Salvakunapaj Jehová Diospi atienekuna

 1. ¿Imajtintaj tukuypis sonqochasqa kayta necesitanchej?

TUKUYPIS sonqochasqa kayta necesitanchej. Imaraykuchus tukuypis llakisqas chayri phutisqas kashanchej onqoykusqanchejrayku, viejoyapusqanchejrayku, ujnin familiarninchej wañupusqanrayku, runas kʼamirpawasqanchejrayku chayri qhapariykuwasqanchejrayku. Chantapis runasqa diamanta día astawan sajrayashanku. Kay tiempopi kausay may llakiy kasqanta rikoyqa, reparachiwanchej ‘qhepa pʼunchaykunapi kausashasqanchejta’. Reparachillawanchejtaj tumpitamantawan paraisopi kausakunanchejta (2 Tim. 3:1). Chaywanpis ichá unaytaña suyashanchej Jehová Diospa nisqasnin juntʼakunanta. Problemasninchejpis ichá diamanta día astawan yapakushan. Chayrayku qhepan parrafospi qhawarisunchej imatachus ruwana kasqanta sonqochakunapaj.

 2. ¿Imatataj profeta Habacucmanta yachanchej?

² Bibliapi pisillata profeta Habacucmanta willawajtinchejpis, paymanta yachakoyqa mayta sonqochawasunchej. Habacucpa sutenqa ichapis niyta munan “Munakuywan Abrazay”. Chaytaj rikuchin Jehová Dios kamachisninta sonqochananpaj munakuywan abrazasqanta chayri kamachisnin Jehová Diospa makinmanta japʼikusqankuta. Jehová Diosqa yacharqa Habacuc libro mayta yanapanawanchejta. Chayrayku Habacucta qhelqacherqa imastachus payman nisqanta (Hab. 2:2).

 3. ¿Imajtintaj Habacucmanta astawan yachakusunchej?

³ Bibliaqa profeta Habacuc llakisqa kashajtin Jehová Dioswan parlasqallanmanta willawanchej. Habacuc libroqa “yachachinawanchejpaj qhelqasqa karqa, jinallataj suyakuyniyoj kananchejpaj. Imaraykuchus Diosmanta Qhelqasqaqa sinchʼita sayanapaj, sonqochakunapaj ima yanapawanchej” (Rom. 15:4). Habacuc libroqa yanapawanchej astawan Jehová Diospi atienekunapaj. Chantapis Habacucpa nisqanqa reparachiwanchej ashkha problemaspi rikukuspapis sonqo tiyasqa kayta atisqanchejta. Chayrayku qhepan parrafospi Habacucmanta astawan yachakusunchej.

 4. ¿Imaraykutaj Habacuc llakikusqa?

⁴ (Habacuc 1:2, 3 leey). Habacucqa sajra runaspa chaupinpi tiyakorqa. Maytataj llakikorqa israelitasta maqanakojta, wañuchinakojta, engañanakojta ima rikuspa. Chayrayku ichapis Habacuc sonqonpi nerqa: “Chay chhika unaytaña sajra runaswan muyurisqa kani. ¿Maykʼajtaj Jehová Dios sajra ruwaykunata tukuchenqari?”, nispa. Chayrayku payqa manchay llakisqa Jehová Diosman nerqa: “Maykʼajkamataj qanta qhaparikamuspa, yanapata mañakusaj, mana uyarichikuspa?”, nispa. Habacucqa ichapis yuyarqa Jehová Dios llajtanmanta qonqakapusqanta chayri anchataña suyachikushasqanta. Ichá noqanchejpis Habacuc jina yuyarqanchej.

 5. ¿Imatataj Habacucmanta yachakusunman? (13 paginapi kaj fotota qhawariy).

⁵ Habacucqa Jehová Diosman tukuy llakiyninta willaspa, quejakuspa ima, rikucherqa Diospi tukuy sonqo atienekusqanta. Habacucqa llakikorqa Jehová Dios llajtanta yanapananpaj ni imata ruwasqanmanta, sufrejta qhawallasqanmanta ima. Chay llakiynin Bibliapi qhelqasqa kasqanta yachayqa, reparachiwanchej Jehová Diosman mana manchachikuspa llakiyninchejta willakunanchej kasqanta. Jehová Diospis munan sonqomantapacha llakiyninchejta payman willakunanchejta (Sal. 50:15; 62:8). Bibliapis jinata niwanchej: “Tukuy sonqoykiwan Tata Diospi atienekuy; ama qampa yachasqallaykipeqa atienekuychu”, nispa (Pro. 3:5). Habacucqa tukuy sonqopuni Jehová Diospi atienekorqa.

