Jesús niraj wañupushaspa imastachus nisqanmanta yachakuna

1, 2. ¿Imatataj Jesusta enemigosnin ruwarqanku?

KAY 33 watapi 14 de nisán pʼunchaypi, ¿imatataj Jesuswan enemigosnin ruwarqanku? Paytaqa qhasimanta tumparqanku, mana juchayojllata juzgarqanku, burlakorqanku ima. Chantapis ñakʼaricherqanku, chakisninta, makisnintapis kʼaspiman chayri posteman clavaykorqanku. Ajinapi sapa samajtin, parlajtin maytachá heridasnin nanarqa. Jinapis payqa wakin imasta parlananpaj mayta kallpachakorqa.

² Kay yachaqanapeqa, Jesús ajina clavasqa kashaspa imastachus nisqanta qhawarisun. Qhawarillasuntaj imastachus chay nisqasninmanta yachakuyta atisqanchejta. Jesuspa nisqasninmanta yachakuspataj, payta uyarisun (Mat. 17:5).

 3. Jesús “paykunata perdonay” nispa, ¿pikunamantataj parlashanman karqa?

³ ¿Imatá Jesús nerqa? Jesusqa kʼaspipi clavasqa kashaspa nerqa: “Tatáy, paykunata perdonay. Mana yachankuchu imatachus ruwashasqankuta”, nispa (Luc. 23:33, 34). Chayta nispa, ¿pikunata perdonanantataj nisharqa? Ichapis Jesusqa, payta clavarqanku chay romano soldadosta perdonananta nisharqa. Imaraykuchus paykunaqa, mana yacharqankuchu pichus Jesús kasqanta. Chantapis ichá nishallanmantaj karqa, payta wañuchinankupaj tanqarqanku chaykunata perdonananta. Imaraykuchus chay runasqa, aswan qhepaman Jesuspi creerqanku (Hech. 2:36-38). Jesusqa mayta ñakʼarichejtinkupis, mana paykunapaj phiñakorqachu, nitaj paykunawan pagachikorqachu (1 Ped. 2:23). Astawanpis Tatanmanta mañakorqa, payta wañuchisharqanku chay runasta perdonananta.

 4. ¿Imaynatá Jesús jina wajkunata perdonasunman?

⁴ ¿Imatataj Jesuspa nisqanmanta yachakusunman? Jesús jina, wajkunata perdonanapaj wakichisqa kana kasqanta (Col. 3:13). Ichá runas chayri familiaresninchej contranchejpi oqharikunkuman. Paykunaqa, imaraykuchus wakin imasta mana ruwasqanchejta, chayri imaynatachus kausakusqanchejta mana entiendenkuchu. Chayrayku ichá noqanchejmanta llullasta parlanqanku chayri wajkunaj ñaupaqenpi kʼumuykachachiwasun. Manachayrí publicacionesninchejta llikʼipuwasun, chayri maqaykuyta munawasun. Ajinata ruwawajtinchej ama phiñakunachu. Astawanpis Jehovamanta mañakuna paykunata cheqa kajta yachakunankupaj yanapananta (Mat. 5:44, 45). Ichá wakenqa qhasimantapuni mayta ñakʼarichiwasun, chayri imallatapis ruwawasun. Ajina kajtintaj ichapis mana paykunata perdonayta atillasunchu. Jinapis paykunata mana perdonasunchu, phiñasqallapunitaj kasun chayqa, noqallanchejpajtaj mana allinchu kanqa. Uj hermana nin: “Wajkunata perdonaspaqa, mana imatachus ruwawasqanku allillan kasqantachu nishani, chayri noqawan imatapis ruwanallankuta saqenaytachu nishani. Wajkunata perdonaspaqa manaña paykunapaj phiñasqa kanayta nishani”, nispa (Sal. 37:8). Wajkunata perdonaspaqa, manaña paykunapaj imastachus ruwawasqanchejmanta phiñasqallapunichu purinchej (Efe. 4:31, 32).

