Leejkunaj tapuyninku

¿Imaraykutaj Jesús niraj wañupushaspa Salmo 22:1 versiculota oqharerqa?

Jesusqa niraj wañupushaspa nerqa: “Diosníy, Diosníy, ¿imaraykutaj saqerpariwankiri?”, nispa. Chaytaj Mateo 27:46 versiculopi qhelqasqa kashan. Chayta nispaqa, imatachus David Salmo 22:1 versiculopi nisqanta juntʼasharqa (Mar. 15:34). ¿Jesús llakisqa kasqanraykuchu chayri pisi creeyniyoj kasqanraykuchu chayta nerqa? Mana. Payqa sutʼita yacharqa runasrayku wañunanpuni kasqanta. Chaytataj ruwaytapuni munarqa (Mat. 16:21; 20:28). Chantapis Jesusqa yacharqa enemigosnin payta wañuchishajtinku, Jehovaqa mana payta jarkʼakunanta (Job 1:10). Ajinapunitaj karqa. Jehovaqa mana jarkʼakorqachu Jesusta wañuchishajtinku. Ajinamanta Jesusqa rikucherqa, mayta ñakʼarichejtinkupis manapuni Jehovata wasanchananta (Mar. 14:35, 36).

¿Imaraykutaj Jesús niraj wañupushaspa, 22 Salmomanta wakin palabrasta oqharerqa? Mana sutʼita yachanchejchu. Jinapis qhawarina wakin imasta.a

Jesusqa “Diosníy, Diosníy, ¿imaraykutaj saqerpariwankiri?” nispa, ichapis payta wañuchishajtinku Jehová mana jarkʼakunanta nisharqa. Jesustaqa enemigosnin wañuchishajtinku Jehová mana jarkʼarqachu. Imaraykuchus payqa “tukuy runasrayku” wañunanpuni karqa (Heb. 2:9).

Jesusqa “Diosníy, Diosníy, ¿imaraykutaj saqerpariwankiri?” nispa, ichapis runasta piensarichiyta munasharqa tukuynin 22 Salmopi. Chay tiempopi judiosqa, ashkha salmosta de memoria yachaj kanku. Chayrayku uj salmomanta uj versiculota uyarispa, tukuynin salmota yuyarikoj kanku. Jesustaj ichapis chayrayku chay salmomanta wakin palabrasta oqharerqa. Ajinamanta yachachisqasninta yanaparqa, chay salmopi kaj profeciasta sumajta yuyarikunankupaj (Sal. 22:7, 8, 15, 16, 18, 24). Chantapis chay salmoj tukukuyninpi, Jehovalla tukuy nacionesta kamachej kasqanta nin. Jesuspa yachachisqasnintaj chaytapis yuyarikullarqankutajchá (Sal. 22:27-31).

Jesusqa, “Diosníy, Diosníy, ¿imaraykutaj saqerpariwankiri?”, nispa, ichapis qhasillamanta ñakʼarichishasqankuta rikuchiyta munarqa. Imaraykuchus Jatun Juntamanta kajkunaqa, payta juzganankupaj tutapacha tantakorqanku, nitaj leyesninkuman jinachu juzgarqanku (Mat. 26:59; Mar. 14:56-59). Astawanpis paykunaqa, Diospa contranpi parlashasqanta nispa Jesusta qhasimanta juchacharqanku (Mat. 26:65, 66). Chayrayku Jesusqa ichapis “Diosníy, Diosníy, ¿imaraykutaj saqerpariwankiri?”, nispa, qhasimantapuni ñakʼarichishasqankuta rikuchiyta munarqa.

¿Imaraykutaj Jesús Davidpa nisqan palabrasta oqharillanmantaj karqa? Ichá wajkunata yuyarichiyta munarqa, Davidqa mayta sufrispapis Diospa ñaupaqenpi allinpaj qhawasqallapuni kasqanta. Davidqa mayta sufrispapis sinchʼi creeyniyojllapuni karqa. Imaraykuchus kikin salmollapitaj nerqa, Jehová salvayta atisqanpi atienekusqanta. Jehová Diostajrí payta bendecillarqapuni (Sal. 22:23, 24, 27, 28). ‘Davidpa Wawan’ Jesuswanpis ajinallataj karqa. Jesusqa kʼaspipi clavasqa kashaspa mayta sufrispapis, Diospa ñaupaqenpi allinpaj qhawasqallapuni karqa (Mat. 21:9).

Jesusqa ichapis may llakisqa kasqanrayku “Diosníy, Diosníy, ¿imaraykutaj saqerpariwankiri?”, nispa ninman karqa. Paytaqa enemigosnin ñakʼarichispa wañuchishajtinku, Jehová Dios mana jarkʼarqachu. Jinapis Jesusqa, Jehová Diosta mayta munakusqanta sutʼita rikucherqa. Jesusqa mana sufrinanpajchu, nitaj ñakʼarinanpajchu ruwasqa karqa. Jinapis payqa Adanwan Evawan juchallikusqankurayku kausayninta qonan karqa. Ajinamantataj Satanás imatachus nisqan llulla kasqanta rikucherqa, tukuy runastataj juchamantawan wañuymantawan salvarqa (Mar. 8:31; 1 Ped. 2:21-24). Chayrayku Jehová Diosqa, Wawanta enemigosnin ñakʼarichispa wañuchinankumanta mana jarkʼakorqachu.

¿Imaraykutaj Jesús Davidpa nisqan palabrasta oqharillanmantaj karqa? Ichapis payqa yachachisqasninta yanapayta munarqa, kausayninta imaraykuchus qoshasqanpi piensarinankupaj.b Jesusqa sutʼita yacharqa uj suwa runata jina wañuchisqankoqa, ashkha runasta pantachinanta (1 Cor. 1:23). Chayrayku yachachisqasnenqa sumajta entiendenanku karqa, Jesusqa runasrayku kausayninta qoshasqanta (Gál. 3:13, 14). Ajinamantataj paytaqa, salvajninkuta jina qhawankuman karqa, manataj suwa runata jinachu.

Mana sutʼita yachanchejchu imaraykupunichus Jesús niraj wañupushaspa, “Diosníy, Diosníy, ¿imaraykutaj saqerpariwankiri?”, nispa nisqanta. Jinapis payqa sutʼita yacharqa, Diospa munaynin juntʼakunanpaj ñakʼarinanpuni kasqanta. Chayrayku payqa Davidpa nisqanta oqhariytawan “juntʼakunña”, nispa nillarqataj (Juan 19:30; Luc. 22:37). Jehová Diosqa Wawanta wañuchishajtinku, mana jarkʼakorqachu. Chayrayku Jesusqa kay jallpʼapi Jehovaj kamachisqanta tukuyninta juntʼarqa. Chantapis juntʼallarqataj “Moisespa Leyninpi, Profetaspa qhelqasqankupi, jinallataj Salmospipis” imatachus paymanta nisqanta (Luc. 24:44).