 6. ¿Imaraykutaj orakunapuni kasqa?

⁶ Habacucqa Jehová Diosta Tatanta jina, amigonta jinataj qhawarqa. Paypi atienekusqanraykutaj llakiykunasnillanpi yuyananmantaqa, mana manchachikuspa Jehová Diosman tukuy llakiyninta willakorqa. Noqanchejpis Habacuc jinallataj llakiyninchejta Jehová Diosman willakusunman. Jehová Diosqa niwanchej mana manchachikuspa llakiyninchejta willakunanchejta (Sal. 65:2). Orakojtinchejqa Jehová Dios uyariwasunchejpuni. Uyariwajtinchejtaj reparasunchej makinchejmanta japʼishawasqanchejta, ñanninta pusanawanchejpajtaj yuyaychashawasqanchejta (Sal. 73:23, 24). Chantapis Jehová Diosqa reparachiwasunchej llakiyninchejta atipayta atisqanchejta. Sonqomantapacha orakuspaqa, Jehová Diospi atienekusqanchejta rikuchisunchej.

 7. ¿Jehová Dios Habacucta kʼamirpasqachu quejakusqanmanta?

⁷ (Habacuc 1:5-7 leey). Habacucqa Jehová Diosman llakiyninta willaytawan, ichapis piensarerqa imatachus Jehová Dios ninanpi. Jehová Diostaj Habacucta quejakusqanmanta mana kʼamerqachu. Manaqa uj tata jina Habacucpa llakiyninta entienderqa. Diosqa yacharqa Habacuc sufrisqanrayku quejakusqanta, yanapatapis mayta mañakusqanta. Chayrayku Jehová Diosqa Habacucman nerqa kamachiykunasninta mana kasoj judiosta castigananta. Ichapis Jehová Diosqa chayta Habacucmanraj ñaupajta willarqa.

 8. ¿Imajtintaj Habacuc mana yuyallarqapischu Jehová Dios judiosta babilonioswan castigananta?

⁸ Jehová Diosqa Habacucta reparacherqa judiosta castiganantapuni. Jehová Diosqa Habacucman nerqa kausashajtillanraj chayri chay tiempomanta runa masisnin kausashajtillankuraj judiosta caldeoswan nisunman babilonioswan castigananta. Habacucqa nichá yuyallarqapischu Jehová Dios judiosta babilonioswan castigananta. Imaraykuchus babiloniosqa may sajra rumi sonqos karqanku, judiosmanta nisqaqa aswan sajrasraj. Judiosqa Diospa kamachiykunasninta rejserqankuraj kanpis. Chayrayku Habacucqa ichapis jinata yuyarqa: “¿Imajtintaj chanta Jehová Dios chay jina sajra runaswan judiosta castigananta ninri? ¿Manachu paykunata astawan sufrichillanqa?”, nispa. Ichá noqanchejpis Habacuc jinallataj yuyasunman karqa.

 9. ¿Imastataj Habacuc Jehová Diosta tapusqa?

⁹ (Habacuc 1:12-14, 17 leey). Habacucqa yacharqa Jehová Dios judiosta babilonioswan castigananta. Chaywanpis sonqonpi nikorqa: “¿Imajtintaj Jehová Dios judiosta babilonioswanpuni castigananta nishanri?”, nispa. Ajinapis Habacucqa llampʼu sonqowan nerqa, Jehová Dios ‘pakakunan chhanka’ kasqanta (Deu. 32:4; Isa. 26:4). Habacucqa yacharqa Jehová Dios munakuyniyoj, kʼachataj kasqanta. Chayrayku mana manchachikuspa Jehová Diosta taporqa: ‘¿Imaynatataj ari qhawakullanki chay millay ruwajkunatari? ¿Imajtintaj chʼinlla kanki sajra runasta wañuchinakojta rikuspari? ¿Imajtintaj sajra ruwaykuna yapakunanta qhawakullankiri?’, nispa. Ajinata nejtinpis Jehová Diosqa “may santopuni” kasqanrayku “mana juchata qhawallaytapis” atinchu.