 5. Jesús, ¿imatataj ujnin suwa runaman nerqa, chanta imatataj yacharqa?

⁵ ¿Imatá Jesús nerqa? Jesús kʼaspipi clavasqa kashajtin paywan khuska iskay suwa runas clavasqa kasharqanku. Paykunataj Jesusmanta burlakorqanku (Mat. 27:44). Jinapis ujnenqa repararqa, Jesusqa ni “ima sajratapis” ruwasqanta. Chayrayku manaña paymanta burlakorqachu (Luc. 23:40, 41). Astawanpis creerqa Jesús kausarimunanta, rey jinataj gobernamunanta. Chayrayku Jesusta nerqa: “Jesús Gobiernoykiman yaykuspa, noqamanta yuyarikunki ari”, nispa (Luc. 23:42). Ajinamanta chay runaqa, sinchʼi creeyniyoj kasqanta rikucherqa. Chayrayku Jesús payman nerqa: “Cheqatapuni kunan niyki: Noqawan paraisopi kanki”, nispa (Luc. 23:43). Jesusqa sutʼita nerqa chay runa paraisopi kananta, manataj cielomanta gobernamunantachu. Chantapis “noqawan paraisopi kanki” nispaqa, chay suwa runawanpuni parlasharqa. Jesusqa yacharqa Tatan may khuyakuyniyoj kasqanta, chay runatataj kausarichimunanta (Sal. 103:8).

 6. ¿Imatataj yachakunchej Jesús ujnin suwa runaman nisqanmanta?

⁶ ¿Imatataj Jesuspa nisqanmanta yachakusunman? Ñaupa kausayninchejpi juchasninchejmanta arrepientekojtinchej, Jesuspa wañusqanpitaj creejtinchej, Jehová Diosqa perdonawanchej, khuyakuwanchejtaj (1 Juan 1:7). Jinapis wakenqa ichá yuyasunman, Jehová ni jaykʼaj perdonanawanchejta. Wakin kutis ajinata yuyanchej chay, ¿imapitaj piensarisunman? Piensarisunman imatachus Jesús niraj wañupushaspa, paypi creej suwa runaman nisqanpi. Jesusqa imatachus chay runaman nisqanwan sutʼita rikucherqa, Tatan jina may khuyakuyniyoj kasqanta (Heb. 1:3). Jehová Diosqa noqanchejta astawanraj khuyakuwanchej. Imaraykuchus payta tukuy sonqo sirvinchej, maytataj kallpachakunchej kamachiykunasninta kasukunapaj (Sal. 51:1; 1 Juan 2:1, 2).

 7. Juan 19:26, 27 nisqanman jina, ¿imatataj Jesús Mariaman, Juanman ima nerqa, chanta imaraykutaj chayta nerqa?

⁷ ¿Imatá Jesús nerqa? (Juan 19:26, 27 leey). Jesusqa niraj wañuchisqa kashaspa, mayta mamanmanta llakikorqa. Imaraykuchus ichapis mamanqa viudaña kasharqa. Jesús wañupojtin, hermanosnin mamankuta atiendenkuman karqa. Jinapis paykunaqa nirajsina Jesuspa discipulosninchu karqanku. Chayrayku, ¿pitaj Mariata Diosta sirvinallanpajpuni yanapayta atinman karqa? Apóstol Juan. Payqa Jesuspa aswan munasqa amigon karqa, Jehová Diostataj tukuy sonqo sirverqa. Jesustaj paywan khuska Diosta yupaychajkunata, familianta jina qhawaj (Mat. 12:46-50). Chayrayku Jesusqa mamanta mayta munakusqanrayku, Juanman encargakorqa. Ajinamanta Mariata Jehová Diosta sirvinallanpajpuni yanaparinanpaj. Jesusqa mamanman nerqa: “Chayqa wawayki”, nispa. Juanmantaj nerqa: “Chayqa mamayki”, nispa. Chay diamantapacha Juanqa Mariata mamanta jina cuidarqa, Mariataj payta wawanta jina qhawarqa. Mariaqa Jesusta wawitamantapacha cuidarqa, wañuchisqa kashajtinpis qayllanpi kasharqa. Chayrayku Jesusqa maytapuni payta munakorqa.

