Bautizakunaykipaj, ¿wakichisqañachu kashanki?

 1. ¿Imatataj ruwananchej tiyan uj wasita ruwakuyta munaspa?

WASITA ruwayta munasqanchejpi piensarina. Ichapis imayna wasitachus ruwakuyta munasqanchejta sumajta yachanchej. ¿Allinchu kanman materialesta rantej riytawan, chay rato wasita ruwayta qallarinanchej? Mana, ¿icharí? Niraj uj wasita ruwayta qallarishaspaqa, qolqenchejtaraj qhawarikunanchej tiyan. Ajinamanta yachananchejpaj, wasita tukuchanapaj qolqenchej alcanzawasunchus manachus chayta. Chayta yachaspaqa, ichapis wasita tukuyta atisun.

 2. Lucas 14:27-30 nisqanman jina, ¿imapitaj piensarina kasqa niraj bautizakushaspa?

² Jehová Diosta munakusqaykirayku, agradecekusqaykirayku ima, ichapis bautizakuypi piensarishanki. Jina kajtin, uj wasitapis ruwayta munashawaj jina kashanki. ¿Imaraykutaj chayta ninchej? Imatachus Lucas 14:27-30 (leey) nisqanpi piensariy. Jesusqa chaypi parlasharqa, paypa yachachisqan kayta munajkuna imatachus ruwananku kasqanta. Jesús nisqanman jina, paypa discipulon kayta munajqa, ‘qolqentaraj qhawarikunan’ tiyan. Chayqa niyta munan, discipulosnenqa llakiykunata aguantanankupaj, wakin imasta saqenankupaj ima wakichisqa kananku kasqanta (Luc. 9:23-26; 12:51-53). Chayrayku niraj bautizakushaspa piensarinayki tiyan, Cristoj discipulon kaspa imaynatachus kausanaykipi. Chayta ruwaspaqa, bautizakuytawanpis Diosta tukuy sonqo sirvillankipuni.

 3. ¿Imatá kay yachaqanapi yachakusun?

³ Rikunchej jina, Cristoj discipulon jina kausakoyqa, mana atikullanchu. Jinapis bautizakunaykeqa may allinpuni. Imaraykuchus ashkha bendicionesta japʼinki. Wakin bendicionestaqa kunanña japʼinki, wakintataj astawan qhepaman. Chayrayku kay yachaqanapi, bautismomanta wakin imasta yachakusun. Chaytaj yanapasonqa, bautizakunaykipaj wakichisqañachus manachus kashasqaykita yachanaykipaj.

 4. 1) ¿Imaynatá Diosman kausayninchejta qopunchej? 2) Mateo 16:24 versiculopi ‘noqanchej kikinchejta chejnikunanchejta’ nisqan, ¿imatataj niyta munan?

⁴ ¿Imaynatá Diosman kausayninchejta qopunchej? Niraj bautizakushaspa, Jehová Diosman uj mañakuypi ninchej, payllapajña kausananchejta, wiñaypajtaj sirvinanchejta. Diosman kausayninchejta qopuspaqa, ‘noqanchej kikinchejta chejnikunchej’ (Mateo 16:24 leey). Chayqa niyta munan, Jehová Diospata kananchejpaj, noqanchejmanta qonqakapunanchej kasqanta. Jehová Diospata kaytaj may sumajpuni (Rom. 14:8). Diosman kausayniykita qospaqa, payman ninki: “Kunanmantapacha manaña noqapajchu kausasaj, manaqa qanpa munayniykita ruwanaypaj”, nispa. Jehová Diosqa mana obligawanchejchu chayta ninapaj. Jinapis payqa chayta nejtinchej juntʼananchejta munan (Sal. 116:12, 14).

