Sonqo juntʼasqa kausanapaj Jesús yachachisqanman jina kausana

“Imaynatachus Jesús kay pachapi kawsarqa, ajinata [kausana].” (1 Juan 2:6.)

ÑAUPAJ yachaqanapi rikorqanchej jina, Jesusqa sonqo juntʼasqa kausarqa. Kikinta kausayta munanchej chayqa, pay jina ruwananchej tiyan, yuyaychaykunasnintataj kasukuna.

Qallariypi versículo nin jina, Jehovaqa chayta ruwananchejta munan. Jesús jina kausanapajtaj, ruwasqanman jina, yachachisqanman jina kausana tiyan. Chayta ruwajtinchejqa, Jehová allinpaj qhawawasun, sonqo juntʼasqataj kausasunchej.

Jesús Orqopi Yachachishajtin, pay jina ruwanapaj ashkha yuyaychaykunata qorqa. Chaykunamanta kinsata ukhuncharina, imaynatachus kausayninchejpi ruwanata ima.

YUYAYCHAY: “May cusiskas cancu sonkoncupi Diosmanta pisiskas caskancuta khawacojcunaka.” (Mateo 5:3, Dios Parlapawanchej.)

¿IMAYNATÁ CHAY YUYAYCHAY YANAPAWANCHEJ?

Jesusqa, runas Diosta rejsiyta necesitasqankuta nerqa. Chayraykuchá tapukunchej: “¿Imapaj kausanchej? ¿Imaraykú ñakʼarinchej? ¿Wañuypichu tukuy ima tukukun? ¿Dios munakuwanchejchu?”, nispa. Sonqo juntʼasqa kausanapajqa, chay tapuykunaj kutichiyninta yachananchej tiyan. Jesusqa, Diospa Palabrallan chay tapuykunaman kutichiyta atisqanta yacharqa. Chayrayku Tatanmanta mañakushajtin nerqa: “Nisqasniykeqa cheqapuni kanku”, nispa (Juan 17:17). Diospa Palabran, ¿cheqamantachu payta rejsinapaj yanapawasunman?

IMATACHUS WAKINPA KAUSAYNIN RIKUCHIN:

Esa sutiyoj waynuchoqa, rock conjuntopi takej, may rejsisqataj kayta qallarisharqa. Chaywanpis mana kusisqachu karqa. Pay nin: “Conjuntoypi kayqa mayta gustawaj, chaywanpis mana kusisqachu karqani”, nispa. Aswan qhepaman, Jehovaj testigosninta rejsisqa. Pay nillantaj: “Chay hermanota tukuy imata taporqani. Sapa tapusqayman Bibliawan kutichiwasqantaj, mayta tʼukuchiwarqa. Chayrayku Bibliamanta yachachinawanta saqerqani”, nispa. Yachakusqanqa sonqonkamapuni chayarqa, chayraykutaj Jehovaman qokorqa. Esa nin: “Ñaupajtaqa, chʼampaykunamanta mana llojsiyta atejchu kani. Chaywanpis kunanqa, kusisqa, sonqo juntʼasqataj kausani”, nispa.a

YUYAYCHAY: “Kusikuyniyojmin kanku khuyakojkunapis.” (Mateo 5:7.)

¿IMAYNATÁ CHAY YUYAYCHAY YANAPAWANCHEJ?

Khuyakuyniyoj runaqa wajkunawan kʼacha, allinninkutataj maskʼan. Jesusqa wajchasta khuyakoj. Khuyakusqanrayku, pay kikinmanta may chhika runasta sanoyacherqa (Mateo 14:14; 20:30-34). Pay jina ruwajtinchejqa, sonqo juntʼasqa kausakusunchej. Imaraykuchus wajkunata khuyakoyqa, kusiyta apamun (Hechos 20:35). Necesitajkunata yanapaspaqa, parlasqanchejwan, ruwasqanchejwan ima, khuyakusqanchejta rikuchinchej. Chaywanpis, ¿cheqamantapunichu wajkunata khuyakuspa kusisqa kasunman?