 8. ¿Imatataj yachakunchej Jesús, Mariamanwan Juanmanwan imatachus nisqanmanta?

⁸ ¿Imatataj Jesuspa nisqanmanta yachakusunman? Hermanosninchej, hermanasninchejpis, familianchejmanta nisqa astawan munakuwasqanchejta. Familianchejqa, ichapis churanakuwasun chayrí saqerpariwasun. Jinapis Jesús nerqa jina, Jehová Diosta sirvillasunpuni chay, llajtallanpipunitaj kasun chayqa, saqesqanchej imasmanta “pachaj jinastawanraj” japʼisun. Hermanosninchejqa kanku munasqa tatanchej, mamanchej, chayri wawanchej jina (Mar. 10:29, 30). Ajina familiayoj kasqanchejmanta maytapuni kusikunchej. Imaraykuchus Jehová Diosta paykunawan khuska sirvinchej, purajmantataj munanakunchej (Col. 3:14; 1 Ped. 2:17).

 9. Mateo 27:46 versiculopi Jesús imatachus nisqanpi, ¿imastataj reparanchej?

⁹ ¿Imatá Jesús nerqa? Jesusqa kʼaspipi clavasqa kashaspa nerqa: “Diosníy, Diosníy, ¿imaraykutaj saqerpariwankiri?”, nispa (Mat. 27:46). ¿Imaraykutaj Jesús chayta nerqa? Bibliaqa mana chayta sutʼinchanchu. Jinapis Jesuspa nisqanpi wakin imasta reparasunman. Jesusqa chayta nispa, Salmo 22:1 nisqan profeciata juntʼasharqa.b Chantapis Jesusqa chay nisqanwan sutʼita reparachiwanchej, Jehová Dios payta mana jarkʼakusqanta (Job 1:10). Jehová Diosqa saqerqa, Jesusta enemigosnin ñakʼarichispa wañuchinankuta. ¿Imajtintaj chayta ruwanankuta saqerqa? Imajtinchus Jesusqa, ajinallamanta ima kajtinpis Tatanta manapuni wasanchananta rikuchiyta aterqa. Chaytataj sutʼita entienderqa. Jesús jinaqa, mana pipis kay jallpʼapi ñakʼarichisqa karqachu. ¿Imatawantaj reparasunman Jesuspa nisqanpi? Payta qhasillamanta wañuchisqankuta.

10. ¿Imastataj yachakunchej Jesús imatachus Tatanman nisqanmanta?

¹⁰ ¿Imatataj Jesuspa nisqanmanta yachakusunman? Creeyninchejrayku ima llakiypi rikukojtinchejpis, Jehová Dios jarkʼanawanchejta mana suyanachu kasqanta. Jesús jinataj wakichisqa kananchej tiyan, Jehová Diosta wañupunanchejkama mana wasanchanapaj (Mat. 16:24, 25). Jehová Diosqa ‘mana saqenqachu, mana sayay atinakama’ ñakʼarinanchejta (1 Cor. 10:13). Yachakullanchejtaj Jesús jina ichapis qhasillamanta ñakʼarichisqa kananchejta (1 Ped. 2:19, 20). Runasqa churanakuwanchej mana paykuna jina kasqanchejrayku, Diosmantataj willasqanchejrayku (Juan 17:14; 1 Ped. 4:15, 16). Jesusqa sutʼita yacharqa, imaraykuchus enemigosnin wañuchinankuta Jehová saqeshasqanta. Jinapis Diospa wakin kamachisnenqa, llakiykunapi kaspa ninchej: “¿Imaraykutaj Dios kay jina llakiykunapi kanayta saqenri?”, nispa (Hab. 1:3). Chayta nejtinchejpis Jehová Diosqa sonqochawanchej, manataj yuyanchu pisi creeyniyoj kasqanchejta. Chaytataj ruwan khuyakuyniyoj, pacienciayojtaj kasqanrayku (2 Cor. 1:3, 4).