 5. Diosman kausayninchejta qoywan, bautizakuywan, ¿imapitaj mana kikinchu?

⁵ Diosman kausayninchejta qopuywan, bautizakuywan, ¿imapitaj mana kikinchu? Mana tukuypa rikunankutachu Jehová Diosman kausayninchejta qonchej, manaqa sapallanchejpi chayta ruwanchej. Jinapis bautizakusqanchejtaqa tukuy rikunku. Imaraykuchus uj jatun tantakuypi bautizakunchej. Bautizakuspaqa tukuyman rikuchinki Jehová Diosman kausayniykita qopusqaykitaña.b Chantá rikuchillankitaj, Jehová Diosta tukuy sonqoykiwan munakusqaykita, jinallataj tukuy kausayniykiwan, tukuy yuyayniykiwan, tukuy kallpaykiwantaj. Bautizakuspaqa Jehová Diosta wiñaypaj sirviyta munasqaykita rikuchillankitaj (Mar. 12:30).

6, 7. Kay 1 Pedro 3:18-22 nisqanman jina, ¿imaraykutaj bautizakunapuni tiyan?

⁶ ¿Bautizakunapunichu tiyan? Imatachus 1 Pedro 3:18-22 (leey) nisqanpi piensariy. Imaynatachus Noeqa arcata ruwaspa creeyniyoj kasqanta rikucherqa, ajinallatataj bautizakusqaykeqa Jehová Diosman kausayniykita qopusqaykita rikuchin. Jinapis ichá ninki: “¿Bautizakunaypunichu tiyan?”, nispa. Arí, bautizakunaykipuni tiyan. Apóstol Pedroqa, imaraykuchus chayta ruwana kasqanta willawanchej. Ñaupajtaqa Pedro nerqa: “Bautismomin qankunatapis salvashasunkichej”, nispa. ¿Imaynatá bautizakuy salvakunapaj yanapawanchej? Bautizakunapajqa Jesuspi creenanchej tiyan, jinallataj noqanchejrayku wañusqanpi, kausarimusqanpi, cieloman ripusqanpi, ‘Diospa pañanpitaj kashasqanpi’. Creesqanchejtataj ruwasqanchejwan rikuchinanchej tiyan. Chay jinamanta bautismo salvawanchej.

⁷ Iskay kaj, bautismoqa “llimphu sonqoyoj” kanapaj yanapawanchej. Jehová Diosman kausayninchejta qopojtinchej, bautizakojtinchejtaj, payman chimpapunchej. Juchasninchejmanta tukuy sonqo pesachikojtinchej, Jesús noqanchejrayku wañusqanpitaj creejtinchej, Diosqa juchasninchejta perdonawanchej. Ajinamanta Jehová Diospa ñaupaqenpi llimphu sonqoyoj kanchej.

 8. ¿Imataj bautizakunaykipaj tanqasunan tiyan?

⁸ ¿Imataj bautizakunaykipaj tanqasunan tiyan? Bibliata sumajta estudiaspaqa, imaynachus Jehová Dios kasqanta, imastachus ruwasqantawan yachakorqanki. Chay yachakusqaykitaj, sonqoykiman chayarqa. Sonqoykitaj Jehová Diosta mayta munakunaykipaj aysasorqa. Bautizakunaykipajqa chay munakuy tanqasunan tiyan.

 9. Mateo 28:19, 20 nisqanman jina, “Tata Diospa sutinpi, Wawanpa sutinpi, atiyninpa sutinpiwan” bautizakunanchej tiyan. ¿Imaynatá chayta ruwanchej?

⁹ Bautizakunaykipajqa imastachus Bibliamanta yachakorqanki, chaypi creenayki tiyan. Imatachus Jesús Mateo 28:19, 20 (leey) versiculospi nisqanta yuyarikuna. Chaypi Jesús nerqa, yachachisqasnin kayta munaspaqa “Tata Diospa sutinpi, Wawanpa sutinpi, atiyninpa sutinpiwan” bautizakunanchej kasqanta. Chaytataj ruwanchej, imatachus Biblia Jehová Diosmanta, Wawan Jesusmanta, atiyninmantawan yachachisqanta tukuy sonqo creespa. Chay yachachiykunaqa, manchay atiyniyoj, sonqoyki ukhukamataj chayanman (Heb. 4:12). Qhepan parrafospi chay yachachiykunamanta parlarisun.