10. ¿Imatataj Habacuc jina Jehová Diosman nishasunman?

¹⁰ Noqanchejqa Habacuc jina Jehová Diosta kasukunchej, paypitaj atienekunchej. Chantapis Bibliata leey, estudiay imaqa, yanapawanchej Jehová Dios sumaj kausayta apamunanpi atienekunapaj. Chayta entiendenapajtaj Jehová Diosqa llajtannejta yanapashawanchej. Chaywanpis ichá Habacuc jina Jehová Diosta nishanchej: “¿Maykʼajkamataj sufrisajri?”, nispa. Kunantaj qhawarina imatachus Habacuc ruwasqanta manchay llakisqa kashaspa.

11. ¿Habacuc Jehová Dioswan parlaytawan llakikullasqapunichu?

¹¹ (Habacuc 2:1 leey). Habacucqa Jehová Dioswan parlasqanrayku manaña anchata llakikorqachu. Manaqa suyarqa Jehová Dios tukuy imata allinchananta. Habacucqa jinata nerqa: “Suyallasaj, maypachachus Dios chay ñakʼarichiwajninchejpa soldadosninta ñakʼariyman churanqa, chay pʼunchayta”, nispa (Hab. 3:16). Ajinallatataj ashkha Diospa kamachisninpis mana saykʼuspa Jehová Diospi suyakorqanku. Paykunaj ejemplonkutaj rikuchiwanchej Jehová Diospi mana saykʼuspa suyakuyta atisqanchejta (Miq. 7:7; Sant. 5:7, 8).

12. ¿Imatataj Habacucmanta yachakusunman?

¹² Habacucmanta yachakunchej Jehová Diosman orakuspa llakiykunasninchejta willakunapuni kasqanta. Yachakullanchejtaj Jehová Diosta kasukuna kasqanta. Payqa Palabrannejta, llajtannejtataj yachachiwanchej. Chantapis yachakunchej Jehová Diospi pacienciawan suyakuna kasqanta, tukuy imata tiemponpi allinchananpitaj atienekuna kasqanta. Jehová Dios allin kausayta apamunanpi atienekuspaqa, ima llakiytapis kusisqas aguantasunchej. Imaraykuchus yachanchej Tatanchej Jehová sajra kajmanta libranawanchejta (Rom. 12:12).

13. ¿Imatataj Jehová Dios nisqa Habacucta sonqochananpaj?

¹³ (Habacuc 2:3 leey). Jehová Diosqa maytachá kusikorqa Habacuc paypi suyakusqanmanta. Jehová Diosqa imayna llakisqapunichus Habacuc kashasqanta entienderqa. Chayrayku Habacucta sonqocharqa, nerqataj tumpamantawan sajra kajta chinkachinanta. Kaytapis nishanman jina karqa: “Pacienciakullay, noqapitaj atienekuy. Qheparejmanña rijchʼasunki chaypis suyarillay, librasunay tiempoqa chayamonqapuni”, nispa. Jehová Diosqa chaywan Habacucta nisharqa nisqasninta juntʼanantapuni.

14. ¿Imatataj ruwananchej kasqa llakiypi rikukuspa?

¹⁴ Noqanchejpis Habacuc jina Jehová Diospi suyakunanchej tiyan, imatachus niwasqanchejtapis kasukunanchej tiyan. Ajinamanta ima llakiypi rikukuspapis Jehová Diospi atienekusunchej, sonqo tiyasqastaj kasunchej. Jesusqa niwarqanchej “maykʼajchus chayri ima horachus imapis” kananmanta ama llakikunata. Imajtinchus chaytaqa Jehová Dioslla yachan (Hech. 1:7). Maychus tiemponpi Jehová Dios yanapanawanchejpi atienekunanchej tiyan. Chantapis paypi mana saykʼuspa suyakunallanchejpuni tiyan, kʼumuykukoj sonqotaj kananchej tiyan. Chayrayku kunanqa tukuy atisqanchejta Jehová Diosta sirvinapaj kallpachakunallapuni (Mar. 13:35-37; Gál. 6:9).

15, 16. 1) ¿Imatataj Habacuc libro niwanchej? 2) Jehová Diospi suyakullasunpuni chay, ¿imatataj rikusunchej?