11. ¿Imaraykutaj Jesús nerqa “chʼakishawan” nispa?

¹¹ ¿Imatá Jesús nerqa? (Juan 19:28 leey). Jesusqa kʼaspipi clavasqa kashaspa, “chʼakishawan”, nispa nerqa. Chayta nerqa Salmo 22:15 versículo nisqan profecía juntʼakunanpaj. Chaypi nin: “Simeyqa kʼanalla jina chʼaki kashan, qalluytaj pata simiyman kʼaskaykun”, nispa. Jesustaqa maytapuni ñakʼaricherqanku, kʼaspimantaj clavaykorqanku. Chayraykuchá payqa mayta chʼakichikorqa, yakituta jaywarinankutataj munarqa.

12. ¿Imatataj yachakusunman Jesús “chʼakishawan” nisqanmanta?

¹² ¿Imatataj Jesuspa nisqanmanta yachakusunman? Jesusqa yanapata mañakuyta mana manchachikorqachu. Noqanchejpis manallataj manchachikunachu tiyan. Ichapis wakin kuteqa, mana piwanpis yanapachikuyta munallanchejchu. Jinapis yanapata necesitaspaqa, wajkunawan yanapachikuna. Machitus chayrí onqosqas kanchej chayqa, rantikoj chayri doctorman rinapaj yanapachikuna. Llakisqa kashanchej chaytaj, uj ancianowan chayri experienciayoj hermanowan parlarina. Paykunataj sumajta uyariwasun, chayri miskʼi palabraswan kallpachariwasun (Pro. 12:25). Hermanosninchejqa mayta munakuwanchej, llakiypi kashajtinchejtaj yanapayta munawanchej (Pro. 17:17). Jinapis llakiyninchejta mana willakusunchu chayqa, mana yachanqankuchu yanapata necesitasqanchejta.

13. Jesús wañupunankama Jehovaj munayninta ruwaspa, ¿imastá rikucherqa?

¹³ ¿Imatá Jesús nerqa? Jesusqa 14 de nisán pʼunchaypi las tres de la tardeta jina, “juntʼakunña” nispa nerqa (Juan 19:30). Payqa wañupunan horakama, Jehová Diospa munayninta kay jallpʼapi ruwarqa. ¿Imastá rikucherqa chay ruwasqanwan? Ñaupaj kaj, Jesusqa Satanás llulla kasqanta rikucherqa. Jesusqa Satanás payman mayta churanakojtinpis, manapuni Jehová Diosta wasancharqachu. Ajinamantataj sutʼita rikucherqa, uj mana pantaj runa Jehová Diosta tukuy imapi kasukuyta atisqanta. Iskay kaj, Jesusqa noqanchejrayku kausayninta qosqanta rikucherqa. Chayraykutaj juchasapa runas kaspapis, Jehová Diospa ñaupaqenpi allinpaj qhawasqa kayta atinchej, wiñay kausaytapis japʼiyta atinchej. Kinsa kaj, Jesusqa Jehová Dioslla cheqan Kamachej kasqanta rikucherqa, sutintapis jatuncharqa.

14. ¿Imata ruwananchejpajtaj sapa día kallpachakunanchej tiyan?