IMATACHUS WAKINPA KAUSAYNIN RIKUCHIN:

Mariawan qosan Carloswanqa, khuyakuyniyoj kanku. Mariaj tatanqa viudo, onqosqa kasqanraykutaj camamanta mana jatarikuyta atinchu. Chayrayku wasinman pusakaporqanku. Tatanta qhawanankurayku, ashkha kutista sutʼiyarqanku. Wakin kutistaj, diabetes onqoynin sinchʼiyajtin hospitalman usqhayllata apananku karqa. Paykunaqa wakin kuti mayta saykʼusqankuta ninku, chaywanpis Jesús nerqa jina kusisqa kanku. Imajtinchus Mariaj tatanta sumajta qhawashasqankuta yachaspa, sonqo juntʼasqa kanku.

YUYAYCHAY: “Kusikuyniyojmin kanku allinyachejkunaqa.” (Mateo 5:9.)

¿IMAYNATÁ CHAY YUYAYCHAY YANAPAWANCHEJ?

¿Imaynatá allinyachej kay, sonqo juntʼasqa kanapaj yanapawanchej? Ñaupajtaqa, wajkunawan aswan allinta kausakunapaj yanapawanchej. Chayrayku kay yuyaychayta kasukuna: “Atisqaykichejman jina tukuy runaswan allimpi kausakuychej” (Romanos 12:18). “Tukuy runaswan” nispaqa, familianchejmanta, mana noqanchej jina creejkunamanta ima parlashan. “Tukuy runaswan” allinpi kausakuy, ¿cheqamantachu sonqo juntʼasqa kanapaj yanapawasunman?

IMATACHUS WAKINPA KAUSAYNIN RIKUCHIN:

Nairpa kausayninta qhawarina payqa, mana wajkunawan allinpi kausakuyta atillajchu, astawanraj familianwan. Qosan chunka phishqayoj wata ñaupajta saqerparisqanmantapacha, wawasninta sapitallan uywan. Ujnin kaj wawanqa drogaspi urmarqa, chayraykutaj sapa kuti phiñakuyninwan atipachikoj. Chantapis payta, warmi wawanta ima maqaykuyta munaj. Nairqa Bibliapi yachakusqan llamphu sonqo kananpaj, wajkunawan allinpi kausakunanpaj ima yanapasqanta nin, wakin kuti mana atikullajtinpis. Payqa imitamantapis chʼajwananmantaqa, kʼacha kananpaj, wajkunata entiendenanpaj ima kallpachakun (Efesios 4:31, 32). Wajkunawan allinpi kausakuyta yachakusqanqa, familianwan, waj runaswan ima, sumajta kausakunanpaj yanapan.

QHEPAMAN IMACHUS KANANPI TʼUKURINA

Jesuspa yuyaychaykunasninta kasukusun chayqa, kusisqa kasun, sonqo juntʼasqataj kausakusun. Chaywanpis cheqamantapuni kusisqa kausanapajqa, imachus qhepaman kananta yachananchej tiyan. Imaraykuchus machuyananchejta, onqonanchejta, wañunanchejta ima yachaspaqa, mana cheqamanta sonqo juntʼasqa kasunmanchu. Kay tiempopitaj, ajinalla kausayninchejqa.

Chaywanpis sumaj willaykuna kan. Jehovaqa, Jesús jina kausajkunapaj ashkha bendicionesta wakichishan. Payqa pisimantawan, Jallpʼata mosojyachenqa. Chaypitaj cheqan kausaylla kanqa, runastaj qallariypi munasqanman jina, mana onqospa wiñaypaj kausanqanku. Palabranpi nin: “Kunanqa Diospa tiyakuynin runas ukhupi kashan, paytaj paykunawan khuska tiyakonqa. Runasqa paypa ayllun kanqanku, Diostaj paykunaj Diosninku kanqa. Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu” (Apocalipsis 21:3, 4).

Mariaqa, pimantachus qallarej yachaqanapi parlarqanchej, chay versículos juntʼakunanta mayta suyashan. ¿Qanrí? Diospa Reinon kamachishajtin, imayna sumajchus kausay kananta, ¿yachayta munawajchu? (1 Timoteo 6:19.) Jina kajtenqa, Jehovaj testigosninwan parlariy chayri kay revistata qhelqajkunaman qhelqay.b

a Esaj kausayninmanta 8, 9 paginaspi leeriy, chaytaj kaypi tarikun: “Bibliamanta yachakusqankoqa kausayninkuta tijracherqa: Kausayneyqa millay karqa”.

b ¿Imatapunitaq Biblia yachachin? libroqa, ashkhasta Bibliaj yachachiykunasninta ujmanta uj ukhunchanankupaj yanapan. Kay librotaqa Jehovaj testigosnin orqhonku.