¿YACHARQANKICHU?

Ñaupa tiempopi runasqa juchʼuy molinosniyojpuni kaj kanku jakʼuta ruwanankupaj. Sapa pʼunchay warmis chayri kamachis kajkuna jakʼuta ruwaj kanku. Kutasqankoqa sapa pʼunchay uyarikoj (Éxodo 11:5; Jeremías 25:10).

Ñaupa tiempo Egiptomanta imastachus tarisqankoqa rikuchin imaynatachus chay molinoswan jakʼuta ruwasqankuta. Molinoqa iskay rumis karqa, jatun kajqa tumpa pʼuku karqa chaymantaj granota churaj kanku, juchʼuy kajwantaj kutaj kanku. Jakʼuta ruwajqa jatun rumej ñaupaqenpi qonqoriykukoj, makisninwantaj juchʼuy rumita japʼej. Chaymantataj tukuy kallpanwan chay juchʼuy rumita ñaupajmantaj qhepamantaj kuyuchej. Uj libro sutʼinchasqanman jina, juchʼuy rumeqa pesarqa iskay kilo chayri tawa kilo. Pillamanpis chay kutana rumiwan choqaykuspaqa wañuchiyta atej kanku (Jueces 9:50-54).

Sapa familia molinoyojpuni kaj. Chayrayku Biblia nin: “Ama pejpatapis molino ruminta prendata jina japʼikunkichejchu, ni patan kajta nitaj uran kajta. Jinatachus ruwankichej chayqa, chay runaj kawsayninta prendata japʼishawajchej jina kanman” (Deuteronomio 24:6).

Bibliaqa nin, Jesucristo “Dios Tatawan khuska” kasqanta (Juan 1:18). Chaytaj niyta munan Jesuswan Tatanwanqa sumaj amigos kasqankuta. Chay palabraqa jamun, ñaupa tiempopi judíos mikhunankupaj tumpata winkuykoj kanku chaymanta.

Jesuspa tiemponpi judiosqa, mikhunankupaj camaspi jina winkoj kanku, chaytaj pʼalta mesaj muyuriyninpi kaj. Sapa runa mesaj ladonman winkuykoj, chakisninta jaytʼatataspa, lloqʼe makintataj uj cabeceraman jina atiykoj. Jinamantaqa paña makinwan mikhuyta atej. Chaymanta uj libro nin: “Ajinamanta winkuspaqa, uj runaj uman lloqʼe ladonpi kaj runamanpis atiykukushanman jina karqa”. Chayrayku nikoj uj runa waj runawan “khuska” kashasqanta.

Uj tataj ladonpi chayri uj fiestata ruwajpaj ladonpi kayqa may sumaj karqa. Chayrayku Jesús discipulosninwan Señorpa cenanta ruwashajtin, apóstol Juan “pitachus Jesús munakoj, chay qayllampi kasharqa”. Bibliaqa nin, Juan “Jesusman atiykukus[kusqanta]” tapunanpaj (Juan 13:23-25; 21:20).