10, 11. ¿Imastataj Tata Diosmanta yachakunki?

¹⁰ Imastachus Tata Diosmanta yachakusqaykipi piensariy. Ñaupajtaqa sutin “Jehová” kasqanta yachakorqanki. Yachakullarqankitaj jallpʼantinmanta paylla aswan “Patapi Kaj Dios” kasqanta, kʼata ‘cheqa Diostaj’ kasqanta (Rom. 10:13; Sal. 83:18; Jer. 10:10). Jehová Diosqa tukuy imata ruwarqa, ‘salvacionpis paymanta jamun’ (Sal. 3:8; 36:9). Chantapis Wawanta kachamorqa juchamanta, wañuymantawan kacharichinawanchejpaj. Payqa wiñay kausayta qonawanchejta niwanchej (Juan 17:3). Jehová Diosman kausayniykita qospa bautizakunki chayqa, Jehovaj testigon kasqaykita rikuchinki (Isa. 43:10-12). Chantapis jallpʼantinpi kaj familianman yaykunki. Chay familiaqa payta sirvinku, sutinwan rejsisqa kasqankumanta kusikunku, tukuy sonqotaj runasman paymanta willamunku (Sal. 86:12, 13).

¹¹ Imatachus Biblia Tata Diosmanta yachachisqanta entiendeyqa, may sumajpuni. Chay yachachiykunata japʼikunki chayqa, sonqoykeqa Jehová Diosman kausayniykita qopunaykipaj, bautizakunaykipajtaj aysasonqa.

12, 13. ¿Imastataj Diospa Wawanmanta yachakunki?

¹² Imastachus Diospa Wawanmanta yachakusqaykipi piensariy. Jehová Diospa qhepantaqa, Jesuslla tukuymanta aswan atiyniyoj. Jesusqa Kacharichiwajninchej. Payqa tukuy sonqo kausayninta noqanchejrayku qorqa. Jesús yawarninta jichʼasqanrayku, juchasninchejmanta perdonta tariyta atinchej, Diosman qayllaykuyta atinchej, wiñay kausaytataj suyakuyta atinchej. Chaypajtaj wañuyninpi creesqanchejta ruwasqanchejwan rikuchinanchej tiyan (Juan 3:16). Jesusqa Kuraj kaj Sacerdotenchej. Payqa yanapayta munawanchej, wañuyninnejta salvacionta tarinanchejpaj, Diosman qayllaykunanchejpaj ima (Heb. 4:15; 7:24, 25). Jehová Diosqa Jesusta Gobiernonpi Rey kananpaj churan. Paynejtataj sutinta llimphuchanqa, tukuy llakiykunata chinkachenqa, paraisopitaj ashkha bendicionesta qowasunchej (Mat. 6:9, 10; Apo. 11:15). Jesusqa noqanchej yachakunanchejpaj jina kausarqa (1 Ped. 2:21). Payqa wañupunankama Diospa munayninta ruwarqa, noqanchejpis pay jina ruwananchejpaj (Juan 4:34).

¹³ Imatachus Biblia Jesusmanta yachachisqanta japʼikunki chayqa, Diospa munasqa Wawanta munakunki. Chay munakuytaj Diospa munayninta ruwanaykipaj tanqasonqa, imaynatachus Jesús ruwarqa, ajinata. Chayta ruwaspaqa, Jehová Diosman kausayniykita qopuyta munanki, bautizakunkitaj.

14, 15. ¿Imastataj espíritu santomanta yachakunki?

