willawanchej (Romanos 1:28-31 leey). “Mana allin imasta” ruwasqankupeqa, imaymana khuchichakuykuna kashan, qharipura chayri warmipura khuchichakuypis (Rom. 1:24-27, 32; Apo. 2:20). Noqanchejqa Bibliaj kamachiykunasninta kasukunanchejpuni tiyan.

13. ¿Imawantaj Satanás engañayta munallawanchejtaj?

¹³ Satanasqa imatachus sonqonchejpi munasqanchejwan urmachiyta munawanchej. Tukuypis familianchejpaj, noqanchejpajpis trabajayta munanchej. Chaypajtaj imallatapis ruwayta yachananchej tiyan (1 Tim. 5:8). Escuelapi, colegiopiwan ashkha imasta ruwayta yachakunchej. Chayrayku sumajta yachakunapaj kallpachakunchej. Jinapis ashkha suyuspi, profesoresqa mana chayllatachu yachachinku, manaqa runaspa yachachiyninkutapis. Paykunaqa alumnosman Dios mana kasqanta yachachinku, Bibliatapis pisipaj qhawachinku. Chay profesoresqa alumnosman ninku, yuyayniyoj runasqa kausay jinallamanta rikhurisqanpi creesqankuta (Rom. 1:21-23). Chay yachachiykunaqa, ‘Diospa yachayninmanʼ churanakun (1 Cor. 1:19-21; 3:18-20).

14. Runaspa yachachiykunasninku, ¿imasmantaj tanqawasunman?

¹⁴ Runaspa yachachiykunasninkoqa, Diospa kamachiykunasninman churanakun. Chay yachachiykunaqa, mana yanapawanchejchu Diospa atiyninpa poqoyninta wiñachinapaj. Astawanpis ‘sajra munayninchejta ruwanapajʼ tanqawanchej (Gál. 5:19-23). Chantapis umata oqharinapaj, may kasqanchejta yuyakunapaj ima tanqawanchej. Chayrayku ashkha runas, “paykunallata munakojkuna” kanku (2 Tim. 3:2-4). Jehová Diostajrí munan llampʼu sonqos, kʼumuykukoj sonqotaj kananchejta (2 Sam. 22:28). ¿Imaspitaj universidadman rej cristianos rikukunku? Ashkhas kay mundomanta runas jina yuyayta qallarinku, niñataj Dios jinachu yuyanku. Qhepan parrafospi uj hermananchejmanta parlarisun.

15, 16. ¿Imatá uj hermananchejpa kausaynin yachachiwanchej?

¹⁵ Uj hermananchej 15 watasmanta astawanña Diospaj tiempo juntʼasqata llankʼashan. Pay nin: “Noqa bautizasqa karqani, yacharqanitaj universidadman reyqa mana allinchu kasqanta. Chaytaqa ashkhas niwarqanku, publicacionespipis leerqani. Jinapis mana chay yuyaychaykunata kasukorqanichu, universidadmantaj yaykorqani”, nispa. ¿Imaspitaj chay hermana rikukorqa? Pay nillanpuni: “Universidadpi estudiasqayrayku mana tiempoyoj, may saykʼusqataj karqani. Jehovamanta niña mañakojchu kani, nitaj kusiywanchu predicaj kani. Tantakuykunapajpis niña wakichikojchu kani. Estudiayllaman qokusqayrayku Jehovamanta karunchakuyta qallarerqani. Reparakorqani universidadmanta llojsipunay kasqanta, llojsiporqanitaj”, nispa.

¹⁶ Hermananchej universidadman risqanrayku, ¿imaynatataj yuyayta qallarerqa? Pay nin: “Universidadqa wajkunata qhawarayta yachachiwarqa. Hermanosta, hermanastapis tukuy imamanta qhawaraj kani, mana pantanankuta suyaj kani, paykunamantataj karunchakorqani. Pʼenqaywan chayta yuyarikuni. Unaypi cambiarqani. Tatanchej Jehovaqa mana qhasitachu llajtannejta yuyaychawanchej. Kamachiykunasninta mana kasukoyqa manapuni allinchu, kausayniypi chayta sutʼita rikuni. Jehová Diosqa, noqamanta nisqa astawan rejsiwarqa. Kasukuymanchus karqa chayqa, nichá chay chhika problemaspi rikukuymanchu karqa”, nispa.

17. 1) ¿Imatataj mana saqenanchejchu tiyan? 2) ¿Imatataj qhepan yachaqanapi yachakusun?

¹⁷ Amapuni saqenachu, Satanás “runaj yachayninwan, qhasi manakaj yachachiykunawan ima” engañanawanchejta. Satanaspa trampasninpi mana urmanapaj sumajta qhawakuna (1 Cor. 3:18; 2 Cor. 2:11). Amapuni saqenachu, Satanás qonqachinawanchejta pichus Jehová Dios kasqanta, imaynatachus payta sirvinanchejta munasqanta ima. Jehová Diospa kamachiykunasninta kasukunapuni. Amataj Supaywan engañachikunachu, Diosta mana kasukunapaj. Jinapis, ¿imatá ruwasunman kay mundoj yuyaynin chimpaykuwanchejña chay? Diospa Palabranqa “sumaj jarkʼachasqa perqasman rijchʼakoj” yachachiykunata, costumbresta ima thuñinman. Chaytataj qhepan yachaqanapi yachakusun (2 Cor. 10:4, 5).