¹⁵ Habacuc libro jinata niwanchej: ‘Cheqan runasqa Diospi creesqankurayku kausanqanku. Chaypachataj, Jehová Diospa jatun kayninmanta yachaywan tukuy kay pacha juntʼa kanqa’, nispa (Hab. 2:4, 14). Arí, Jehová Diosqa paypi mana saykʼuspa suyakojkunaman wiñay kausayta qonqa.

¹⁶ “Cheqan runasqa Diospi creesqankurayku kawsanqanku” nisqa palabrastaqa, apóstol Pablopis kinsa kutita cartasninpi oqharerqa, Habacucpa nisqan may importante kasqanrayku (Rom. 1:17; Gál. 3:11; Heb. 10:38). Ima llakiypi rikukuspapis Jehová Diospi suyakullasunpuni chayqa, Diospa nisqasninta juntʼakojta rikusunchej. Chayrayku Jehová Diosqa munan sumaj kausayta japʼinanchejpi yuyananchejta, manataj llakiykunasnillanchejpichu.

17. ¿Imatataj Habacuc libro reparachiwanchej?

¹⁷ Qhepa pʼunchaykunapi kausakusqanchejrayku Habacuc libroqa mayta yanapawasunman. Imajtinchus Habacuc libro reparachiwanchej Jehová Dios yanapanawanchejta, sajra kajmantataj salvanawanchejta. Chantapis Jehová Diosqa niwanchej cheqan kajta ruwajkunaman, paypi atienekojkunaman ima wiñay kausayta qonanta. Chayrayku ima llakiypi rikukuspapis Jehová Dios yanapanawanchejpi atienekunallapuni. Chantapis Jehová Diosqa nillawanchejtaj paypi atienekunata, mana saykʼuspataj Gobiernon kay jallpʼata kamachimunanta suyakunata. Diospa Gobiernon kay jallpʼata kamachimojtenqa, tukuy runas kusisqas, sonqo tiyasqastaj Jehová Diosta yupaychasunchej (Mat. 5:5; Heb. 10:36-39).

18. ¿Imapitaj Habacuc tʼukurisqa Jehová Dios kallpachasqantawan?

¹⁸ (Habacuc 3:16-19 leey). Habacucqa Jehová Diosta uyarispa mayta kallpachakorqa. Chayrayku tʼukurerqa imastachus Jehová Dios aswan ñaupajta llajtanrayku ruwasqanpi. Chaypi tʼukurisqanrayku astawan creeynin yapakorqa. Habacucqa yacharqa tumpatawan ñakʼarinanta, chaywanpis mana iskaychakorqachu Jehová Dios chay sufrimientomanta librananta. Arí, Habacucqa seguro kasharqa Jehová Dios salvananmanta. Chayrayku pay nerqa: “Chaypachamari kusiywan juntʼa kasaj Salvawajniy Tata Diosrayku”, nispa. Chaymanta parlaspa wakin runas ninku, Habacuc kusiymanta phinkiykachananta nisqanta. Habacucpa nisqanqa reparachiwanchej Jehová Dios tumpamantawan nisqasninta juntʼanantapuni.

19. ¿Imatataj ruwananchej kasqa Jehová Diospi creenallapajpuni?

¹⁹ Habacuc libropi yachakunchej Jehová Diospi creejkuna salvakunankuta (Hab. 2:4). Jehová Diospi creenallapajpuneqa payman astawan qayllaykunanchej tiyan. Chaypajqa orakuspa tukuy llakiyninchejta Diosman willakunanchej tiyan. Chantapis Bibliaj nisqasninta, Diospa llajtanta ñaupajman apajkunata ima kasukunanchej tiyan. Mana saykʼuspataj Jehová Diospi suyakunanchej tiyan nisqasninta juntʼanankama. Habacucpis Jehová Diospi suyakorqa. Habacucqa Jehová Dioswan parlayta qallarishaspa manchay llakisqa kasharqa. Chaywanpis parlayta tukunanpajqa, Jehová Dios kallpachasqanrayku sonqon tiyaykorqa, kusisqataj kasharqa. Noqanchejpis Habacuc jinallataj llakiyninchejta Jehová Diosman willakusunman, ajinamanta reparasunchej Jehová Dios sonqochawasqanchejta. Imaraykuchus Jehová Diosqa sonqochanawanchejpaj wakichisqa kashan.