¹⁴ Imatachus espíritu santomanta yachakusqaykipi piensariy. Espíritu santoqa Diospa atiynin chayri kallpan, manataj dios jinachu. Jehová Diosqa, chay atiyninwan runasta yuyaycharqa Bibliata qhelqanankupaj. Chay atiyllataj noqanchejtapis yanapawanchej, Bibliaj nisqanta entiendenapaj, chayman jinataj kausakunapaj (Juan 14:26; 2 Ped. 1:21). Jehová Diosqa ‘may sumaj atiyninta qowanchej’ (2 Cor. 4:7). Diospa atiynenqa, sumaj willaykunata willanapaj kallpachawanchej. Chantá yanapawanchej juchapi mana urmanapaj, mana anchata phutikunapaj, llakiykunata chayri pruebasta aguantanapaj ima. Chantapis Diospa atiynenqa, Gálatas 5:22, 23 nisqanman jina kausakunapaj yanapawanchej. Diosqa paypi atienekojkunaman, tukuy sonqo mañakojkunamantaj atiyninta mana michʼakuspa qon (Luc. 11:13).

¹⁵ Jehová Diosqa kamachisninta atiyninwan yanapan, payta sirvinankupaj. Chayta yachayqa mayta kallpachawanchej. Imatachus Biblia espíritu santomanta yachachisqanta japʼikojtiyki, sonqoykeqa Diosman kausayniykita qopunaykipaj, bautizakunaykipajtaj tanqasonqa.

16. ¿Imastá kay parrafokama yachakunchej?

¹⁶ Kausayninchejta Diosman jaywapuywan bautizakuywanqa, mana pujllakuy jinachu. Yachakunchej jina, bautizakunapajqa llakiykunata aguantanapaj, wakin imasta saqenapajwan wakichisqa kana tiyan. Jinapis chaymanta nisqaqa, bendicionesqa astawan ashkha. Bautismoqa salvasunkiman, Diospa ñaupaqenpi llimphu sonqoyoj kanaykipajtaj yanapasunkiman. Jinapis astawanqa, Jehová Diosta munakusqaykirayku bautizakunayki tiyan. Chantapis tukuy sonqo creenayki tiyan, imatachus Biblia Jehová Diosmanta, Wawan Jesusmanta, atiyninmantawan yachachisqanta. Tukuy chay imasta yachaspa, ¿imatá niwaj? Bautizakunaykipaj, ¿wakichisqachu kashanki?

17. ¿Imastataj ruwanayki tiyan niraj bautizakushaspa?

¹⁷ Bautizakunaykipaj wakichisqaña kasqaykita yuyanki chayqa, Jehová Diosman qayllaykunaykipaj ashkha imastañachá ruwarqanki.c Bibliata estudiasqaykirayku, Jehová Diosmanta, Jesusmantapis ashkhataña yachakunki. Creeyniykipis yapakunña (Heb. 11:6). Chantapis imastachus Jehová Dios Bibliapi nisqanta creenkiña. Yachankitaj Jesuspa wañuyninpi creespa, juchamanta wañuymantawan kacharichisqa kayta atisqaykita. Chantapis juchasniykimanta pesachikunkiña, nisunman sajra imasta ruwasqaykimanta sonqoykita nanachikunki. Jehová Diosmantapis perdonta mañakunkiña. Chantapis Diosman kutirikunki, nisunman ñaupa kausayniykita saqespa, Diosta kusichinapaj jina kausayta qallarinki (Hech. 3:19). Bibliapi yachakusqaykitataj, tukuyman willariyta munarqanki. Chayrayku ancianoswan parlarerqanki, congregacionwan khuska predicaj llojsinaykipaj. Chay jinamantataj niraj bautizasqa kaspapis, paykunawan khuska predicashankiña (Mat. 24:14). Jehová Diosqa chay tukuy imasta ruwasqaykimanta, mayta kusikun. Paypa sonqonqa mayta qhallallarishan (Pro. 27:11).