¹⁴ ¿Imatataj Jesuspa nisqanmanta yachakusunman? Sapa día Jehová Diospa munayninta ruwana kasqanta. Hermanonchej Maxwell Friendmanta parlarina. Payqa Galaad Escuelapi yachachejkunamanta ujnin karqa. Payqa uj asamblea internacionalpi discursota qoshaspa, Jehová Diosta tukuy sonqo sirvinamanta ajinata nerqa: “Imatachus kunan ruwananchej kasqanta, imatachus ninanchej kasqantapis, ama qʼayapaj saqenachu. Imaraykuchus mana yachanchejchu, qʼaya kausananchejtachus manañachus. Chayrayku sapa día Jehová Diosta tukuy sonqo sirvinapaj kallpachakunallapuni. Ajinamanta rikuchisun, wiñaypaj kausakuyta munasqanchejta”, nispa. Jehová Diosta tukuy atisqanchejta sirvisun chayqa, creeyninchejrayku wañuy patapi kaspapis, kayta niyta atisun: “Jehová Diosníy, mayta kallpachakorqani qanta tukuy sonqo sirvisunaypaj, Satanás llulla kasqanta rikuchinaypaj, sutiykita jatunchanaypaj, qanlla sumaj Kamachej kasqaykitataj rikuchinaypaj”, nispa.

15. ¿Imaraykutaj Jesús Lucas 23:46 versiculopi nisqanta nerqa?

¹⁵ ¿Imatá Jesús nerqa? (Lucas 23:46 leey). Jesusqa Jehová Diospi atienekusqanrayku nerqa: “Tatáy, makisniykiman kausayniyta saqeni”, nispa. ¿Imaraykú Jesús chayta nerqa? Payqa yacharqa Jehová kausarichimunanta, paymantataj yuyarikunantapuni.

16. ¿Imatataj hermanitonchej Joshuamanta yachakunchej?

¹⁶ ¿Imatataj Jesuspa nisqanmanta yachakusunman? Jehová Diospa makinman kausayninchejta saqenata. Chaypajqa ‘tukuy sonqo Jehová Diospi atienekuna tiyan’ (Pro. 3:5). Hermanitonchej Joshuamanta parlarina. Payqa 15 watasniyoj kashaspa, mana jampiy atina onqoyniyoj karqa. Payqa Jehovata kasukuyta munasqanrayku, jampichikunanpaj mana yawarta churachikorqachu. Niraj wañupushaspa mamanman nerqa: “Mamáy, kausayniytaqa Jehová Diospa makisninman saqepuni. Payqa wañupojtiypis kausarichimuwanqapuni. Payqa yachan maytapuni munakusqayta”, nispa. Noqanchejpis chay hermanito jina creeyninchejrayku wañuy patapi kajtinchej, Jehová Diospa makisninman kausayninchejta saqepuna, pay kausarichimunawanchejpitaj atienekuna.

17, 18. ¿Imastataj Jesuspa nisqasninmanta yachakunchej? (“¿Imatá yachakunchej Jesuspa nisqasninmanta?” nisqa recuadrota leeriy).

¹⁷ Jesús niraj wañupushaspa imastachus nisqanmanta, ¿imastataj yachakunchej? Wajkunata perdonana kasqanta, Jehová Dios perdonanawanchejpitaj atienekuna kasqanta. Yachakullanchejtaj Jehovaj llajtanpeqa, ashkha familiayoj kasqanchejta, paykunataj mayta yanapayta munawasqanchejta. Jinapis chaypajqa noqanchej yanapata mañakuna tiyan. Chantá yachakullanchejtaj, ima llakiypi kajtinchejpis Jehová yanapanawanchejtapuni. Sapa día Jehová Diosta tukuy sonqo sirvinapaj kallpachakuna. Chayta ruwajtinchej, wañupojtinchejpis Jehová Diosqa kausarichimuwasunpuni.

¹⁸ Jesuspa nisqasninmanta yachakusqanchejman jina ruwana. Chayta ruwaspaqa, Jehová Dios imatachus niwasqanchejta kasukusun. Pay nerqa: “Payta uyariychej”, nispa (Mat. 17:5).