18. ¿Imastawan ruwanayki tiyan bautizakunaykipaj?

¹⁸ Bautizakunaykipajqa, wakin imastawan ruwanayki tiyan. Yachakorqanchej jina, kausayniykita Diosman jaywapunayki tiyan. Chaypajtaj sapallaykipi orakuspa, Diosman tukuy sonqo ninayki tiyan payllapajña kausanaykita, munaynintataj ruwanaykita (1 Ped. 4:2). Chantá coordinador jina llankʼaj ancianoman, bautizakuyta munasqaykita willariy. Paytaj wakin ancianosta kamachenqa qanwan parlarinankupaj. Ama manchachikuychu paykunawan parlariytaqa. Chay hermanosqa, rejsisunkuña, munakusunkutaj. Paykunaqa Bibliaj yachachiykunasninta entiendesqaykitachus manachus qhawarenqanku. Chantapis qhawarillanqankutaj, Diosman kausayniykita qopuymanta, bautizakuymantawan, sutʼitachus manachus entiendesqaykita. Chaypajtaj Bibliapi yachakusqaykimanta tapurisonqanku. Sichus ancianos wakichisqaña kasqaykita reparanqanku chayqa, jamoj asambleapi bautizakuyta atisqaykita nisonqanku.

19, 20. ¿Imatá ruwanayki kanqa bautizakuytawan, chanta imataj chaypaj yanapasonqa?

¹⁹ ¿Imatá ruwanayki kanqa bautizakuytawan?d Bautizakushaspaqa Jehová Diosman nerqanki payllapajña kausanaykita. Jehová Diostaj chay nisqaykita juntʼanaykita munan. Chayrayku bautizakuytawanqa, imatachus Jehovaman nerqanki, chayman jina kausanayki tiyan. ¿Imataj chaypaj yanapasonqa?

²⁰ Congregacionmanta ama karunchakuychu. Bautizakuytawanqa jallpʼantinmanta ‘tukuy hermanosman’ ujchaykukunki (1 Ped. 2:17). Congregacionmanta hermanos, hermanaspis familiayki kanqanku. Reunionesman mana faltakuspaqa, paykunaman astawan kʼaskaykunki. Chantapis Diospa Palabranta sapa día leey, chaypitaj tʼukuriy (Sal. 1:1, 2). Bibliamanta uj cheqata leeriytawan, chay leesqaykipi piensariy. Ajinamanta chay palabrasqa sonqoykiman chayanqa. Chantá Diosmanta mana saykʼuspa mañakuy (Mat. 26:41). Jehová Diosmanta tukuy sonqo mañakuspaqa, payman astawan qayllaykunki. Chantapis ‘Diospa Gobiernonta ñaupajta maskʼallaypuni’ (Mat. 6:33). Chaytaqa ruwanki predicacionta kausayniykipi ñaupajman churaspa. Sapa kuti predicajtiykeqa, creeyniyki astawan kallpachakonqa, runastataj wiñay kausayta japʼinankupaj yanapanki (1 Tim. 4:16).

21. Bautizakunki chay, ¿ima bendicionestataj japʼinki?

²¹ Jehová Diosman kausayninchejta qoywan, bautizakuywan ima, ni ima kikinchakunchu. Bautizakunaykipajqa llakiykunata aguantanapaj, wakin imasta saqenapaj ima, wakichisqa kanayki tiyan. Jinapis bautizakunaykeqa may allinpuni. Kay sajra mundopi ima llakiypis “uj tiempollapaj, nitaj imapischu” (2 Cor. 4:17). Bautizakunki chayqa, kay tiempopiña aswan kusisqa kausakunki, jamoj tiempopitaj ‘cheqa kaj kausayta’ japʼinki (1 Tim. 6:19). Chayrayku Diosmanta yanapata mañakuspa, sumajta piensariy bautizakunaykipaj wakichisqañachus manachus kasqaykipi.